Levítico 17 - DIOSPA QHELQACHISQAN DEUTEROCANONICAL

Diosta yupaychana cheqaqa ujlla

¹ Tata Dios Moiseswan parlaspa, nillarqataj:

² Aaronta, churinkunata, chantá israelitakunatawan ima niy: Tata Diosqa ajinata kamachisunkichej:

³ Sichus israelitakunamanta pillapis wakata, ovejata, chayrí cabratapis ñak'aspa Diosman jaywayta munanman chayqa,

⁴ Dioswan Tinkukuna Toldo punkuman apamuspa ñak'anan tiyan Tata Diosman jaywanapaj. Sichus jaramanta jawapi, chayrí jara ukhupi ñak'anman chayqa, runa wañuchipis kanman jina juchachasqa kanqa. Chayrayku llajtanmanta chinkachisqa kanqa.

⁵ Ajina kamachisqa kashan israelitakuna amaña campopi uywata ñak'anankupaj, manachayqa Dioswan Tinkukuna Toldo punkupi sacerdoteman apanankupaj. Chaypitaj sacerdotekunaqa Tata Diosman k'achata kawsakuy jaywanata jaywanankupaj chay uywata ñak'anqanku.

⁶ Sacerdoteqa Dioswan Tinkukuna Toldo punkupi, Tata Diospa altarninta ñak'asqa uywaj yawarninwan ch'ajchonqa. Uywaj wiranta q'olachispataj, Tata Diosman jaywanqa, chay jaywasqaj q'apaynintaj Tata Diospa sonqonman jina chayananpaj kanqa.

⁷ Ajina kanqa amaña chivoman rijch'asqa lantikunaman uywata ñak'aspa jaywanankupaj. Chaykunata yupaychaspa, israelitakunaqa sajra purikoj warmi jina ch'ichichakorqanku. Kay kamachisqaqa qankunapaj, jinataj mirayniykichejpajpis wiñaypaj kanqa.

⁸ Jinallataj israelitakunata niy: Sichus mayqen israelita, chayrí qankunawan tiyakoj waj llajtayojpis q'olachispa Diosman jaywananpaj uywata, chayrí ima jaywanallatapis jaywayta munan chayqa, Dioswan Tinkukuna Toldoman chayta apamuchun.

⁹ Sichus wajnejpi Tata Diosman jaywanman chayrí, chay runa ayllun ukhumanta chinkachisqa kanqa, nispa.

Yawarta mana mikhunachu

¹⁰ Tata Dios israelitakunata nillarqataj: Sichus uj israelita, chayrí qankunawan tiyakoj waj llajtayojpis yawarta mikhunman chayqa, noqa paypa contranpi sayaykusaj, chantá ayllun ukhumanta payta chinkachisaj.

¹¹ Tukuy animalpa kawsaynenqa yawarninpi kashan. Noqataj qankunaman yawarta qoykichej altarman apanaykichejpaj, juchallisqaykichej pampachasqa kananpaj. Yawarpi kawsay kasqanrayku, qankunaj juchaykichejta pampachasaj.

¹² Chayrayku israelitakunata nini: Qankunamanta mana pipis, nitaj qankunawan tiyakoj karu llajtayojpis, yawarta mikhunanchu tiyan, nispa.

¹³ Mayqen israelitapis, chayrí qankunawan tiyakoj waj llajtayojpis, llimphupaj qhawasqa animalta, chayrí p'isqotapis jap'inman chayqa, yawarninta jallp'aman sut'uchispa, p'ampaykunan tiyan.

¹⁴ Tukuy kawsajpa kawsaynenqa yawarpi kashan. Chayrayku israelitakunata nini: Ni ima animalpa yawarninta mikhunkichejchu, imaraykuchus tukuy kawsajpata yawarninpi kawsaynin kashan. Chayrayku yawarta mikhoj runaqa chinkachisqa kanqa.

¹⁵ Sichus mayqen israelitapis, chayrí qankunawan tiyakoj karu llajtayojpis wañusqa uywaj aychanta mikhunman, chayrí k'ita animalpa jap'isqanta mikhunman chayqa, p'achanta t'ajsakunan tiyan. Jinallataj ukhuntapis yakuwan mayllakunan tiyan. Chantá ch'isiyanankama mana llimphupaj qhawasqa kanqa. Chaymantaraj llimphuchasqa kanqa.

¹⁶ Sichus mana p'achanta t'ajsakonqachu chay, nitaj ukhuntapis mayllakonqachu chayqa, mana uyarikusqanmanta juchachasqa kanqa, nispa.