Levítico 18 - DIOSPA QHELQACHISQAN DEUTEROCANONICAL

Ayllupura mana puñuykunachu

¹ Tata Dios Moiseswan parlaspa, nillarqataj:

² Israelitakunata niy: Tata Dios ajinata nisunkichej: Noqa Tata Diosmin, Diosniykichej kani.

³ Qankunaqa Egiptopi tiyakorqankichej ajinaqa, ama paykuna jinallataj ruwankichejchu. Jinallataj Canaanman pusashaykichej chaypipis, imatachus paykuna ruwayta yachasqanku, chayta amallataj ruwankichejchu, nillataj usunkuman jina kawsankichejchu.

⁴ Noqaj kamachisqayta junt'ankichej, nisqaytapis kasunkichej, chaykunaman jinataj purinkichej. Noqa Tata Diosmin Diosniykichej kani.

⁵ Nisqayta, kamachisqaytapis kasunkichej. Pillapis chaykunata junt'ajqa kawsanqa. Noqamin Tata Dios kani.

⁶ Ama pi qharipis qaylla ayllullanmanta kaj warmiwan puñuykonqachu. Noqamin Tata Dios kani.

⁷ Ama mamaykiwan puñuykuspa, tataykita p'enqaypi rikhurichinkichu, imajtinchus payqa mamaykimin. Chayrayku ama paywan puñuykunkichu.

⁸ Ama tataykej warminwan puñuykuspa, tataykita pisipaj qhawankichu.

⁹ Ama panaykiwan puñuykunkichu, ni tataykimanta panayki kajtin, nitaj mamaykimanta panayki kajtinpis. Tataykej wasinpipis paqarichun, wajnejpipis paqarichun, ama panaykiwan puñuykunkichu.

¹⁰ Ama allchhiykiwan puñuykunkichu. Ususiykej wawanpis kachun, chayrí churiykejtapis kachun, amapuni paywan puñuykunkichu.

¹¹ Ama tataykej warminpa ususinwan puñuykunkichu, imaraykuchus payqa tataykej wawan, chayraykutaj qanpa panayki kashan. Amapuni paywan puñuykunkichu.

¹² Ama tataykej pananwan puñuykunkichu, imaraykuchus payqa tataykej ayllunmin kashan.

¹³ Ama mamaykej ñañanwan puñuykunkichu, imaraykuchus payqa mamaykej ayllunmin kashan.

¹⁴ Ama tioykej warminwan puñuykuspa, tioykita p'enqaypi rikhurichinkichu, imaraykuchus payqa tiaykimin.

¹⁵ Ama ñojch'aykiwan puñuykunkichu, imajtinchus payqa churiykej warminmin. Chayrayku ama paywanqa puñuykunkichu.

¹⁶ Ama wawqeykej warminwan puñuykuspa, wawqeykita p'enqaypi rikhurichinkichu.

¹⁷ Ama uj warmiwan, nitaj chay warmej ususinwan puñuykunkichu, nillataj allchhinwanpis puñuykunkichu, chay warmej churinpatapis kachun, chayrí ususinpatapis kachun. Amapuni paywan puñuykunkichu. Chayqa ancha millaymin, imaraykuchus paykunaqa yawar masintin kanku.

¹⁸ Warmiyki kawsakushajtenqa, ama warmiykej ñañanwan casarankichu, nitaj paywan puñuykunkichu, ama paykunapura chejninakunankupaj.

¹⁹ Killanpi kashaj warmiwan ama puñuykunkichu.

²⁰ Ama runa masiykej warminwan puñuykunkichu, ama chayrayku ch'ichichakunaykipaj.

²¹ Amapuni Moloc sutiyoj lantiman wawaykita q'olachispa jaywankichu. Ama ajinata ruwaspa Diosniykej sutinta p'enqaypi rikhurichinkichu. Noqamin Tata Dios kani.

²² Warmiwan jina, ama qhari masiykiwan puñuykunkichu, imaraykuchus ajinata ruwanaqa millay juchamin.

²³ Ama ni ima uywawan t'inkikunkichu, ama chayrayku ch'ichichakunaykipaj. Nillataj warmipis ni ima uywawan t'inkinakuchunchu. Chayqa millay juchamin.

²⁴ Ama chaykunata ruwaspa ch'ichichakunkichejchu. Chay jina millayta ruwasqankurayku, noqa ñawpaqeykichejmanta chay millay runakunata qharqosaj. Imajtinchus chay runakuna chayta ruwaspa ch'ichichakorqanku.

²⁵ Chay jina millayta ruwasqankurayku jallp'apis ch'ichichasqa karqa. Noqatajrí chay jina millayta ruwasqankumanta paykunata ñak'aricherqani. Chayrayku chay suyukunapi jallp'aqa, chay jina millayta ruwajkunata ajtuspa jina wijch'umorqa.

²⁶ Qankunarí, jinallataj qankunawan tiyakoj waj llajtayojkunapis, kamachisqayta, chantá nisqayta ima kasunkichej. Millachikunapaj jina ruwasqankumanta ama ni imata ruwankichejchu.

²⁷ Manaraj qankuna tiyakushajtiykichej, chay cheqapi llajtayojkuna tukuy imaymana millayta ruwaspa karqanku. Chayrayku chay jallp'a ch'ichichasqa karqa.

²⁸ Pajtataj chay jallp'aqa millayta ruwasqaykichejrayku, qankunatañataj ajtuspa jina wijch'umusunkichejman, imaynatachus qankunamanta ñawpajta tiyakojkunata wijch'umorqa, ajinata.

²⁹ Pillapis chay jina millayta ruwajqa llajtanmanta chinkachisqa kanqa.

³⁰ Chayrayku kamachisqaykunata kasuychej. Ama qankunaqa millay ch'ichita ruwaychejchu, imaynatachus qankunamanta ñawpajta tiyakojkuna ruwarqanku, jinataqa. Ama chaykunata ruwaspa ch'ichichakuychejchu. Noqa Tata Diosmin, Diosniykichej kani, nispa.