Levítico 19 - DIOSPA QHELQACHISQAN DEUTEROCANONICAL

Cheqanta ruwaspa purina

¹ Tata Dios Moiseswan parlaspa, nillarqataj:

² Tukuy israelitakunata niy: Tata Dios ajinata nisunkichej: Qankunaqa noqapaj t'aqasqa jina llimphu kaychej, imaraykuchus noqa Tata Diosniykichej may llimphumin kani.

³ Sapa ujpis mamaykichejta, tataykichejtapis jatun respetowan qhawaychej. Jinallataj samarina p'unchayniyta maypaj qhawaspa, samariychej. Noqa Tata Diosmin Diosniykichej kani.

⁴ Ama lantikunata yupaychankichejchu, amallataj metalta unuyachispa, dioskunata ruwakunkichejchu. Noqa Tata Diosmin Diosniykichej kani.

⁵ K'achata kawsakuy jaywanata Diosman jaywaspaqa, jaywasqaykichejta Tata Dios tukuy sonqo jap'ikunanpaj jina ruwaychej.

⁶ Diosman jaywasqaykichej uywata ñak'aspaqa, chay p'unchaypacha mikhunaykichej tiyan, manachayrí q'ayantin. Minchhantinpaj puchojtarí ruphachinkichej.

⁷ Sichus kinsa p'unchaymanraj mikhunkichej chayqa, chay jaywasqaqa millachikunapaj qhawasqa kanqa. Chayraykutaj Diosqa mana jap'ikonqachu.

⁸ Pichus mikhojqa juchachasqa kanqa. Chayrayku llajtanmanta chinkachisqa kanqa, Tata Diosman jaywasqata manakajpaj qhawasqanrayku.

⁹ Chajra oqharina tiempo chayamojtenqa, ama tukuynintachu ruthunkichej. Trigo uma t'akakojtaqa amaña chajmankichejchu.

¹⁰ Uva huertaykichejmanta ama tukuynintachu pallankichej, nitaj pampaman t'akakojtapis oqharinkichejchu. Chayqa pisi tiyapuyniyojkuna, jinallataj waj llajtayojkuna pallakunankupaj kanqa. Noqa Tata Diosmin Diosniykichej kani.

¹¹ Ama suwakunkichejchu. Amallataj llullakuychejchu, nillataj ujkuna ujkunawan q'otiyanakuychejchu.

¹² Amamin sutiypi tiluspa llullakunkichejchu, imaraykuchus Diosniykichejpa sutinta pisipaj qhawawajchej. Noqamin Tata Dios kani.

¹³ Ama runa masiykichejta waqachinkichejchu, nitaj imantapis qhechunkichejchu. Amallataj peonniykichejpa pagonta q'ayantinkama jap'ikunkichejchu.

¹⁴ Ama joq'aramanta alqorakunkichejchu. Amallataj ni ima misk'anata ñawsa runaj ñawpaqenman churankichejchu. Manachayrí Diosniykichejta may jatun respetowan qhawawankichej. Noqamin Tata Dios kani.

¹⁵ Qan juez kaspaqa, cheqanta ruwanki, ama wajchaman sayakuspa, nitaj qhapajman. Justiciataqa cheqantapuni ruwanki.

¹⁶ Llajtaykipi ama cuento q'epi kankichu. Amallataj runa masiykita wañuchiysikunkichu. Noqamin Tata Dios kani.

¹⁷ Ama wawqeykita sonqoykipi chejnikunkichu. Runa masiykita k'amiy, k'amina kajtenqa, juchallejtin ama juchachasqa kanaykipaj.

¹⁸ Ama vengakunkichu, nillataj llajta masiykita phiñapayankichu. Astawanqa payta qan kikiykita jina munakunki. Noqamin Tata Dios kani.

¹⁹ Kamachisqayta kasukunkichej. Uywaykichejta ama waj jina uywatawan tinkuchinkichejchu. Amallataj jallp'aykichejpi chajrusqa mujuta tarpunkichejchu. Tukuy imaymana q'aytumanta ruwasqa p'achata ama churakunkichejchu.

²⁰ Sichus pipis uj qhariwan casarananpaj parlasqa kamachi warmiwan puñuykunman, chay warmi manaraj rantisqa, nitaj kacharipusqarajchu kashajtin chayqa, iskayninku jasut'isqa kanqanku. Chaywanpis mana wañuchisqachu kanqanku, imaraykuchus warmi manaraj kacharipusqachu karqa.

²¹ Chay runaqa Dioswan Tinkukuna Toldo punkuman uj corderota apamunan tiyan, juchallisqanrayku Tata Diosman jaywananpaj.

²² Sacerdotetaj chay corderota Tata Diosman jaywanqa, chay runaj juchallisqan pampachasqa kananpaj. Ajinamanta juchallisqan pampachasqa kanqa.

²³ Qankuna Canaanman yaykuspa, tukuy imaymana poqoj sach'ata churankichej. Jinaspataj, kinsa watata chay sach'aj poqoyninta ama mikhunkichejchu. Ch'ichipaj qhawasqa kanqa.

²⁴ Tawa watamantaj uj raymita ruwaspa, chay sach'akunaj tukuy poqosqanta Tata Diospaj t'aqankichej.

²⁵ Phishqa watamantataj poqosqanta mikhuyta atinkichej. Ajinamanta sach'aykichejqa astawan poqopusonqachej. Noqa Tata Diosmin Diosniykichej kani.

²⁶ Ama imatapis yawarniyojta mikhunkichejchu. Ama adivinaj kankichejchu, nillataj layqapis.

²⁷ Chujchaykichejtaqa ama muyullata k'utukunkichejchu, nillataj sunkhaykichejpata puntantapis k'uturakunkichejchu.

²⁸ Wañojkunamanta yuyarikunaykichejpaj ama ukhuykichejta q'allurakunkichejchu. Nillataj ukhuykichejpi ima marcatapis ruwakunkichejchu. Noqamin Tata Dios kani.

²⁹ Ama ususiykichejta qolqerayku khuchichakunaman tanqaykunkichejchu, ama llajtaykichejman millay kawsay junt'aykunanpaj.

³⁰ Samarina p'unchayniykunapi samariychejpuni. Tiyakunay cheqatapis respetowan qhawaychej. Noqamin Tata Dios kani.

³¹ Ama aysirikunata, nitaj layqakunatapis tapukunkichejchu. Sichus tapukoj rinkichej chayqa, ch'ichichakunkichej. Noqa Tata Diosmin Diosniykichej kani.

³² Machu runataqa sayarikuspa napaykunki, jinallataj manchay respetowan qhawanki. Diosniykitapis manchachikunki. Noqamin Tata Dios kani.

³³ Qankunawan tiyakoj waj llajtayojtaqa ama ñak'arichinkichejchu.

³⁴ Paykunataqa llajta masiykichejta jina qhawaychej, qankunata jinataj munakuychej, imaraykuchus qankunapis Egiptopi waj llajtayoj jinallataj tiyakorqankichej. Noqa Tata Diosmin Diosniykichej kani.

³⁵ Justiciataqa maychus kajta ruwankichej. Chimpuspa, tupuspa, chayrí imatapis vendespa, ama q'otiyankichejchu.

³⁶ Balanzaykichej, pesanaykichej romana, chantá chimpuykichejpis cabal kanan tiyan. Noqa Tata Diosmin Diosniykichej kani, pichus qankunata Egiptomanta orqhomusorqachej, chay.

³⁷ Ajinaqa tukuy kamachisqayta, imatachus nisqaytapis kasuspa, ruwaychej. Noqamin Tata Dios kani, nispa.