San Lucas 15 - DIOSPA QHELQACHISQAN DEUTEROCANONICAL

Chinkasqa ovejamanta rijch'anachina

¹ Impuestota cobrajkuna, mana allin kawsayniyoj runakuna ima Jesusman qayllaykusharqanku parlasqanta uyarinankupaj.

² Chayrayku fariseokunawan, Diospa kamachisqanmanta yachachejkunawan ima thutuspa, nisharqanku: Kay runaqa juchasapakunawan kawsakun, paykunawantaj mikhun, nispa.

³ Jinapi Jesús kay rijch'anachinata willarqa:

⁴ Qankunamanta mayqenpis pachaj ovejayoj kaspa, ujnin chinkajtin, manachu chay jisq'on chunka jisq'onniyojta ch'innejpi saqespa, chinkasqa kajta tarinaykichejkama mask'aj riwajchej?

⁵ Ovejanta tariytawantaj, michejqa may kusisqa lijrariykukun.

⁶ Wasinman chayaytawantaj, kawsaqenkunata, llajta masinkunata ima tantaykuspa, paykunata nin: Noqawan khuska kusikuychej, imaraykuchus chinkasqa ovejayta tarikapuni, nispa.

⁷ Kayta niykichej: Ajinallataj janaj pachapi aswan kusiy tiyan juchasapa runa Diosman kutirikojtin, jisq'on chunka jisq'onniyoj mana juchayojkunamanta nisqaqa, pikunachus Diosman mana kutirikunankuchu tiyan, chaykunamanta, nispa.

Chinkasqa qolqemanta rijch'anachina

⁸ Jesús nillarqataj: Manachu pi warmipis chunka qolqenmanta ujnin kajta chinkachispa, chay ratopacha lamparata jap'ichin, wasinta pichaspataj, qolqenta tarinankama mask'an?

⁹ Tariytawantaj kawsaqenkunata, llajta masinkunata ima tantaykuspa, paykunata nin: Noqawan kusikuychej, imaraykuchus chinkachisqay qolqeyta tarikapuni, nispa.

¹⁰ Nillaykichejtaj Diospa angelninkunaj ñawpaqenpi ajina kusiy kasqanta, juchasapa runa Diosman kutirikojtin, nispa.

Munakuyniyoj tatamanta rijch'anachina

¹¹ Jesús nillarqataj: Uj runa iskay churiyoj kasqa.

¹² Sullk'a kajtaj tatanta nisqa: Tatáy, manaraj wañupushaspa kunanpacha chayaqeyta qopuway, nispa. Tatankutaj sapa ujninkuman chayaqenkuta qopusqa.

¹³ Mana unaymanchu sullk'a kaj churi tukuy chayaqenta vendeytawan, chay qolqeta tantaykuspa, karu llajtaman ripusqa. Jaqaypitaj tukuy qolqenta tukuchisqa mana allinta purispa.

¹⁴ Maypachachus tukuy qolqen tukukojtin, chaypachallataj chay llajtapi manchay yarqhay kasqa, paytaj pisichikuyta qallarisqa.

¹⁵ Chayrayku chay llajtayoj patronpaman qayllaykuspa, ganakunanpaj ruwanata mañakusqa. Chay patrontaj jallp'anman kachasqa khuchita michinanpaj.

¹⁶ Chaypitaj waynaqa yarqhaymanta khuchi mikhuna thaqota mikhuyta munasqa. Chaywanpis mana pipis ni imatapis jaywasqachu.

¹⁷ Chantá waynaqa yuyayninman churakuspa, sonqonpi nisqa: Tataypa wasinpeqa peonkuna ashkha mikhunayoj kanku, noqatajrí kaypi yarqhaymanta wañushaniña.

¹⁸ Chayrayku tataypa wasinman kutiripusaj, chantá nisaj: Tatáy, Diospa contranta juchallini, qanpa contraykitapis.

¹⁹ Manaña wawayki kanaypaj jinachu kani. Chayrayku ujnin peonniyki jinallatapis jap'iway ari, nispa.

²⁰ Sayariytawantaj, waynaqa tatanpaman kutipusqa. Karullapiraj kashajtintaj, tatanqa wawanta rikuspa, mayta khuyarikusqa. Chantá usqhayta taripamuspa, wawanta ojllaykusqa, much'aykusqataj.

²¹ Jinapi churin nisqa: Tatáy, Diospa contranta juchallini, qanpa contraykitapis. Manaña wawayki kanaypaj jinachu kani, nispa.

²² Tatanrí uywaqenkunata kamachisqa: Usqhayllata aswan sumaj p'achata orqhomuspa, kay wawayta p'achallichiychej. Anillotapis makinman churaychej, mosoj juk'utatapis chakinman.

²³ Chantá wirayachisqa torillota ñak'aychej, imaraykuchus raymita ruwaspa, sumajta mikhusunchej.

²⁴ Kay wawayqa wañusqa karqa, kawsarimuntaj. Chinkasqa karqa, kunantajrí tarikapuni, nispa. Ajinamanta tukuyninku mayta kusikuspa, raymita ruwayta qallarisqanku.

²⁵ Chaykama kuraj kaj chureqa chajrallapiraj kashasqa. Wasinman kutimuspataj takisqankuta, tususqankuta ima uyarisqa.

²⁶ Jinapi ujnin kamachita wajyaspa, tapusqa: Ima ch'ajwataj chayri? nispa.

²⁷ Paytaj kutichisqa: Wawqeyki chayampun, tataykitaj wirayachisqa torillota ñak'achin, wawqeyki allillan kutimpusqanrayku, nispa.

²⁸ Chantá kuraj kaj chureqa phiñakuspa, manapuni wasiman yaykuyta munasqachu. Tatantaj llojsimuspa, mayta nisqa yaykunanta.

²⁹ Paytajrí tatanman kutichisqa: Noqaqa kay chhika watataña qanpaj llank'ani, manataj jayk'ajpis uj cabritallatapis qowarqankichu kawsaqeykunawan mikhuspa kusirikunaypaj.

³⁰ Kay lloqallaykirí tukuy kapuyniykita usuchimorqa imaymana khuchi warmikunawan purispa. Chaywanpis kutimojtenqa, qan wirayachisqa torillota paypaj ñak'achinki, nispa.

³¹ Tatantajrí kutichisqa: Wawáy, qanqa noqawanpuni kashanki, tukuy imaypis qanpatapuni.

³² Chaywanpis raymita ruwaspa, kusikunanchejpuni karqa, imaraykuchus kay wawqeykeqa wañusqa karqa, kawsarimuntaj, chinkasqa kasqanmantataj tarikapunchej, nispa. Ajinata Jesús runakunaman yachacherqa.