Jueces 10 - DIOSPA QHELQACHISQAN DEUTEROCANONICAL

Tolawan Yairwan israelitakunata kamachinku

¹ Abimelecpa qhepanta Isacar jatun ayllumanta uj runa Tola sutiyojqa juez jina israelitakunata kacharichinanpaj sayaykorqa. Tolaqa karqa Dodoj allchhin, Fuáj churintaj. Paytaj tiyakorqa Efraín jatun aylloj jap'iynin orqonejpi, Samir llajtapi.

² Tolaqa israelitakunata iskay chunka kinsayoj watakunata kamacherqa, wañupojtintaj, Samir llajtapi ayanta p'amparqanku.

³ Chay qhepanta Galaadmanta Yairñataj sayarerqa juez jina, paytaj iskay chunka iskayniyoj watata israelitakunata kamacherqa.

⁴ Yairqa kinsa chunka churikunayoj karqa. Paykuna sapa ujninku burropi purej kanku, sapa ujninkutaj Galaad chaynejpi uj llajtayojkama karqanku. Chay kinsa chunka llajtakunaqa kunankamapis “Yairpa llajtankuna” nisqa kashanku.

⁵ Yaír wañupojtenqa, Camón nisqa cheqapi ayanta p'amparqanku.

Amonitakuna israelitakunata ñak'arichinku

⁶ Israelitakunaqa watej Tata Diospa contranta juchallillarqankutaj, yupaychaspa Baalman, jinataj Astarotman rijch'akoj lantikunata. Yupaychallarqankutaj Siriamanta, Sidonmanta, Moabmanta, Amonmanta lantikunata, jinataj filisteokunajpata kajkunatawan. Tata Diosmanta karunchakuspa, manaña payta kasorqankuchu.

⁷ Chayraykumari Tata Diosqa paykunapaj sinch'ita phiñarikuspa, filisteokunaman, amonitakunamanwan paykunata qaraykorqa.

⁸ Chaymantapacha chunka pusajniyoj watata filisteokunaqa, jinataj amonitakunapis maytapuni israelitakunata ñak'aricherqanku Galaadpi tukuy tiyakojkunata, Jordán mayoj chimpanpi amorreokunaj jallp'ankupi kajkunata ima.

⁹ Amonitakunaqa Jordán mayuta chimparqanku maqanakamunankupaj Judá jatun aylluwan, Benjamín jatun aylluwan, jinataj Efraín jatun aylluwanpis. Ajinamanta israelitakunaqa may llakiypi rikhurerqanku.

¹⁰ Chaypacha Tata Diosmanta mayta mañakorqanku: Diosniyku, contraykipi juchalliyku. Qanmanta karunchakuyku Baal lantikunata yupaychanaykurayku, nispa.

¹¹ Chantá Tata Dios kuticherqa: Ñawpajta qankunaqa ñak'arichisqa karqankichej Egipto llajtayojkunanejta, amorreokunanejta, amonitakunanejta, jinataj filisteokunanejta,

¹² sidoniokunanejta, amalecitakunanejta, chantá maonitakunanejta ima. Jinapi maypachachus qankuna qhaparikamuwarqankichej chaypacha, noqa paykunamanta kacharicherqaykichej.

¹³ Chaywanpis qankunaqa ujtawan noqamanta karunchakorqankichej, waj dioskunata yupaychamuspa. Chayrayku noqaqa manaña ujtawan kacharichisqaykichejñachu.

¹⁴ Riychej, mañakamuychej ajllakusqaykichej dioskunamanta. Paykunawan kunanqa ñak'ariykunamanta kacharichikuychej, nispa.

¹⁵ Chantá israelitakunaqa Tata Diosman kuticherqanku: Juchalliyku. Chayrayku noqaykuwan munasqaykita ruway. Chaywanpis ama jina kaychu kacharichiwayku ari, nispa.

¹⁶ Chantá israelitakunaqa chay waj dioskunata saqespa, Tata Diosta yupaycharqanku. Tata Diospis manaña munarqachu israelitakuna astawan ñak'arinallankutapuni, imaraykuchus sinch'ita llakikorqa ñak'arishasqankumanta.

¹⁷ Chaypacha amonita soldadokunaqa sumajta wakichikuspa, Galaadpi jarakorqanku. Israelita soldadokunapis tantaykukuspa, Mispapi jarakorqanku.

¹⁸ Chantá Galaadpi tiyakoj israelitakunaqa kurajninkukunawan parlanakorqanku: Pitaj amonitakunawan maqanakuyta qallarenqari? Pichus qallarejqa Galaadpi tukuy tiyakojkunaj kamachejninku kanqa, nispa.