Levítico 8 - DIOSPA QHELQACHISQAN DEUTEROCANONICAL

Aaronwan, churinkunawan Tata Diospaj t'aqasqa

¹ Tata Dios Moisesta nillarqataj:

² Aaronta, churinkunatawan ima wajyachiy. Chantá sacerdotekunapaj p'achata, jawina aceiteta ima oqharikuy, jinallataj jucha pampachasqa kananpaj jaywana torillota, iskay corderota, canastapi mana levadurayoj t'antatawan.

³ Chantá tukuy israelitakunata Dioswan Tinkukuna Toldo punkuman tantay, nispa.

⁴ Jinataj Moisesqa Tata Diospa kamachisqanman jina ruwarqa. Israelitakunataj Dioswan Tinkukuna Toldo punkuman tantakamorqanku.

⁵ Chantá Moisesqa tukuy israelitakunata nerqa: Tata Diosqa kayta ruwananchejta kamachin, nispa.

⁶ Chaymanta Moisesqa Aaronta, churinkunatawan ima qayllachimuspa, paykunata yakuwan mayllarqa.

⁷ Chantá Aaronman p'achata churarqa, chumpiwantaj chumpiykorqa. Patanmantaj ponchoman rijch'asqa qhatanawan qhataykorqa. Chaypa patanmantaj unkuta churaykorqa, jinaspataj, unkoj watanallanwantaj sumajta wataykorqa.

⁸ Chaymantataj unkoj patanman pecherata warkhuykorqa. Pecheramantaj Diosta tapuna Urimta chantá Tumimta ima churarqa.

⁹ Moisesqa Aaronpa umanmantaj chhoqo ch'uluta churarqa, chay ch'uloj ñawpaqenmantaj qorimanta qhelqasqa tablitata churaykorqa, Diospaj t'aqasqa kasqan yachakunanpaj.

¹⁰ Chantá Moisesqa Diospaj t'aqanapaj jawina aceiteta jap'ispa, Dioswan Tinkukuna Toldota jawerqa. Jawillarqataj toldo ukhupi tukuy imachus kajta, ajinata jawispataj, Tata Diospaj t'aqarqa.

¹¹ Chay kikin aceitellawantaj qanchis kutita altarta ch'ajchorqa. Chaymantataj Moisés altarta, chaypi kaj tukuy imatawan aceitewan jawerqa. Jawillarqataj broncemanta ruwasqa jatun ch'illamita, sayanantawan, Tata Diospaj t'aqasqa kananpaj.

¹² Chantá Moisesqa Aaronpa umanman jawina aceiteta jich'aspa, sacerdote kananpaj t'aqarqa.

¹³ Chaymantataj Moisesqa Aaronpa churinkunatañataj wajyaspa, paykunaman p'achata churaykorqa, chantá chumpiwan chumpiykorqa. Jinaspataj, umankuman chhoqo ch'uluta churaykorqa, Tata Dios kamachisqanman jina.

¹⁴ Chantá Moisés kamacherqa jucha pampachasqa kananpaj jaywana torillota apamunankuta. Apamojtinkutaj, Aaronwan, churinkunawan ima torilloj umanman makinkuta churarqanku.

¹⁵ Chaymantataj Moisés torillota ñak'arqa. Chantá torilloj yawarninta jap'erqa, maki ruk'ananta yawarman chhapuspataj, altarpa tawantin wajrankunata jawerqa. Puchoj yawartataj altarpa uranman jich'arqa. Ajinata ruwaspa, Moisés altarta Tata Diospaj t'aqarqa, chaypi tukuy runaj juchan pampachasqa kananpaj.

¹⁶ Chantá Moisés uywa ñak'asqaj tukuy ch'unchulanmanta wiranta orqhorqa. Orqhollarqataj uywaj k'iwichanpi kaj wiranta, iskaynin lurunninpi wiranta ima. Jinaspataj tukuyninta altarpi q'olacherqa.

¹⁷ Ñak'asqa uywamanta puchoj aychanta, qaranta, wanuntawan imarí jaramanta jawaman orqhospa, ruphacherqa. Ajinata Moisés ruwarqa, Tata Diospa kamachisqanman jina.

¹⁸ Chaymanta Moisesqa q'olachispa jaywanapaj corderota apamunankuta nerqa. Apamojtinkutaj, Aaronwan, churinkunawan ima uywaj umanman makinkuta churarqanku.

¹⁹ Chantá Moisés uywata ñak'aspa, altarta, jinallataj altarpa muyuyninta ima ñak'asqa uywaj yawarninwan ch'ajchorqa.

²⁰ Chaymantataj Moisesqa corderota chhikan chhikanta khuchurarqa. Chantá umanta, wiranta ima khuchusqa aychatawan khuska q'olacherqa.

²¹ Chantá ñak'asqa corderoj ch'unchulanta, piernantawan ima yakuwan mayllaspa, tukuyninta altarpi q'olacherqa, ima munayta q'apashaj Tata Diosman jaywanata jina. Ajinata Moisés ruwarqa, Tata Diospa kamachisqanman jina.

²² Chaymanta Moisés Tata Diospaj t'aqasqa kanapaj jaywana ujnin kaj corderotañataj apachimorqa. Chantá Aaronwan, churinkunawan ima, uywaj umanman makinkuta churarqanku.

²³ Chaymantataj Moisés corderota ñak'aspa, uj chhika yawarwan Aaronpa paña ninrinpa uranta jawerqa. Jinallataj Aaronpa paña makinpa machu ruk'ananta, paña chakinpa machu ruk'anantawan ima jawillarqataj.

²⁴ Chantá Moisesqa Aaronpa churinkunata qayllamunankuta nerqa. Paykuna qayllajtinkutaj, paña ninrinkoj uranta, paña makinkoj machu ruk'anankuta, chantá paña chakinkoj machu ruk'anankutawan ima yawarwan jawirarqa. Jinaspataj, altarta, muyuynintawan puchoj yawarwan ch'ajchorqa.

²⁵ Chaymantataj Moisesqa ñak'asqa uywamanta wiranta, chupanta, ch'unchulanmanta tukuy wiranta, k'iwichanpi wiranta, iskaynin lurunninmanta wiranta, paña piernantawan ima jap'erqa.

²⁶ Chantá Tata Diospa ñawpaqenpi kaj mana levadurayoj ruwasqa t'antayoj canastamanta mana levadurayoj tortillata orqhorqa. Orqhollarqataj aceitepi chayachisqa tortillata, aceitewan jawisqa tortillatawan. Chaykunatataj wira pataman, paña pierna pataman ima churarqa.

²⁷ Chantá chay tukuyta Aaronman, churinkunaman ima jaywarqa, paykuna Tata Diosman ikhasqa jaywanata jaywanankupaj.

²⁸ Chaymantataj Moisesqa chay ikhasqa jaywanata makinkumanta jap'ispa, q'olachispa jaywana uywatawan khuska altarpi q'olacherqa. Chay karqa Aaronwan, churinkunawan Tata Diospaj t'aqasqa kasqankumanta jaywana. Chay q'olachispa jaywanaj ima munay q'apaynintaj Tata Diospa sonqonman chayarqa.

²⁹ Chantá Moisés uywaj qhasqonta oqharerqa, ikhaspataj, Tata Diosman jaywarqa. Tata Diospa kamachisqanman jina, Diospaj t'aqasqa kanapaj jaywasqa corderomanta qhasqon Moisespaj kanan karqa.

³⁰ Chantá Moisés jawina aceiteta, chantá altar patapi kashaj yawartawan oqharispa, Aaronta, churinkunatawan ima ch'ajchorqa. Jinallataj sacerdote p'achankutapis ch'ajchullarqataj. Ajinata Moisesqa Aaronta, churinkunata, chantá sacerdote p'achankutawan ima Tata Diospaj t'aqarqa.

³¹ Chantá Moisés Aaronta, churinkunatawan ima nerqa: Dioswan Tinkukuna Toldo punkupi kay aychata chayachispa, Tata Diospaj t'aqasqa t'anta canastapi kashan, chaytawan mikhuychej. Ajinata ruwankichej Tata Dios kamachisqanman jina: Chay aychataqa Aaronwan, churinkunawan ima mikhonqanku, nispa.

³² Chantataj puchoj aychata, puchoj t'antatawan ima q'olachinkichej.

³³ Qankunaqa Dioswan Tinkukuna Toldo punkumanta qanchis p'unchayta ama llojsinkichejchu, imaraykuchus qanchis p'unchaypi Diospaj t'aqasqa kasqaykichej junt'akonqa.

³⁴ Tata Dios kamacherqa juchaykichej pampachasqa kananpaj kunan imatachus ruwarqanchej, chayta ruwanata.

³⁵ Chayrayku qankunaqa qanchis p'unchay junt'ata, tuta p'unchay Dioswan Tinkukuna Toldo punkupi kanaykichej tiyan. Ama wañuchisqa kanaykichejpaj, Tata Diospa kamachisqanta kasuychej. Ajinata Tata Dios kamachiwarqa, nispa.

³⁶ Chantá Aaronwan, churinkunawan ima Moisesnejta Tata Dios tukuy kamachisqanta ruwarqanku.