Levítico 24 - DIOSPA QHELQACHISQAN DEUTEROCANONICAL

Lamparata k'anchachinapaj aceite

¹ Tata Dios Moiseswan parlaspa, ajinata nerqa:

² Israelitakunata kamachiy, lamparakunata k'anchachinapaj olivomanta ruwasqa sumaj aceiteta apamunankuta, lamparakuna k'anchanallankupajpuni.

³ Aaronqa Dioswan Tinkukuna Toldoman yaykunapi lamparakunata churanqa, tukuy tutantin k'anchananpaj, Tata Diospa ñawpaqenpi, velomanta jawapi, Diospa trato ruwasqan arcaj ñawpaqenpi. Kay kamachisqaqa tukuy mirayniykichejpaj wiñaypaj kanqa.

⁴ Aaronqa Tata Diospa ñawpaqenpi lamparakuna k'anchanallankupajpuni sumaj qorimanta ruwasqa candeleroman churanqa.

Tata Diospa ñawpaqenpi churana t'anta

⁵ Sumaj jak'umanta chunka iskayniyoj t'antata ruwanki. Sapa t'anta tawa kilo jak'umanta ruwasqa kanqa.

⁶ Chaytataj Tata Diospa ñawpaqenpi sumaj qorimanta ruwasqa mesaman iskay sinruta churanki, sapa sinrupi sojtatakama.

⁷ Sapa sinrumantaj mana chhapusqa inciensota churanki, chay t'antata sumajta q'aparichinanpaj. Jinaspataj inciensota Tata Diospa sutinpi q'olachinki.

⁸ Chay t'antataqa israelitakunaj sutinpi sapa samarina p'unchayta sacerdote Tata Diospa ñawpaqenpi churanqa, Tata Dios israelitakunawan wiñaypaj tratota ruwasqankurayku.

⁹ Tata Diospa ñawpaqenpi churasqa t'antaqa Aaronpaj, churinkunapajwan kanqa. Paykunataj chayta Diospaj T'aqasqa Cheqapi mikhonqanku, imajtinchus Diosman jaywasqa t'antaqa Diospaj t'aqasqamin, chayrayku, nispa.

Diospa contranta rimajkunapaj jasut'i

¹⁰ Ujpacha, israelitakuna ukhupi uj runa karqa, chay runataj jarapi uj israelitawan siminakuspa, phiñanakorqa. Chay runaj mamanqa Israel llajtayoj karqa, tatantajrí Egiptomanta.

¹¹ Mamanqa israelita ayllumanta Dibrij ususin Selomit karqa. Chantá payqa Diospa contranta rimaspa, Diospa sutinta maldicerqa. Chayrayku chay runata Moisesman pusamorqanku.

¹² Chantá chay runata wisq'aspa, paywan imatachus ruwanankuta Tata Dios ninankama suyarqanku.

¹³ Chantá Tata Dios Moisesta kay jinata nerqa:

¹⁴ Pichus maldiciwajta jaramanta jawaman orqhoy. Chantá nisqanta uyarejkuna makinkuta paypa umanman churachunku. Chantataj tukuy runakuna rumiwan ch'anqaykuspa chay runata wañuchichunku.

¹⁵ Jinallataj israelitakunata niy: Pillapis Diosninpa sutinta maldicejqa juchanmanta wañuchisqa kanqa.

¹⁶ Pichus Tata Diospa contranta rimajtaqa tukuy runakuna rumiwan ch'anqaykuspa, wañuchenqanku. Waj llajtayojpis, chayrí israelitapis kachun wañuchisqa kanqa.

¹⁷ Pillapis runa masinta wañuchejqa wañuchisqallataj kanqa.

¹⁸ Pichus runaj uywanta wañuchejqa uywamanta uywallatataj kutichinan tiyan.

¹⁹ Pillapis runa masinpa ukhunta k'irirparejqa paytapis chay jinallatataj ruwanqanku.

²⁰ Pichus runa masinpa tullunta p'akejtaqa paypa tulluntapis p'akillanqankutaj. Pichus runa masinpa ñawinta suruchejtaqa paypa ñawintapis suruchillanqankutaj. Pichus runa masinpa kirunta p'akiykojtapis, paypa kiruntapis p'akillanqankutaj. Runa masinpa imantachus nanachisqanta chayllatataj paytapis nanachenqanku.

²¹ Pichus uj runaj uywanta wañuchejqa kawsashaj uywata kutichipunan tiyan. Pichus uj runata wañuchejqa wañuchisqallataj kanqa.

²² Waj llajtayojpaj, jinataj israelitakunapaj uj kamachisqalla kanqa. Noqamin Tata Diosniykichej kani, nispa.

²³ Chantá Moisés tukuy chaykunata israelitakunaman willarqa. Paykunataj Diospa contranta rimaj runata jaramanta jawaman orqhoytawan, rumiwan ch'anqaspa wañucherqanku. Ajinata Tata Dios Moisesta kamachisqanman jina ruwarqanku.