San Lucas 1 - DIOSPA QHELQACHISQAN DEUTEROCANONICAL

Lucas imaraykuchus qhelqasqanta sut'inchan

¹ Ashkhaña qhelqayta munarqanku Dios noqayku ukhupi imakunatachus ruwarqa, chaymanta.

² Chayta qhelqarqanku Jesuspa ñawpa yachachisqankuna willasqankuman jina, pikunatachus Jesús nisqanta willaramunankupaj kacharqa, chaykunamanta.

³ Noqapis chaymanta qhelqayta munallarqanitaj. Chayrayku qallariymantapacha imaynachus kasqanta sumajta tapurispa, chantá allinta yachaspa qhelqamuyki, may respetasqa Teófilo.

⁴ Jinamanta qanpis aswan allinta yachanki imatachus yachachisorqanku, chay cheqa kasqanta.

Bautizaj Juan paqarinanmanta

⁵ Kuraj kamachej Herodes Judea jap'iypi kamachishajtin, uj sacerdote karqa Zacarías sutiyoj, Abiaspa mit'anmanta. Warmenqa Elisabet sutiyoj karqa, Aaronpa ayllullanmantataj.

⁶ Qhari warmi Diospa ñawpaqenpi cheqan kawsayniyoj karqanku, Diospa nisqanman jina kawsakuspa, ni pejpa k'aminan.

⁷ Chaywanpis mana wawayoj karqanku, Elisabet mana wijsallikuyta atisqanrayku, iskayninkutaj allin machuña karqanku.

⁸ Chantá sacerdote Zacarías Templopi mit'anpi Diospaj ruwananta junt'ashajtin,

⁹ usunkuman jina, sorteopi payman chayarqa Diosman Templopi inciensota q'oshñichina.

¹⁰ Pay inciensota q'oshñichinankamataj, ashkha runakuna jawapi Dioswan parlarikusharqanku.

¹¹ Jinallapi, Zacariasman Tukuyta Kamachej Diospa angelnin rikhurerqa incienso q'oshñichina altarpa pañannejpi sayashaj.

¹² Chay angelta rikuspa, Zacariasqa manchaywan kharkatiterqa.

¹³ Chantá ángel payta nerqa: Zacarías, ama mancharikuychu. Mañakusqaykita Diosqa uyarinña. Warmiyki Elisabet wawayoj kanqa, paytataj Juan sutiwan sutichanki.

¹⁴ Qanpajqa ancha kusiypuni kanqa, jinallataj wajkunapajpis wawayki paqarisqanmanta,

¹⁵ imaraykuchus pay jatunpaj qhawasqa kanqa Tukuyta Kamachej Diospa ñawpaqenpi. Mana vinota, nitaj ima machachej ujyanata ujyanqachu. Chantá mamanpa wijsanmantapacha Santo Espíritoj kamachiyninpi kanqa.

¹⁶ Aswan qhepamanqa pay ashkha israelitakunata Tukuyta Kamachej Diosninkuman kutirichenqa.

¹⁷ Jinataj Diosmanta ñawpa sut'inchaj Elías imaynatachus Diospa Espiritunpa kamachiyninpi kaspa atiyniyoj karqa, ajinallataj Juanpis kanqa. Chantá payqa tata mamakunaj sonqonkuta llamp'uyachispa, wawankunawan allinyachenqa, mana kasukojkunatataj Diosta kasuyta yachachenqa. Ajinamanta runakunata allinta wakichenqa Tukuyta Kamachej Diosta jap'ikunankupaj, nispa.

¹⁸ Zacariasrí angelta taporqa: Imaynatataj chay junt'akunanta yachasajri? Noqaqa ancha machuña kani, warmiypis payaña, nispa.

¹⁹ Angeltaj kuticherqa: Noqaqa Gabriel kani, jinataj Diospa ñawpaqenpipuni kashani. Paymin kay sumaj willayta willasunaypaj kachamuwan.

²⁰ Chaywanpis nisusqayta mana jap'ikusqaykirayku opayanki, nitaj parlarinkichu wawayki paqarinankama. Kay nisqaytaj junt'akonqa maychus kasqanman jina, nispa.

²¹ Chaykama runakunaqa jawapi Zacariasta maytapuni suyasharqanku, anchata Templo ukhupi qhepakusqanrayku.

²² Llojsimuspatajrí, Zacariasqa mana parlayta aterqachu. Chaynejta paykuna repararqanku imachá payman Templo ukhupi rikhurisqanta. Zacariastaj señallawanña entiendechikuyta munarqa.

²³ Mit'an Templopi junt'akojtintaj, Zacariasqa wasinman kutiporqa.

²⁴ Chaymanta qhepamantaj Elisabet warmenqa wijsallikorqa. Jinapi phishqa killa junt'ata mana wasinmanta llojserqachu. Paytaj nerqa:

²⁵ Tukuyta Kamachej Dios ruwan kaytaqa, mana wawayoj kasqaymanta runa ama pisipaj qhawanawankupaj, nispa.

Jesús paqarinanmanta willay

²⁶ Chaymanta sojta killanman, Diosqa ángel Gabrielta Galileapi Nazaret llajtamanñataj kacharqa.

²⁷ Chaypi manaraj qharita rejsej María sutiyoj uj sipas tiyakorqa. Payqa casarakunanpaj parlapayasqa karqa Josewan, pichus ñawpa kuraj kamachej Davidpa mirayninmanta karqa, chaywan.

²⁸ Chantá maypichus María kasharqa, chayman yaykuspa, ángel payta napaykorqa: Diospa khuyakusqan warmi, tukuy sonqo napaykuyki, nispa.

²⁹ Angelpa nisqanta uyarispa, María t'ukorqa, sonqonpitaj tapukorqa angelpa napaykusqan imatachus niyta munasqanta.

³⁰ Angeltajrí nerqa: María, ama mancharikuychu. Dios sumajta qhawarimusunki.

³¹ Kunantaj wijsayoj rikhurispa, uj qhari wawata paqarichikunki, paytataj Jesús sutiwan sutichanki.

³² Pay allin rejsisqa kanqa, paytataj, Patapi Kaj Diospa Churin, nispa sutichanqanku. Tukuyta Kamachej Diostaj ñawpa tatan Davidpa kamachinan tiyanata payman qonqa.

³³ Chantá payqa israelitakunata wiñaypaj kamachenqa, kamachiynintaj mana jayk'ajpis tukukonqachu, nispa.

³⁴ Chaymanta Mariaqa angelta taporqa: Chantá imaynataj chay kanqari? Noqaqa manaraj qharita rejsinichu, nispa.

³⁵ Angeltaj kuticherqa: Santo Espíritu qanman jamonqa, Diospa atiynintaj llanthuykusonqa. Chayrayku paqarichikunki, chay wawaqa Diospaj t'aqasqa kanqa, Diospa Churin sutichasqataj.

³⁶ Jinallataj aylluykimanta Elisabet payaña kashaspapis, qhari wawayoj kanqa. Pitachus mana wawayojchu, nispa nej kanku, kunan chay warmeqa sojta killa onqojña.

³⁷ Chayqa ajina, imaraykuchus Diospaj mana imapis mana atikojqa kanchu, nispa.

³⁸ Chaypacha María nerqa: Noqaqa Tukuyta Kamachej Diospa kamachin kani. Chayrayku paypa munaynin noqawan ruwasqa kachun nisqaykiman jina, nispa. Chantá angelqa riporqa.

Mariaqa Elisabetta watukun

³⁹ Chaymanta mana unaymanchu Mariaqa usqhayllata rerqa Judea orqorara cheqapi uj llajtaman, maypichus Zacarías tiyakorqa, chayman.

⁴⁰ Zacariaspa wasinman yaykuspataj, Elisabetta napaykorqa.

⁴¹ Jinapi Mariajpa napaykusqanta Elisabet uyarejtin, wawaqa Elisabetpa wijsan ukhupi kuyurerqa. Elisabettaj Santo Espíritoj kamachiyninpi rikhurerqa.

⁴² Chantá Elisabetqa jatunmanta parlaspa, Mariata nerqa: Diosqa tukuy warmimanta nisqaqa qanta astawan saminchasunki. Wijsaykipi kaj wawatapis saminchallantaj.

⁴³ Pitaj noqa kasqani, Tukuyta Kamachejniypa maman watukunawanpajri?

⁴⁴ Napaykuwasqaykita uyarejtiykama, wawayqa wijsay ukhupi kusiywan kuyurin.

⁴⁵ Kusikuyniyojmin kanki Diospa nisqanta jap'ikusqaykirayku, imaraykuchus Tukuyta Kamachej Diospa nisusqanqa junt'akonqapuni, nispa.

⁴⁶ Chantá María nerqa: Sonqoyqa Tukuyta Kamachej Diosniyta jatunchan.

⁴⁷ Espirituytaj mayta kusikun qhespichiwaj Diosniypi.

⁴⁸ Dios allinpaj qhawawarqa, noqa mana kasu ruwana kamachillan kashajtiypis. Chayrayku kunanmantapacha tukuy runaj miraynin noqata niwanqanku kusikuyniyoj kasqayta.

⁴⁹ Tukuy Atiyniyoj Dios may t'ukuna imakunata noqapaj ruwan. Sutenqa May Llimphu Kaj Dios.

⁵⁰ Diospa khuyakuynin kallanpuni miraymanta mirayman, pikunachus may respetowan payta qhawajkunapaj.

⁵¹ Makinwan Dios atiyninta rikuchin, ch'eqerachintaj runaykachajkunata, churanakojkunata ima.

⁵² Payllataj atiyniyojkunata kamachinanku tiyanamanta urayk'uchin, llamp'u sonqoyoj runakunatatajrí pataman oqharin.

⁵³ Jinallataj Dios yarqhasqa runakunata allin imakunawan junt'achin, qhapaj runakunatatajrí mana imayojta kachapun.

⁵⁴ Diosqa khuyakuyninmanta yuyarikuspa, kamachin Israelta yanaparqa,

⁵⁵ imaynatachus ñawpa tatanchejkuna Abrahamman, tukuy paypa mirayninman ima wiñaypaj parlasqanman jina. Ajinata nispa, María Diosta jatuncharqa.

⁵⁶ Chantá María kinsa killata jina Elisabetwan qhepakorqa. Chaymantataj wasinman kutiporqa.

Bautizaj Juanpa paqarisqan

⁵⁷ Elisabetpa onqokunan chayamojtin, qhari wawata paqarichikorqa.

⁵⁸ Jinapi kawsaqenkuna, ayllunkuna ima Dios imaynatachus Elisabetta sumajta khuyarikusqanta uyarispa, paywan kusikorqanku.

⁵⁹ Chantá paykuna pusaj p'unchayninman wawata circuncidachej jamorqanku, jinapitaj wawata tatan Zacariaspa sutinwan sutichayta munarqanku.

⁶⁰ Mamantajrí nerqa: Mana. Wawaj sutenqa Juan kanqa, nispa.

⁶¹ Chay runakunarí payta nerqanku: Mana pipis aylluykipi chay sutiyoj kanchu, nispa.

⁶² Chantá wawaj tatanta señawan taporqanku ima sutiwanchus sutichayta munasqanta.

⁶³ Zacariastaj tablillata mañakuspa, chaypi qhelqarqa: Sutenqa Juan kanqa, nispa. Chantá tukuyninku t'ukorqanku.

⁶⁴ Chay ratopachataj Zacariaspa qallun phaskarakaporqa, parlaspataj, Diosta yupaychayta qallarerqa.

⁶⁵ Chaymanta tukuy chay qayllapi tiyakojkuna t'ukorqanku, chaytataj tukuy Judea orqorarapi willararqanku.

⁶⁶ Chayta uyarejkunataj sonqonkupi tapukorqanku: Chantá kay wawa wiñaspa, pipunitaj kanqari? nispa, imaraykuchus Diospa atiynin paywan karqa.

Zacarías takin

⁶⁷ Chaypacha Juanpa tatan Zacariasqa Santo Espíritoj kamachiyninpi rikhurispa, kay jinata sut'incharqa:

⁶⁸ Yupaychasqa kachun Israelpa Tukuyta Kamachej Diosnin, imaraykuchus pay jamun awqankoj makinmanta paykunata kacharichej.

⁶⁹ Diosqa kamachin Davidpa mirayninmanta atiyniyoj uj qhespichejta kachamuwanchej,

⁷⁰ imaynatachus ñawpa tiempopi ajllasqa sut'inchajkunaj siminnejta sut'incharqa, ajinata.

⁷¹ Kunantaj awqanchejkunamanta kacharichiwasunchej, tukuy chejnikuwajninchejpa makinmantawan.

⁷² Diosqa ñawpa tatanchejkunata khuyaspa, sumaj tratota paykunawan ruwasqanmanta yuyarikorqa.

⁷³ Dios tiluspa, ñawpa tatanchej Abrahamta nerqa awqanchejmanta kacharichisqa kananchejta.

⁷⁴ Ajinamanta mana manchachikuspa, Diospa munaynintapuni ruwayta atisunchej,

⁷⁵ Diospa ñawpaqenpi may llimphuta purispa, jinallataj cheqanta ruwaspa.

⁷⁶ Qanrí wawáy, Patapi Kaj Diospa sut'inchajnin sutichasqa kanki, imaraykuchus paypa ñawpaqenta rispa, ñanninta wakichinki.

⁷⁷ Qanqa ayllunman willanki Dios paykunata qhespichinanta, juchankutapis pampachananta ima.

⁷⁸ Diosninchejqa jatun khuyakuyninrayku patamantapacha qhespichejta kachamuwanchej sut'iyaypi inti llojsimoj jina k'anchanawanchejpaj.

⁷⁹ Pay jamun laqhapi tiyakojkunata, wañuypa llanthunpi kajkunatapis k'anchananpaj. Chantá puriyninchejta cheqanchaspa, allinpi kawsayta qowasunchej. Ajinata nispa, Zacariasqa Diosta jatuncharqa.

⁸⁰ Chay qhepata chay wawa wiñarqa, Diosmanta yachaspataj, kallpachakorqa. Runayaspataj, pay ch'innejpi tiyakorqa, Israel aylluman rejsichikunan p'unchaykama.