Jueces 9 - DIOSPA QHELQACHISQAN DEUTEROCANONICAL

Abimelecpa ruwasqan

¹ Yerubaalpa churin Abimelecqa Sichem llajtaman rerqa mamanmanta kaj ayllunkunawan parlaj. Jinaspataj, Abimelec nerqa:

² Noqa mañarikuykichej kay Sichem llajtapi tiyakojkunata tapurinaykichejta, pitaj kamachej kananta munankichej. Yerubaalpa qanchis chunka churinkunachu chayrí uj runallachu kamachej kanan tiyan? Yachankichej jina, noqaqa yawar masiykichej kani, nispa.

³ Jinataj chay runakunaqa Abimelec paykunaj ayllunku kasqanrayku, payman kutikorqanku, Sichem llajtapi tiyakojkunatataj yuyaychamorqanku Abimelecta qhatinankuta.

⁴ Chaypajqa qolqeta orqhorqanku Baal Berit nisqa diosninkoj yupaychana wasinmanta Abimelecman qonankupaj. Chay qolqewantaj Abimelecqa millay suwa runakunata mink'akorqa paywan rinankupaj.

⁵ Jinamanta paykunaqa rerqanku Abimelecpa tatan Yerubaalpa llajtan Oframan. Chaypitaj uj rumi patapi Abimelecpa qanchis chunkantin wawqenkunata wañucherqanku. Yerubaalpa sullk'a kaj churin Yotanllata mana wañucherqankuchu pay pakakusqanrayku.

⁶ Chay qhepantataj Sichem llajtamanta kajkuna, chantá Milomanta kajkunapis encina sach'a chaynejpi tantaykukorqanku, maypichus diosninku yupaychana rumi karqa, chaypi. Jinaspataj, Abimelecta kuraj kamachejninkupaj churarqanku.

⁷ Yotanqa chayta yachaytawankama, Guerizín orqoman wicharispa, sinch'ita qhaparerqa, tukuy uyarinankupaj jina: Uyariwaychej allinta Sichem llajtayojkuna, ichapis ajinata Tata Dios qankunatapis uyarisunkichejman, nispa.

⁸ Chantá uj rijch'anachinata nerqa: Uj kuti sach'akuna kuraj kamachejniyoj kayta munaspa, olivo sach'ata mañasqanku kuraj kamachejninku kananta.

⁹ Chay sach'atajrí mana munasqachu kuraj kamachej kayta, nisqataj: Sach'akunaj kuraj kamachejninku kanaypajqa aceite qonaytachari saqenay kanman. Chay aceiteqa kashan Diosta jatunchanapaj, jinallataj runakunatapis, nispa.

¹⁰ Chaymantataj sach'akunaqa higo sach'atañataj parlapayasqanku kuraj kamachejninku kananpaj.

¹¹ Jinapi higo sach'apis kutichillasqataj: Mana atiymanchu kuraj kamachejniykichej kayta. Kuraj kamachej kanaypajqa saqenay kanman misk'i higo poqoyta, nispa.

¹² Chantá chay sach'akunaqa uva sach'atañataj parlapayasqanku kuraj kamachejninku kananpaj.

¹³ Uva sach'apis manallataj munasqachu, nisqataj: Kuraj kamachej kanaypajqa saqenaychá kanman uvata poqoyta vinota ruwanankupaj. Chaywan kusichini runakunata, jinataj Diostapis, nispa.

¹⁴ Chay sach'akunaqa khishkarara sach'atañataj parlapayasqanku kuraj kamachejninku kananpaj.

¹⁵ Khishkarara sach'ataj paykunata nisqa: Sichus cheqamanta kuraj kamachejniykichej kanayta munankichej chayqa, llanthuy uraman tukuyniykichej jamunaykichej tiyan. Manatajchus kuraj kamachejniykichej kanayta munankichej chayrí, noqamanta llojsispa, nina lawray tukuy Libanopi kaj pinokunata ruphaykonqa, nispa.

¹⁶ Kunantaj tapusqaykichej: Allintachu, cheqan sonqowanchu Abimelecta kuraj kamachejniykichejpaj ajllankichej? Yerubaalpa churinkunawanpis allintachu ruwarqankichej, imaynatachus Yerubaalqa qankunawan ruwarqa, jinatachu?

¹⁷ Tatayqa wañuyta mana manchachikuspa, qankunarayku maqanakorqa, madianitakunamanta kacharichisunaykichejrayku.

¹⁸ Kunantaj qankunaqa tataypa ayllunpa contranpi oqharikunkichej, qanchis chunka churinkunatataj uj rumi patallapi wañucherqankichej. Chaywanpis Gedeonpa chay waj warminpi churin Abimelectaraj Sichempi kuraj kamachejniykichejpaj churaykukunkichej, aylluykichej kasqanraykulla.

¹⁹ Kunanqa ujta nisqaykichej: Sichus qankuna Yerubaalwan, ayllunwan allinta cheqan sonqowantaj ruwarqankichej chayqa, Abimelecwan kusikuychej, paytaj qankunawan kusikuchun.

²⁰ Mana jina chayrí, Abimelecmanta nina lawray llojsispa, ruphaykuchun Sichem llajtapi tiyakojkunata, jinataj Milopi tiyakojkunatapis. Ajinallatataj Sichem llajtamanta, Milomantawan nina lawray llojsillachuntaj, Abimelectañataj ruphananpaj.

²¹ Chay tukuyta niytawan, Yotanqa ayqerikapuspa, Ber llajtapi tiyakamorqa, wawqen Abimelecta manchachikusqanrayku.

Abimelecta wañuchinku

²² Abimelecqa kinsa watataña israelitakunata kamacherqa.

²³ Chantá Diosqa mana allin yuyayta Abimelecman qorqa, jinataj Sichem llajtapi tiyakojkunamanpis, Abimelecpa contranpi oqharikunankupaj.

²⁴ Ajinata Abimelecqa Yerubaalpa qanchis chunka churinkunata wañuchisqanrayku jasut'isqa karqa. Jinallataj Sichem llajtamanta runakunapis payta yanapasqankurayku jasut'isqallataj karqanku.

²⁵ Sichem llajtayojkunamanta wakin runakuna orqo cheqanejpi pakakuspa, ñan purejkunamanta suwarqanku. Chaywanpis pichá chayta Abimelecman willarqa.

²⁶ Aswan qhepaman Ebedpa churin Gaalwan, wawqenkunawan ima Sichem llajtaman chayarqanku, jinataj chay llajtayojkunaj sonqonkuta suwarqanku.

²⁷ Chantá tukuyninku llojserqanku campoman uvata pallaj. Vinota ruwaspataj, uj jatun raymita ruwarqanku. Chantá mikhuspa, ujyaspataj diosninkoj yupaychana wasinpi Abimelecpaj millayta rimarqanku.

²⁸ Ebedpa churin Gaaltaj nisharqa: Pi kasqantataj yuyakun kay Abimelecri? Payqa Yerubaalpa churillan. Chantá manachu Zebulqa yanapajnillanri? Noqanchej Sichem llajtamanta kajkunarí, pikunataj kasqanchej Abimelecpa wata runan kananchejpajri? Jamorpa wata runan kanachej, pichus Sichem llajtayojkunaj ñawpa tatanku karqa, chaypata, amataj Abimelecpa wata runanqa.

²⁹ Ay, noqachus qankunaj kamachejniykichej kayman chayqa, kunitanpacha Abimelectaqa wijch'uyman. Paywan tinkuspa, noqa niyman: Abimelec, soldadoykikunata tantamuy maqanakunanchejpaj, nispa. Ajinata Gaalqa Abimelecpa contranta rimarqa.

³⁰ Llajtata kamachej Zebulrí Ebedpa churin Gaalpa rimasqanta uyarispa, mayta phiñarikorqa.

³¹ Chantá Abimelec Arumapi kashajtin, pakayllamanta willachimorqa: Ebedpa churin Gaal, wawqenkunawan ima Sichem llajtaman jamunku. Kunantaj kay llajtayojkunaman umata sat'ishanku qanpa contraykipi oqharikunankupaj.

³² Chayrayku qanwan, soldadoykikunapiwan tutallan jamuspa, campopi pakakuychej.

³³ Chantá tutamanta inti llojsimuynejta jina llajtaman maqanakoj yaykuy. Gaal, runankunawan ima maqanakoj jamusojtinkutaj, paykunawan munasqaykita ruway, nispa.

³⁴ Ajinata ari Abimelecqa soldadonkunawan tutallan jamuspa, tawaman t'aqakorqanku. Chantá Sichem llajtaj muyuyninpi pakaykukorqanku.

³⁵ Q'ayantin tutamantataj Ebed churin Gaal llajta punkuman llojserqa. Chaypacha Abimelecpis chay runankunawan pakakusqankumanta llojsimushallarqankutaj.

³⁶ Paykunata rikuspataj, Gaalqa Zebulta nerqa: Qhawariy, orqonejmanta ashkha runakuna urayk'amushanku, nispa. Zebultajrí kuticherqa: Qanqa orqoj llanthullanta runakunata jina rikushanki, nispa.

³⁷ Jinapis Gaalqa nishallarqapuni: Qhawariy, Jallp'aj pupun nisqa orqomantapis urayk'amushallankutaj ashkha soldadokuna. Waj t'aqataj Yatirikunaj Encina Sach'anku nisqa ñanninta jamushallantaj, nispa.

³⁸ Chantá Zebul nerqa: Kunan parlariy á, simisapa. Qan nerqanki: Abimelecqa pitaj kasqa noqayku paypa kamachin kanaykupajri? nispa. Jaqaymin pisipaj qhawasqayki soldadokunaqa. Kunanqa llojsiy maqanakamuy ari, nispa.

³⁹ Chantá Gaalwan, Sichem llajtayojkunawan ima Abimelecpa contranta maqanakoj llojserqanku.

⁴⁰ Jinapi Abimelecqa Gaalta qhatiykorqa, Gaaltaj paymanta ayqekorqa. Abimelecpa soldadonkunaqa chay llajtayojkunamanta ashkhata wañucherqanku.

⁴¹ Chaymantataj Abimelecqa Arumapi qhepakorqa. Zebulrí Sichem llajtamanta Gaalta, wawqenkunatawan ima wijch'orqa.

⁴² Q'ayantenqa Sichem llajtamanta kajkuna chajrankuman llojsinankuta yachaspa,

⁴³ Abimelecqa soldadonkunata kinsaman t'aqarqa, paykunataj chay camponejpi pakaykukorqanku. Chantá Sichem llajtayojkuna llojsimusqankuta rikuspa, Abimelecpa soldadonkuna pakakusqankumanta llojsiytawan, chay llajtayojkunawan maqanakorqanku.

⁴⁴ Abimelecqa uj t'aqa soldadonkunawan llajta punkuta jap'ej rerqanku. Chay iskay t'aqa soldadokunataj chajrankupi kashajkunata wañuracherqanku.

⁴⁵ Tukuy p'unchaynintinta Abimelecqa Sichem llajtayoj runakunawan maqanakorqa paykunata atipanankama. Chantá chay llajtata phirerqa, tukuy chaypi tiyakojkunatataj wañuracherqa. Jinaspataj, chay llajtaman kachita qhalliykorqa.

⁴⁶ Abimelecpa ruwasqanta yachaspa, Migdal torre Sichempi kashajkunaqa Berit nisqa yupaychana wasipi pakakorqanku.

⁴⁷ Abimelecrí uyarerqa chay yupaychana wasipi tukuy tantasqa kashasqankuta.

⁴⁸ Chaypacha Abimelecqa tukuy soldadonwan Salmón nisqa orqoman rispa, jachawan sach'amanta thansata k'utorqa. Chayta lijrariykukuspataj, soldadonkunata nerqa: Qankunapis usqhayta kikillantataj ruwaychej, nispa.

⁴⁹ Tukuyninku thansata k'uturaspa q'epiriykukuytawan, qhaterqanku Abimelecta chay llajtayojkunaj diosninku Beritta yupaychananku wasikama. Chaypitaj k'utusqanku thansata qolluykuytawankama, ninata jap'iykucherqanku. Jinamanta chay yupaychana wasipi pakakojkunata wañucherqanku. Paykuna karqanku qharikuna, warmikunapiwan ima 1.000 jina.

⁵⁰ Chay qhepaman Abimelecqa Tebesmanñataj rerqa, chay llajtata muyuykuytawantaj jap'erqa.

⁵¹ Llajtaj chawpinpi uj torre karqa, chay llajtamanta kajkunataj chaypi pakasqa kasharqanku qharikuna, chantá warmikunapis, kurajninkukuna ima. Punkukunata wisq'aykuytawan, torrej patanman wicharerqanku.

⁵² Abimelectajrí torre chaynejkama chayaspa, punkuman qayllaykorqa ninawan jap'iykuchinanpaj. Chaypi kashajtintaj,

⁵³ uj warmi kutana rumita torre patamanta kachaykamuspa, Abimelecpa umanta ch'ejtarparqa.

⁵⁴ Chantá Abimelecqa armanta apaykachajta nerqa: Espadaykiwan wañuchiway. Mana munanichu warmillaraj wañuchisqa ninawankuta, nispa. Chantá Abimelecpa armanta apaykachaj runaqa espadawan t'ojsispa, Abimelecta wañurparicherqa.

⁵⁵ Israelita soldadokunataj Abimelec wañusqanta rikuytawan, sapa ujninku wasinkuman kutiporqanku.

⁵⁶ Ajinamanta Diosqa Abimelecta jasut'erqa, chay qanchis chunka wawqenkunata wañuchispa, tatanpaj mana allinta ruwasqanmanta.

⁵⁷ Ajinallatataj Diosqa Sichem llajtapi kaj runakunatapis jasut'illarqataj tukuy millayta ruwasqankumanta. Jinamanta junt'akorqa paykunapi Yerubaalpa churin Yotanpa maldicisqan.