San Lucas 4 - DIOSPA QHELQACHISQAN DEUTEROCANONICAL

Kuraj Supayqa Jesusta juchallichiyta munan

¹ Jesusqa Santo Espíritoj kamachiyninpi kashaspa, Jordán mayumanta kutimorqa, Espiritutaj payta ch'innejman pusarqa.

² Chaypeqa tawa chunka p'unchay junt'ata Kuraj Supayqa Jesusta juchallichiyta munarqa. Chay chhika p'unchaypi mana imata mikhusqanraykutaj Jesús yarqhachikorqa.

³ Chantá Kuraj Supayqa Jesusta nerqa: Sichus Diospa Churin kanki chayqa, kay rumita t'antaman tukunanta niy, nispa.

⁴ Jesustajrí kuticherqa: Mana, imaraykuchus Diospa Qhelqachisqanpi nin: Mana mikhunallawanchu runaqa kawsanqa, nispa.

⁵ Chantá Kuraj Supayqa orqo pataman Jesusta pusaspa, uj ñawi ch'irmiypi tukuy kay pachapi suyukunata rikucherqa,

⁶ nerqataj: Kay tukuy suyuta kamachinaykipaj atiyta qosqayki, tukuy kapuyninkutawan, imaraykuchus noqaman qosqa karqa. Chayrayku pimanchus munani, chayman qoyta atini.

⁷ Sichus qan ñawpaqeypi qonqoriykukuspa yupaychawanki chayqa, noqa kay tukuyta qosqayki, nispa.

⁸ Jesustajrí kuticherqa: Manapuni, imaraykuchus Diospa Qhelqachisqanpi nin: Tukuyta Kamachej Diosniykita yupaychanki, paypa munaynillantataj ruwanki, nispa.

⁹ Chaymanta Kuraj Supayqa Jerusalén llajtamanñataj Jesusta pusarqa, Templo patapi sayaykuchispataj, nerqa: Diospa Churinchus kanki chayqa, kay patamantapacha uraman wijch'uykukuy.

¹⁰ Diospa Qhelqachisqanpi nin: Diosqa angelninkunata kachamonqa waqaychasunankupaj, nispa.

¹¹ Chantá nillantaj: Makinkupi jap'isonqanku, ama ima rumipipis chakiykita takakunaykipaj, nispa.

¹² Jesustajrí kuticherqa: Mana, imaraykuchus Diospa Qhelqachisqanpi nillantaj: Ama Tukuyta Kamachej Diosniykita atiniyojchus manachus kasqanta yachariyta munaspa imatapis ruwankichu, nispa.

¹³ Ajinata Kuraj Supay tukuy imata ruwarqa Jesusta juchallichinanpaj. Mana atispataj, Jesusta pachanpi saqerqa, jinataj pisi tiempota chinkarerqa.

Jesús Galileapi Diosmanta willarayta qallarin

¹⁴ Jesusqa Santo Espíritoj kamachiyninpi kashaspa, Galileaman kuterqa. Runakunataj tukuynejpi payllamanta parlasharqanku.

¹⁵ Payqa tantakuna wasikunapi yachacherqa, tukuytaj Jesusta mayta jatunchaj kanku.

Jesús Nazaret llajtapi

¹⁶ Jesusqa Nazaret llajtanman rerqa, maypichus uywasqa karqa, chayman. Judío usunkuman jinataj samarina p'unchaypi tantakuna wasiman yaykorqa, jinaspataj, Diospa Qhelqachisqanta tukuypa uyarinanta ñawirinanpaj sayarerqa.

¹⁷ Ñawirinanpaj payman jaywarqanku Diosmanta ñawpa sut'inchaj Isaiaspa qhelqanta, paytaj mayt'uraspa, kay jina qhelqasqata tarerqa:

¹⁸ Tukuyta Kamachej Diospa Espíritun noqapi kashan, imaraykuchus pay ajllawan sumaj willayta wajchakunaman willanaypaj. Chantá kachamuwan presokunaman kacharichisqa kanankuta willanaypaj, ñawsakunata qhawarichinaypaj, chantá ñak'arichisqa kajkunata qhespichinaypaj.

¹⁹ Jinallataj Tukuyta Kamachej Dios runamanta khuyarikunan wata chayamusqantaña willanaypaj kachamuwan, nispa.

²⁰ Chantá Jesús chay qhelqata mayt'orqa, qhelqata jallch'ajman jaywaytawantaj, tiyaykukorqa. Tukuy chaypi kajkunataj paytapuni qhawasharqanku.

²¹ Jinapi pay parlayta qallarerqa: Imatachus Diospa Qhelqachisqanpi uyarerqankichej, chay kunan p'unchay junt'akushan, nispa.

²² Chay runakuna allinpajpuni Jesusta qhawarqanku, chay jinata parlasqanmantataj t'ukorqanku: Chaywanpis tapunakorqanku: Manachu payqa Josejpa churillan? nispa.

²³ Chantá Jesús kuticherqa: Niwankichejchari kay nisqata: Jampikamayoj, qan kikiykita jampikuy. Aswanqa, ima t'ukunatachus Cafarnaunpi ruwasqaykita uyarerqayku, chayta kay llajtaykipipis ruwallaytaj ari, nispa.

²⁴ Noqatajrí sut'ita niykichej: Diosmanta sut'inchajqa kikin llajtanpi manapuni allinpaj qhawasqachu, nispa.

²⁵ Nillaykichejtaj: Eliaspa tiemponpi ashkha pisichikoj warmisapakuna Israelpi karqanku. Chaypacha kinsa wata sojta killayojta mana pararqachu, chayraykutaj tukuynejpi yarqhay anchapuni karqa.

²⁶ Diostajrí Eliastaqa mana ni mayqen israelita warmisapamanchu kacharqa, manachayqa Sidonpi kaj Sarepta llajtayoj warmisapallaman.

²⁷ Jinallataj Israel suyupeqa Diosmanta sut'inchaj Eliseoj tiemponpi llejtiwan onqosqa ashkha runakuna karqanku. Chaywanpis mana ni mayqenninku qhaliyachisqachu karqa, manachayqa Siria llajtayoj Namanlla, nispa.

²⁸ Jesuspa chay nisqanta uyarispa, tantakuna wasipi tukuy kajkuna sinch'ita phiñarikorqanku.

²⁹ Sayarispataj, llajtamanta jawaman Jesusta aparqanku, ima orqopichus llajta sayarichisqa karqa, chay pataman. Chaymantataj payta qaqaman tanqaykuyta munarqanku.

³⁰ Chaywanpis Jesús paykunaj chawpinkumanta llojsispa, riporqa.

Jesús uj runamanta supayta qharqon

³¹ Chaymanta Jesús Galileapi Cafarnaún llajtaman rerqa, chaypitaj samarina p'unchaypi tantakuna wasipi runakunaman yachacherqa.

³² Chay runakunataj Jesuspa yachachisqanmanta mayta t'ukorqanku, imaraykuchus kasuchikunapaj jina yachacherqa.

³³ Chaypacha tantakuna wasipi supayniyoj uj runa sinch'ita qhaparispa, nerqa:

³⁴ Saqewayku ari. Nazaretmanta Jesús, ima nispa noqaykuwan jap'inakoj jamunki? Noqaykuta chinkachejchu jamunki? Noqa yachani pichus kasqaykita: Qanqa Diospa May Llimphu Ajllakusqan kanki, nispa.

³⁵ Jesustajrí supayta sinch'ita k'amerqa: Ch'in kay, llojsiy chay runamanta, nispa. Jinapi chay supay runakunaj rikunanta chay runata pampaman choqarqa, llojsiytawantaj riporqa, chay runata mana imanaspa.

³⁶ Chaypi tantasqa runakunataj t'ukuspa, ninakorqanku: Imataj kayri? Kay runaqa atiywan, sinch'i kallpawantaj supaykunatapis qharqon, supaykunataj payta kasuspa llojsinku, nispa.

³⁷ Chayrayku Jesusqa may mentasqa karqa tukuy chaynejpi.

Jesusqa Pedroj suegranta qhaliyachin

³⁸ Cafarnaunpi tantakuna wasimanta ripuspa, Jesusqa Simonpa wasinman rerqa. Chaypacha Simonpa suegran sinch'i k'aja onqoywan kasharqa. Chaypi kajkunataj Jesusta mañakorqanku payta qhaliyachinanpaj.

³⁹ Chantá Pedroj suegranman qayllaykuspa, Jesusqa k'aja onqoyninta k'amerqa, warmitaj qhaliyakaporqa. Chay ratopacha jatarimuytawantaj, paykunapaj mikhunata wayk'orqa.

Jesús onqosqakunata qhaliyachin

⁴⁰ Inti yaykuykushajtinña, runakuna imaymana onqoyniyojkunata Jesusman pusamorqanku, paytaj sapa ujta makinwan llankhaykuspa, qhaliyacherqa.

⁴¹ Jinallatataj supaykuna ashkha onqosqakunamanta qhaparispa llojsirarqanku: Qanqa Diospa Churin kanki, nispa. Jesustajrí chay supaykunata k'amispa, ch'inyacherqa, imaraykuchus paykuna yacharqanku pay Diospa kachamusqan Cristo kasqanta.

Jesusqa Galileapi Diosmanta willan

⁴² Sut'iyayta llajtamanta llojsispa, Jesusqa ch'innejman rerqa. Runakunataj payta mask'arqanku tarinankukama, chantá ama ripunanpaj jark'arqanku.

⁴³ Jesustajrí nerqa: Wajkunamanpis Tata Diospa kamachiyninmanta sumaj willayta willamunallaytaj tiyan, imaraykuchus chaypaj kachamusqa kani, nispa.

⁴⁴ Ajinamanta Jesusqa Judea jap'iypi tantakuna wasikunapi Diosmanta willararqa.