San Lucas 14 - DIOSPA QHELQACHISQAN DEUTEROCANONICAL

Jesús punkisqa runata qhaliyachin

¹ Samarina p'unchaypi Jesús uj kuraj fariseoj wasinman mikhoj yaykorqa, wakin fariseokunataj payta wateqasharqanku.

² Chaypitaj punkiywan uj onqosqa runa Jesuspa ñawpaqenpi kasharqa.

³ Chantá Jesús Diospa kamachisqanmanta yachachejkunata, fariseokunata ima taporqa: Samarina p'unchaypi onqosqakunata qhaliyachina atikunmanchu? nispa.

⁴ Paykunatajrí ch'inlla karqanku. Chantá Jesús onqosqa runata makinmanta jap'ispa qhaliyacherqapacha, chaymantataj kachaporqa.

⁵ Chaypi kajkunamantaj nerqa: Wawaykichej, chayrí wakaykichej pujyuman urmaykojtin, qankuna chay ratopacha orqhowajchej, samarina p'unchay kashajtinpis, icharí? nispa.

⁶ Paykunatajrí Jesuspa nisqanman mana kutichiyta aterqankuchu.

K'umuykukoj sonqoyoj kanamanta

⁷ Jesús qhawasharqa imaynatachus jatun mikhunaman wajyarisqakuna aswan sumachaj tiyanakunata ajllarakusqankuta. Chayrayku paykunata kay jinata yuyaycharqa:

⁸ Casarakuman wajyarisqa kaspaqa, ama aswan sumaj kaj tiyanapichu tiyarikuy. Ichapis qanmanta aswan jatunpaj qhawasqa waj runapis wajyarisqallataj kanman.

⁹ Chantá pichus iskayniykichejta wajyarikoj runa nisunkiman: Chay tiyanata payman qoy, nispa. Qantaj p'enqayta qhepanejman tiyaj rishawaj.

¹⁰ Chayrayku wajyarisqa kaspaqa, qhepanejllapi tiyarikamuy. Chantá pichus wajyasorqa, chay runa jamuspa, nisonqa: Kawsaqéy, aswan ñawpajpi tiyakamuy, nispa. Ajinapeqa allinpaj qhawasqa kanki qanwan khuska wajyarisqakunaj ñawpaqenkupi.

¹¹ Chayqa ajina, imaraykuchus jatunchakojqa k'umuykuchisqa kanqa, k'umuykojtajrí jatunchasqa kanqa, nispa.

¹² Mikhunaman wajyarikoj runatapis Jesús nillarqataj: Jayk'ajllapis almuerzota, chayrí cenata wayk'uchispaqa, ama kawsaqeykikunata, nitaj wawqeykikunata, nitaj aylluykikunata, nitaj qhapaj llajta masiykikunatapis wajyarikunkichu. Paykuna qanta kikillantataj mikhunaman wajyarisunkuman, chayllawantaj t'inkachisqa kawaj.

¹³ Manachayqa jatun mikhuyta wayk'uchispaqa, wajyarikuy wajchakunata, ñuk'ukunata, suchukunata, ñawsakunata ima.

¹⁴ Chaywanqa aswan kusikuyniyoj kanki, imaraykuchus paykuna mana imatapis kutichipusuyta atenqankuchu. Chantá cheqan runakuna wañusqamanta kawsarimpojtinku, chaypachamá Diosmin t'inkaykita qosonqa, nispa.

Jatun mikhunamanta rijch'anachina

¹⁵ Chayta uyarispataj, Jesuswan khuska mikhojkunamanta ujnin kaj Jesusta nerqa: Kusikuyniyojmin kanqa, Dios kamachishajtin pichus jatun mikhunaman wajyarisqa kaj, nispa.

¹⁶ Jesustajrí uj rijch'anachinata willaspa, kuticherqa: Uj runa manchay jatun mikhuyta wakichisqa, ashkha runatataj wajyarikusqa.

¹⁷ Mikhunankuña kashajtintaj, chay runaqa ujnin kamachinta wajyarisqa kajkunaman willamojta kachasqa: Usqhayta jamullaychejña, imaraykuchus tukuy ima wakichisqaña, nispa.

¹⁸ Chaywanpis tukuyninku, ujmanta uj, mana riyta munaspa, achakita churayta qallarisqanku. Ñawpaj kaj nisqa: Noqaqa kunallanraj jallp'ata rantikuni. Qhawamoj rinay tiyan. Ama jinachu kay, saqerillaway rejta ari, nispa.

¹⁹ Qhepan kajtaj nisqa: Phishqa yunta rantisqayta llank'achimunayraj tiyan. Mana jamuyta aterqoymanchu, nispa.

²⁰ Chay ujnintaj nillasqataj: Kunallanraj casarakuni. Chayrayku noqaqa mana jamuyta atisajchu, nispa.

²¹ Chantá chay kamacheqa kutimuspa, chay tukuyta patronninman willasqa. Patronrí sinch'ita phiñakuspa, kamachinta nisqa: Riy usqhayta kay llajtaj plazanta, callenkunata ima, pusaramuytaj tukuy wajchakunata, ñuk'ukunata, ñawsakunata, suchukunata ima, nispa.

²² Kamachitaj kutimuytawan, nisqa: Patrón, nisqaykiman jina ruwani. Chaywanpis raymi wasi manaraj junt'achu, nispa.

²³ Chaymantataj patronqa kamachita nisqa: Jina kajtenqa, tukuy chaki ñankunaman riy, jatun ñankunaman ima, jinataj wajkunata usqhay usqhayta pusaramuy, wasiy junt'a kananpaj, nispa.

²⁴ Noqa niykichej: Ñawpaj wajyarisqa runakunamantaqa manapuni mayqenpis mikhunayta llamirillanqapischu, nispa.

Cristowan purinapajqa tukuy imata saqena

²⁵ Ashkha runa paypa qhepanta jamushajtinku, Jesús paykunaman kutirispa, nerqa:

²⁶ Pipis yachachisqay kayta munajqa noqatapuni astawan munakunawan tiyan. Tatanmanta, mamanmanta, wawanmanta, wawqe pananmanta, kikin kawsayninmantapis astawan noqata munakunawan tiyan.

²⁷ Jinallataj manachus cruzninta oqharispa qhepayta jamun chayqa, mana yachachisqay kayta atinchu, nispa.

²⁸ Chantá rijch'anachinata willaspa, nerqa: Sichus mayqenniykichejpis alto patayoj wasita sayachiyta munanman chayqa, manachu tiyaykukuspa, ñawpajta allinta qhawarinman, qolqen kapunchus manachus, chayta, chay wasita sayachiyta tukuychananpaj?

²⁹ Manachus ñawpajta allinta qhawarikunman chayqa, cimientota churaspaña, mana tukuychayta atinmanchu, chayta rikojkunataj asikunkuman:

³⁰ Kay runaqa wasita qallariyta yachasqa, tukuychaytarí mana atisqachu, nispa.

³¹ Jinallatataj, pi kuraj kamachejpis waj kuraj kamachejwan maqanakoj yaykunanpajqa, manachu ñawpajta qhawarikunraj, atenqanchus manachus atipayta, chayta yachananpaj? Ajinamanta yachanqa sichus 10.000 soldadokunallawan chay ujninta atipayta atinanta, chay ujnin 20.000 soldadokunawan jamushajtin?

³² Mana atipananta reparaspataj, payqa kachakunata kachan chay ujnin kamachej karullapiraj kashajtin, ajinamanta paywan allinyakapunanpaj.

³³ Jina ari, qankunamanta pillapis tukuy tiyapusqanta mana saqejqa mana yachachisqay kayta atinmanchu, nispa.

Kachimanta rijch'anachina

³⁴ Jesús nillarqataj: Kacheqa sumajmin. Chaywanpis kachichus q'aymayanman chayqa, imaynatataj watejmanta k'araman kutinmanri?

³⁵ Mana allinñachu jallp'apaj, nitaj wanupajpis, manachayqa wijch'unallapajña. Pichus nisqayta jap'ikuyta munajqa allinta uyarichun, nispa.