San Lucas 5 - DIOSPA QHELQACHISQAN DEUTEROCANONICAL

Ashkha challwata jap'inku

¹ Jesús uj kuti Genesaret qocha kantupi kashajtin, maytapuni runakuna payman k'iskikamorqanku Diospa simi nisqanta uyarinankupaj.

² Chantá Jesús qocha kantupi iskay boteta rikorqa, challwirikunataj botenkumanta llojsispa, challwa jap'ina ch'ipakunata t'ajsasharqanku.

³ Jinapi Jesusqa Simonpa botenman yaykuspa, boteta aswan qocha ukhunejman apananta nerqa. Chay botepi tiyaykuspataj, chaymanta chaypi kajkunaman Diosmanta yachacherqa.

⁴ Chantá yachachiyta tukuspa, Jesusqa Simonta nerqa: Boteykita aswan ukhunejman purichiy, chantá ch'ipaykichejtataj yakuman wijch'uykuychej challwakunata jap'inaykichejpaj, nispa.

⁵ Simontajrí kuticherqa: Yachachej, tukuy tutantin ni uj challwallatapis jap'iykuchu. Chaywanpis, nisqaykiman jina ch'ipata ujtawan wijch'uykusaj, nispa.

⁶ Ajinata ruwaspataj, may chhika challwakunata jap'erqanku, ch'ipankupis llik'ikunayasharqaña.

⁷ Chayrayku waj botepi kaj challwiri masinkuta wajyarqanku, jamuspa yanapanankupaj. Jamojtinkutaj, iskaynin botekunaman challwawan junt'acherqanku, chayraykutaj botekunaqa yakuman chinkaykoj jinaña kasharqanku.

⁸ Chayta rikuytawan, Simón Pedroqa qonqoriykukuspa, Jesusta nerqa: Tukuyta Kamachej, noqamanta ithirikuy, imaraykuchus juchasapa kani, nispa.

⁹ Chay chhika challwakunata jap'isqankurayku, Pedroqa mayta t'ukorqa, jinallataj paywan kajkunapis.

¹⁰ Kikillantataj Zebedeoj churinkuna Santiago, Juanwan t'ukorqanku. Paykuna Pedroj challwiri masinkuna karqanku. Jesustajrí Simonta nerqa: Ama mancharikuychu, kunanmantaqa challwata jap'inaykitaqa runakunata mask'anki qhatinawankupaj, nispa.

¹¹ Chantá chay challwirikuna botenkukunata qocha kantuman aysaytawan, tukuy imata saqerparispa, Jesuswan riporqanku.

Jesusqa llejti onqoyniyojta qhaliyachin

¹² Jesús uj llajtapi kashajtin, llejti onqoyniyoj uj runa payman chimparqa. Jesusta rikuytawantaj, onqosqaqa pampakama k'umuykuspa, mañakorqa: Wiraqochíy, munankichus chayqa, onqoyniymanta qhaliyachiwayta atinki llimphuchasqa kanaypaj, nispa.

¹³ Jesustaj makinwan llankharispa, nerqa: Arí, llimphuchasqa kanaykita munani, llimphuchasqa kay, nispa. Chayta Jesús nejtinkamataj, onqosqa runaqa llejti onqoyninmanta qhaliyaporqa.

¹⁴ Chantá Jesús nerqa: Ama ni piman kayta willankichu. Manachayqa sacerdoteman rispa rikuchikamuy, llimphuchasqa kasqaykimanta jaywanata apaspa, Moisespa kamachisqanman jina. Ajinamanta onqoyniykimanta llimphuchasqa kasqayki yachakonqa, nispa.

¹⁵ Mana tukuyman willarananta Jesús kamacherqa chaypis, Jesuspa ruwasqan tukuynejpi yachakorqa. Chayrayku may ashkha runakuna jamorqanku payta uyarej, jinataj onqoyninkumanta qhaliyachisqa kanankupaj.

¹⁶ Jesustajrí ch'innejman rerqa, Dioswan parlarikunanpaj.

Jesusqa suchu runata puririchin

¹⁷ Uj p'unchay Jesús yachachishajtin, wakin fariseokuna, Diospa kamachisqanmanta yachachejkunawan chaypi tiyasharqanku. Paykuna jamusqanku tukuynin Galilea jap'iymanta, Judea jap'iymanta, Jerusalén llajtamanta ima. Tukuyta Kamachej Diospa atiynintaj Jesuswan kasharqa onqosqakunata qhaliyachinanpaj.

¹⁸ Chaypacha wakin runakuna uj suchu runata phullupi wantumuspa, wasi ukhuman apaykuyta munarqanku Jesuspa ñawpaqenman.

¹⁹ Chaywanpis ni imaynamanta chay wasiman yaykuyta aterqankuchu, chaypi kajkuna ancha k'iski kasqankurayku. Chayrayku wasi pataman wicharispa, wasej qhatanta jusk'orqanku. Chay jusk'unejtataj suchu runata phullunpi Jesuspa ñawpaqenman urayk'ucherqanku.

²⁰ Chay suchu runata apamojkuna paypi atinikusqankuta rikuspa, Jesusqa suchu runata nerqa: Wawqéy, juchaykeqa pampachasqaña, nispa.

²¹ Chantá Diospa kamachisqanmanta yachachejkuna, fariseokunawan ima paykuna ukhupi unanchaspa, nisharqanku: Kay runaqa pi kasqantataj yuyakunri, ajinata Diospa contranta rimananpajri? Dioslla juchata pampachayta atin, nispa.

²² Jesustajrí sonqonpi yacharqapacha imatachus yuyashasqankuta. Chayrayku paykunata taporqa: Imaraykutaj chay jinata yuyashankichejri?

²³ Imataj aswan atikojlla kanman suchu runata ninaypaj: Juchayki pampachasqaña, nispa ninaychu, chayrí: Sayariy, phulluykita oqharispa, ripullay, nispa ninaychu?

²⁴ Yachanaykichejpaj Runaj Churin kay pachapi atiyniyoj kasqanta juchata pampachananpaj kayta nisaj, nispa. Chantá Jesusqa suchu runata nerqa: Qanta niyki: Sayariy, phulluykita oqharispataj, wasiykiman ripuy, nispa.

²⁵ Chantá chay ratopacha chay runaqa paykunaj rikunankuta sayarispa, phullunta oqharerqa. Jinaytawantaj, Diosta yupaychaspa wasinman riporqa.

²⁶ Chaypi kajkunataj t'ukuspa, Diosta jatuncharqanku, mancharisqataj nerqanku: Mana jayk'aj rikusqanchejta kunan rikunchej, nispa.

Jesusqa Leví sutiyoj runata wajyan

²⁷ Chaymanta llojsiytawan, Jesusqa impuesto cobraj uj runa Leví sutiyojta rikorqa. Pay impuestota cobranan chaypi tiyasharqa. Jesustaj payta nerqa: Yachachisqay kanaykipaj, noqawan jamuy, nispa.

²⁸ Levitaj sayariytawan, tukuy imanta saqerpayaspa, Jesuswan puriyta qallarerqa.

²⁹ Chantá Leví wasinpi jatun mikhuyta Jesuspaj wakicherqa, chaypitaj impuestota ashkha cobrajkunawan, wajkunawan ima paywan khuska mikhoj tiyaykorqanku.

³⁰ Chayta rikuspa, fariseokunawan, Diospa kamachisqanmanta yachachejkunawan ima Jesuspa yachachisqankunapaj thutorqanku, nerqankutaj: Imarayku impuestota cobrajkunawan, juchasapakunawan ima mikhunkichej, ujyankichejtajri? nispa.

³¹ Jesustajrí kuticherqa: Mana walej kajkunachu jampikamayojta wajyananku tiyan manachayqa onqosqa kajkunalla.

³² Noqaqa mana cheqan runa kasqankuta yuyakojkunatachu wajyaj jamuni, manachayqa juchasapa kasqankuta reparakojkunata wajyani Diosman kutirikunankupaj, nispa.

Ayunomanta tapukunku

³³ Chaypacha Jesusta nerqanku: Juanpa yachachisqankuna, fariseokunaj yachachisqankunapis ashkha kutita ayunanku, Dioswantaj parlarikunku. Qanpa yachachisqaykikunarí mikhuspalla, ujyaspalla kashanku, nispa.

³⁴ Jesustaj uj rijch'anachinawan paykunaman kuticherqa: Yuyankichejchu casamientoman wajyarisqa kajkuna ayunanankuta chaypi casarakoj kashajtin? Manapuni, icharí?

³⁵ Uj p'unchay chayamonqa, chaypachataj casarakoj manaña paykunawan kanqachu. Chaypachamá ayunanqanku, nispa.

³⁶ Jesús kay rijch'anachinata nillarqataj: Mana pipis mawk'a p'achaman mosoj telawan t'irinmanchu, imaraykuchus mosoj kajqa q'entiykuspa, mawk'ata aswan jatunta llik'inman. Mosoj telataj mawk'a p'achapi millay rikukun.

³⁷ Manallataj pipis mosoj vinota mawk'a qara botaman jich'anmanchu, imaraykuchus mosoj vinoqa poqoykuspa, mawk'a botata phatachinman. Jinapitaj vino jich'akunman, qara botapis usunman.

³⁸ Chayrayku mosoj vinotaqa mosoj qara botamanpuni jich'ana. Jinaqa ni mayqen usonqachu.

³⁹ Pipis unayniyoj vinota ujyaspa, mana munanmanchu mosoj vinotaqa: Unayniyoj vinopuni aswan sumaj, nispa.