Jueces 17 - DIOSPA QHELQACHISQAN DEUTEROCANONICAL

Micaíaj lantinkuna

¹ Efrainpa jatun ayllu jap'iynin orqonejpi uj runa Micaía sutiyoj tiyakorqa.

² Uj kuti payqa mamanman rimarerqa: Chay 1.100 qolqeykita suwachikorqanki, chayraykutaj chay suwata maldicerqanki. Noqamin chay qolqetaqa suwarqayki, makiypitaj kashan, nispa. Mamantaj kuticherqa: Wawáy, Tata Diosqa qanta saminchasuchun chay mana pakaspa rimarisqaykimanta, nispa.

³ Chantá Micaía chay 1.100 qolqeta mamanman kutichiporqa, mamantaj nerqa: Noqaqa Tata Diosman kay qolqeta qopusaj amaña maldición chayamusunanpaj. Chay qolqewantaj ruwachisaj k'ullumanta uj lantita, qolqe metalwan lluch'isqata. Qanmantaj qopusqayki, nispa.

⁴ Micaiaqa mamanman chay qolqeta kutichipojtintaj, mamanqa lanti ruwajman 200 qolqeta aparqa. Chaykunamanta k'ullumanta uj lantita qolqewan lluch'isqata ruwarqa, ujnintataj qolqemanta unuyachisqata ruwarqa. Chaykunatataj Micaíaj wasinman churarqa.

⁵ Micaiataj wasinpi uj cheqata lantita yupaychanapaj wakicherqa, jaqaypitaj churarqa waj lantinkunatawan ima. Chantá ruwakorqa uj efod lantita. Ujnin kaj churintapis sacerdote kananpaj churallarqataj.

⁶ Chaypacha Israel suyupi kuraj kamachejkuna mana karqankuchu. Sapa ujpis ruwaj kanku munayninkuman jinalla.

⁷ Uj kuti Leví jatun ayllumanta uj wayna chay cheqaman chayarqa. Pay ñawpajta Judá jatun aylloj jap'iyninpi Belén llajtapi tiyakusqa.

⁸ Chay waynaqa Belén llajtamanta ripusqa, aswan allinpi kawsanata mask'aspa. Jinapi Efraín jatun aylloj jap'iyninpi orqo cheqanejpi Micaíaj wasinman chayarqa.

⁹ Chantá Micaiaqa chay waynata tapurerqa: Maymanta jamushankiri? nispa. Waynataj kuticherqa: Judá jap'iy Belenmanta jamuni, levita kani. Tiyakunaypaj uj cheqata mask'ashani, nispa.

¹⁰ Jinapi Micaiaqa nerqa: Noqawan qhepakuy ari, sacerdotey kanaykipaj, uj tatay jinataj. Sapa wata chunka qolqeta pagasqayki. Chay jawa qollasqaykitaj p'achatawan, mikhunatawan, nispa.

¹¹ Levitamanqa allin rijch'arqa Micaiawan tiyakunan, paypajtaj ujnin wawan jina karqa.

¹² Jina Micaiaqa chay levitata sacerdotenpaj churarqa, paytaj chaypi tiyakapoj qhepakorqa.

¹³ Chaypacha Micaiaqa uj levita runata sacerdoten kananpaj churasqanrayku, yuyarqa Tata Dios tukuy imapi payta yanapananta.