Levítico 3 - DIOSPA QHELQACHISQAN DEUTEROCANONICAL

K'achata kawsakuy jaywana

¹ Sichus mayqenpis uywanmanta wakata, chayrí torota k'achata kawsakuy jaywanata jaywananpaj Tata Diosman apamunman chayqa, mana iman imanasqa uywata apamunan tiyan.

² K'achata kawsakuy jaywanata Tata Diosman apamojqa uywaj umanman makinta churanqa. Chaymantataj Dioswan Tinkukuna Toldo punkupi chay uywata ñak'anqa. Aaronpa churinkunamanta Sacerdotekunataj altar patata, chantá tukuy muyuynintinta ima uywaj yawarninwan ch'ajchonqa.

³ Chantá pichus Tata Diosman k'achata kawsakuy jaywanata apamojqa uywaj ch'unchulanpi wiranta,

⁴ iskaynin lurunninta, lurunninpi wiranta, ch'illanpi wiranta, k'iwichanpi wiranta ima q'olachispa jaywanqa. Chaytaqa lurunnintawan khuska orqhonqa.

⁵ Tukuy chaytaqa Aaronpa mirayninmanta sacerdotekuna altarpi q'olachenqanku, uywa ñak'asqa q'olachinatawan khuska. Chay q'olachisqa jaywanaqa Tata Diospaj ima munay q'aparishaj jaywana kanqa.

⁶ Sichus mayqenpis ovejanmanta orqotapis, chinatapis, Tata Diosman k'achata kawsakuy jaywanata jaywananpaj apamunman chayqa, uywaqa mana iman imanasqa kanan tiyan.

⁷ Sichus Diosman jaywananpaj corderota apamunman chayqa, Tata Diospa ñawpaqenman apamuchun.

⁸ Pichus jaywanata apamojqa uywaj umanman makinta churanqa, chantá Dioswan Tinkukuna Toldo punkupi ñak'anqa. Aaronpa churinkunamanta sacerdotekunataj uywaj yawarninwan altarta, chantá tukuy muyuyninta ima ch'ajchonqanku.

⁹ Pichus k'achata kawsakuy jaywanata apamojqa uywaj wiranta, wasa tullunmantapacha khuchusqa chupanta, chantá tukuy wijsanninmanta wiranta ima q'olachispa, Tata Diosman jaywanqa.

¹⁰ Jinallataj uywaj iskaynin lurunninta, lurunninpi wiranta, ch'illanpi wiranta, k'iwichanpi wiranta ima q'olachenqa. Chaytaqa lurunnintawan khuskata orqhonqa.

¹¹ Chantá sacerdoteqa chay tukuyta altar patapi q'olachenqa. Chayqa Tata Diospaj misk'i mikhuy q'olachisqa jaywana kanqa.

¹² Sichus pipis Diosman jaywanapaj uj cabrata apamunman chayqa, Tata Diospa ñawpaqenman apamuchun.

¹³ Chantá pichus apamojqa uywaj umanman makinta churaspa, Dioswan Tinkukuna Toldo punkupi ñak'anqa. Aaronpa churinkunamanta sacerdotekunataj altarta, chantá tukuy muyuynintinta ima cabraj yawarninwan ch'ajchonqanku.

¹⁴ Chaymanta pichus Tata Diosman jaywananpaj uywata apamojqa uywaj ch'unchulanpi wiranta,

¹⁵ iskaynin lurunninta, lurunninpi wiranta, ch'illanpi wiranta, k'iwichanpi wiranta ima Tata Diospaj q'olachenqa. Uywaj wirantaqa, lurunnintawan khuska orqhonqa.

¹⁶ Chantá sacerdoteqa chay tukuyta altar patapi q'olachenqa. Chayqa Tata Diospaj misk'i mikhuy q'olachisqa jaywana jina kanqa, ima munayta q'aparishaj. Uywaj tukuy wiranqa Tata Diospaj kanqa.

¹⁷ Kay kamachisqayqa, maypichá tiyakunkichej, chaypi qankunapaj chantá mirayniykichejpaj ima wiñaypaj kanqa. Amapuni wirata, nitaj yawartapis mikhunkichejchu, nispa.