Jueces 16 - DIOSPA QHELQACHISQAN DEUTEROCANONICAL

Sansonqa Gaza llajtaman rin

¹ Ujpacha Sansonqa Gaza llajtaman rerqa. Chaypi uj phisu warmita rikorqa, wasinman rispataj, paywan puñuykorqa.

² Jinapi Gazamanta kajkunaqa Sansón chay llajtapi kasqanta yachaytawan, llajtata muyuykorqanku. Chantá llajtaman yaykuna punkuta tukuy tuta qhawarqanku, q'ayantin sut'iyayta Sansonta wañuchiyta yuyaspa.

³ Sansonrí chawpi tutata jatarispa, llajtaj punkunta, sayantantinta ima sik'irparerqa. Chantá chay tukuyninta lijrariykukuspa apakaporqa, Hebronpa chimpanpi kashan, chay orqoman.

Sansonwan Dalilawan

⁴ Chaymanta qhepata Sansonqa sonqonta suwachikorqa Sorec Vallemanta Dalila sutiyoj warmiwan.

⁵ Chantá filisteokunaj kurajninkukunaqa Dalilawan parlaj rispa, nerqanku: Mana reparallayta Sansonta tapuy maymantachus chay jina kallpan kasqanta. Chantá willawayku ajinamanta yachanaykupaj imaynatachus payta atipaspa, watasqata apayta atinaykuta. Sichus willawasqayku chayqa, sapa ujniyku 1.100 qolqeta qanman qosqayku, nispa.

⁶ Chantá Dalilaqa Sansonta nerqa: Willanawaykita munayman imaynachus chay jina kallpasapa kasqaykita. Imaynatataj watasunkuman mana kacharichikunaykipaj jinari? nispa.

⁷ Sansontaj kuticherqa: Sichus pipis wataykuwankuman qanchis mosoj ch'awarawan chayqa, kallpayqa pisiyanman, chantá mayqen runa jinallaman tukuyman, nispa.

⁸ Chantá filisteokunaj kurajninkoqa aparqanku Dalilaman mosoj ch'awarata, chaykunawantaj Dalilaqa Sansonta wataykorqa.

⁹ Ñawpajmantaña Dalilaqa filisteo soldadokunata wasinpi pakaykusqa. Chantá qhaparerqa: Sansón, filisteokuna jap'isoj jamushanku, nispa. Sansontajrí chay mosoj ch'awarata p'itirarqa phunu q'aytupis kanman karqa jinata. Ajinamanta filisteokunaqa mana yachayta aterqankuchu maymantachus kallpan kasqanta.

¹⁰ Chantá Dalilaqa Sansonta nerqa: Q'otiyaykuwanki, llullakuwarqankitaj. Sut'ita nillaway ari: Imaynatataj pipis atinman qanta watasuyta amapuni kacharichikuyta atinaykipaj? nispa.

¹¹ Sansontaj kuticherqa: Sichus pipis wataykuwanman mosoj waskhakunawan, manaraj pejpa watasqanwan chayqa, kallpayqa pisiyanman. Chantá mayqen runa jinallaman tukuyman, nispa.

¹² Chaypacha Dalilaqa mosoj waskhakunata oqharispa, Sansonta wataykorqa, qhaparerqataj: Sansón, filisteokuna jap'isoj jamushanku, nispa. Chaypacha Dalilaqa wasinpi runakunata pakaykullasqataj. Sansontajrí chay waskhakunata ñañu q'aytupis kanman jinata p'itirarqa.

¹³ Chantá Dalilaqa Sansonta nerqa: Q'otiyashallawankipuni, llullakushallawankipunitaj. Nillawayña: Imaynatataj pipis qanta watasuyta atinman amapuni kacharichikuyta atinaykipaj? nispa. Sansontaj kuticherqa: Sichus qan chujchayta awana q'aytuwan qanchis simp'akunata awaykuspa, chay tukuyta sumajta estacawan pampaman takaykuwaj chayqa, kallpayqa pisiyanman, chantá mayqen runa jinallaman tukuyman, nispa. Chaypacha Dalilaqa Sansonta puñucherqa, chay qanchis simp'ankunata jap'ispataj, awasqa telatawan khuska awaykorqa.

¹⁴ Chaymanta chay simp'asqa chujchanta awasqanta uj estacata pampaman takaytawan, qhaparerqa: Sansón, filisteokuna jap'isoj jamushanku, nispa. Sansontajrí sayariytawan, estacata pampamanta, awana telatawan khuska sik'irparillarqataj.

¹⁵ Chantá Dalilaqa nerqa: Llulla runa, imaraykutaj niwanki munakuwasqaykitari? Kaywanqa kinsa kutitaña llullakuwanki, nipunitaj sut'inchawankichu kallpayki maymantachus jamusqanta, nispa.

¹⁶ Ajinamanta Dalilaqa kutin kutinta Sansonta umanta nanacherqa, chaymanta manañataj kawsaytapis munarqachu.

¹⁷ Chantá Dalilaman mana llullakuspa, Sansonqa willaykaporqa imatachus pakasharqa, chayta: Mana jayk'ajpis chujchayta k'utuchikunichu, imaraykuchus manaraj paqarikusqaymantapacha Diospaj t'aqasqa nazareo kani. Jinapi sichus pipis chujchayta k'utuwanman chayqa, kallpay chinkanman, chantá mayqen runa jinalla kallpayoj kayman, nispa.

¹⁸ Kay kutipi Dalila repararqa Sansón cheqatapuni willasqanta. Chayrayku Dalilaqa filisteokunaj kurajninkukunaman willacherqa: Kunanqa jamuychej ari. Sansonqa sonqonpi pakashasqanta sut'inchawanña, nispa. Chantá paykunaqa Dalilajpaman rerqanku qolqeta apaspa.

¹⁹ Jinapi Dalilaqa Sansonta puñurpacherqa arphin pataman siriykuchispa. Chaypachataj wajyarqa uj filisteo runata, Sansonpa chay qanchis simp'ankunata k'utunanpaj. Ajinamanta Sansonqa mana kallpayoj rikhurerqa.

²⁰ Chantá Dalilaqa qhaparerqa: Sansón, filisteokuna jap'isoj jamushanku, nispa. Sansontaj rijch'ariytawan, yuyarqa ñawpaj kutipi jina kacharichikunallanta. Jinapis mana yacharqachu Tata Diosqa payta saqerparisqanta.

²¹ Chaypacha filisteokunaqa Sansonta jap'ispa, ñawinkunata orqhorparerqanku, Gaza llajtamantaj aparqanku. Chaypi broncemanta cadenawan wataykuspa, carcelpi jak'uchina molinota muyuchicherqanku.

²² Chaywanpis k'utuchikusqanmanta qhepaman Sansonpa chujchanqa watej wiñaykushallarqataj.

Sansón wañun

²³ Unay tiemponman filisteokunaj kurajninkukuna tantaykukorqanku jatun raymita ruwanankupaj Sansonta jap'isqankumanta jinataj Dagón diosninkuman uywa ñak'asqata jaywanankupajwan. Kay jinatataj takerqanku: Diosninchej jaywaykuwanchej awqanchej Sansonta, nispa.

²⁴ Sapa kuti Sansonta rikuspa, chay llajtayoj runakunapis diosninkuta kay jinata yupaycharqanku: Diosninchejqa awqanchej Sansonta jaywaykuwanchej, pichus chajranchej tukuchejta, ashkha llajta masinchejkunatataj wañuchej, chayta, nispa.

²⁵ Jinapi chay tantasqa runakuna mayta kusikuspa, mañarqanku Sansonta carcelmanta orqhomunankuta, paymanta alqochakunankupaj. Jinataj kurajkunaqa Sansonta carcelmanta orqhocherqanku runakuna paymanta alqochakunankupaj. Sansón jamojtintaj, payta yupaychana wasej sayantankuna chawpiman sayaykucherqanku.

²⁶ Chantá Sansonqa makinmanta pusaykachaj waynata nerqa: Qayllaykuchiway kay wasej sayantankunaman. Chayman atiykurikuspa, samarikuyta munani, nispa.

²⁷ Filisteokunaj tukuy kurajninkukuna chay jatun wasipi kasharqanku, jinataj qharikuna, chantá warmikuna ima. Chay jawa kashallarqankutaj uj 3.000 runakuna jina alto patapi. Tukuyninku Sansonmanta asikuspa qhawasharqanku.

²⁸ Chantá Sansonqa Tata Diosmanta mañakorqa: Tukuyta Kamachej Tata Diosníy, mañarikuyki kay kutillatawanpis noqamanta yuyarikunaykita, jinataj kallpata qorinawaykita, iskaynin ñawiyta orqhowasqankumanta filisteokunawan pagachikunaypaj, nispa.

²⁹ Chay qhepantataj Sansonqa makinwan chay wasej iskaynin sayantanta mask'arqa, imaraykuchus chaykunalla tukuy wasitaqa sayachisharqanku. Iskaynin sayantakunamantaj makinta churarqa, ujninman pañata ujninmantaj lloq'eta.

³⁰ Chantá Sansón qhaparerqa: Filisteokunawan khuska wañusaj, nispa. Chaymantaqa chay sayantakunata ñit'erqa tukuy kallpanwan, chay jatun wasitaj thuñikorqa filisteokunaj kurajninkukunaj patankuman, chaypi kasharqanku, tukuy chaykunaj patankumanwan. Sansón kawsashaspa, mashkha filisteokunatachu wañuchisqanmantaqa kay kutipi aswan ashkhataraj filisteokunata wañucherqa.

³¹ Chaymanta Sansonpa wawqenkuna, tukuy ayllunkuna ima jamorqanku. Ayanta oqharispataj, p'ampamorqanku Manoa tatanpa aya p'ampananman. Chay aya p'ampanaqa Sorawan, jinataj Estaolwan chay chawpinejpi kasharqa. Sansonqa tukuy kawsayninpi iskay chunka watata israelitakunata kamachisqa juez jina.