San Lucas 18 - DIOSPA QHELQACHISQAN DEUTEROCANONICAL

Warmisapamanta juezmantawan rijch'anachina

¹ Uj kuti Jesusqa uj rijch'anachinata willaspa, yachacherqa mana sayk'uspa Dioswan parlarikunapuni kasqanta.

² Paytaj nerqa: Uj llajtapi uj juez kasqa. Payqa Diosta mana manchachikojchu, nitaj pitapis kasuta ruwajchu.

³ Chay llajtapi uj warmisapa kallasqataj. Payqa justiciata mañakuspa, juezpaman rillajpuni: Justiciata ruwaspa awqaypa makinmanta kacharichiway, nispa.

⁴ Jueztajrí unayta chay warmita mana uyariyta munasqachu. Chaymantaña sonqonpi yuyaychakuspa, nisqa: Noqaqa Diosta mana manchachikunichu, nitaj pitapis kasuta ruwanichu.

⁵ Kay warmisaparí, mana samarejta saqeshawanchu justiciata ruwapunayta mañawaspa. Chayrayku justiciata ruwasaj, amaña ajinata sapa kuti umayta nanachiwaj jamunanpaj, nispa.

⁶ Chantá Tukuyta Kamachej Jesús nerqa: Chay mana allin juezpa ruwasqanmanta allinta yachakuychej.

⁷ Diospa ajllakusqankuna tuta p'unchay paymanta justiciata mañakushajtinku, manachu paykunapaj justiciata ruwanqa? Payqa unaytarajchu suyachikonqa? Mana, icharí?

⁸ Noqa niykichej: Mana suyachikuspa, Dios justiciata ruwanqapuni. Chaywanpis Diospa Churin kay pachaman kutimuspa, mashkha runatataj Diospi atinikushajta tarenqari? nispa.

Fariseomanta impuestota cobrajmantawan rijch'anachina

⁹ Chaymanta Jesús waj rijch'anachinata nillarqataj, pikunachus allin runa kasqankuta yuyakuspa, wajkunata pisipaj qhawanku, chaykunamanta. Paytaj nerqa:

¹⁰ Iskay runakuna Temploman Diosmanta mañakoj risqanku. Ujnin kasqa fariseo, ujnintaj impuestota cobraj.

¹¹ Jinapi fariseo kajqa sayarikuspa, kay jinata Dioswan parlarikusqa: Diosníy, pachis niyki, imaraykuchus mana wakinkuna jina suwachu, sajrachu, qhenchachu kani, nillataj kay impuesto cobraj jinachu.

¹² Noqaqa semanapi iskay kutita ayunani, tukuy kapuyniymantataj sapa chunkamanta ujta qoni, nispa.

¹³ Impuesto cobraj runatajrí karullapi sayaspa, manchachikuywan mana patallamanpis qhawariyta munasqachu. Manachayqa qhasqonta takakuspa, nisqa: Diosníy, noqa juchasapata khuyarikuway ari, nispa.

¹⁴ Noqataj niykichej: Chay impuesto cobraj runaqa juchan pampachasqa wasinman kutipusqa. Fariseoj juchanrí mana pampachasqachu karqa, imaraykuchus Diosqa jatunchakojkunata k'umuykuchenqa, k'umuykojtatajrí jatunchanqa, nispa.

Jesús wawakunata saminchan

¹⁵ Uj kuti wakin runakuna Jesusman juch'uy wawakunata pusamorqanku, llankhaykuspa Diospa sutinpi saminchananpaj. Jesuspa yachachisqankunatajrí chayta rikuspa, wawa pusamojkunata k'amerqanku.

¹⁶ Jesustajrí wawakunata wajyaspa, yachachisqankunaman nerqa: Wawakunata noqaman jamojta saqeychej, amataj jark'aychejchu, imaraykuchus kay wawakuna jina kajkunalla Diospa janaj pacha kamachiyninman yaykonqanku.

¹⁷ Kayta sut'ita niykichej: Pichus mana wawa jina Diospa kamachiyninta jap'ikojqa mana jayk'aj chayman yaykonqachu, nispa.

Qhapaj runa

¹⁸ Waj kutipi judío kurajkunamanta ujnin kaj Jesusta taporqa: K'acha Yachachej, imata ruwaspataj wiñay kawsayta tariymanri? nispa.

¹⁹ Jesustaj nerqa: Imaraykutaj K'acha Yachachej niwankiri? Mana pipis k'achaqa kanchu, manachayqa Dioslla.

²⁰ Qan yachankiña Diospa kamachisqankunata: Ama khuchichakuspa qhenchachakunkichu, ama runa masiykita wañuchinkichu, ama suwakunkichu, ama runa masiykej contranta llullakuspa parlankichu. Chantá tataykita, mamaykitapis jatunpaj qhawanki, nispa.

²¹ Chay runataj nerqa: Chay tukuy imataqa wayna kasqaymantapacha junt'ani, nispa.

²² Chayta uyarispa, Jesús payman nerqa: Jina chayqa, uj imatawanraj ruwanayki tiyan: Tukuy kapuyniykita vendespa, wajchakunaman chay qolqeta rak'iray. Ajinata ruwaspa, janaj pachapi tukuy imayoj kanki. Chaymantataj kutimuspa, yachachisqay kanaykipaj noqawan jamuy, nispa.

²³ Chayta uyarispa, runaqa mayta llakikorqa, may jina qhapaj kasqanrayku.

²⁴ Jesustaj chay runa llakikusqanta rikuspa, nerqa: Qhapajkunaqa may ñak'ayllata Diospa kamachiyninman yaykonqanku.

²⁵ Astawanqa camelloraj yarwej ninrinta yaykuyta atinman, Diospa kamachiyninman qhapaj runa yaykunanmantaqa, nispa.

²⁶ Chantá chayta uyarejkuna taporqanku: Jina kajtenqa, pitaj qhespichisqa kayta atinmanri? nispa.

²⁷ Jesustaj nerqa: Runapajqa chay mana atikunchu, Diostajrí tukuy imata ruwayta atin, nispa.

²⁸ Jinapi Pedro nerqa: Noqaykoqa qanwan purinaykupaj tukuy kapuyniykuta saqerparerqayku, nispa.

²⁹ Jesustaj kuticherqa: Kayta sut'ita niykichej: Sichus pipis wasinta, chayrí warminta, tatanta, mamanta, wawqenkunata, wawankunatapis Diospa kamachiyninrayku saqen chayqa,

³⁰ kunan kay kawsaypi aswan ashkhatapuni jap'enqa, jinataj jamoj p'unchaypi wiñay kawsayta jap'enqa, nispa.

Jesusqa wañunanmanta ujtawan willan

³¹ Jesús chunka iskayniyoj kuraj kachankunata wajnejman pusaspa, paykunata nerqa: Kunanqa Jerusalenman rishanchej, chaypi Runaj Churinmanta imatachus Diosmanta ñawpa sut'inchajkunaj qhelqasqanku, chay tukuy junt'akunanpaj.

³² Chaypi judío kajkuna mana judío kajkunawan payta jap'ichenqanku, chaymantataj payta asipayanqanku, p'enqayta k'umuykachachenqanku, thoqaykonqanku ima.

³³ Jasut'iytawantaj, payta wañuchenqanku. Chaywanpis kinsa p'unchayninman pay wañusqakunaj chawpinmanta kawsarimponqa, nispa.

³⁴ Jesuspa yachachisqankunarí imatachus nisqanta mana tumpallatapis entienderqankuchu, nitaj yacharqankuchu imamantachus parlashasqanta.

Jesusqa ñawsa runata qhawarichin

³⁵ Jericó llajtaman Jesús chayashajtin, uj ñawsa runa ñan patapi mañakuspa tiyakusharqa.

³⁶ Ashkha runata rishajta uyarispataj, ñawsa runaqa imachus chay ch'ajwa kasqanta tapukorqa.

³⁷ Willarqankutaj: Nazaretmanta Jesús kayninta jamushan, nispa.

³⁸ Chantá ñawsa runa qhapariyta qallarerqa: Jesús, Davidpa Churin, khuyarikuway ari, nispa.

³⁹ Ñawpajta rejkunatajrí payta k'amerqanku: Ch'in kay, nispa. Chaywanpis ñawsa runa aswan sinch'ita qhaparerqa: Davidpa Churin, khuyarikuway ari, nispa.

⁴⁰ Chantá Jesús sayaspa, ñawsa runata pusachimorqa, chayamojtintaj, taporqa:

⁴¹ Imatataj ruwapusunayta munankiri? nispa. Paytaj kuticherqa: Wiraqochíy, qhawarichinawaykita munani, nispa.

⁴² Jesustaj nerqa: Ñawiyki rikuchun, noqapi atinikusqaykirayku qhaliyachisqaña kanki, nispa.

⁴³ Jesús chayta nisqantawankama, ñawsa runa qhawarerqapacha. Chantá Diosta jatunchaspa, pay Jesuspa qhepanta rerqa. Tukuy runapis chayta rikuspa, Diosta jatunchallarqankutaj.