Levítico 21 - DIOSPA QHELQACHISQAN DEUTEROCANONICAL

Sacerdotekuna imaynachus kananku

¹ Tata Dios Moiseswan parlaspa, nillarqataj: Aaronpa mirayninmanta sacerdotekunata niy: Ama pipis ayata llankharisqaykichejrayku mana llimphupaj qhawasqa kankichejchu.

² Qaylla aylluykichejpa ayanta, mamaykichejpata, tataykichejpata, qhari wawaykichejpata chayrí warmi wawaykichejpata, chayrí wawqeykichejpata,

³ chayrí qanwan tiyakoj manaraj qosayoj panaykichejpata ayanta llankhaspa, mana llimphupaj qhawasqa kayta atillankichej.

⁴ Sichus panayki casarakorqa chayqa, ama ayanta llankhaspa ch'ichichakunkichu.

⁵ Jinallataj sacerdotekunaqa ama chujchankuta, nitaj sunkhankutapis raphakonqankuchu, nillataj ukhunkutapis q'allurakonqankuchu.

⁶ Paykunaqa noqajllataña kanankupaj t'aqasqa kasqankurayku sutiyta ama p'enqaypi rikhurichenqankuchu. Paykunaqa noqa Tata Diosman q'olachisqa jaywanata jaywawanku, jinallataj Diospaj t'aqasqa t'antantawan. Chayrayku Diospaj t'aqasqa jina kachunku.

⁷ Jinallataj sacerdotekunaqa ama phisu warmiwan, nitaj alqochasqa warmiwan, nillataj qosanmanta t'aqasqa warmiwanpis casarachunkuchu, imaraykuchus sacerdotekunaqa Tata Diospaj t'aqasqa kanku.

⁸ Chayrayku paykunata Tata Diospaj t'aqasqata jina qhawankichej, imaraykuchus paykunaqa Tata Diosniykichejman t'antanta jaywanku. Chayrayku sacerdotekunata Diospaj t'aqasqa kasqankuta jina qhawaychej, imajtinchus noqaqa may llimphumin kani, pichus qankunata noqajta kanaykichejpaj t'aqakuykichej, chay.

⁹ Sichus uj sacerdotej ususin sajra purikuyman qokunman chayqa, tatanta p'enqaypi rikhurichin. Chayrayku chay warmi kawsashaj ruphachisqa kanqa.

¹⁰ Kuraj kaj sacerdote kananpaj aceitewan umanpi jawisqa kasqanrayku, sacerdote p'achata churakunanpaj t'aqasqa kashan. Ajinaqa llakisqa kasqanta rejsichinanpaj, ama umanta t'ojluchikonqachu, nitaj p'achantapis llik'irakonqachu.

¹¹ Nillataj maypichus aya kashan, chayman yaykonqachu. Nitaj tatanpata, mamanpata ayanta llankharispa ch'ichichakonqachu.

¹² Diosta yupaychana cheqamanta mana llojsenqachu, nitaj Diosninpa yupaychana cheqata p'enqaypi rikhurichenqachu. Payqa jawina aceitewan jawisqa kasqanrayku Diospaj t'aqasqamin. Noqamin Tata Dios kani.

¹³ Kuraj kaj sacerdoteqa mana qharita rejsej warmiwan warmichakonqa.

¹⁴ Warmisapawanqa ni ima kashajtin warmichakonqachu, nitaj qosanmanta t'aqasqawan, nillataj phisu warmiwanpis warmichakonqachu. Manachayqa paypa kikin jatun ayllunmanta, qharita mana rejsej warmita oqharikonqa.

¹⁵ Ajinata ruwanqa ama llajta masinkunata, nitaj mirayninta p'enqaypi rikhurichinanpaj. Noqa Tata Diosmin payta noqajta kananpaj t'aqakuni, nispa.

Pikunachus sacerdote kayta mana atejkuna

¹⁶ Tata Dios Moiseswan parlaspa, nillarqataj:

¹⁷ Aaronta niy: Kunanmanta qhepamanqa mirayniykimanta mayqenpis iman mana allin kajtenqa, Tata Diosninman t'antata jaywaj mana qayllayta atenqachu.

¹⁸ Sacerdote jina Tata Diosman mana qayllayta atenqankuchu iman imanasqa kaj, ñawsa, wenqho, senqan, chayrí ninrin imanasqa,

¹⁹ chakin p'akisqa, chayrí makin p'akisqa,

²⁰ moqo wasa, chayrí wat'a runa, ñawin imanasqa, sarnarara, chayrí ukhunpi yuraj tijllayoj, chayrí kapasqa runa.

²¹ Aaronpa mirayninmanta mayqellanpis sichus iman mana allinchu kanman chayqa, q'olachisqa jaywanata Tata Diosman mana jaywayta atenqachu. Nillataj Tata Diospaj t'antanta jaywayta atenqachu.

²² Tata Diosman jaywana t'antata, jinataj Diospaj t'aqasqa imakunamantapis mikhuyta atillanqa.

²³ Ukhunpi iman mana allin kasqanrayku, veloj wasanpi Diosllapaj T'aqasqa nisqa cheqanejman mana yaykonqachu, nitaj altar qayllamanpis chimpanqachu. Noqamin Tata Dios kani, pichus paykunata noqapaj t'aqakorqani, chay, nispa.

²⁴ Moisestaj tukuy chayta Aaronman, churinkunaman, jinataj tukuy israelitakunaman ima willarqa.