Jueces 8 - DIOSPA QHELQACHISQAN DEUTEROCANONICAL

Gedeón madianitakunata atipasqata atipaykun

¹ Efraín jatun ayllumanta kajkunaqa phiñarikuspa, Gedeonwan siminakorqanku, madianitakunawan maqanakunankupaj paykunata mana wajyachisqanrayku.

² Gedeontajrí kuticherqa: Manachu reparakorqankichej, qankuna noqamanta astawan ruwasqaykichejta? Chay pisi ruwasqaykichejqa astawanraj valen noqayku Abiezerpa ayllunpa ruwasqaykumanta nisqaqa.

³ Tata Diospa yanapayninwan qankunamin madianitakunaj kamachejninkunata Orebta, Zeebtawan atiparqankichej. Paykunaqa madianitakunaj kurajninkuna karqanku. Imatataj noqa ruwarqani qankunaj ruwasqaykichejmanta aswan allintari? nispa. Efrainmanta kajkunataj Gedeonpa nisqanta uyarispa, sonqonkuta tiyaykuchikorqanku.

⁴ Chantá Gedeonqa 300 runankunawan Jordán mayuman chayamuspa, chimparqanku. Paykunaqa sinch'i sayk'usqa kashaspapis, madianitakunataqa qhatiykushallarqankupuni.

⁵ Chantá Sucot llajtaman chayaspa, chay llajtayojkunamanta mañarikorqa: Ama jina kaspa, mikhuyta qoriychej noqawan khuska jamojkunaman. Paykunaqa allin sayk'usqa kashanku, imaraykuchus madianitakunaj kuraj kamachejninku Zebajta, Salmunatawan qhatiykuspa purishayku, nispa.

⁶ Sucotpi kamachejkunatajrí kuticherqanku: Runaykikunaman mikhuchinaykupajqa Zebajta, Salmunatawan jap'inkichejñachu? nispa.

⁷ Chaymanta Gedeonqa paykunaman kuticherqa: Zebajta Salmunatawan Tata Diospa yanapayninwan jap'ejtiykukama, kutimuspa, khishka varakunawan wasaykichejta llik'irasqayku, cardowantaj qankunata seq'orasqayku, nispa.

⁸ Chantá Peniel llajtaman chayaspa, Sucotpi jina mikhunata mañakullarqankutaj. Penielpi kajkunatajrí Sucotpi kajkuna jinallataj kuticherqanku.

⁹ Jinapi Gedeonqa paykunata nerqa: Noqa paykunata atipaytawan, kutimusaj, kay torreykichejtataj thuñisaj, nispa.

¹⁰ Chaykama Zebajwan, Salmunawan Carcorpi kasharqanku 15.000 soldadokunawan. Paykunaqa chay pachaj iskay chunkayoj inti llojsimuynejmanta kaj soldadokunamanta puchoj karqanku, imaraykuchus israelitakuna chaykama 120.000 madianita soldadokunata wañuchisqanku.

¹¹ Gedeonrí rillarqapuni chay ch'innejta muyuykoj ñanta, Nobajmanta inti llojsimuynejninta chantá Yogbeanejta. Chantá kaymanta jinalla madianitakunaj jarankuman maqanakoj yaykuykorqa.

¹² Kuraj kamachej Zebajwan, Salmunawantaj ayqerqanku. Gedeonrí qhatiykuytawan, paykunata jap'irparerqa, madianita tukuy soldadonkukunatataj t'ustiykorqa.

¹³ Gedeón maqanakusqanmanta Jeres q'asanta kutimpushaspa,

¹⁴ Sucotmanta uj waynata jap'erqa. Gedeón tapojtintaj, chay waynaqa Sucotmanta qanchis chunka qanchisniyoj kamachejkunaj jinataj kurajkunajpa sutinkuta qhelqasqata qorqa.

¹⁵ Chantá Gedeonqa Sucotman rispa, chaypi tiyakojkunata nerqa: Yuyarikunkichejchu imaynatachus alqochakuwasqaykichejta Zebaj, chantá Salmunaraykuri? Yuyarikunkichejchu soldadoykunaman t'antata mana qorisqaykichejta, paykuna may sayk'usqa kashajtinku? Qankuna nerqankichej: Manaraj Zebajta, Salmunatawan jap'inkichejrajchu, nispa. Kayqa, kunanqa paykunata rikuychej, nispa.

¹⁶ Chaypacha Gedeonqa khishkata, cardotawan ch'innejmanta apamuspa, chaykunawan Sucotmanta kurajkunataqa seq'oykorqa.

¹⁷ Ajinallatataj Penielpi torreta thuñiykorqa, chay llajtayojkunatataj wañuracherqa.

¹⁸ Chantá Zebajta, Salmunatawan taporqa: Taborpi runakuna wañucherqankichej, chaykuna imaynataj karqanku? nispa. Paykunataj kuticherqanku: Qanman rijch'akorqanku. Sapa ujninku kuraj kamachejpa churinman rijch'akorqanku, nispa.

¹⁹ Chaypacha Gedeonqa sinch'ita llakikuspa qhaparerqa: Paykuna wawqeykuna karqanku, mamaypa wawankuna. Tata Diosrayku tiluni: Manachus paykunata wañuchiwajchej karqa chayqa, manallataj noqapis wañuchiykichejmanchu karqa, nispa.

²⁰ Chantataj Gedeonqa kuraj kaj churin Jeterta nerqa: Kaykunata wañuchiy, nispa. Jinapis Heterqa as waynallaraj kasqanrayku espadanta orqhoyta manchachikorqa wañuchinanpaj.

²¹ Chaypacha Zebajwan, Salmunawan Gedeonta nerqanku: Sichus qhari kanki chayqa, qanpuni wañuchiwayku, nispa. Gedeontaj sayarispa, paykunata wañuracherqa. Chantá Zebajta, Salmunatawan camellonkunaj kunkankupi kasharqa, chay k'achanchanakunata orqhokaporqa.

Gedeón lantikunata yupaychan

²² Chaypacha israelitakunaqa Gedeonta nerqanku: Qanqa madianitakunamanta kacharichiwaykuña. Kunanqa munayku qan, chantá aylluykikuna ima kamachinawaykuta, nispa.

²³ Gedeontajrí paykunaman kuticherqa: Mana noqachu, nitaj churiychu kamachejniykichej kasqayku, manachayqa Tata Dioslla kamachejniykichejqa.

²⁴ Chaywanpis noqa munayman madianita wañusqa soldadokunamanta qhechusqaykichej walqakunamanta wakinta qonawaykichejta, nispa. Chay qori walqata madianitakunaqa churakuyta yachaj kanku, Ismaelpa ayllunmanta kasqankurayku.

²⁵ Jinapi israelitakunaqa uj llijllata pampaman mast'aykuytawankama, chayman qori walqakunata churarqanku, chantá nerqanku: Kayqa, tukuy sonqoykumanta qoshayku, nispa.

²⁶ Tukuyninpi chay qori walqakunaqa chunka jisq'onniyoj kilo jina pesarqa. Chaypis wajlla karqa qorimanta kaj k'achanchakuna imakuna, jinallataj Madianmanta kuraj kamachejpa p'achallikunanmanta puka telakuna, chantá camellokunaj kunkankupi kaj k'achanchanapis.

²⁷ Chantá Gedeonqa chay qorimanta uj lantita ruwaytawan, Ofrá llajtaman churaykorqa. Ajinamanta chay lantita Gedeón ruwachisqanrayku, Tata Diosta wasancharqanku chay llajtayojkuna, jinataj Israel ayllukunapis. Jinallataj Gedeonpajpis, ayllunpajpis misk'ana jina karqa.

²⁸ Ajinata ari israelitakunaqa madianitakunata atipaykorqanku. Chaymantapacha madianitakuna manaña israelitakunaj contrankupi oqharikorqankuchu. Tawa chunka wata junt'ata, Gedeón kawsanankama, allin kawsakuylla chay suyupi karqa.

Gedeón wañupun

²⁹ Chaymanta qhepaman Joaspa churin Gedeón, pichus Yerubaal sutiyojllataj karqa, payqa llajtanman tiyakoj riporqa.

³⁰ Paytaj ashkha warmiyoj kasqanrayku, qanchis chunka churinkunayoj karqa.

³¹ Sichem llajtayoj kaj, chay ujnin warmeqa uj qhari wawata paypaj paqarichikorqa. Gedeontaj chay wawanta Abimelec sutiwan suticharqa.

³² Gedeonqa allin machuña wañuporqa. Paytataj p'ampaykorqanku tatan Joaspa aya p'ampananpi. Chay karqa Abiezerpa ayllunpa Ofrá sutiyoj llajtanpi.

³³ Gedeón wañupusqanmanta qhepaman israelitakunaqa Diosmanta karunchakuyta qallarillarqankutaj, Baalpa tukuy imaymana lantinkunaman yupaychaj rispa. Baal Berit lanti nisqata diosninku kananpaj ajllakorqanku.

³⁴ Tata Diosmanta qonqakaporqanku, paymari tukuy awqankukunamanta paykunata kacharichejtinpis.

³⁵ Israelitakunaqa Yerubaal sutiyoj chay Gedeonpa ayllunmantapis manallataj yuyarikullarqankupischu, payqa israelitakunata mayta yanapajtinpis.