Jueces 12 - DIOSPA QHELQACHISQAN DEUTEROCANONICAL

Jefteqa Efraín jatun aylluwan maqanakun

¹ Chaymanta qhepanejman Efraín jatun ayllumanta runakunaqa tantaykukuspa, Jordán mayuta chimparqanku Zafón chaynejman, Jeftemantaj nerqanku: Imaraykutaj noqaykuman mana willaspalla amonitakunawan maqanakoj rerqankiri? Noqaykoqa qanwan riykuman karqa. Kunanqa chaymanta, qanta wasiykipi ruphaykuchisqayku, nispa.

² Jinapi Jefté kuticherqa: Noqata, chantá runaykunatawan amonitakunaqa sinch'ita churanakuwarqayku, noqataj qankunata wajyakorqaykichej. Qankunarí mana yanapawaj jamorqankichejchu.

³ Qankuna yanapaj mana jamuwasqaykuta rikuspa, wañuyta mana manchachikorqanichu, amonitakunawan maqanakoj sayaykorqani. Tata Diostaj paykunata atipayta yanapawarqa. Kunanqa imaraykutaj noqawan maqanakoj jamuwankichejri? nispa.

⁴ Efrainmanta kajkunataj Jefteman kuticherqanku: Efraín jatun aylloj, jinataj Manasés jatun aylloj qayllanpi tiyakoj galaaditakunaqa Efrainmanta q'elliskirilla kankichej, nispa. Chayrayku Jefteqa Galaadmanta tukuy soldadokunata tantaykuspa, Efraín jatun aylluwan maqanakuspa atipaykorqa.

⁵ Chantá Galaadmanta kajkunaqa Efraín runakunaj Jordán mayoj chimpanankuta wisq'aykorqanku. Jinapi Efrainmanta kajkuna, mayqellanpis ayqekushaspa pasachinankuta mañarikojtaqa, tapoj kanku: Efraín jatun ayllumantachu kanki? nispa. Mana chaymantachu kani, nejtataj,

⁶ kay jinata parlachej kanku: Shibolet niy, nispa. Pichari mana sut'ita nejchu, manachayqa Sibolet nispalla parlaj karqa chaytaqa, jap'iytawankama kikin Jordán mayupi wañuchej kanku. Chaypacha Efraín jatun ayllumanta 42.000 soldadokunata wañuykucherqanku.

⁷ Chaymanta qhepaman Jefteqa israelitakunata sojta watata kamacherqa. Wañupojtenqa, Galaad, Mispá llajtanpi ayanta p'amparqanku.

Kinsa juezkuna

⁸ Jeftéj qhepantaqa Belenmanta Ibzán sutiyojqa israelitakunaj juezninku karqa.

⁹ Ibzanpata kinsa chunka churinkuna karqa, kinsa chunka ususinkunapiwan. Tatankutaj tukuyninkuta mana ayllunmanta kajkunawan casaraykucherqa. Ibzanqa qanchis watata israelitakunata kamacherqa.

¹⁰ Ibzán wañupojtintaj, Belenpi ayanta p'amparqanku.

¹¹ Paypa qhepanta Zabulón jatun ayllumanta Elonñataj chunka wata junt'ata israelitakunata juez jina kamacherqa.

¹² Elón wañupojtintaj, Ayalón llajtapi ayanta p'amparqanku. Ayalonqa Zabulón jap'iypi karqa.

¹³ Paypa qhepanta Piratón llajtamanta Hilelpa churin Abdonñataj israelitakunata kamacherqa juez jina.

¹⁴ Abdonpata tawa chunka churinkuna karqa, kinsa chunka allchhinkunataj, tukuyninkutaj burropi purej kanku. Abdonqa israelitakunata pusaj watata kamacherqa.

¹⁵ Pay wañupojtintaj, Piratón llajtapi Efraín jatun aylloj jap'iyninpi, Amalec orqonejpi ayanta p'amparqanku.