Jueces 11 - DIOSPA QHELQACHISQAN DEUTEROCANONICAL

Jeftéj ruwasqan

¹ Galaad jallp'api uj kallparara maqanakoj runa karqa Jefté sutiyoj. Payqa karqa uj phisu warmej churin, tatantaj Galaad sutiyoj karqa.

² Galaadpa warminpi waj churinkunapis kallarqankutaj. Paykunataj wiñaykuspa, Jeftetaqa wasinkumanta qharqorqanku, nerqankutaj: Mana imatapis tataykumanta jap'inkichu, waj mamayoj kasqaykirayku, nispa.

³ Chantá Jefteqa wawqenkunamanta ayqekuspa, Tob llajtaman tiyakoj riporqa. Chaypitaj suwa runakunawan tantakorqa, jinataj paykunaj kamachejninkuman tukorqa.

⁴ Chay kasqa, maypachachus amonitakunaqa israelitakunawan maqanakoj yaykusqanku, chaypacha.

⁵ Galaadmanta kurajkunaqa rerqanku Tob llajtaman Jefteta pusakampoj.

⁶ Chantá Jefteta nerqanku: Jamuy, kamachejniyku kanaykita munayku, amonitakunawan maqanakupi, nispa.

⁷ Jeftetajrí nerqa: Manachu qankunaqa chejnikuwaspa, tataypa wasinmantapis qharqowarqankichej? Imarayku kunan llakiypi rikhurispallaña mask'awaj jamunkichejri? nispa.

⁸ Paykunataj kuticherqanku: Llakiypi kaspapuni, qanta mask'aj jamuyku ari. Munayku noqaykuwan rinaykita amonitakunawan maqanakoj, chantá tukuy Galaadpi tiyakojkunaj kamachejniyku kanaykipaj, nispa.

⁹ Jeftetaj paykunata nerqa: Qankuna munankichej amonitakunawan maqanakunayta, icharí? Chantá sichus Tata Dios atipayta yanapawan amonitakunata atipananchejpaj chayqa, chaymantapacha noqa kamachejniykichej kasaj, nispa.

¹⁰ Chantá Galaadmanta kurajkuna tiluspa nerqanku: Tata Diosmin testigoqa. Qan kamachiwasqaykuta ruwasqaykupuni, nispa.

¹¹ Jinamanta Jefteqa Galaadmanta kurajkunawan rerqa, israelitakunataj kamachejninkupaj churarqanku. Jefterí Mispapi Tata Diospa ñawpaqenpi imatachus parlasqankuta yuyaricherqa.

¹² Chantá Jefteqa willajkunata kacharqa amonitakunaj kuraj kamachejninkuman kay jinata tapurinankupaj: Imanarqaykitaj noqa suyuypa contranpi maqanakoj jamunaykipajri? nispa.

¹³ Amonitakunaj kuraj kamachejninkutaj kachasqakunaman kuticherqa: Qankuna Egiptomanta llojsimushaspa, jallp'aykuta qhechuwarqayku, Arnón mayumantapacha Jaboc mayukama, jinataj Jordán mayukama ima. Kunanqa ch'inllamanta kutichipuwayku, nispa.

¹⁴ Chantá Jefteqa amonitakunaj kuraj kamachejninkuman waj willajkunatañataj ninankupaj kacharqa:

¹⁵ Jefteqa kay jinata nimusunki: Israelitakunaqa manapuni jallp'ata qhechorqankuchu moabitakunamanta nitaj amonitakunamantapis.

¹⁶ Israelitakuna Egiptomanta llojsimorqanku chaypacha, paykuna Puka Mama Qocha nisqakama ch'innejta chimpamuspa, Cadeskama chayamusqanku.

¹⁷ Chaypachataj kachasqanku willajkunata Edompa kuraj kamachejninman chay jallp'annejta pasajta saqenanpaj. Chaywanpis payqa mana saqesqachu pasajta. Moabpa kuraj kamachejninmanpis willajkunata kachallarqankutaj, paypis manallataj munasqachu. Chayrayku israelitakunaqa Cadespi qhepakusqanku.

¹⁸ Chantarí chay ch'inkunanejta purispa, Edompa jap'iyninta, jinataj Moabpa jap'iynintapis muyuykamusqanku. Chayamusqanku Moab inti llojsimuyninnejman, chaypitaj jarakusqanku Arnón mayu chimpapi. Manataj chimpasqankuchu Moabpa jap'iyninña kasqanrayku.

¹⁹ Chaypacha israelitakunaqa willajkunata kachasqanku Jesbón llajtaman, amorreokunaj kuraj kamachejninku Sijonman. Paymanta amorreokunaj jap'iyninkunejta pasajta saqenanta mañakusqanku jallp'ankuman chayayta atinankupaj.

²⁰ Jinataj Sijonpis manallataj saqesqachu chayninta pasanankuta. Aswanpis soldadonkunata tantaykorqa, Yahás chaynejman jarakuspataj, israelitakunawan maqanakusqanku.

²¹ Israelpa Tata Diosninrí israelitakunawan Sijonta atipachisqa, jinataj soldadonkunatapis. Ajinamantataj israelitakuna jap'ikusqanku chay cheqapi tiyakoj amorreokunaj jallp'ankuta.

²² Amorreokunaj jallp'ankuta jap'isqankoqa kasqa Arnón mayumantapacha Jabockama, chay ch'innejmantapachataj Jordán mayukama.

²³ Kunantaj noqayku israelitakunaj Tata Diosniyku amorreokunamanta chay jallp'ata qhechuspa, noqaykuman qopuwarqayku, chay jallp'atachu qhechukapuyta munawayku?

²⁴ Quemos diosniyki qosusqanqa manachu qanpata? Jinallataj noqaykupis Tata Diospa qowasqaykuta noqaykojtapuni kasqanta qhawayku.

²⁵ Qanqa yuyakunkichu Moabmanta kuraj kamachej Siporpa churin Balacmanta aswan sumaj kasqaykita? Payqa mana noqaykoj contraykupichu maqanakoj jamorqa.

²⁶ Kinsa pachaj wataña kanqa Jesbón llajtapi noqaykoj tiyakusqaykoqa, chantá Aroerpi, jinataj chay qaylla ranchokunapi, ajinallatataj Arnón mayu qaylla llajtakunapipis. Imaraykutaj mana aswan ñawpajmantaña chay suyukunata qhechuwarqaykuchuri?

²⁷ Mana ni ima sajratapis ruwaykichu. Qanmá mana allintachu ruwashanki noqaykuwan maqanakoj jamuspa. Tata Diosmin juezqa. Paymin justiciata ruwaspa nenqa pichus cheqanta ruwashasqanta, qankunachus chayrí noqaykuchus, nispa. Ajinata Jefteqa willacherqa amonitakunaj kuraj kamachejninkuman.

²⁸ Chaywanpis amonitakunaj kuraj kamachejninkoqa Jeftéj willachisqanta mana kasorqachu.

²⁹ Chaypacha Tata Diospa Espíritun Jefteman jamorqa. Jeftetaj Galaad jallp'anejta, Manasesnejta, Galaadpi Mispanejta ima purerqa soldadokunata mask'aspa amonitakunawan maqanakunankupaj. Jinaytawantaj, Galaadpi Mispamanta amonitakunaj jap'iyninkuman soldadonkunawan yaykorqa.

³⁰ Jeftetaj Tata Diosman imatachus qonanta kay jinata nerqa: Sichus amonitakunata atipayta yanapawanki chayqa,

³¹ qanman q'olachispa jaywasqayki, pichari ñawpajta wasiymanta taripawaj llojsimonqa, chayta, nispa.

³² Chaypacha Jefteqa soldadonkunawan amonitakunaj jap'iyninman yaykorqa paykunawan maqanakoj, Tata Diostaj amonitakunata atipaykucherqa.

³³ Jeftewan, soldadonkunawan ima ashkha soldadokunata wañuchispa, jap'erqanku iskay chunka llajtakunata, Aroermanta Minitkama, jinataj Abel Queraminkama. Jinamanta israelitakunaqa wata runankuman amonitakunata tukucherqanku.

³⁴ Maypachachus Jefté Mispapi wasinman kutiporqa chaypacha, uj k'ata ususin taripaj llojsimorqa panderetata tocarispa, tusurikuspataj. Pay k'ata wawanlla karqa.

³⁵ Ajinaqa ususinta rikuytawankama, Jefteqa p'achanta llik'ikuspa, manchay llakisqa nerqa: Ay, wawáy, qannejta jatun llakiypi rikhurini. Chaywanpis kunanqa tiluspa Tata Diosman, qosaj nisqayta junt'anay tiyan, nispa.

³⁶ Chantá ususin kuticherqa: Tatáy, noqamanta Tata Diosman imatachus nisqaykitaqa junt'allay, imaraykuchus payqa nisusqanta junt'asorqa, awqayki amonitakunata atipayta yanapasuspa.

³⁷ Tatay, chaywanpis ujllata mañarikuyki: Iskay killapaj jaqay orqonejta kawsakusqay sipas masiykunawan khuska waqaspa purimunaypaj kachaway, mana casarakuspalla wañunay kasqanmanta.

³⁸ Chantá Jefté iskay killapaj kacharqa, chaymanta ususenqa orqonejta waqaspa purerqa kawsakusqan sipaskunawan khuska, mana casarakuspalla wañunan kasqanmanta.

³⁹ Iskay killa junt'akojtintaj, Jeftejpa ususin tatanpaman kutimporqa, Jeftetaj junt'arqa Tata Diosman imatachus qonan karqa, chayta. Jeftéj ususenqa wañorqa qharej mana chayasqan.

⁴⁰ Chaymantapacha Galaadpi kay usu karqa israelitakuna ukhupi: Sapa wata sipaskuna Jeftéj ususinmanta tawa p'unchayta orqoman waqaj rej kanku.