Levítico 14 - DIOSPA QHELQACHISQAN DEUTEROCANONICAL

Llejtiwan onqosqa llimphupaj qhawasqa kananmanta

¹ Tata Dios Moiseswan parlaspa, ajinata nillarqataj:

² Llejtiwan onqosqata llimphupaj qhawanapaj kamachisqakunaqa kaymin: Llejtiwan onqosqataqa sacerdoteman pusamonqanku.

³ Sacerdotetaj jaramanta jawaman llojsispa, onqosqata qhawanqa. Sichus runapi llejti onqoy chinkapusqanta reparanqa chayqa,

⁴ chay onqosqa llimphuchasqa kananpaj, llimphupaj qhawasqa p'isqomanta iskayta apamunanta kamachenqa. Kamachillanqataj cedro k'aspita, puka q'aytuta, chantá hisopo qhoratawan ima onqosqa runa apamunanta.

⁵ Chaymantataj sacerdoteqa juturimanta yakuyoj t'uru manka patapi ujnin kaj p'isqota wañuchinankuta kamachenqa.

⁶ Chantá kawsashaj p'isqota, cedro k'aspita, puka q'aytuta, hisopo qhoratawan oqharispa, juturi yaku patapi wañuchisqa karqa, chay p'isqoj yawarninwan joq'ochanqa.

⁷ Chaymantataj llejti onqoymanta llimphuchakojman qanchis kutita chay yawarwan ch'ajchullanqataj, chantá llimphu kasqanta nenqa. Jinaspataj, kawsashaj p'isqota kachariponqa.

⁸ Pichus llimphuchakojqa p'achanta t'ajsanan tiyan, jinallataj tukuy chujchanta raphakonqa. Chantapis mayllakullanqataj, ajinamanta llimphupaj qhawasqa kanqa. Chaymantaraj jaraman yaykuponqa. Chaywanpis qanchis p'unchaytaraj paypa toldonmanta jawallapi tiyakonqa.

⁹ Qanchis p'unchayninmantaj ujtawan tukuy chujchanta raphakonqa. Jinallataj sunkhanta, ñawi qhesiranta, tukuy ukhunpi kaj chujchantawan raphakullanqataj. Chaymantataj p'achanta t'ajsanqa, tukuy ukhuntapis mayllakullanqataj. Chaypacha payqa llimphupaj qhawasqa kanqa.

¹⁰ Pusaj kaj p'unchaypitaj iskay corderota mana iman imanasqata apamonqa. Jinallataj uj watayoj ovejata mana iman imanasqata apamullanqataj. Apamullanqataj, ch'aki mikhuy jaywanata jaywanapaj, sumaj jak'umanta aceitewan puñasqata sojta kilo khuskanniyojta, chantá khuskan botella aceitetawan.

¹¹ Chantá llimphuchaj sacerdoteqa llimphuchakoj runata, jinataj Diosman jaywananpaj apamusqantawan, Tata Diospa ñawpaqenman qayllachenqa, Dioswan Tinkukuna Toldo punkuman.

¹² Chaymanta sacerdoteqa ujnin corderota, khuskan botella aceitetawan ikhaspa, jucharayku Tata Diosman jaywanqa.

¹³ Jinaspataj, sacerdoteqa chay corderota ñak'anqa, maynejpichus jucha pampachasqa kananpaj, chayrí q'olachispa Tata Diosman jaywanapaj uywata ñak'anku, chaypi. Jucha pampachasqa kananpaj Diosman jaywasqa, jinataj jucharayku Diosman jaywasqaqa sacerdotepaj kanqa, chay jaywasqa Tata Diospaj t'aqasqa kasqanrayku.

¹⁴ Chantá sacerdoteqa jucharayku jaywasqa uywamanta uj chhika yawarninwan llimphuchakojpa paña ninrinta, paña makinpa machu ruk'ananta, chantá paña chakinpa machu ruk'anantawan jawenqa.

¹⁵ Chaymantataj sacerdoteqa uj chhika aceiteta paypa lloq'e makinman jich'anqa.

¹⁶ Chantá paña makinpi ruk'ananta lloq'e makinpi kashaj aceiteman chhapuspa, Tata Diospa ñawpaqenpi qanchis kutita ch'ajchonqa.

¹⁷ Chay jawa sacerdoteqa makinpi puchoj aceitemanta uj chhikata oqharispa, chay llimphuchakoj runaj paña ninrinta, paña makinpi machu ruk'ananta, paña chakinpi machu ruk'anantawan jawenqa, maynejpichus yawarwan jawisqaña karqa, chaynejta.

¹⁸ Chaymantataj sacerdoteqa makinpi puchoj aceitewan llimphuchakojpa umanta jawillanqataj. Ajinata ruwaspa, sacerdoteqa Tata Diospa ñawpaqenpi chay runaj juchan pampachasqa kananta tarenqa.

¹⁹ Chantá sacerdoteqa llimphuchakojpa jucha pampachasqa kananpaj, apamusqan uywata Diosman jaywanqa. Ajinata sacerdote ruwanqa mana llimphupaj qhawasqa runa llimphuchasqa kananpaj. Chaymantataj q'olachispa jaywanapaj apamusqan uywata ñak'aspa,

²⁰ ch'aki mikhuy jaywanatawan khuska altarpi jaywanqa. Ajinata ruwaspa, sacerdoteqa Tata Diospa ñawpaqenpi chay runaj juchan pampachasqa kananta tarenqa, chay runataj llimphupaj qhawasqa kanqa.

²¹ Sichus llimphuchakoj runa pisi tiyapuyniyoj kasqanrayku, Diosman jaywananpaj mañasqankuta mana rantiyta atinmanchu chayqa, jucharayku jaywanapaj uj corderollata apamuchun. Apamusqanta juchan pampachasqa kananpaj, ikhaspa Tata Diosman jaywanqa. Apamullachuntaj aceitewan puñasqa sumaj jak'umanta iskay kilota, ch'aki mikhuy jaywanata jaywanapaj. Khuskan botella aceitetapis apamullachuntaj.

²² Chantá atisqanman jina apamullachuntaj iskay jurk'utata, chayrí iskay urpi irpata. Ujnin kanqa jucha pampachasqa kananpaj Diosman jaywanapaj, ujnintaj q'olachispa Diosman jaywanapaj.

²³ Pusaj kaj p'unchaypi tukuy chaykunata chay runa llimphuchasqa kananpaj sacerdoteman apanqa, Dioswan Tinkukuna Toldo punkupi Tata Diosman jaywananpaj.

²⁴ Chantá sacerdoteqa jucharayku jaywanapaj apamusqan corderota, khuskan botella aceitetawan jap'ispa, Tata Diospa ñawpaqenpi chaykunata ikhaspa, jaywanqa.

²⁵ Chaymantá sacerdoteqa jucharayku jaywanapaj apamusqan corderota ñak'anqa. Chantá ñak'asqa corderomanta uj chhika yawarninta jap'ispa, llimphuchakojpa paña ninrinta, paña makinpi machu ruk'ananta, paña chakinpi machu ruk'anantawan ima jawenqa.

²⁶ Jinaytawantaj, sacerdoteqa uj chhika aceiteta lloq'e makinman jich'anqa.

²⁷ Chantá sacerdoteqa lloq'e makinpi aceiteman paña ruk'ananta chhapuspa, Tata Diospa ñawpaqenpi qanchis kutita aceiteta ch'ajchonqa.

²⁸ Jinallataj sacerdoteqa makinpi kashaj aceitewan llimphuchakojpa paña ninrinta, paña makinpi machu ruk'ananta, paña chakinpi machu ruk'anantawan ima, maynejtachus yawarwan jawerqaña, chaynejta jawillanqataj.

²⁹ Chantá sacerdoteqa makinpi puchoj aceitewan llimphuchakojpa umanta jawenqa. Ajinata ruwasqanrayku, llimphuchakojpa juchan Tata Diospa ñawpaqenpi pampachasqa kanqa.

³⁰ Chantá sacerdoteqa llimphuchakoj runa atisqanman jina apamusqanmanta, ujnin jurk'utata, chayrí ujnin urpi irpata Tata Diosman jaywanqa.

³¹ Ujninta jucha pampachasqa kananpaj Diosman jaywanqa, ujnintataj ch'aki mikhuy jaywanawan khuska, q'olachispa Tata Diosman jaywanqa. Ajinata ruwaspa, sacerdoteqa Tata Diospa ñawpaqenpi llimphuchakojpa juchan pampachasqa kananta tarenqa.

³² Ajinata llejtiwan onqojkunamanta pisi tiyapuyniyojkunaqa llimphuchasqa kanqanku, nispa.

Wasipi qorwariyay rikhurejtin imatachus ruwana

³³ Tata Dios Moiseswan chantá Aaronwan ima parlaspa, nillarqataj:

³⁴ Maypachachus qankunaman qosqaykichej chay Canaán jap'iyman yaykunkichej chaypacha, sichus mayqenpa wasinpi qorwariyay onqoyta rikhurichiyman chayqa,

³⁵ wasiyojqa sacerdoteman willamonqa: Wasiypi qorwariyay jina rikhurin, nispa.

³⁶ Chantá sacerdote manaraj chay wasiman yaykushaspa, chay wasimanta tukuy imata jawaman orqhochenqa, wasipi kaj imakuna mana ch'ichipaj qhawasqa kanankupaj. Chaymantataj sacerdoteqa wasiman yaykuspa, qorwariyay rikhurisqanta qhawanqa.

³⁷ Sichus sacerdote wasiman yaykuspa perqapi q'omer, chayrí puka qorwariyay rikhurisqanta rikunman, chaytaj perqata mikhushasqanta reparanman chayqa,

³⁸ sacerdote chay wasimanta llojsispa, qanchis p'unchayta wisq'asqa kananta kamachenqa.

³⁹ Qanchis p'unchaymantataj sacerdoteqa ujtawan wasita qhawamullanqataj. Sichus qorwariyay chay wasi perqapi astawan wiñaykun chayqa,

⁴⁰ sacerdote kamachenqa qorwariyasqa rumita orqhospa, llajtamanta jawapi q'opa jich'anaman wijch'umunankuta.

⁴¹ Kamachillanqataj wasi ukhuta khitunankuta, khitusqankumanta jallp'atataj llajtamanta jawaman, q'opa jich'anaman wijch'umunankuta.

⁴² Chantá perqamanta rumita orqhosqankumanqa waj rumita churanqanku. Jinaspataj, wasej perqanta t'uruwan llut'anqanku.

⁴³ Sichus rumita orqhosqankumantaña, perqata khitusqankumantaña chantá watej t'uruwan llut'asqankumantaña qorwariyay ujtawan rikhurillanmantaj chayqa,

⁴⁴ sacerdote ujtawan chay wasita qhawamonqa. Sichus onqoy watej wasiman junt'aykusqanta reparanqa chayqa, chay qorwariyayqa millay qorwariyay kashan. Chayrayku waseqa ch'ichipaj qhawasqa kanqa.

⁴⁵ Jina kajtenqa, wasita thuñiykonqanku. Chantá ruminta, k'aspinta, tukuy jallp'antawan llajtamanta jawaman, q'opa jich'anaman wijch'umonqanku.

⁴⁶ Sichus pipis sacerdote wasi wisq'asqa kananta kamachishajtin yaykunman chayqa, chay runa ch'isiyanankama mana llimphupaj qhawasqa kanqa.

⁴⁷ Pillapis chay wasipi mikhojqa, chayrí puñojqa p'achanta t'ajsanan tiyan.

⁴⁸ Sichus sacerdote ujtawan wasita qhawaj rispa rikunman llut'asqankumanta qhepaman qorwariyay sayasqanta chayqa, sacerdote nenqa chay wasi llimphuña kasqanta, chay qorwariyay chinkapusqanrayku.

⁴⁹ Chantá wasita llimphuchanapaj sacerdoteqa iskay p'isqetukunata, cedro k'aspita, puka q'aytuta chantá hisopo qhoratawan jap'enqa.

⁵⁰ Jinaspataj, juturimanta yakuyoj t'uru manka patapi ujnin kaj p'isqetuta wañuchenqa.

⁵¹ Chantá wañusqa p'isqetoj yawarninwan, jinataj juturimanta yakuwan, cedro k'aspita, hisopo qhorata, puka q'aytuta, chantá kawsashaj p'isqetutawan ima joq'ochanqa. Jinaspataj, chay wasita qanchis kutita yakuwan, chantá yawarwan ima ch'ajchonqa.

⁵² Ajinata p'isqetoj yawarninwan, juturi yakuwan, kawsashaj p'isqetuwan, cedro k'aspiwan, hisopo qhorawan, puka q'aytuwan ima wasita llimphuchanqa.

⁵³ Jinaytawantaj, kawsashaj p'isqetuta llajtamanta jawapi kachariponqa. Ajinata sacerdoteqa wasita llimphuchanapaj imachus ruwanata junt'anqa. Chay wasitaj llimphupaj qhawasqa kanqa, nispa.

⁵⁴ Kaykuna kanku llejti onqoywan, tijlla onqoywan,

⁵⁵ p'achapi qorwariyay, chantá wasipi qorwariyay rikhurejtin, imatachus ruwanamanta kamachisqakuna.

⁵⁶ Jinallataj runaj ukhunpi punkiy, mirkha, chayrí lleqhe rikhurejtin, imatachus ruwanamanta kamachisqakuna kanku.

⁵⁷ Ajinamanta israelitakuna yachanqanku mayk'ajchus llimphupaj qhawasqa kanankuta, chayrí ch'ichipaj qhawasqachus kanankuta. Llejti onqoykunamanta kamachisqakuna kaykama karqa.