Jueces 18 - DIOSPA QHELQACHISQAN DEUTEROCANONICAL

Dan jatun ayllumanta kajkuna jallp'ankuta mask'anku

¹ Chaypacha Israel ayllu ukhupi mana kuraj kamachej karqachu. Dan jatun ayllojtapis manaraj jallp'an karqachu, ajinaqa maypichus tiyakunankuta mask'asharqanku.

² Chayrayku Danmanta kajkunaqa Soramanta, jinataj Estaolmanta kacharqanku phishqa aswan kallpayoj runakunata qhawaramunankupaj, jinataj sumajta rejsimunankupaj chay jallp'akunata. Chay phishqa kachakunaqa Efraín jatun aylloj jallp'ankupi orqorara cheqanejman rispa, chayarqanku Micaíaj wasinman, chaypi chay ch'isi puñukunankupaj.

³ Micaíaj wasinman qayllashaspañaqa, chay wayna levitaj parlasqanta rejserqanku. Chayrayku levitaman qayllaykuspa, taporqanku: Pitaj kaynejman pusamusorqari? Imaraykutaj qan kaypi kashankiri? Imatataj kaypi mask'ashankiri? nispa.

⁴ Chantá levita kuticherqa: Kay Micaiawan uj tratota ruwarqayku, paytaj sacerdoten kanaypaj pagamanta mink'akuwan, nispa.

⁵ Chayta uyarispa, Danmanta jamojkuna nerqanku: Diosta tapuripuwayku kay puriyniykupi allinchus riwasqayku manachus, chayta, nispa.

⁶ Levita sacerdotetaj kuticherqa: Rillaychej mana manchachikuspa, imaraykuchus Tata Diosqa qankunata waqaychasonqachej mayllamanpis rejtiykichej, nispa.

⁷ Chaymantataj chay phishqa kachakunaqa Laisman rerqanku. Chay llajtayojkunaqa mana imamanta manchachikuspa tiyakoj kanku, imaynatachus sidoniokuna kawsayta yachasqankuman jina, ni ima ch'ajwawan, sumajpi kawsarqanku, ni pejpa imanasqan, nitaj ni imamanta pisichikuspa. Paykunaqa sidoniokunamanta karupi tiyakorqanku, manataj piwanpis tratoyojchu karqanku.

⁸ Chaymantataj chay phishqa kachakunaqa kutimporqanku Soraman, jinataj Estaolman, maypichus chay wawqe masinku kasharqanku, chayman. Paykunataj chay kachakunata tapurerqanku: Imaynataj risorqachejri? nispa. Chay kachakunataj kuticherqanku:

⁹ Chaynejpi purispa, sumaj jallp'ata tarerqayku. Ama qhella kanachu mana ima ruwaspa. Jaku rina chay jallp'ata jap'ikapoj.

¹⁰ Chayman chayaspa, rikunkichej chay llajtayojkunaqa mana imamanta manchachikuspa, nitaj imamanta pisichikuspa, ashkha jallp'ayoj kasqankuta. Diosmin chay jallp'ata qowasunchej, nispa.

¹¹ Chantá Dan jatun ayllumanta, Soramanta, Estaolmanta ima 600 qharikuna llojserqanku sumaj wakisqa maqanakunapaj.

¹² Judaman chayaspataj, Quiriat Yearinmanta inti yaykuynejpi jina jarakorqanku. Chayrayku chaynejpata kunankama sutin “Danpa Jaran” nisqa.

¹³ Chaymantataj rerqanku Efrainpa jallp'anpi orqorara cheqanejman, chayarqankutaj Micaíaj wasinman.

¹⁴ Chantá pikunachus Lais llajtata qhawaj jamusqanku, chay phishqa kachakunaqa llajta masinkuman nerqanku: Yachankichejchu kay wasipi tiyan Diosta tapuna efodta, chantá lantikuna, jinataj k'ullu llajllasqamanta uj lanti qolqewan lluch'isqa ima. Ima ninkichejtajri? nispa.

¹⁵ Chantá kachakunaqa rispa, Micaíaj wasiman chayaspa levitata napaykorqanku.

¹⁶ Chaykamataj Dan jatun ayllumanta kaj 600 soldadokuna sumaj wakisqa punkupi suyasharqanku.

¹⁷ Jinapi chay phishqa kachakunaqa wasiman yaykuykuspa, suwakorqanku k'ullumanta llajllasqa qolqewan lluch'isqa lantita, Diosta tapuna efodta, chay waj lantikunata ima. Chaykamarí sacerdoteqa chay 600 soldadokunawan khuska punkupi kasharqa.

¹⁸ Chay phishqa kachakuna lantitawan, Diosta tapuna unkutawan, chay waj lantikunatawan apashaspa Micaíaj wasimanta llojsishajtinku, sacerdoteqa paykunata rikuspa taporqa: Imatataj ruwashankichejri? nispa.

¹⁹ Paykunataj kuticherqanku: Ch'inlla kakuy. Chantá noqaykuwan jampuy. Munayku sacerdoteyku kanaykita, jinataj uj tatayku jina. Manachu aswan walej kanman Israel ujnin kaj jatun aylluntinmanta sacerdote kanayki uj runaj wasillanmanta nisqaqa? nispa.

²⁰ Chay nisqankuta uyarispa, sacerdoteqa kusikorqa. Chayrayku chay lantita, Diosta tapuna efod p'achata, chay waj lantikunatapis apariykukuspa, Dan jatun ayllumanta soldadokunawan riporqa.

²¹ Chay soldadokunataj warminkuta, wawankuta, uywankuta, tukuy kapuyninkuta ima ñawpachispa, chaymanta riporqanku.

²² Karutaña purishajtinkutaj Micaiawan, kawsaqenkunawan tantaykukuspa, Dan jatun aylluta qhatiykorqanku.

²³ Chay qhatiykojkunaj qhaparisqankuta uyarispataj, Danmanta kajkunaqa qhepaman kutirerqanku. Micaiawan tinkuspataj, taporqanku: Imataj tiyanri? Imaraykutaj chay jinatapuni qhaparimuwaykuri? nispa.

²⁴ Micaiastaj kuticherqa: Qankuna apakapushankichej, ruwakorqani, chay lantiykunata. Sacerdoteytapis apakapushallankichejtaj, mana imayojtataj saqerparishawankichej. Chantá tapushawankichejrajtaj: Ima tiyan? nispa.

²⁵ Danmanta kajkunarí kuticherqanku: Ama qhapariykuwaykuchu. Pajtataj noqaykumanta wakinkuna phiñarikuspa, maqaj jamusunkuman, qantawan, aylluykitawan ima wañuchisunkumantaj, nispa.

²⁶ Ashkha soldado contranpi kasqankuta reparaspa, Micaiasqa wasinman kutiriporqa. Danmanta kajkunataj ñanninkuta riporqanku.

²⁷ Paykunaqa Micaíaj ruwakusqan lantikunata apariykukuspa, jinataj sacerdotentawan pusariykukuspa, Laiskama chayarqanku. Chaypi runakunaqa mana imamanta llakiyniyoj paykunallapi atinikuspa kawsakusharqanku. Chantá Danmanta kajkunaqa Laispi tiyakojkunata wañuracherqanku, llajtatataj ruphaykucherqanku.

²⁸ Laispi tiyakojkunata mana pipis jark'akoj karqachu, chay llajta Sidonmanta karupi kasqanrayku, manataj waj llajtakunawanpis ni ima tratoyoj kasqanraykutaj. Chay llajtaqa Bet Rejob vallenejpi kasharqa. Chantá Dan jatun ayllumanta kajkunaqa chay llajtata watejmanta sayachispa, chaypi tiyakaporqanku.

²⁹ Chay llajta ñawpa sutin karqa Lais nisqa, paykunatajrí, Israelpa churin Dan ñawpa tatankoj sutiwan suticharqanku.

³⁰ Chaypi Danmanta kajkunaqa suwamusqanku llajllasqa lantinkuta yupaychanankupaj churaykorqanku, sacerdotenkutaj Jonatán karqa. Payqa Moisespa allchhin Gersonpa churin karqa. Chay qhepamantaj Jonatanpa mirayninmanta kajkuna Danpi sacerdotekuna karqanku, karu suyuman apasqa karqanku, chay p'unchaykama.

³¹ Micaíaj ruwasqan lanteqa Dan jatun ayllupi kasharqa, Diospa Toldon Silopi kanankama.