Levítico 4 - DIOSPA QHELQACHISQAN DEUTEROCANONICAL

Jucha pampachasqa kananpaj Diosman jaywana

¹ Tata Diosqa Moisesta nillarqataj:

² Israelitakunata niy: Sichus pipis mana reparakuspa, Tata Diospa mayqen kamachisqanta p'akispa juchallinman chayqa, kay jinata ruwanqa.

³ Sichus kuraj kaj sacerdote juchallinman chayqa, tukuy israelitakuna juchayojllataj rikhurenqanku. Jina kajtenqa, juchallisqan pampachasqa kananpaj sacerdoteqa mana iman imanasqa torillota Tata Diosman jaywanqa.

⁴ Torillotaqa Tata Diospa ñawpaqenman, Dioswan Tinkukuna Toldo punkuman apamonqa. Chantá torilloj umanman makinta churaspa, Tata Diospa ñawpaqenpi ñak'anqa.

⁵ Chantá kuraj kaj sacerdotellataj torilloj yawarninmanta uj chhikata Dioswan Tinkukuna Toldo ukhuman apanqa.

⁶ Chaypitaj kuraj kaj sacerdoteqa maki ruk'ananta yawarman chhapuspa, Tata Diospa ñawpaqenpi cortina cheqanejman qanchis kutita ch'ajchonqa.

⁷ Chantá sacerdoteqa Tata Diospa ñawpaqenpi, Dioswan Tinkukuna Toldopi inciensota q'oshñichina altarpa wajrankunatapis yawarwan jawillanqataj. Puchoj yawartataj q'olachina altarpa uranman jich'aykonqa, mayqenchus Dioswan Tinkukuna Toldo punkunejpi kashan, chay altarpa uranman.

⁸ Chantá juchan pampachasqa kananpaj, kuraj kaj sacerdoteqa ñak'asqa torillomanta, ch'unchulanmanta tukuy wiranta, llikha wiranta ima orqhonqa.

⁹ Jinallataj torilloj iskaynin lurunninta, lurunninpi wiranta, ch'illanpi wiranta, k'iwichanpi wirantawan ima orqhollanqataj. Chaykunataqa lurunnintawan khuska orqhonqa.

¹⁰ Chaytaqa imaynatachus k'achata kawsakuy jaywanata jaywanapaj ñak'asqa torillomanta orqhonku, ajinallatataj orqhonqa. Chantá kuraj kaj sacerdoteqa chaykunata altar patapi q'olachenqa.

¹¹ Chaymantataj torilloj qaranta, tukuy aychanta, umanta, chakinta, ch'unchulanta, wanunta ima

¹² torillojta tukuy iman kaj chhikata, jaramanta jawapi uj llimphuchasqa cheqaman orqhonqa, maypichus ushphata jich'anku, chayman. Chaypitaj ushpha pataman llant'ata churaspa, chaykunata ruphachenqa.

¹³ Sichus tukuy israelitakuna mana yuyasqallamanta juchallikunkuman, nitaj pipis reparanmanchu Tata Diospa kamachisqanmanta ujninta p'akisqankuta chayqa, ajina kajtinpis juchayojpuni kanqanku.

¹⁴ Juchallisqankuta reparakuytawan, juchanku pampachasqa kananpaj, tukuyninku uj torillota Diosman jaywananku tiyan. Torillotaqa Dioswan Tinkukuna Toldo punkuman apanqanku.

¹⁵ Chaypitaj israelitakunaj kurajninkuna Tata Diospa ñawpaqenpi torilloj umanman makinkuta churanqanku. Chantá chaypi torillota ñak'anqanku.

¹⁶ Jinaspataj kuraj kaj sacerdoteqa torilloj yawarninmanta uj chhikata Dioswan Tinkukuna Toldo ukhuman apanqa.

¹⁷ Chantá pay maki ruk'ananta yawarman chhapuspa, Tata Diospa ñawpaqenpi, cortina cheqanejman qanchis kutita ch'ajchonqa.

¹⁸ Chaymantataj Dioswan Tinkukuna Toldopi, Tata Diospa ñawpaqenpi kashaj inciensota q'oshñichina altarpa wajrankunata uj chhika yawarwan jawenqa. Puchoj yawartataj Dioswan Tinkukuna Toldoman yaykuna punkupi q'olachina altarpa uranman jich'anqa.

¹⁹ Chantá ñak'asqa torillomanta tukuy wiranta orqhospa, altarpi chayta q'olachenqa.

²⁰ Chay ñak'asqa torillowan ruwanqa, kuraj kaj sacerdote juchan pampachasqa kananpaj ñak'asqa torillowan imaynatachus ruwarqa, ajinallatataj. Ajinata sacerdoteqa israelitakunaj juchanku pampachasqa kananpaj, Tata Diosman jaywanqa. Juchankutaj pampachasqa kanqa.

²¹ Chaymantataj ñak'asqa torillota jaramanta jawaman orqhospa, q'olachenqa, imaynatachus ñawpaj kaj torillowan ruwarqanku, ajinallatataj. Chayqa israelitakunaj juchallisqanku pampachasqa kananpaj jaywanamin.

²² Sichus uj kamachej mana reparakuspa, Tata Diosninpa kamachisqanta p'akispa juchallinman chayqa, juchayojmin kanqa.

²³ Juchallisqanta reparakuytawantaj, mana iman imanasqa uj chivota Diosman jaywananpaj apamonqa.

²⁴ Chantá kamachejqa chivoj umanman makinta churaytawan, Tata Diospa ñawpaqenpi chay chivota ñak'anqa, q'olachinapaj maypichus uywata ñak'anku, chaypi. Chayqa jucha pampachasqa kananpaj Diosman jaywanamin.

²⁵ Chaymantataj sacerdoteqa jucha pampachasqa kananpaj ñak'asqa uywaj yawarninman maki ruk'ananta chhapuspa, q'olachinapaj altarpi wajrakunata jawenqa. Puchoj yawartataj q'olachinapaj altarpa uranman jich'anqa.

²⁶ Chantá ñak'asqa chivoj tukuynin wiranta altarpi q'olachenqa, imaynatachus k'achata kawsakuy jaywana uywa ñak'asqa wirawan ruwanku, ajinallatataj. Sacerdoteqa ajinata ruwaspa, kamachejpata juchan pampachasqa kananta tarenqa, kamachejpa juchantaj pampachasqa kanqa.

²⁷ Sichus mayqen runallapis mana reparakuspa, Tata Diospa kamachisqanta p'akispa juchallinman chayqa, juchayojmin kanqa.

²⁸ Juchallisqanta reparakuytawantaj, juchan pampachasqa kananpaj Diosman jaywananpaj mana iman imanasqa uj cabrata apamonqa.

²⁹ Chantá cabraj umanman makinta churaytawan, q'olachinapaj maypichus uywata ñak'anku, chaypi cabrata ñak'anqa.

³⁰ Chaymantataj sacerdoteqa jucha pampachasqa kananpaj ñak'asqa uywaj yawarninman maki ruk'ananta chhapuspa, altarpa wajrankunata jawenqa. Puchoj yawartataj altarpa uranman jich'anqa.

³¹ Chantaqa cabraj tukuy wiranta wirachanqa, imaynatachus Tata Diosman k'achata kawsakuy jaywanata jaywanapaj ñak'asqa uywaj wiranwan ruwanku, ajinallatataj. Sacerdoteqa ajinata ruwaspa, runaj juchan pampachasqa kananta tarenqa, chay runaj juchantaj pampachasqa kanqa.

³² Sichus uj runa juchanrayku jaywananpaj uj ovejata apamunman chayqa, mana iman imanasqata apamunan tiyan.

³³ Chantá ovejaj umanman makinta churaspa, q'olachinapaj maypichus uywata ñak'anku, chaypi ovejata ñak'anqa. Chayqa jucha pampachasqa kananpaj Diosman jaywanamin.

³⁴ Chaymantataj sacerdoteqa jucha pampachasqa kananpaj ñak'asqa ovejaj yawarninman maki ruk'ananta chhapuspa, q'olachina altarpa wajrankunata jawenqa. Jinaytawantaj, puchoj yawarta altarpa uranman jich'anqa.

³⁵ Chantá ñak'asqa ovejaj tukuy wiranta wirachanqa, imaynatachus k'achata kawsakuy jaywana uywa ñak'asqawan ruwanku, jinallatataj. Jinaspataj, sacerdoteqa Tata Diosman ch'aki mikhuy jaywanaj patanpi wirata altarpi q'olachenqa. Sacerdoteqa ajinata ruwaspa, runaj juchallisqan pampachasqa kananta tarenqa. Chay runaj juchantaj pampachasqa kanqa, nispa.