Levítico 26 - DIOSPA QHELQACHISQAN DEUTEROCANONICAL

Dios nin kasukojkunata yanapananta

¹ Tata Dios israelitakunata nillarqataj: Ama ni imaman rijch'akoj lantikunata ruwakunkichejchu. Nillataj llajtaykichejpi yupaychana rumita sayachinkichejchu. Amallataj rumipi warawata ruwankichejchu. Ama chaykunaman qonqorikunkichejchu, imaraykuchus noqamin Tata Diosniykichej kani.

² Samarina p'unchayniypi samarinkichejpuni. Noqata yupaychana cheqatapis jatun respetowan qhawankichej. Noqamin Tata Dios kani.

³ Sichus kamachisqayman jina purinkichej, kamachisqayta kasuspataj chayman jina ruwankichej chayqa,

⁴ noqa jallp'aykichejman maychus tiemponpi parachimusaj. Jallp'aqa sumajta poqonqa, sach'akunapis poqollanqataj.

⁵ Trigo oqharisqaykichejqa uva pallanakama kanqa, uvata pallanaykichejtaj tarpuy tiempokama kanqa. Sajsakunaykichejkama t'antata mikhunkichej, ni imamanta llakikuspataj, llajtaykichejpi tiyarikunkichej.

⁶ Llajtaykichejpi sumajta kawsachisqaykichej, ni imata manchachikuspataj, misk'ita puñukunkichej. Noqa suyuykichejta phiña k'ita animalkunamanta jark'asaj, nillataj maqanakupis jallp'aykichejpi kanqachu.

⁷ Qankunaqa awqaykichejta ayqechinkichej, espadawantaj wañuchinkichej.

⁸ Qankunamanta phishqalla pachaj runakunata ayqechinkichej, jinallataj pachajlla chunka waranqata ayqechinkichej. Awqaykichejqa qankunaj ñawpaqeykichejpi espadawan wañuchisqa kanqanku.

⁹ Noqa qankunata qhawarisqaykichej, may jinatataj mirachisqaykichej. Qankunawan trato ruwasqaytapis junt'asajpuni.

¹⁰ Qayna watamanta puchoj trigota mikhunkichej, mosoj trigota pirwanaykichejpajtaj puchoj trigota jawaman orqhonkichej.

¹¹ Noqaqa qankunaj chawpiykichejpi tiyakusaj, manataj qhesachasqaykichejchu.

¹² Noqa qankunaj chawpiykichejpi purisaj. Diosniykichej kasaj, qankunataj aylluy kankichej.

¹³ Noqa Tata Diosmin Diosniykichej kani, pichus Egiptomanta orqhomorqaykichej, manaña paykunaj wata runanku kanaykichejpaj, chay. Noqa watasusqanku yugota p'akispa, umaykichejta oqharichispa, qankunata puricherqaykichej.

Mana kasukojkunapaj jasut'i

¹⁴ Ichapis qankuna mana kasuwankichejchu, nitaj kamachisqaytapis ruwankichejchu.

¹⁵ Jinallataj kamachisqayta pisipaj qhawaspa, nisqaytapis pisipaj qhawankichej. Chantá tratoytapis p'akispa, tukuy kamachisqayta mana junt'awajchejchu chayqa,

¹⁶ noqapis qankunawan kay jinata ruwasaj: Manchachikuspalla kawsayta kachaykamusqaykichej, wañuchej onqoyta, k'aja onqoyta, ñawi onqoyta, chantá llawch'iyay onqoytawan ima kachaykamullasqaykichejtaj. Qankunaqa qhasillata tarpunkichej, imaraykuchus poqochisqaykichejta awqaykichej mikhukaponqanku.

¹⁷ Noqapis qankunaj contraykichejpi sayaykusaj, awqaykichejtaj atipasonqachej. Qankunata chejnisojkuna chakinku uraman churasonqachej, qankunataj mana pej qhatiykachasqallan ayqekunkichej.

¹⁸ Sichus chay tukuywanpis manapuni kasuwankichejchu chayqa, juchallisqaykichejrayku qanchis kutita jasut'isqaykichej.

¹⁹ Runaykachayniykichejta p'akinaypaj, mana parachimusajchu. Mana parasqanraykutaj jallp'apis mana poqonqachu.

²⁰ Qhasillata kallpaykichejta tukuchinkichej, imaraykuchus chajraqa mana poqonqachu, nitaj sach'akunapis poqonqankuchu.

²¹ Sichus contrallaypipuni oqharikuspa, manapuni kasuwankichejchu chayqa, juchaykichejman jina qanchis kutitawan jasut'isqaykichej.

²² Qankunaman phiña k'ita animalkunata kachaykamusaj, chaykunataj wawaykichejta mikhonqanku, uywaykichejtapis tukuchenqanku. Jinamanta qankuna pisiyankichej, ñanniykichejkunatapis manaña pipis purej kanqachu.

²³ Chay tukuywanpis sichus manapuni kasuwaspa, noqaj contraypi sayaykuspallapuni kankichej chayqa,

²⁴ noqapis qankunaj contraykichejpi sayaykusaj. Juchaykichejman jinataj qanchis kutitawanraj jasut'isqaykichej.

²⁵ Trato ruwasqayta mana kasusqaykichejmanta maqanakupi wañuchisqaykichej. Qankunaqa llajtaykichejman pakakoj ayqekunkichej chaypis, noqa chayman onqoyta kachaykamusqaykichej. Qankunataj awqaykichejpa makinkuman urmankichej.

²⁶ Maypachachus mikhunaykichejta qhechusqaykichej chaypachaqa, chunka warmikuna uj hornollapi t'antata chayachenqanku. Qankunamantaj pisimanta pisi t'antata qosonqachej, manataj sajsakunkichejchu.

²⁷ Chay tukuywanpis sichus manapuni kasuwaspa noqaj contrayta sayaykullankichejpuni chayqa,

²⁸ noqapis qankunaj contraykichejta sayaykusaj. Phiñakuspataj, juchaykichejrayku qanchis kutitawanraj jasut'isqaykichej.

²⁹ Chaypacha qankunaqa qhari wawaykichejta, warmi wawaykichejtapis yarqhaywan mikhukapunkichej.

³⁰ Noqataj orqo patapi lanti yupaychana wasiykichejta thuñirasaj, incienso q'oshñichina altarniykichejtapis loqherasaj. Qankunaj ayaykichejtaqa mana kawsayniyoj lantiykichejpa patanman tawqasaj. Qankunamantataj millachikusqaykichej.

³¹ Llajtaykichejta raqayllataña saqesaj, yupaychana wasiykichejtapis loqhesaj. Ima munayta q'apashaj jaywawasqaykichejwanpis manaña misk'irichikusajchu.

³² Llajtaykichejta ch'inman tukuchisaj, chayman awqaykichejkuna tiyakoj jamojkunataj t'ukushaj qhepakonqanku.

³³ Qankunata maqanakuwan ñak'arichisqaykichej, waj suyukunamantaj ch'eqerachisqaykichej. Jallp'aykichejqa ch'inman tukonqa, llajtaykichejtaj ch'in raqayllaman.

³⁴ Chaypacha jallp'aykichej samarenqa, qankuna awqaykichejkunaj llajtankupi kawsanaykichejkama. Ajinamanta jallp'aqa mana samarisqanmanta chaypacha samarenqa.

³⁵ Ch'inpacha kashanankama jallp'aqa samarikonqa, qankuna chaypi tiyakushajtiykichej mana samarisqanmanta.

³⁶ Pikunachus awqaykichejpa llajtanpi kawsashajraj qhepakojkunata sinch'ita manchachisaj. Chayrayku sach'a laqheta urmajta uyarispalla ayqenqanku. Qankunaqa pipis wañuchinapaj espadawan qhatiykachashanman jina ayqenkichej. Mana pipis qhatiykachashajtillan urmankichej.

³⁷ Maqanakumantapis ayqeshawajchej jina qankunapuralla takanakuspa, urmankichej, mana ni pipis qankunata qhatiykachashajtillan. Ni mayqenniykichej awqaykichejman sayaykuyta atinkichejchu.

³⁸ Qankunaqa runaj llajtanpi tukukunkichej, awqaykichejkunaj jallp'ankutaj oqoykusonqachej.

³⁹ Chantá pikunachus awqaykichejpa jallp'ankupi kawsashajkunarajqa juchaykichejrayku wañunkichej. Tata mamaykichej millayta ruwaspa purisqankurayku, paykunawan khuska wañunkichej.

⁴⁰ Chaypacha qankuna, jinataj tataykichejkuna millayta ruwaspa purisqaykichejta rimarinkichej, wasanchawaspa noqaman sayaykuwasqaykichejtapis.

⁴¹ Noqapis contraykichejpi oqharikuspa, awqaykichejpa llajtankuman wijch'usqaykichej. Ichapis ajinamanta sonqoykichej llamp'uyajtin, juchallisqaykichejta rejsikapuwajchej.

⁴² Chantá noqaqa Jacobwan, Isaacwan, Abrahamwan ima tratota ruwasqaymanta yuyarikusaj, yuyarikullasajtaj suyuykichejmantapis.

⁴³ Karuman wijch'usqa kasqaykichejrayku, jallp'aykichejqa saqerparisqa ch'inpacha kanqa. Chaypacha jallp'aqa mana samarisqanmanta samarenqa. Qankunataj millayta ruwaspa purisqaykichejmanta jasut'isqa kankichej, imajtinchus kamachisqaykunata qhesacharqankichej, nisqaytataj pisipaj qhawarqankichej.

⁴⁴ Chay tukuywanpis awqaykichejpa llajtanpi kashajtiykichejpis, mana qankunata saqerparisqaykichejchu, nitaj qhesachasqaykichejchu. Nillataj tukuchisunaykichejkama chejnikusqaykichejchu. Manallataj qankunawan ruwasqay tratotapis p'akisajchu, imaraykuchus noqamin Tata Diosniykichej kani.

⁴⁵ Aswanpis tratota ruwasqaymanta yuyarikusaj. Chay tratotaqa Diosninku kanaypaj ñawpa tataykichejkunawan ruwarqani, maypachachus paykunata Egiptomanta tukuy runaj rikunankuta orqhomorqani, chaypacha. Noqamin Tata Dios kani, nispa.

⁴⁶ Chaykunamin kanku Tata Diospa kamachisqan, nisqan, chantá yachachisqan ima. Chaykunata Tata Diosqa Sinaí orqopi Moisesnejta israelitakunaman qorqa.