San Lucas 13 - DIOSPA QHELQACHISQAN DEUTEROCANONICAL

Diosman kutirikuna

¹ Chaypachallataj wakin runakuna Jesusman qayllaykuspa, willarqanku imaynatachus Galilea llajtayoj runakuna, Templopi Diosman q'olachispa jaywashajtinku, Pilatoqa wakinta wañuchichisqanta.

² Jesustajrí kuticherqa: Yuyankichejchu chaykuna ajina wañuchisqa kasqankuta, tukuy Galilea llajtayojkunamanta nisqaqa aswan juchasapa kasqankurayku?

³ Manapuni, aswanpis ajinallataj qankunawanpis kanqa, manachus Diosman kutirikunkichej chayqa.

⁴ Jinallataj yuyarikuychej jaqay chunka pusajniyoj runakunamanta, pikunatachus Siloepi torre urmaykuspa p'altarparerqa, chaykunamanta. Qankuna yuyankichejchu paykuna aswan juchasapa kasqankuta Jerusalenpi tiyakojkunamanta nisqaqa?

⁵ Noqarí niykichej mana jinachu kasqanta. Manachus Diosman kutirikunkichej chayqa, ajinallataj qankunawanpis kanqa, nispa.

Mana poqoj higo sach'amanta rijch'anachina

⁶ Jesús uj rijch'anachinatawan nillarqataj: Uj runajta higo sach'an kasqa uva huertanpi. Paytaj poqoyninta pallaj rispa, mana uj higollatapis tarisqachu.

⁷ Chantá huerta qhawajman nisqa: Kinsa watataña jamuni kay sach'api higota mask'aj, manataj tarinichu. K'uturpariy ari. Imapajtaj qhasi manakajta jallp'ata usuchillanqapuniri? nispa.

⁸ Huertata qhawajrí kutichisqa: Patronníy, kay sach'a kay watatawan kallachunraj ari. Noqataj muyuyninta allaspa, wanuchaykurisaj.

⁹ Chantá poqonqachus chayqa, allin kanqa. Manapuni poqojtinrí, k'uturparichillanki, nispa.

Samarina p'unchaypi Jesús uj warmita qhaliyachin

¹⁰ Ujpacha Jesús samarina p'unchaypi tantakuna wasipi yachachisharqa.

¹¹ Chaypitaj uj warmi kasharqa, pichus k'umpullamantaña purej, nitaj imaynamanta cheqanta sayayta atejchu, chunka pusajniyoj watataña uj supay ajinata payta onqochisqanrayku.

¹² Chantá Jesús chay warmita rikuytawan, payta wajyaspa, nerqa: Warmisita, onqoyniykimanta qhaliyachisqaña kanki, nispa.

¹³ Jesús makinwan warmita llankhaykojtinkamataj, chay warmi cheqanta sayaspa, Diosta mayta yupaychayta qallarerqa.

¹⁴ Chaywanpis tantakuna wasita qhawajqa phiñakorqa, Jesús samarina p'unchaypi chay warmita qhaliyachisqanmanta. Jinataj runakunaman nerqa: Semanapi sojta p'unchay tiyan imallatapis ruwanapaj. Chay p'unchaykunallapi jampichikoj jamuychej, amataj samarina p'unchaypeqa, nispa.

¹⁵ Tukuyta Kamachej Jesustajrí payman kuticherqa: Qankuna puraj uya kankichej. Manachu mayqenniykichejpis samarina p'unchaypi wakaykichejta, chayrí burroykichejtapis phaskaraspa yakuta ujyachimunkichej?

¹⁶ Kay warmirí Abrahampa mirayninmanta kajtinpis, Supay Satanás chunka pusajniyoj watataña kay onqoywan payta watasqa. Jina kajtenqa, manachu payta phaskaranay karqa samarina p'unchay kashajtinpis? nispa.

¹⁷ Chayta Jesús nisqanrayku, payta tukuy chejnejkuna p'enqaypi rikhurerqanku. Chaywanpis, runakunaqa kusikorqanku may t'ukuna imakunata Jesús ruwasqanrayku.

Mostaza mujumanta rijch'anachina

¹⁸ Chaymanta Jesús nillarqataj: Imaynataj kanman Diospa kamachiynin? Ima rijch'anachinawantaj chaymanta yachachisunmanri?

¹⁹ Diospa kamachiynenqa mostaza mujuman rijch'akun, mayqentachus uj runa jallp'anpi tarpusqa, chayman. Chay mujoqa wiñasqa sach'ayanankama, p'isqokunataj thansankunapi thapachakusqanku, nispa.

Levaduramanta rijch'anachina

²⁰ Ujtawan Jesús nillarqataj: Diospa kamachiyninmanta yachachishaspa, imawantaj rijch'anachiymanri?

²¹ Diospa kamachiynin levaduraman rijch'akun, mayqentachus uj warmi kinsa arroba jak'uman chajruykusqa tukuynin masata poqochinanpaj, chayman, nispa.

K'ullku punkumanta rijch'anachina

²² Jerusalenman rej jina Jesús llajtakunapi, ranchokunapi ima yachacherqa.

²³ Uj kutitaj uj runa taporqa: Wiraqochíy, pisi runallatachu Dios qhespichenqa? nispa. Jesustaj kuticherqa:

²⁴ Atisqaykichejta ruwaychej Diospa kamachiyninman k'ullku punkunejta yaykunaykichejpaj, imaraykuchus Diospa kamachiyninman ashkha yaykuyta munanqanku, manataj atenqankuchu.

²⁵ Wasiyoj runa punkuta wisq'ajtinña, qankunaqa jawapi rikhurispa, punkuta takankichej: Tukuyta Kamachej, kichaririwayku, nispa. Paytajrí kutichisonqachej: Mana rejsiykichejchu, manataj yachanichu maymantachus kasqaykichejta, nispa.

²⁶ Chaypacharaj qankunaqa ninkichej: Qanwan khuska mikhorqayku, ujyarqaykutaj. Llajtaykoj callenkunapipis qan yachacherqanki, nispa.

²⁷ Paytajrí nisonqachej: Mana yachanichu maymantachus kasqaykichejta. Millayta ruwajkuna, noqamanta karunchakuychej, nispa.

²⁸ Chaypachamá waqayqa, kiru k'arukuypis kanqa, imaraykuchus Dios kamachishajtin, chaypi qankuna Abrahamta, Isaacta, Jacobta, Diosmanta tukuy sut'inchajkunata ima rikunkichej. Qankunarí jawaman wijch'usqa kankichej.

²⁹ Chaypachallataj ashkha runakuna inti llojsimuynejmanta, inti yaykuynejmanta, wichaynejmanta, uranejmanta ima jamonqanku, chantá Diospa kamachiyninpi mikhoj tiyarikonqanku.

³⁰ Kaytawan yachaychej: Kunan qhepapi kajkunaqa chaypacha ñawpajpi rikhurenqanku. Ñawpajpi kajkunatajrí qhepapi rikhurenqanku, nispa.

Jesús Jerusalenrayku waqan

³¹ Chay p'unchayllapitaj wakin fariseokuna chayamuspa, Jesusta nerqanku: Ripuy kaymanta, imaraykuchus kuraj kamachej Herodes wañuchisuyta munashan, nispa.

³² Jesustajrí kuticherqa: Rispa, jaqay atoj jina runaman kayta willamuychej: Jesús nisunki: Noqaqa kunan, q'ayapis supaykunata runamanta qharqosaj, onqosqakunatataj qhaliyachisaj ima. Minchhatajrí ruwanayta tukusaj.

³³ Chaywanpis noqa purinayraj tiyan kunan, q'aya, minchhatawan ima, imaraykuchus Diosmanta sut'inchajqa mana wañuyta atinmanchu Jerusalenmanta jawapeqa, nispa.

³⁴ Ay Jerusalén, qanqa Diosmanta sut'inchajkunata wañuchej llajta kanki. Qanman Diospa kachamusqankunatapis rumiwan ch'anqaykuspa, wañuchillankitaj. Mashkha kutitachus wawaykikunata tantayta munarqani, imaynatachus wallpa chillwinkunata lijran uraman tantaykun, ajinata. Qantajrí mana munarqankichu.

³⁵ Kunanrí qhawariychej: Wasiykichejqa ch'inpacha qhepakonqa. Chayrayku niykichej: Manaña ujtawan rikuwankichejchu, ninaykichejkama: Tukuyta Kamachej Diospa sutinpi jamojta jatunchaychej, nispa.