San Lucas 22 - DIOSPA QHELQACHISQAN DEUTEROCANONICAL

Jesusta wañuchinankupaj yachachinakunku

¹ Mana Levadurayoj T'anta Mikhuna, Pascua sutiyoj raymiman qayllaña karqa.

² Chantá kuraj sacerdotekuna, Diospa kamachisqanmanta yachachejkuna ima mask'asharqanku imaynamantachus Jesusta wañuchichinankuta. Chaywanpis runakunata manchachikorqanku.

³ Chantá Supay Satanasqa Judas Iscarioteman yaykorqa, pichus Jesuspa chunka iskayniyoj kuraj kachankunamanta ujnin karqa, chayman.

⁴ Jinapi Judasqa kuraj sacerdotekunawan, chantá Templota qhawajkunaj kamachejninkukunawan parlamorqa, imaynatachus Jesusta jap'ichinanmanta.

⁵ Paykunataj kusikuspa, Judasman qolqeta qonankupaj parlarqanku.

⁶ Chaymantapachataj Judas mask'ayta qallarerqa, imaynamantachus runaj mana rikusqallanta Jesusta jap'ichinanpaj.

Jesús Pascua mikhuyta mikhun

⁷ Mana Levadurayoj T'anta mikhuna raymi chayamorqa, maypachachus Pascua corderota wañuchej kanku, chaypacha.

⁸ Chantá Jesusqa Pedrota, Juantawan kachaspa, nerqa: Rispa, Pascua mikhunata wakichimuychej, khuska mikhunanchejpaj, nispa.

⁹ Paykunataj taporqanku: Maypitaj munanki wakichinaykutari? nispa.

¹⁰ Jesustaj kuticherqa: Llajtaman yaykushaspa, tinkukunkichej p'uñupi yakuta apashaj runawan. May wasinmanchá yaykonqa, chaykama payta qhatinkichej.

¹¹ Chay wasiyojmantaj ninkichej: Yachachejniyku nichimusunki: Maypitaj cuarto kashan, yachachisqaykunawan Pascua mikhunata mikhunaykupajri? nispa.

¹² Chantá wasiyojqa alto patapi k'uchunchasqa jatun cuartota rikuchisonqachej, chaypitaj tukuy imata Pascua mikhunata mikhunanchejpaj wakichinkichej, nispa.

¹³ Paykuna rispa, imaynatachus Jesús nisqanman jina tarerqanku, chaypitaj Pascua mikhunata wakicherqanku.

¹⁴ Mikhuna phani chayamojtin, Jesusqa kuraj kachankunawan khuska mikhunanpaj tiyaykorqa.

¹⁵ Jinapi pay nerqa: Manaraj ñak'arishaspa, noqa maytapuni kay Pascua mikhunata qankunawan mikhuyta munarqani.

¹⁶ Noqataj niykichej: Manaña ujtawan Pascua mikhunata qankunawan mikhusajchu, Diospa kamachiyninpi chay junt'akunankama, nispa.

¹⁷ Chantá Jesús copata oqharispa, Diosman pachis niytawan, nerqa: Sapa ujniykichej kay copamanta ujyaychej.

¹⁸ Nillaykichejtaj: Manaña uva poqoymanta ujtawan ujyasajchu Dios kamachiyta qallarinankama, nispa.

¹⁹ Chaymanta, t'antatañataj oqharispa, Diosman pachis nerqa, paykunaman jaywaspataj, nerqa: Kayqa ukhuymin, mayqenchus qankunarayku qosqa kanqa. Kay jinata ruwaychej noqamanta yuyarikunaykichejpaj, nispa.

²⁰ Jinallatataj mikhojtinkukama, Jesús vinoyoj copata oqharispa, nerqa: Kay copapi vinoqa yawarniywan ninakun, chaywantaj Dios qankunawan mosoj tratota ruwan, chaytaj qankunarayku jich'asqa kanqa.

²¹ Chaywanpis, pichus wasanchawaspa awqayman jaywaykuwajqa kunan noqawan khuska mikhushan.

²² Kayta sut'ita niykichej: Runaj Churin wañunanpuni tiyan, kamachisqa kasqanman jina. Chaywanpis ay, chay runamanta, pinejtachus jap'ichisqa kanqa, chaymanta, nispa.

²³ Chantá Jesuspa yachachisqankuna paykunapura tapunakuyta qallarerqanku, mayqenchus paykunamanta chayta ruwaj kanman, chaymanta.

Pitaj aswan kurajpaj qhawasqa kanman?

²⁴ Chantá Jesuspa kuraj kachankuna siminakuyta qallarerqanku mayqenninkuchus aswan kurajpaj qhawasqa kanankumanta.

²⁵ Jesustajrí nerqa: Kuraj kamachejkunaqa suyukunata kamachishaspa, chay llajtayojkunata munayninkuman jina apaykachanku. Chaywanpis paykuna allin ruwajkuna, nispa sutichachikunku.

²⁶ Qankuna ukhupirí mana ajinachu kanqa. Manachayqa qankunamanta pichus kuraj kayta munajqa sullk'a jinalla kachun, kamachej kayta munajtaj kamachi jinalla kachun.

²⁷ Chantapis mayqentaj aswan kurajpaj qhawasqa kanmanri: Mesapi tiyaspa qarachikojchu, chayrí mikhunata qarajchu? Manachu mesapi tiyaykuspa mikhunata qarachikoj kurajpaj qhawasqa kanman? Chaywanpis noqa yachachejniykichej kaspa, qankuna ukhupi mikhunata jaywaj jinalla kashani.

²⁸ Noqata mana allinkuna qhatirishawajtin, qankunaqa noqallawanpuni karqankichej.

²⁹ Chayrayku imaynatachus Tatay kuraj kamachej kanaypaj noqata churawarqa, ajinallatataj noqa qankunatapis churaykichej kamachejkuna kanaykichejpaj.

³⁰ Ajinamanta noqa kamachishajtiy, qankuna noqawan mikhunkichej, ujyankichejtaj ima. Jinallataj kamachina tiyanapi tiyaykunkichej Israelpa chunka iskayniyoj jatun ayllunkunata juzganaykichejpaj, nispa.

Jesús nin Pedro payta qhesachananta

³¹ Jesús nillarqataj: Ay, Simón, Supay Satanasqa munan qankunata trigota jina trillaspa wayrachiyta.

³² Noqarí qanpaj mañapuyki, mana llawch'iyaspa noqapi atinikunaykipaj. Chayrayku maypachachus noqaman kutirimunki chaypacha, wawqe masiykikunata sinch'ita sayanankupaj kallpachay, nispa.

³³ Simontaj kuticherqa: Kamachejníy, qanwanqa mana carcelllamanchu rinaypaj wakichisqa kani, astawanqa wañunaypajpis, nispa.

³⁴ Jesustajrí kuticherqa: Pedro, ujta nisqayki: Manaraj gallo waqashajtin, qanqa kinsa kutitapuni ninki mana rejsiwasqaykita, nispa.

Ñak'ariy chayamunanmanta

³⁵ Chantá Jesús paykunata taporqa: Maypachachus sumaj willayta willaramojta kacharqaykichej mana qolqeyojta, mana wayaqayojta, nitaj waj juk'utayojta chaypacha, imallapis pisisorqachejchu? nispa. Paykunataj kuticherqanku: Mana imapis pisiwarqaykuchu, nispa.

³⁶ Jesús nillarqataj: Kunantajrí, qolqeykichej kajtenqa, apakuychej, jinallataj wayaqaykichejtapis. Mana espadayojpis qhatanan p'achanta vendespa, espadata rantikuchun.

³⁷ Noqa niykichej: Diospa Qhelqachisqanpi kay qhelqasqa noqapiraj junt'akunan tiyan: Payqa juchasapakunawan yupasqa karqa, nispa. Ajinaqa noqamanta imachus qhelqasqa kaj junt'akunanpuni tiyan, nispa.

³⁸ Chaypacha paykuna nerqanku: Tukuyta Kamachej Jesús, iskay espadakuna tiyapuwayku, nispa. Paytaj kuticherqa: Chaylla kachun, nispa.

Jesús Getsemanipi Dioswan parlarikun

³⁹ Jesuswan, kuraj kachankunawan ima altopata wasimanta llojsispa, Olivos orqoman rerqanku yachasqa kasqankuman jina.

⁴⁰ Jaqayman chayajtinkutaj, Jesús paykunata nerqa: Diosmanta mañakuychej juchallinaman tanqasqa kaspa ama kasunaykichejpaj, nispa.

⁴¹ Chantá Jesús paykunamanta karunchakorqa uj rumi choqayman jina, chaypi qonqoriykukuspataj, Diosmanta mañakorqa:

⁴² Tatáy, munankichus chayqa, noqamanta karunchay, imatachus ñak'arinay kashan, chayta. Chaywanpis ama noqaj munaynillay kachunchu, manachayqa qanpa munayniyki ruwasqa kachun, nispa.

⁴³ Jinallapi janaj pachamanta uj ángel rikhurimorqa Jesusta kallpachananpaj.

⁴⁴ Anchatañapuni ñak'arishaspataj Jesús aswan sinch'ita Dioswan parlarqa, jump'iynintaj jatuchaj yawar sut'uy jina pampaman sut'orqa.

⁴⁵ Chantá Dioswan parlasqanmanta sayarispa, Jesús yachachisqankunaman kutirerqa, paykunatataj puñushajta tariparqa, sinch'i llakisqa kasqankurayku.

⁴⁶ Chantá Jesús nerqa: Imaraykutaj puñushankichejri? Sayariychej, Diosmanta mañakuychej juchallinaman tanqasqa kaspa ama kasunaykichejpaj, nispa.

Jesusta presochanku

⁴⁷ Jesús parlashajtillanraj, ashkha runakuna chayamorqanku, ñawpaqenkutataj ujnin kuraj kachan, Judas sutiyoj jamusharqa. Paytaj qayllaykuspa, Jesusta uyanpi much'aykorqa.

⁴⁸ Jesustajrí nerqa: Judas, ujta much'aykuspachu Runaj Churinta jap'ichinki? nispa.

⁴⁹ Jinapi Jesuswan kajkuna imachus kananta yachaspa, taporqanku: Tukuyta Kamachej Jesús, espadawanchu qonakusqayku? nispa.

⁵⁰ Paykunamanta ujnintaj espadawan wajtaspa, kuraj kaj sacerdotej kamachinpa paña ninrinta qholurparerqa.

⁵¹ Jesustajrí nerqa: Amaña jinaychejchu, nispa. Jinapitaj chay kamachejpa ninrinta llankhaykuspa, qhaliyacherqa.

⁵² Jesuspa contranpi jamojkuna ukhupi karqanku kuraj sacerdotekuna, Templota qhawajkunaj kamachejninkuna, waj kurajkuna ima. Jesustaj paykunata nerqa: Espadayoj, k'aspiyoj ima noqata jap'ej jamusqankichejqa suwapis kayman jina.

⁵³ Sapa p'unchay qankunawan Templopi kashajteyqa, mana jap'iwarqankichejchu. Chaywanpis kunanqa ruwanaykichej phani chayamun, jinallataj laqhayaypa atiynin kallpawan oqharikun, nispa.

Pedroqa Jesusta mana rejsejman tukun

⁵⁴ Jesusta presochaspa, chay runakuna kuraj kaj sacerdotej wasinman payta pusarqanku. Pedrotaj karu qhepallanta risharqa.

⁵⁵ Chantá Jesusta presochajkuna chawpi patiopi ninata jap'ichispa, muyuyninman tiyaykorqanku. Chaypi Pedropis tiyaykullarqataj paykunawan khuska.

⁵⁶ Jinallapi uj sipas kamachi Pedrota nina qayllapi tiyashajta rikuytawan, allinta qhawarispa, nerqa: Kay runapis Jesuswan kasharqa, nispa.

⁵⁷ Pedrotajrí nerqa: Mana payta rejsinichu, nispa.

⁵⁸ Qhepatataj wajñataj Pedrota rikuspa, nerqa: Qanpis paykunamanta kanki, nispa. Pedrotajrí kuticherqa: Mana paykunamantachu kani, nispa.

⁵⁹ Chantá tumpamantawan wajñataj nerqa: Kay runapis Jesuswanpuni karqa, imaraykuchus paypis Galileamanta, nispa.

⁶⁰ Jinapi Pedroqa nerqa: Uyariway, manapuni yachanichu imatachus nisqaykita, nispa. Pedro chayta nisqantawankamataj, gallo waqarqa.

⁶¹ Jinallapi Tukuyta Kamachej Jesús kutirikuspa, Pedrota qhawarerqa. Pedrotaj yuyarikorqa paypa nisqanmanta: Manaraj gallo waqashajtin, kinsa kutita ninki mana rejsiwasqaykita, nispa.

⁶² Patiomanta jawaman llojsispataj, Pedro sonqo nanayta waqarikorqa.

Jesusmanta alqochakunku

⁶³ Chantá Jesusta qhawaj soldadokuna paymanta alqochakusharqanku, sajmasharqankutaj.

⁶⁴ Ñawinta qhataykuytawantaj, uyanpi laq'arqanku, chantataj taporqanku: Sut'inchawayku: Pitaj sajmasorqa? nispa.

⁶⁵ Paymanta alqochakuspataj, imaymanatawanraj nerqanku.

Jesús Jatun Juntaj ñawpaqenpi

⁶⁶ Sut'iyamojtenqa, kurajkuna, kuraj sacerdotekuna, Diospa kamachisqanmanta yachachejkuna ima Jatun Juntapi tantakorqanku. Chantá Jesusta chay juntaman pusachimuspa, taporqanku:

⁶⁷ Sichus Diospa kachamusqan Cristo kanki chayqa, sut'ita niwayku, nispa. Jesustaj kuticherqa: Nisqaykichejchus chayqa, mana nisqayta jap'ikunkichejchu.

⁶⁸ Imamantapis tapojtiy, manallataj kutichiwankichejchu.

⁶⁹ Chaywanpis, kunanmantapacha Runaj Churenqa Tukuy Atiyniyoj Diospa pañanpimin tiyaykukonqa, nispa.

⁷⁰ Chaymanta tukuyninku taporqanku: Chantá qan Diospa Churinchu kanki? nispa. Paytaj kuticherqa: Arí, qankuna ninkichej, nispa.

⁷¹ Chayta uyarispa, paykunapura ninakorqanku: Imapajña astawan testigokunata munasunmanri? Noqanchej kikinchej paypa siminmanta chayta uyarinchej, nispa.