Jueces 3 - DIOSPA QHELQACHISQAN DEUTEROCANONICAL

Canaán suyupi qhepakoj llajtakuna

¹ Tata Dios wakin llajtayojkunata saqerqa, israelitakunata maqanakuyta yachachinanpaj, pikunachus Canaán suyupi maqanaku kasqanmanta mana yacharqankuchu, chaykunapaj.

² Tata Diospuni chay llajtayojkunata saqellarqa, israelitakunamanta pikunachus ni jayk'aj maqanakuman riyta yacharqankuchu, chaykuna maqanakuyta yachanankupaj.

³ Filisteokunamanta qhepakorqanku, pikunachus chay phishqa kamachejkunaj kamachinpi karqanku, chaykuna. Qhepakullarqankutaj tukuynin cananeokuna, sidoniokuna, Líbano orqonejpi tiyakoj heveokunapis, Baal Hermón orqomantapacha Jamat q'asakama.

⁴ Chay runakunawan Tata Diosqa yachayta munarqa israelitakuna kasunankutachus chayrí manachus, Moisesnejta ñawpa tatankukunaman qosqa, chay kamachisqakunata.

⁵ Jinamanta israelitakunaqa tiyakorqanku cananeokunawan, jititakunawan, amorreokunawan, ferezeokunawan, heveokunawan, jebuseokunawan ima.

⁶ Chantá israelitakunaqa ususinkukunata chay waj llajtayoj runakunawan casaracherqanku, churinkukunatataj chay runakunaj ususinkukunawan. Jinallataj chay llajtayojkunaj diosninkukunatapis yupaycharqanku.

Otonielqa israelitakunata Cusán Risatayinpa makinmanta kacharichin

⁷ Israelitakunaqa Tata Diosta qonqayman churaspa, paymanta karunchakorqanku, yupaycharqankutaj Baalpa lantinkunata, Aseraj lantinkunata ima.

⁸ Chayraykutaj Tata Diosqa paykunaj contrankupi sinch'ita phiñakuspa, Mesopotamiamanta kuraj kamachej Cusán Risatayinman paykunata jaywaykorqa. Pusaj wata junt'ata israelitakunaqa kuraj kamachej Cusán Risatayinpa wata runan karqanku.

⁹ Chaymantataj israelitakunaqa Tata Diosman qhaparikorqanku, Tata Diostaj churarqa uj juezta, Cenazpa churin Otonielta, chay Cenazqa Calebpa sullk'a wawqen karqa.

¹⁰ Otonielmantaj Tata Diospa Espíritun jamorqa, paytaj israelitakunata kamacherqa. Tata Diosqa Otonielta yanaparqa maqanakuman israelitakunata pusajtin, kuraj kamachej Cusán Risatayinta atipanankupaj.

¹¹ Chaymanta qhepaman israelitakuna tawa chunka watata allinta kawsakorqanku chay suyupi, Cenazpa churin Otoniel wañupunankama.

Aod israelitakunata moabitakunamanta kacharichin

¹² Chaymanta qhepaman israelitakunaqa watejmanta ruwallarqankutaj Tata Diospa mana munasqanta. Chayrayku Tata Diosqa Moabpa kuraj kamachej Eglonman astawan atiyta qorqa israelitakunamanta nisqaqa.

¹³ Kuraj kamachej Eglonqa amonitakunawan, amalecitakunawan ima ujchakuspa, maqanakupi israelitakunata atiparqa, Palma sach'ayoj llajtatataj jap'ikaporqa.

¹⁴ Jinapi chunka pusajniyoj watata israelitakunaqa Moabta kuraj kamachej Eglonpa kamachiyninpi wata runan karqanku.

¹⁵ Chantá Tata Diosman qhaparikorqanku, paytaj churarqa uj juezta paykunata kacharichinanpaj. Chay juezqa Benjamín jatun ayllumanta Geraj churin Aod sutiyoj karqa, paytaj lloq'ero karqa. Uj kuti israelitakunaqa Aodwan apacherqanku, Moabta kuraj kamachej Eglonman impuesto pagananku karqa, chayta.

¹⁶ Aodrí puraj filoyoj espadata ruwakusqa khuskan metroyoj jinata, chaytataj paña kaj chakannejman p'achan uraman churakorqa.

¹⁷ Jinaspataj, Eglonman apachikuta aparqa. Moabta kamachej Eglonqa rakhu, wira runa karqa.

¹⁸ Chay apachikuta Eglonman jaywapuytawantaj, Aodqa kutimporqa, pikunachus paywan jamorqanku, chaykunawan khuska.

¹⁹ Gilgal qayllapi lantikuna kasharqa, chayman chayamuspa, Aodqa kutirillarqataj, maypichus kuraj kamachej Eglón kasharqa, chayman. Chantá Eglonta nerqa: Kuraj kamachejníy, uj willay qanpaj tiyan. Kaytarí sapallaykipi willasqayki, nispa. Eglontaj nerqa: Amallaraj niwaychu, nispa. Chantá kamachinkunata kamacherqa chaymanta llojsinankuta.

²⁰ Eglón chay q'oñi tiempopaj wakichisqa wasipi sapan qhepakusqantawan, Aodqa qayllaykuspa, Eglonta nerqa: Kuraj kamachejníy, kay willay apamususqayqa Diosmantamin, nispa. Chayta uyarispataj, Eglonqa tiyananmanta sayarikorqa.

²¹ Aodrí lloq'e makinwan pañanmanta espadanta orqhokamuytawan, Eglonpaj wijsanman sat'iykorqa.

²² May sinch'ita sat'iykojtintaj, espadanqa jap'inantin ima Eglonpa wijsanman chinkaykaporqa, Eglón manchay wira runa kasqanrayku. Aodtaj espadanta mana orqhokaporqachu.

²³ Chaymantataj Aodqa punkuta llaveykuspa, ventananta llojsiporqa.

²⁴ Aod ripusqanmantaña, Eglonpa kamachinkunaqa jamorqanku, chay wasej punkunta wisq'asqata taripaspataj, yuyarqanku jisp'ana wasipi kashasqanta.

²⁵ Anchataña suyarqanku, manapuni Eglón llojsimojtintaj, kamachinkuna astawan mancharikuyta qallarerqanku. Punkuta kicharispataj, kuraj kamachejninkutaqa wañusqata tariparqanku.

²⁶ Eglonpa kamachinkuna punkuta kicharinankukamaqa, Aodqa ayqerikaporqaña. Gilgal chaypi lantikunata pasaytawantaj, Seiratpi pakakorqa.

²⁷ Chantá Israel suyuman chayaspañaqa, Efraín orqonejpi putututa waqacherqa, israelitakunata wajyaspa. Tukuynin israelitakuna chay orqomanta urayk'amorqanku, Aodtaj ñawpaqenkuta rerqa.

²⁸ Jinapi Aodqa paykunata nerqa: Qhatiwaychej, imaraykuchus Tata Diosqa awqaykichej moabitakunata atipayta yanapasonqachej, nispa. Chaypacha Aodta qhatispa, israelitakunaqa Jordán mayoj ch'ajchankunata jap'ikaporqanku, manataj ni pita chayninta chimpajta saqerqankuchu.

²⁹ Moabitakunaqa wapu soldadokuna karqanku. Chaywanpis israelitakunaqa 10.000 soldadokunata wañucherqanku. Ni uj kawsashaj qhepakorqachu.

³⁰ Israelitakunataj ajinata Moabta atipaykorqanku. Chaymanta qhepamantaj pusaj chunka watata jina allinta kawsakorqanku chay jallp'apeqa.

Samgar israelitakunata filisteokunaj makinmanta kacharichin

³¹ Qhepan kaj juez Anatpa churin Samgar sutiyoj karqa. Payqa wapu runa karqa. Chayrayku payqa 600 filisteo soldadokunata ayjonllawan wañucherqa. Ajinamanta israelitakunata filisteokunaj makinmanta kacharichillarqataj.