San Lucas 21 - DIOSPA QHELQACHISQAN DEUTEROCANONICAL

Wajcha warmisapa Diosman qolqeta qon

¹ Uj kuti Jesús Temploj pationpi kashaspa, qhawasharqa imaynatachus qhapajkunaqa Diospaj qolqeta apamusqankuta qolqe churanaman churashasqankuta.

² Rikullarqataj uj wajcha warmisapatapis iskay phatallata churaykojta.

³ Chantá Jesús nerqa: Kayta sut'ita niykichej: Kay wajcha warmisapaqa tukuy runamanta nisqaqa astawan ashkhata churan.

⁴ Chayta niykichej, imaraykuchus chay ujkuna puchoj qolqellankumanta Diosman qonku. Kay warmisaparí wajcha kayninpi tukuy kapusqanta churaykun.

Templo thuñisqa kananmanta

⁵ Wakinkuna parlasharqanku Temploqa k'acha sumachaj rumikunawan ruwasqa kasqanmanta, jinallataj may k'achitu k'achanchasqa kasqanmantawan ima. Jesustajrí paykunata nerqa:

⁶ Jamoj p'unchaykunapirí kay tukuy ima rikusqaykichej thuñisqa kanqa, manataj uj rumillapis waj rumi patapi qhepakonqachu, nispa.

Jatun ñak'ariykuna kanqa

⁷ Chantá Jesuspa yachachisqankuna taporqanku: Yachachej Wiraqochíy, jayk'ajtaj chay tukuy ima kanqari? Ima señaltaj kanqa chay tukuy ima kananpajri? nispa.

⁸ Chantá Jesús nerqa: Allinta qhawakuychej, pajtataj pipis q'otiyasunkichejman. Chayta niykichej, imaraykuchus ashkha runakuna jamuspa, nenqanku: Noqaqa Diospa kachamusqan Cristo kani, nispa. Nillanqankutaj: Chay p'unchay qayllaña, nispa. Qankunarí amapuni qhepankuta riychejchu.

⁹ Jinallataj maqanakumanta, ch'ajwamanta ima uyarispa, ama mancharikunkichejchu. Chay tukuy ima ñawpajta kananpuni tiyan. Chaywanpis manaraj kay pachaj tukukuyninchu kanqa, nispa.

¹⁰ Chantá Jesús nillarqataj: Uj suyu waj suyoj contranta oqharikonqa, uj kamachejtaj waj kamachejpa contranta.

¹¹ Sinch'i jallp'a ikhakuykuna kallanqataj, yarqhaykuna, tukuynejpi wañuchej onqoykuna ima. Manchachikunapaj jina imakuna kanqa, janajpipis runaj mana jayk'aj rikusqan t'ukuna imakuna kallanqankutaj.

¹² Chaywanpis manaraj chay tukuy ima kashajtin, runakuna qankunata ñak'arichisunaykichejpaj presochasonqachej. Chantá tantakunanku wasiman apasonqachej, carcelkunamantaj wisq'arasonqachej. Jinallatataj kuraj kamachejkunaj ñawpaqenman, llajtata kamachejkunaj ñawpaqenman ima pusasonqachej yachachisqaykuna kasqaykichejrayku.

¹³ Chaywanpis qankuna chaynejta noqamanta tukuy runaman willarayta atinkichej.

¹⁴ Chayrayku imatachus kutichikunaykichejtaqa ama ñawpajta wakichikuychejchu,

¹⁵ imaraykuchus noqamin yachayta qosqaykichej, yuyaychasqaykichejtaj imatachus parlanaykichejta. Jinapi awqaykichejkuna chay parlasqaykichejta mana atipanqankuchu, nitaj kutichikuytapis atenqankuchu.

¹⁶ Chaywanpis kikin tataykichejwan, wawqeykichejwan, aylluykichejwan, jinataj kawsaqeykichejwan ima qankunata jap'ichisonqachej. Wakinniykichejtataj wañuchenqanku.

¹⁷ Noqarayku tukuy runaj chejninan kankichej.

¹⁸ Chaywanpis umaykichejmanta mana uj chujchallapis chinkanqachu.

¹⁹ Sinch'ita sayaychej, ajinamantataj wiñay kawsayta tarinkichej.

²⁰ Jerusalén llajtata soldadokunawan muyurisqata rikuspaqa, qankuna yachaychej manaraj imapi thuñisqapuni kananta.

²¹ Chaypacha Judeapi kajkuna orqokunaman ayqechunku, Jerusalenpi kajkunataj llajtamanta jawaman llojsispa, ripuchunku. Jinallataj chajrapi kajkunapis ama llajtaman kutirimuchunkuchu,

²² imaraykuchus ñak'ariy p'unchaykuna kanqa ñawpa qhelqasqapi nisqanman jina junt'akunanpaj.

²³ Chaypacha manchay llakiy kanqa wijsayoj warmikunapaj, ñuñoj wawayojkunapajpis, imaraykuchus kay suyupi manchay sinch'i ñak'ariy kanqa, jinallataj manchay jasut'iykuna kay llajtata qhatirenqa.

²⁴ Wakenqa espadawan wañuchisqa kanqanku, wakintaj presochasqa tukuy suyuman apasqa kanqanku. Chantá mana judío kajkunaqa Jerusalén llajtata saronqanku chay tiempo junt'akunankama.

Runaj Churinpa kutimuynin

²⁵ Chaypacha intipi, killapi, ch'askakunapi ima runaj mana jayk'aj rikusqan t'ukuna rikhurillanqataj. Kay pachapipis tukuy runakuna manchayta llakikuspa, musphaykachanqanku, mama qochaj qhollchoqeyasqanta rikuspa, yaku moqo oqharikusqanta uyarispa ima.

²⁶ Tukuy runataj ima llakiykunachus kay pachata qhatirinanmanta yuyaspa, llawch'iyanqanku, imaraykuchus janajpi atiykunapis, ch'askakunapis thalarasqa kanqanku.

²⁷ Chantá runakuna chaypacha rikonqanku Runaj Churinta phuyupi jamushajta, manchay atiywan, jatun kayninpa lliphipiyninwan ima.

²⁸ Chay tukuy ima rikhurejtintaj, kallpachakuychej, jinataj patata qhawariychej, imaraykuchus qhespichisqa kanaykichej p'unchay qayllamushanña, nispa. Ajinata Jesús yachacherqa.

²⁹ Jesús kay rijch'anachinata nillarqataj: Higo sach'ata qhawariychej, chayrí mayqen sach'allatapis.

³⁰ Q'omeryajta rikuspa, yachankichejña q'oñi tiempo qayllapiña kashasqanta.

³¹ Jinallatataj qankunapis chay tukuy ima pasasqanta rikuspa, yachaychej Diospa kamachiynin qayllapiña kashasqanta.

³² Kayta sut'ita niykichej: Manaraj mita masiykichej tukukushajtinku, kay tukuy ima junt'akunanpuni tiyan.

³³ Janajpis, kay pachapis tukukaponqanku. Chaywanpis, nisqayqa mana jayk'ajpis pasanqachu, junt'akonqankupuni.

³⁴ Qankunarí qhawarikuychej. Pajtataj anchata mikhunawan, machaykunawan, kay kawsaymanta phutikuykunawan ima sonqoykichej atipachikunman. Pajtataj chay p'unchay mana wakichisqata jap'isunkichejman.

³⁵ Chay p'unchayqa tukuy kay pachapi kawsajkunata tojlla jina mana yuyasqallamanta jap'enqa.

³⁶ Qankunarí wakichisqapuni kaychej ari, tukuy tiempo Diosmanta mañarikuspa chay tukuy ima jamoj llakiymanta llusp'inaykichejpaj, ajinamanta Runaj Churinpa ñawpaqenpi mana manchachikuspa rikhuriyta atinaykichejpaj, nispa.

³⁷ Jesús sapa p'unchay Temploj pationpi yachachej, tutantaj Olivos sutiyoj orqopi qhepakoj.

³⁸ Tukuy runataj tutamantapacha Temploman jamoj kanku paypa yachachisqanta uyarinankupaj.