San Lucas 23 - DIOSPA QHELQACHISQAN DEUTEROCANONICAL

Jesusta Pilatoman pusanku

¹ Chantá juntamanta tukuy kajkuna Jesusta Pilatoman pusarqanku.

² Chaypitaj Jesusta ch'ataykuyta qallarerqanku: Kay runataqa runakunata ch'ajwachishajta taripayku, imaraykuchus nin kuraj kamachej Cesarman impuestota mana paganata. Nillantaj pay Diospa kachamusqan Cristo kasqanta, jinallataj kuraj kamachej jina kamachinanta, nispa.

³ Chantá Pilatoqa Jesusta taporqa: Qanchu judiokunaj kuraj kamachejninku kanki? nispa. Jesustaj kuticherqa: Arí, qan ninki, nispa.

⁴ Jinapi Pilatoqa kuraj sacerdotekunaman, runakunaman ima nerqa: Mana ni ima mana allin ruwasqanta paypi tarinichu, payta juchachanaypaj jinaqa, nispa.

⁵ Paykunatajrí nishallarqankupuni: Payqa yachachisqanwan runakunata ch'ajwachishan, Galileamanta qallarispa Judeakama, nispa.

Jesusqa Herodespa ñawpaqenpi

⁶ Pilato chayta uyarispa, taporqa: Kay runa Galileamantachu? nispa.

⁷ Galileamanta Jesús kasqanta yachaspataj, Pilato kuraj kamachej Herodespaman payta pusacherqa, imaraykuchus Herodes chaypacha Jerusalenpi kasharqa.

⁸ Herodesqa Jesusta rikuspa, mayta kusikorqa, imaraykuchus unayña payta rejsiyta munarqa, paymanta parlajta uyarisqanrayku. Herodes munallarqataj Jesusta ima t'ukuna imallatapis ruwajta rikuyta.

⁹ Chayrayku Herodes Jesusta tukuy imamanta taporqa, paytajrí mana imatapis kuticherqachu.

¹⁰ Chaypi kashallarqankutaj kuraj sacerdotekuna, Diospa kamachisqanmanta yachachejkuna ima, paykunataj Jesusta ch'ataykushallarqankupuni.

¹¹ Chantá Herodeswan, soldadonkunawan ima Jesusta k'umuykachachiyta qallarerqanku, alqochakuyta munaspataj, kuraj kamachejta jina sumaj p'achawan p'achallicherqanku. Chaymantataj Herodes watej Pilatoman Jesusta pusacherqa.

¹² Chay p'unchaypitaj Pilatowan Herodeswanqa phiñanasqa kasqankumanta allinyakaporqanku.

Jesusta wañunanpaj juchachanku

¹³ Chaypacha Pilatoqa kuraj sacerdotekunata, kamachejkunata, tukuy runata ima tantacherqa.

¹⁴ Paykunatataj nerqa: Kay runata pusamuwarqankichej runa ch'ajwachejta jina. Jinapis ñawpaqeykichejpi tapusqayman jinaqa tarini imamantachus ch'ataykusqaykichejmanta mana juchayoj kasqanta.

¹⁵ Nillataj Herodespis juchayoj kasqanta tarinchu, chayraykutaj payta kutichimullantaj. Kayta yachaychej: Kay runaqa mana imatapis ruwanchu wañuchisqa kananpaj jinaqa.

¹⁶ Chayrayku payta jasut'ichisaj, chaymantataj kacharipusaj, nispa.

¹⁷ Sapa Pascua raymipi Pilato uj presota kachariyta yachajpuni.

¹⁸ Chayta yachaspa, tukuyninku ujllata qhapariyta qallarerqanku: Jesús wañuchisqa kachun, Barrabastataj kacharipuy, nispa.

¹⁹ Barrabasta presochasqanku, runakunata tantaykuspa romano kamachejpa contranta oqharikusqanmanta, runata wañuchisqanmanta ima.

²⁰ Chaywanpis Pilatoqa ujtawan parlarqa, Jesusta kacharipuytapuni munaspa.

²¹ Runakunatajrí kutin kutinta qhaparerqanku: Cruzman chakatasqa kachun, nispa.

²² Kinsa kutikama Pilatoqa nerqa: Chantá, imatapunitaj ruwarqari? Mana imatapis ruwanchu wañuchisqa kananpaj jinaqa. Chayrayku Jesusta jasut'ichisaj, chaymantataj kacharipusaj, nispa.

²³ Chay runakunarí qhaparillarqankupuni, Jesús cruzman chakatasqa kananpaj. Chantá chay jinatapuni qhaparisqankuwan imatachus munasqankuta tarerqanku.

²⁴ Chayrayku Pilato kamacherqa paykunaj mañasqankuman jina ruwasqa kananta.

²⁵ Jinallataj mañasqankuman jina Barrabasta kachariporqa, pichus carcelpi karqa kamachejpa contranta oqharikusqanmanta, runata wañuchisqanmanta ima, chayta. Jesustatajrí soldadokunaman jaywaykorqa runakunaj munasqankuta ruwanankupaj.

Jesusta cruzman chakatanku

²⁶ Chay soldadokuna Jesusta cruzman chakatanankupaj pusashaspa, Cirenemanta Simón sutiyoj runawan tinkukorqanku, campomanta jamushajtin. Jinapitaj paywan cruzta lijrachispa, Jesuspa qhepanta apacherqanku.

²⁷ Chaypacha ashkha runakuna Jesuspa qhepanta risharqanku, chaykuna ukhupitaj warmikuna Jesusrayku mayta waqasharqanku, qhaparisharqanku ima.

²⁸ Jinapi Jesús chay warmikunata qhawarispa, nerqa: Jerusalenmanta warmikuna, ama noqamanta waqaychejchu, manachayqa qankunamanta waqaychej, wawaykichejkunamantawan.

²⁹ Chayta niykichej, imaraykuchus jamoj p'unchaykunapi nenqanku: Kusikuyniyojmin kanku mana wawayoj kayta atej warmikuna. Jinallataj kusikuyniyoj kanku, pikunachus mana wawata paqarichikunkuchu, nitaj wawata ñuñuchinkuchu, chaykuna, nispa.

³⁰ Chaypachallataj runakuna orqokunata nenqanku: Pataykuman urmaykamuwayku, nispa. Lomakunatataj nenqanku: P'ampaykuwayku, nispa.

³¹ Sichus q'omer sach'awan kay jinata ruwanku chayqa, imatapunitaj ruwankuman ch'aki sach'awanri? nispa.

³² Chay soldadokunaqa iskay suwakunatawan pusallarqankutaj paykunapis Jesús jina cruzman chakatasqa kanankupaj.

³³ T'ojlu moqo nisqa cheqaman chayaytawantaj, Jesustaraj cruzman chakatarqanku. Chaymantataj chay iskay suwakunatapis cruzman chakatallarqankutaj, ujninta Jesuspa pañanman, ujnintataj lloq'enman.

³⁴ Chaymanta qhepamantaj Jesús nerqa: Tatáy, juchankuta pampachay, imaraykuchus mana yachankuchu imatachus ruwasqankuta, nispa. Chaykamataj soldadokuna suerteta choqaspa, Jesuspa p'achanta rak'inakorqanku.

³⁵ Chaypi kajkunaqa Jesusta qhawasharqanku, judío kurajkunataj asikuspa, ninakorqanku: Pay wajkunata qhespicherqa. Kunantajrí pay kikin qhespichikuchun, sichus cheqamanta Diospa ajllasqan Cristo kanman chayqa, nispa.

³⁶ Chaypi kaj soldadokunapis Jesusmanta alqochakullarqankutaj, qayllaykuspataj, k'allku vinota jaywarqanku.

³⁷ Nerqankutaj: Sichus qan judiokunaj kuraj kamachejninku kanki chayqa, qan kikiykita qhespichikuy, nispa.

³⁸ Jesuspa cruzninpi, uman patanejpi kay jina qhelqasqa karqa: Kayqa Judiokunaj Kuraj Kamachejninku, nispa.

³⁹ Jinallapi Jesuswan cruzman chakatasqallataj karqanku chaykunamanta ujnin kaj suwaqa Jesusta turiyaspa, nerqa: Qanchus Cristo kanki chayqa, qan kikiykita qhespichikuy. Noqaykutapis qhespichillawaykutaj, nispa.

⁴⁰ Ujnin kajrí chay rimajta k'amerqa: Qanpis pay jina wañunaykipaj juchachasqa kashaspa, manachu Diosta manchachikunki?

⁴¹ Noqanchejqa juchanchejrayku kaypi kashanchej, imaraykuchus millay ruwasqanchejmanta ñak'arishanchej. Payrí mana ima sajratapis ruwarqachu, nispa.

⁴² Chantá chay suwaqa Jesusta nerqa: Noqamanta yuyarikuway, maypachachus kamachiyta qallarinki chaypacha, nispa.

⁴³ Jesustaj kuticherqa: Kayta sut'itapuni niyki: Kunanpacha may kusiy cheqapi noqawan khuska kanki, nispa.

Jesús wañun

⁴⁴ Chawpi p'unchay jinaña karqa. Chantá tukuy chay cheqaqa laqhayaykorqa kinsa kaj phanikama.

⁴⁵ Intitaj laqhayaykorqa. Chaypachallataj Templopi jatun velo ujllata iskayman llik'irparikorqa.

⁴⁶ Jinapi Jesusqa sinch'ita qhaparerqa: Tatáy, makiykiman kawsayniyta jap'ichikamuyki, nispa. Chayta nispataj, Jesús wañuporqa.

⁴⁷ Chantá soldadokunaj capitanninku chayta rikuspa, Diosta jatuncharqa: Kay runaqa cheqan runapuni karqa, nispa.

⁴⁸ Chaypi kaj tukuy runakuna chayta rikusqankumanta qhasqonkuta takakuspa, riraporqanku.

⁴⁹ Chaywanpis, pikunachus Jesusta tukuy rejsejkuna, Galileamanta paywan khuska jamoj warmikuna ima karullamanta chay tukuyta qhawasharqanku.

Jesusta p'ampanku

⁵⁰ Chaypitaj José sutiyoj uj runa karqa, Judeapi Arimatea llajtamanta. Pay k'acha runa karqa, cheqantaj, jinataj judiokunaj Jatun Juntankumanta ujnin.

⁵¹ Kay Joseqa mayta suyasharqa Dios kamachiyta qallarinanta. Paytaj mana khuskachakorqachu kurajkuna imatachus Jesusmanta yuyasqankuwan, nitaj ruwasqankuwanpis.

⁵² Chantá José Pilatoman rispa, Jesuspa ayanta p'ampananpaj mañarqa.

⁵³ Jinapi cruzmanta ayata urayk'uchimuspa, sabanawan mayt'uykorqa, jinaytawantaj chhankapi ruwasqa aya p'ampanaman churaykorqa, maypichus manaraj pitapis p'ampasqankuchu, chayman.

⁵⁴ Chaypacha Pascua raymipaj wakichina p'unchay karqa, samarina p'unchaytaj qallarisharqaña.

⁵⁵ Galileamanta Jesuswan jamoj warmikunapis rillarqankutaj, maypichus Jesús p'ampasqa karqa, chay cheqata rikoj, ajinamanta yachanankupaj maymanchus Jesuspa ayanta churasqankuta.

⁵⁶ Chantá wasinkuman kutirispa, chay warmikuna sumaj q'apashaj jawinakunata wakicherqanku. Jinaytawantaj, kamachisqaman jina samarikorqanku, samarina p'unchay kasqanrayku.