Jueces 7 - DIOSPA QHELQACHISQAN DEUTEROCANONICAL

Gedeón madianitakunata atipaykun

¹ Yerubaal nisqa Gedeonqa, tukuy paywan kajkunapiwan chhapu chhaputa jatarikuspa, Jarod yaku juturi chaypi jarakoj rerqanku. Madianitakunaj jarankutaj paykunamanta aswan wichaynejpi, More Orqo k'uchupi chay jatun pampapi kasharqa.

² Chantá Tata Diosqa Gedeonta nerqa: Ancha ashkha runakunata pusamunki. Sichus paykuna ajinata madianitakunata atipanku chayqa, israelitakunaqa umata oqharinkuman: Kallpallaykuwan kaykunata atipayku, nispa.

³ Chayrayku kunanqa niy, pikunachá manchachikunku, chaykuna Galaad orqomanta wasinkuman ripunankuta, nispa. Gedeón nejtinkamataj, 22.000 runakuna wasinkuman kutiporqanku. Chunka waranqallaña qhepakorqanku.

⁴ Chantá Tata Diosqa Gedeonta nillarqataj: Ashkharajpuni kanku. Chayrayku paykunataqa pusay yakuta ujyanankupaj. Chaypi paykunata ch'ijllasaj, nisqaykitaj pikunachus qanwan khuska maqanakoj rinankuta, pikunatajchus mana rinankuta, nispa.

⁵ Jinataj Gedeonqa chay runakunata mayuman pusarqa yakuta ujyamunankupaj. Chantá Tata Dios nerqa: Pikunachus makinkuwan alqo jina laqhospa ujyajkunata wajman t'aqanki, chay pikunachus qonqoriykukuspa ujyanku, chaykunamanta, nispa.

⁶ Pikunachus laqhospa alqo jina yakuta ujyarqanku, chaykunaqa 300 karqanku, wakintaj qonqoriykukuspa ujyarqanku.

⁷ Chantá Tata Diosqa Gedeonta nerqa: Kay 300 runakunallawan qankunata kacharichisaj, yanapasqaykichejtaj madianitakunata atipanaykichejpaj. Chay wajkunarí wasinkuman ripullachunku, nispa.

⁸ Gedeón chaypacha kamacherqa chay wajkuna wasinkuman kutipunankuta. Chaywanpis manaraj ripurashajtinku, p'uñukunata, wajramanta pututunkukunatawan tantacherqa. Ajinamanta Gedeón 300 ajllasqa israelitakunallawan qhepakorqa. Madianitakuna jarasqa kasharqanku, chaynejmanta aswan wichaynejpi Gedeonqa runankunawan jarakorqa.

⁹ Chay ch'isipacha Tata Diosqa Gedeonta kamacherqa: Sayarispa, madianitakunawan maqanakoj urayk'uy. Noqamin yanapasqayki paykunata atipanaykipaj.

¹⁰ Sichus paykunawan maqanakuyta manchachikushanki chayrí, kamachiyki Furawan madianitakunaj jarankuman urayk'unaykita.

¹¹ Chaypitaj uyarinki imatachus ninakusqankuta. Chaymantaqa manaña manchachikunkichu, nispa. Chaypacha Gedeonqa kamachin Furawan urayk'orqanku, maynejkamachus awqankoj qhawajkuna soldadonkuna kasharqanku, chaynejkama.

¹² Madianitakunawan, amalecitakunawan, chantá inti llojsimuynejmanta chay runakunapis phinki phinkikuna jina chay pampapi mast'alla kasharqanku. Camellonkunapis may chhika karqanku, mama qocha kantupi t'iyu chhikapuni.

¹³ Jinapi Gedeonqa awqankoj jarankuman qayllaykuspa, uyarerqa uj soldado madianita mosqokusqanta ujninman willarishajta: Mosqoyniypi rikorqani uj cebada t'anta jaranchejman tilinkamushasqanta, ujnin toldoman takakuspataj, urmarparichisqanta, nispa.

¹⁴ Chantá soldado masin kuticherqa: Chayqa Israelmanta Joaspa churin Gedeonpa soldadonkuna kanman. Tata Diosqa paykunata yanapanqa noqanchej madianitakunata atipanawanchejpaj, nispa.

¹⁵ Chay mosqoymanta willajta, jinataj ima niytachus munasqantawan uyarispa, Gedeonqa sonqon ukhupi Tata Diosta yupaycharqa. Chaymanta israelitakunaj jarankuman kutispataj, soldadonkunata kamacherqa: Jakuchej, imaraykuchus Tata Diosqa madianitakunata atipayta yanapawasun, nispa.

¹⁶ Chantá Gedeonqa chay 300 runankunataqa kinsaman t'aqaspa, sapa ujman putututa jaywararqa, chantá ch'usaj p'uñutawan, p'uñoj ukhunpitaj nina jachuntawan.

¹⁷ Chantá nerqa: Maypachachus madianitakunaj jarankuman chayashajtinchejña, qhawawankichej. Imatachus noqa ruwasaj, kikillantataj ruwankichej.

¹⁸ Noqa, chantá noqawan rejkunapis putututa waqachejtiykukama, qankunapis tukuy jaraj muyuyninpi pututuykichejta waqachillankichejtaj, qhaparispataj, ninkichej: Tata Diospa atiyninwan, Gedeonpa kallpanwantaj, nispa.

¹⁹ Ajinaqa Gedeón pachaj runankunawan madianitakunaj jaranku kantuman chayarqanku, chawpi tuta qhawaj soldadokuna manaraj puñoj ripushajtinku. Chaypachataj Gedeonwan kajkunaqa pututunkuta waqacherqanku, jap'isharqanku, chay p'uñunkutapis p'akillarqankutaj.

²⁰ Kinsantin t'aqakunaqa ujllapi pututunkuta waqacherqanku, p'uñunkutapis p'akillarqankutaj. Lloq'e makinkupitaj aparqanku nina jachunta, pututunkutataj paña makinkupi, jinaspataj qhaparerqanku: Tata Diospa atiyninwan, Gedeonpa kallpanwantaj, nispa.

²¹ Israelitakunaqa sapa ujninku mana ni mayman kuyuspa, chay jaraj muyuyninta muyuykorqanku, madianitakunarí qhaparispa, ayqekorqanku.

²² Chaykama 300 israelitakunaqa pututunkutaqa waqachishallarqankupuni, Tata Diostaj madianitakunataqa paykunapurata maqanaykucherqa. Jinallapi paykuna Bet Sitaman ayqekorqanku, Sererá ñanninta rispa, Tabat qayllapi Abel Meholá tinkuykama chayarqanku.

²³ Chaypacha Gedeonqa tukuy israelitakunata wajyacherqa Neftalí jatun ayllumanta, Asermanta, Manasespa tukuynin kajkunapiwan, ayqeykachashaj madianitakunata qhatiykunankupaj.

²⁴ Chaypacha Gedeonqa Efraín jatun ayllumanta kajkunamanpis willachillarqataj, chay jatun ayllumanta qharikuna madianitakunawan maqanakoj urayk'amunankuta. Kamachillarqataj Jordán mayuta chantá Bet Barakama tukuy mayuta jark'aykunankuta. Efraín jatun ayllumanta kajkunaqa Gedeonpa kamachisqanta kikinta ruwarqanku.

²⁵ Chantá madianitakunamanta iskay kurajkunata Orebta, Zeebtawan jap'erqanku. Orebtaqa uj chhankapi wañucherqanku. Chayrayku kunan chay chhankajta sutin Orebpa chhankan nisqa. Zeebtapis wañuchillarqankutaj, chay sutinwan kashan, chay cheqapi. Chayllapitaj uvata ch'irwaj kanku vinota ruwanankupaj. Madianitakunata maqanakupi qhatiykuytawankama, Orebpata, Zeebpatawan umankuta qholuspa, Gedeonman aparqanku, maypichus pay Jordán mayoj chimpapi kasharqa, chayman.