San Lucas 2 - DIOSPA QHELQACHISQAN DEUTEROCANONICAL

Jesuspa paqarisqan

¹ Chaypacha Romapi kuraj kamachej Augusto kamacherqa tukuy suyupi runa yupasqa kanankuta.

² Chay ñawpaj kaj runa yupay karqa Quirino Siriapi kamachishajtin.

³ Jinapi tukuy yupachikunankupaj sapa uj llajtankuman rinanku karqa.

⁴ Chantá Josepis Davidpa mirayninmanta kasqanrayku, Judea jap'iyman, Davidpa llajtan Belenkama rerqa Galileapi Nazaret llajtamanta.

⁵ Paywan khuskataj warmin Mariapis rillarqataj. Chaypacha María may jatun onqojña kasharqa.

⁶ Belenpiña kashajtinku, Maríaj onqokunan p'unchay chayamorqa.

⁷ Jinapi payqa kuraj kaj qhari wawanta paqarichikorqa, janantawan k'iruykuspataj, uywa qaranapi siriykucherqa, tambo wasipi paykunapaj mana campo kasqanrayku.

Angelkuna michejkunaman rikhurinku

⁸ Belén llajta qayllapi ovejata michejkuna kasharqanku, tutantin uywankuta qhawaspa.

⁹ Jinallapi Tukuyta Kamachej Diospa angelnin paykunaman rikhurerqa, lliphipiynintaj paykunata muyuykojtin, anchata mancharikorqanku.

¹⁰ Chantá ángel paykunata nerqa: Ama mancharikuychejchu, imaraykuchus noqaqa sumaj willayta apamuykichej, chaytaj tukuy runapaj may kusiy kanqa.

¹¹ Kunan Davidpa llajtanpi qhespichej paqarin. Payqa Tukuyta Kamachej Cristomin.

¹² Payta tarinaykichejpajtaj kay señal kanqa: Wawataqa janantapi k'irusqata tarinkichej, uywa qaranapi sirisqata, nispa.

¹³ Jinallaman chay angelwan khuska ashkha angelkuna janaj pachamanta rikhurimorqanku, Diosta yupaychaspataj nerqanku:

¹⁴ Janaj pachapi Dios jatunchasqa kachun, kay pachapitaj allinpi kawsay kachun, pikunawanchus Dios sonqo junt'asqa kashan, chaykunapaj, nispa.

¹⁵ Chay angelkuna janaj pachaman ripusqankutawan, michejkunaqa ninakorqanku: Jaku rina Belenman, imachus kasqanta yachamunanchejpaj, Tukuyta Kamachej Dios willachiwasqanchejman jina, nispa.

¹⁶ Chantá usqhayllata rispa, michejkunaqa Mariata, Josetawan tariparqanku. Jinataj wawata uywa qaranapi sirisqata rikorqanku.

¹⁷ Chayta rikuytawantaj, michejkuna ripuspa, imatachus chay ángel wawamanta nisqanta tukuyman willararqanku.

¹⁸ Chayta uyarejkunataj michejkunaj willasqankumanta t'ukorqanku.

¹⁹ Chaywanpis Mariaqa chay tukuy imata sonqonpi waqaychaspa, chaykunapi unancharqa.

²⁰ Chantá michejkuna kutiporqanku Diosta jatunchaspa, yupaychaspataj imakunatachus uyarisqankumanta, rikusqankumanta ima angelpa willasqanman jina.

Jesusta Temploman apanku

²¹ Pusaj p'unchayninman Josewan, Mariawan wawata circuncidacherqanku, jinataj payta suticharqanku Jesús sutiwan, imaynatachus angelqa Mariaman nisqa manaraj María onqoj kashajtin.

²² Moisespa kamachisqanman jina llimphuchakunanku tiempo junt'akojtintaj, Josewan Mariawan wawata Jerusalenman aparqanku Tukuyta Kamachej Diospaj t'aqanankupaj.

²³ Chayta junt'arqanku, Tukuyta Kamachej Diospa kamachisqanpi nisqaman jina: Tukuy kuraj kaj qhari wawa Tata Diospaj t'aqasqa kanqa, nispa.

²⁴ Jinallatataj Diosman uj jaywanata aparqanku, Diospa kamachisqanpi nisqanman jina: Iskay urpita chayrí iskay jurk'utata Diosman jaywankichej, nispa.

²⁵ Chaypacha Jerusalenpi uj runa Simeón sutiyoj tiyakorqa. Pay cheqanta ruwaj runa karqa, Diostataj may jatun respetowan qhawarqa. Chayrayku pay suyasharqa Dios Israelta qhespichinanta. Santo Espíritoj kamachiyninpipis kallarqataj.

²⁶ Jinataj Santo Espíritu payman sut'inchasqa manaraj wañupushaspa Diospa kachamusqan Cristota rikunanta.

²⁷ Chaypacha Santo Espiritoqa Simeonta Temploman pusarqa. Chaypachallataj Jesuspa tatankunapis payta Temploman aparqanku, Diospa kamachisqanman jina.

²⁸ Jinapi Simeonqa wawata marq'arikuspa, Diosta kay jinata yupaycharqa:

²⁹ Kunanqa Tukuyta Kamachej Dios, sonqoy junt'asqata pusakapuway, imaraykuchus niwasqaykeqa junt'akun.

³⁰ Noqaqa kikin ñawiywan kachamusqayki qhespichejta rikuni,

³¹ pitachus qan kachamunki tukuy runapaj, chayta.

³² Payqa tukuy suyupi kajkunaman k'anchanqa, jinallataj Israel aylluyki jatunchasqa kananpaj kanqa, nispa.

³³ Jesuspa tatan, mamanwan t'ukorqanku, Simeón wawamanta imatachus nisqanmanta.

³⁴ Chantá Simeón paykunata saminchaytawan, wawaj maman Mariatañataj nerqa: Kay wawataqa Diosmin Israelpi churan, wakinkunata urmachinanpaj, wakinkunataj Diosman kutirichinanpaj. Dios payta señal kananpaj churajtinpis, ashkha runakuna payta qhesachanqanku.

³⁵ Jinataj ashkha runaj yuyasqanku sut'inchasqa kanqa. Chaywanpis llakeyqa sonqoykita espada jina t'ojsenqa, nispa.

³⁶ Templo chaynejpi kashallarqataj Aser jatun ayllumanta Fanuelpa ususin Ana, paytaj Diosmanta sut'inchaj karqa, payañataj. Sipaspacha casarakuspa, qanchis watallata qosanwan tiyakusqa.

³⁷ Paytaj warmisapa karqa, pusaj chunka tawayoj watayojtaj. Chantá Templomanta mana karunchakojchu, manachayqa tuta p'unchay Diosta yupaychaspa, ayunarqa Dioswantaj parlarikorqa.

³⁸ Simeón Jesuspa tatankunawan parlashajtin, Anaqa chimpaspa, Jesús wawarayku Diosman pachis nerqa. Chaymantapachataj wawa Jesusmanta willarqa, pikunachus Jerusalén llajta qhespichisqa kananta suyasharqanku, chaykunaman.

Nazaret llajtaman kutipunku

³⁹ Jesuspa tatankuna tukuy imata Tukuyta Kamachej Diospa kamachisqanman jina junt'aspa, Galileapi Nazaret llajtankuman kutiporqanku.

⁴⁰ Chantá wawaqa wiñarqa, Diosmanta yachaspataj kallpachakorqa. Jinataj astawan astawan yachayniyojman tukorqa. Diostaj paywan may kusisqa karqa.

Jesusqa Templopi

⁴¹ Jesuspa tatankunaqa sapa wata Pascua raymipaj Jerusalenman rej kanku.

⁴² Chantá Jesús chunka iskayniyoj watayoj kashaspa, tatankunawan khuska Jerusalenman rerqa, Pascua raymiman rina yachasqa kasqanman jina.

⁴³ Pascua raymi tukukuyta tatan maman kutipushajtinku, Jesús Jerusalenpi qhepakusqa paykunaj mana yachasqallanku.

⁴⁴ Wajkunawan rishasqanta yuyaspa, paykuna uj p'unchay puriypiña watukorqanku ayllunku ukhupi, rejsisqankukuna ukhupi ima.

⁴⁵ Jesusta mana tarispataj, Jerusalenkama kutirerqanku.

⁴⁶ Kinsa p'unchaymanta Jesuspa tatankuna Temploj pationpi payta tarerqanku Diospa kamachisqanmanta yachachejkunawan tiyashajta, parlasqankuta uyarispa, tapurispa ima.

⁴⁷ Uyarejkunataj mayta t'ukusharqanku Jesuspa yachayninmanta, kutichisqanmanta ima.

⁴⁸ Ajinata rikuspa, tata mamanpis t'ukullarqankutaj, mamantaj Jesusta nerqa: Wawáy, imaraykutaj kay jinata ruwawaykuri? Noqawan, tataykiwanqa may phutisqa mask'ashasorqayku, nispa.

⁴⁹ Jesustaj nerqa: Imaraykutaj mask'ashawarqankichejri? Manachu yachankichej Tataypa ruwananpi kanay kasqantari? nispa.

⁵⁰ Paykunarí chay nisqanta mana entienderqankuchu.

⁵¹ Chantá Jesusqa tatan mamanwan Nazaretman kutiporqa, chaypitaj paykunata kasuspa tiyakorqa. Mamantajrí chay tukuyta sonqollanpi waqaycharqa.

⁵² Chaykamataj Jesús wiñasharqa, jinallataj astawan astawan yachayniyojman tukusharqa. Paytaj Diospaj allinpaj qhawasqa karqa, jinallataj tukuy runapajpis.