San Lucas 19 - DIOSPA QHELQACHISQAN DEUTEROCANONICAL

Jesusqa Zaqueoj wasinman rin

¹ Jesusqa Jericó llajtaman yaykuspa, llajta ukhunta pasasharqa.

² Chaypitaj uj qhapaj runa Zaqueo tiyakorqa. Payqa impuestota cobrajkunaj kurajninku karqa.

³ Jinapi payqa Jesusta rejsiyta munarqa. Chaywanpis ashkha runakuna kasqankurayku mana rikuyta aterqachu, imaraykuchus Zaqueo moqo runalla karqa.

⁴ Chayrayku usqhayta ñawparispa, sicómoro sach'aman wicharerqa, chaymanta rikuyta atinanpaj, imaraykuchus Jesús chayninta rinan karqa.

⁵ Chantá chaynejta purishaspa, Jesusqa Zaqueota qhawariytawan nerqa: Zaqueo, usqhayta urayk'amuy. Kunan wasiykipi qhepakusaj, nispa.

⁶ Jinapi usqhayta urayk'amuytawan, Zaqueoqa may kusisqa Jesusta wasinman pusaykorqa.

⁷ Chaywanpis chayta rikuspa, tukuy runakuna thutuyta qallarerqanku: Kay runaqa juchasapaj wasinman yaykun, nispa.

⁸ Chantá Zaqueo sayarispa, Jesusta nerqa: Tukuyta Kamachej Jesús, tukuy kapuwasqanpa khuskanninta wajchakunaman qosaj. Sichus pimantapis ch'awkiyaspa imatapis suwarqani chayqa, tawa jinatawan kutichipusaj, nispa.

⁹ Jesustaj kuticherqa: Kunan p'unchay Zaqueopaj, wasi ayllunpaj ima qhespichina chayamun, imaraykuchus Zaqueoqa cheqapuni Abrahampa wawan kasqanmanta yachayta qon.

¹⁰ Runaj Churenqa jamun, chinkasqa kajta mask'aspa, qhespichinanpaj, nispa.

Qolqemanta rijch'anachina

¹¹ Chay imakunata runakuna uyarishajtinku, Jesusqa uj rijch'anachinatawan nerqa. Jerusalén llajta qayllapiña Jesús kasqanrayku, paykuna yuyasharqanku Diosqa chaypacha kamachiyta qallarinanta.

¹² Chayrayku pay nerqa: Uj uyarisqa runa karu llajtaman risqa, kuraj kamachej churasqa kananpaj, chaymantataj kutimuspa, kamachiyta qallarinanpaj.

¹³ Manaraj rishaspa, chay runa chunka kamachinkunata wajyasqa, sapa ujmantaj qolqeta jaywarisqa: Kutimunaykama kay qolqetaqa mirachiychej, nispa.

¹⁴ Llajta masinkunatajrí payta chejnej kasqanku. Chayrayku, kachakunata qhepanta kachasqanku, ninankupaj: Mana munaykuchu chay runa kuraj kamachejniyku kananpaj, nispa.

¹⁵ Chay runa kuraj kamachejña churasqa kaspa, llajtanman kutimpusqa. Chantá chay kamachinkunata wajyachisqa, tapunanpaj sapa uj chay qolqe jaywasqanwan mashkhatachus mirachisqanta.

¹⁶ Ñawpaj kaj kamachi jamuspa, nisqa: Wiraqochi, qolqe jaywawasqaykitaqa chunka jinatawanraj mirachini, nispa.

¹⁷ Kuraj kamachejtaj kutichisqa: Walejpacha, sumaj kamachi kanki. Chay pisillawan allinta ruwasqaykirayku, kunanmantapacha chunka llajtakunata kamachinki, nispa.

¹⁸ Chantá qhepan kaj kamachiñataj jamuspa, nisqa: Wiraqochi, qolqe jaywawasqaykitaqa phishqa jinatawan mirachini, nispa.

¹⁹ Kuraj kamachejtaj kutichisqa: Qanpis phishqa llajtakunata kamachillankitaj, nispa.

²⁰ Chantá chay ujninñataj jamuspa, nisqa: Wiraqochi, q'epichanapi wataspa, qolqeykitaqa jallch'aykorqani. Kayqa, jap'ikapullay ari.

²¹ Rumi sonqo kasqaykirayku noqa manchachikorqayki. Qanqa mana qanpata kajta jap'ikapunki, mana tarpusqaykimantataj oqharillanki, nispa.

²² Chantá kuraj kamachej nisqa: Qanqa mana allin kamachi kanki, jinataj nisqaykiwan qanllataj juchachakushanki. Sichus yacharqanki rumi sonqo kasqayta, mana noqaj kajta jap'ikapusqayta, mana tarpusqay kajta oqharisqayta ima chayqa,

²³ imaraykutaj chay jaywasusqay qolqeta mana bancoman churaykapuwarqankichuri? Ajinata kutimuspa, noqa qolqeyta interesnintawan orqhokapuyman karqa, nispa.

²⁴ Chantá kuraj kamachej chaypi kajkunaman nillasqataj: Paymanta chay qolqeta qhechuspa, pichus chunkatawan mirachejman jaywaychej, nispa.

²⁵ Paykunatajrí kutichisqanku: Wiraqochi, payqa chunka qolqetaña jap'ishan, nispa.

²⁶ Kuraj kamachejrí kutichisqa: Noqa niykichej: Kapuyniyojmanqa aswan ashkha qosqa kanqa, mana imayojmantatajrí, pisilla kapusqanpis qhechusqa kanqa.

²⁷ Jinallatataj, jaqay awqaykuna, pikunachus mana kuraj kamachej kanayta munarqankuchu, chaykunata kayman apamuspa, ñawpaqeypi wañurachiychej, nispa. Ajinata Jesús chay rijch'anachinata nerqa.

Jesús Jerusalenman yaykun

²⁸ Chayta niytawan, Jesusqa tukuypa ñawpaqenta purirerqa Jerusalenman rinanpaj.

²⁹ Chantá Olivos orqoj chimpanpi, Betfagué llajtaman, Betaniaman ima qayllashaspa, iskay yachachisqanta kacharqa:

³⁰ Qankuna jaqay chimpapi ranchoman rinkichej, chaypitaj uña burro watasqata tarinkichej, mayqenmanchus ni pi kunankama lloq'aykunrajchu, chayta. Chantá phaskaraspa, kayman aysamuychej.

³¹ Sichus pipis tapusunkichej: Imaraykutaj phaskarashankichej? nispa, chayqa, qankuna kutichiychej: Wiraqochiyku Jesús kay burrota munan, nispa.

³² Jinataj chay iskay yachachisqankuna rispa, Jesuspa nisqanman jina uña burrota tarerqanku.

³³ Burrota phaskarashajtinkutaj, dueñonkuna paykunata taporqanku: Imapajtaj chay burrota phaskashankichej? nispa.

³⁴ Paykunataj kuticherqanku: Wiraqochiyku Jesús kay burrota munan, nispa.

³⁵ Chantá chay yachachisqankunaqa burrota Jesusman aysamorqanku. Burroj wasanman qhatanankuwan caronaykuspataj, Jesusta lloq'aykucherqanku.

³⁶ Jesús burropi lloq'asqa chay ñanta rishajtin, chaypi tantasqa runakunaqa qhatananku p'achankuta mast'allarqankutaj, chayninta purinanpaj.

³⁷ Olivos orqoj kinrayman qayllaykushajtintaj, Jesusta tukuy qhatejkuna kusisqa qhaparispa, Diosta jatunchayta qallarerqanku, Jesuspa t'ukuna ruwasqata rikusqankumanta.

³⁸ Paykuna nerqanku: Jatunchasqa kachun Diospa sutinpi jamoj kuraj kamachejqa. Janaj pachapi allin kawsay kachun, jinallataj patapipis Dios jatunchasqa kachun, nispa.

³⁹ Chantá chay runakunawan khuska rej fariseokuna nerqanku: Yachachej Jesús, chayta nisqankurayku yachachisqaykikunata k'amiy ari, nispa.

⁴⁰ Jesustajrí kuticherqa: Sichus paykuna ch'inlla kankuman chayqa, rumikunañataj qhaparispa jatunchawankuman, nispa.

⁴¹ Chantá Jerusalén llajta qayllaman chayaspa, Jesús llajtata rikuytawan, waqarikorqa.

⁴² Paytaj nerqa: Mayta munayman kay p'unchayllapis reparanaykita qanpaj allinpi kawsakuy imachus kasqanta. Chaywanpis chayqa ñawiykimanta pakasqa kashan, manataj reparayta atinkichu.

⁴³ Jamoj p'unchaykunapirí awqaykikunaqa jallp'a moqokunata contraykipi oqharenqanku. Atipasunankupaj muyuykusonqanku, tukuynejmantataj ñit'iykamusonqanku.

⁴⁴ Chaymantataj paykuna thuñisonqanku, jinallataj qanpi tiyakojkunatapis wañurachillanqankutaj. Qanpi mana saqenqankuchu rumi patapi rumita, imaraykuchus mana reparakorqankichu Diosniyki qanta qhespichej jamushasojtin, nispa.

Jesús qhatojkunata Templomanta qharqon

⁴⁵ Chantá Jesusqa Temploj pationman yaykuspa, tukuy chaypi qhatojkunata qharqoyta qallarerqa.

⁴⁶ Nerqataj: Diospa Qhelqachisqanpi pay nerqa: Waseyqa noqawan parlarikuna wasimin. Chaywanpis qankuna suwa thapaman tukuchisqankichej, nispa.

⁴⁷ Chay p'unchaykunapi Jesús sapa p'unchay Temploj pationpi yachachej karqa. Jinapitaj kuraj sacerdotekuna, Diospa kamachisqanmanta yachachejkuna, llajtamanta kurajkuna ima imaynallamantapis payta wañuchiyta munasharqanku.

⁴⁸ Chaywanpis mana imanayta aterqankuchu, imaraykuchus tukuy runakuna Jesús imatachus yachachinanta uyariyta suyasharqanku.