San Lucas 24 - DIOSPA QHELQACHISQAN DEUTEROCANONICAL

Jesús kawsarimpun

¹ Semana qallariy p'unchayta chhapu chhapullataraj, chay warmikuna, maypichus Jesús p'ampasqa karqa, chayman rerqanku, sumaj q'apashaj jawinata wakichisqankuta apaspa.

² Chayaspataj, aya p'ampanaj punkunpi wisq'ana jatun rumita tijrasqata tariparqanku.

³ Chayman yaykuspataj, mana Tukuyta Kamachej Jesuspa ayanta tarerqankuchu.

⁴ Jinallapi paykuna t'ukushajtinku, qayllankupi iskay qharikuna rikhurerqanku, lliphipishaj p'achayoj.

⁵ Chay warmikuna mancharikuspa, pampakama k'umuykorqanku. Chay qharikunatajrí paykunata nerqanku: Imaraykutaj kawsashaj runata wañusqakuna ukhupi mask'ashankichejri?

⁶ Payqa manaña kaypichu, wañusqamanta kawsarimpunña. Imatachus nisorqachej Galileallapiraj kashaspa, chay nisqanmanta yuyarikuychej.

⁷ Pay nerqa: Runaj Churintaqa juchasapakunaj makinman jaywaykonqanku, payta cruzman chakatanankupaj. Chaywanpis kinsa p'unchaymanta wañusqakunaj chawpinmanta kawsarimponqa, nispa.

⁸ Chaypacharaj chay warmikuna Jesuspa nisqanmanta yuyarikorqanku.

⁹ Aya p'ampanamanta kutimuspataj, chay tukuyta Jesuspa chunka ujniyoj kuraj kachankunaman, wajkunaman ima willararqanku.

¹⁰ Jesuspa kuraj kachankunaman willajkuna karqanku María Magdalena, Juana, Santiagoj maman María, waj warmikunawan ima.

¹¹ Kuraj kachakunapajrí chay warmikunaj nisqankoqa wampoj thawtisqan jinalla karqa. Chayrayku nisqankuta mana jap'ikorqankuchu.

¹² Chaywanpis Pedro sayarispa, maypichus Jesús p'ampasqa karqa, chay cheqaman usqhayta rerqa. Chay ukhuta qhawaykuspataj, uj cheqapi mayt'una sabanallata rikorqa. Chantá pay ripullarqa chay tukuy imamanta t'ukuspa.

Emausman rina ñanpi

¹³ Kikin p'unchayllataj Jesuspa yachachisqankunamanta iskay risharqanku Emaús sutiyoj ranchoman. Chayqa Jerusalenmanta iskay leguapi jina.

¹⁴ Rej jinataj paykunapura parlasharqanku chay tukuy ima kasqanmanta.

¹⁵ Jinallapi mayta parlaspa rishajtinku, kikin Jesús qayllaykuspa, paykunawan khuska puriyta qallarerqa.

¹⁶ Chaywanpis paykunaj ñawinku chharpuyasqa jina karqa payta mana rejsinankupaj.

¹⁷ Chantá Jesús paykunata taporqa: Imamantapunitaj chay jinata parlashankichejri? Imaraykutaj llakisqa kashankichejri? nispa.

¹⁸ Paykunamanta ujnin kaj, Cleofas sutiyoj kuticherqa: Qanllachá mana yachankichu imachus Jerusalenpi kay p'unchaykunapi kasqanmanta, nispa.

¹⁹ Jesustaj kuticherqa: Imataj karqari? nispa. Chantá paykuna nerqanku: Parlasharqayku imachus Nazaret llajtayoj Jesusta qhatirisqanmanta. Payqa Diosmanta sut'inchaj kaspa, ruwasqanpi, jinataj nisqanpi ima may atiyniyoj karqa Diospa ñawpaqenpi, jinataj tukuy runaj ñawpaqenpipis.

²⁰ Chaywanpis kuraj sacerdotekuna, kurajninchejkuna ima payta presochaspa, wañuchisqa kananpaj juchacharqanku. Chaymantataj payta cruzman chakatacherqanku.

²¹ Noqaykurí yuyasharqayku payqa Israel suyuta kacharichinanta. Kunantaj kinsa p'unchayña pasan chay tukuy ima kasqanmanta.

²² Chay tukuywanpis, noqayku ukhumanta wakin warmikuna mancharichiwarqayku. Chhapu chhaputa, maypichus Jesús p'ampasqa karqa, chay cheqaman risqanku.

²³ Chaywanpis Jesuspa ayanta mana tarispa, chayta willaj kutimorqanku. Willallarqankutaj iskay angelkuna paykunaman rikhurisqankuta, chay angelkunataj nisqanku Jesús wañusqamanta kawsarimusqanta.

²⁴ Noqaykumanta wakinkunapis aya p'ampanaman rillarqankutaj, paykunapis ch'usajllata taripasqanku warmikunaj nisqankuman jina. Jesuspa ayantarí mana rikusqankuchu, nispa.

²⁵ Chantá Jesús nerqa: Ay, chay jina wampu kanaykichejri? Imaraykutaj Diosmanta sut'inchajkunaj tukuy nisqanta mana jap'ikunkichejchuri?

²⁶ Manachu Cristo chay tukuyta ñak'arinanpuni karqa, manaraj jatunchasqa kashaspa? nispa.

²⁷ Chay ratopacha Jesús sut'inchayta qallarerqa, Diospa Qhelqachisqanpi paymanta imatachus nisqanta, Moisespa qhelqasqanmanta qallarispa, Diosmanta tukuy sut'inchajkunaj qhelqasqankumantawan.

²⁸ Mayqen llajtamanchus chay yachachisqakuna risharqanku, chayman chayaspa, Jesusqa aswan karuman rej tukorqa.

²⁹ Paykunatajrí Jesusta jark'arqanku: Noqaykuwan qheparikuy ari. Intipis yaykushanña, ch'isiyamonqañataj, nispa. Jesustaj paykunawan khuska wasinkuman rerqa.

³⁰ Chantá Jesusqa paykunawan mikhunanpaj tiyarikuspa, t'antata jap'erqa. Chantá Diosman pachis nerqa, partiytawantaj, paykunaman jaywarqa.

³¹ Chay kikinpachataj yachachisqakunaj ñawinku kicharikunmanpis jina paykuna Jesusta rejsikaporqanku. Paytajrí ñawpaqenkumanta ujllata chinkarerqa.

³² Jinapi paykuna ninakorqanku: Manachu sonqonchej k'ajarerqa ñanpi parlashawajtinchej, Diospa Qhelqachisqanpa nisqantataj sut'inchashawajtinchej? nispa.

³³ Chantá chay ratopacha jatarispa, paykuna Jerusalenman kutirerqanku. Chaypitaj Jesuspa chunka ujniyoj kuraj kachankunata tariparqanku, paykunawan khuska kajkunatawan.

³⁴ Chay kuraj kachakunataj nisharqanku: Cheqapuni Tukuyta Kamachej Jesusqa wañusqamanta kawsarimpusqa. Simonmanpis rikhurillasqataj, nispa.

³⁵ Chantá chay iskay yachachisqakunapis willallarqankutaj imaynatachus Jesús paykunawan ñanpi kasqanta, imaynatatajchus t'antata partishajtin, payta rejsikapusqankuta ima.

Jesús yachachisqankunaman rikhurin

³⁶ Paykuna chay imakunamanta parlashanankukama, Jesusqa chawpinkupi rikhurispa, paykunata napaykorqa: Diospa sonqo tiyaykuynin qankunawan kachun, nispa.

³⁷ Jinapi paykuna manchariywan musphaspa, yuyarqanku uj almata rikushasqankuta.

³⁸ Jesustajrí paykunata nerqa: Imaraykutaj mancharikunkichej, sonqoykichejpitaj iskayrayashankichejri?

³⁹ Qhawariychej makiyta, chakiyta ima. Noqa kikiy kani. Llankhawaychej, allintataj qhawawaychej, imaraykuchus almaqa mana aychayojchu, nitaj tulluyojchu, noqajta rikushankichej jina.

⁴⁰ Chayta nispataj, Jesús makinta, chakinta ima paykunaman rikucherqa.

⁴¹ Paykunarí kusiywan t'ukuspa, manaraj pay kasqanta creerqankuchu. Chantá Jesús paykunata nerqa: Manachu ima mikhunapis kaypi tiyapusunkichej? nispa.

⁴² Paykunataj uj chhikan challwa kankasqata jaywarqanku.

⁴³ Chayta jap'ikuspataj, Jesusqa paykunaj ñawpaqenkupi chayta mikhorqa.

⁴⁴ Chaymantataj nerqa: Imachus noqata kunankama qhatiriwarqa, chay tukuy ima kananta willarqaykichejña qankunawan kashaspa. Imaynatachus noqamanta willan Moisespa kamachisqanpi, jinataj Diosmanta sut'inchajkunaj qhelqasqankupi, chantá Salmokunapi qhelqasqa kashan, chay tukuy ima junt'akunan karqa, nispa.

⁴⁵ Chantá Jesús Diospa Qhelqachisqanta sut'incharqa yachachisqankuna allinta entiendenankupaj.

⁴⁶ Pay nillarqataj: Ajinata Diospa Qhelqachisqanpi nin, Cristoqa jinatapuni ñak'arinanta, chantataj wañusqakuna chawpimanta kinsa p'unchayninman kawsarimpunanta.

⁴⁷ Chantá Jerusalenpi qallarispa, payta qhatikojkuna Jesuspa sutinpi tukuy runaman willananku karqa Diosman kutirikunankuta, ajinamanta Dios juchankuta pampachananpaj.

⁴⁸ Qankunataj chay tukuy rikusqaykichejmanta testigo jina willaramunaykichej tiyan.

⁴⁹ Noqataj, Tata Diosniy pitachus kachamusunaykichejta nerqa, chayta kachamusqaykichej. Chaykamarí, Jerusalén llajtapi qhepakuychej, janaj pachamanta atiywan kallpachasqa kanaykichejkama, nispa.

Jesús janaj pachaman ripun

⁵⁰ Chaymanta Jesusqa yachachisqankunata Jerusalén llajtamanta jawaman pusarqa Betaniakama. Chaypitaj makinta oqharispa, paykunata samincharqa.

⁵¹ Paykunata saminchashaspataj, Jesús paykunamanta karunchakorqa, janaj pachamantaj oqharisqa karqa.

⁵² Paykunataj Jesusta yupaychaspa, may kusisqa Jerusalenman kutiporqanku.

⁵³ Chaymantataj sapa p'unchay Temploman rispa, Diosta yupaycharqanku.