Jueces 1 - DIOSPA QHELQACHISQAN DEUTEROCANONICAL

Judá aylluwan Simeón aylluwan ima Adonibesecta atipanku

¹ Josué wañupusqanmanta qhepata, israelitakuna Tata Diosta tapukorqanku: Mayqen jatun ayllurajtaj ñawpajta cananeokunawan maqanakoj renqari? nispa.

² Tata Diostaj paykunaman kuticherqa: Judá jatun aylluraj ñawpajta maqanakoj renqa, noqataj paykunaman chay jallp'ata qosaj, nispa.

³ Chaypacha Judá jatun ayllumanta kajkunaqa Simeón jatun ayllumanta kaj wawqenkuta nerqanku: Yanapawayku cananeokunawan maqanakuyta, pikunachus tiyashanku noqaykuman qosqa jallp'api, chaykunawan. Chaymantataj noqaykupis qankunaman qosqa jallp'aykichejta jap'iyta yanapasqayku, nispa. Jinapi Simeón jatun ayllumanta kajkunaqa Judá jatun ayllumanta kajkunawan khuska maqanakuman rerqanku.

^4-5 Ajinamanta Judá jatun ayllumanta kajkunaqa maqanakoj yaykorqanku cananeokunaj jallp'ankuman, jinataj ferezeokunajmanpis. Tata Diostaj Judá jatun aylluta yanaparqa maqanakupi atipanankupaj. Paykuna Bezec cheqapeqa cananeokunata chantá ferezeokunatawan 10.000 runakunata atiparqanku. Chaypi kuraj kamachej Adonibesectapis atipallarqankutaj.

⁶ Adonibésec ayqekojtintaj, paykuna qhatiykuspa, jap'irparerqanku. Chantá machu ruk'ananta mut'urparerqanku iskaynin makinmanta, chakinmanta ima.

⁷ Chaypacha Adonibesecqa nerqa: Ñawpajtaqa noqa qanchis chunka kuraj kamachejkunaj makinkoj machu ruk'anankuta, jinallataj chaki machu ruk'anankutapis mut'uracherqani. Chantá chay runakunataj mikhuna t'akakusqanmanta mesay urapi mikhunankupaj pallaj kanku. Kunanrí imaynatachus noqa ruwarqani, kikillantataj Tata Dios ruwawan, nispa. Chantá Jerusalenman payta aparqanku, chaypitaj wañuporqa.

Judá ayllumanta kajkuna Jerusalenta Hebrontawan jap'ikapunku

⁸ Judá jatun ayllumanta kajkuna maqanakuspa, Jerusalén llajtatapis jap'ikapullarqankutaj. Espadawan runankunata wañurachiytawantaj, llajtataqa ruphaykucherqanku.

⁹ Chaymantaqa orqonejpi tiyakoj cananeokunawanñataj maqanakorqanku Néguev chaynejpi, jinataj chay pampakunanejpi tiyakojkunawanpis.

¹⁰ Ajinallatataj Judaqa Hebronpi tiyakorqanku, chay cananeokunawanpis maqanakullarqankutaj. Chay llajtaj ñawpa sutenqa Quiriat Arbá karqa. Chaypitaj kuraj kamachejkuna Sesayta, Ajimanta, Talmayta ima atiparqanku.

Otonielqa Debir llajtata jap'ikapun

¹¹ Chaymantaqa Judá jatun ayllumanta kajkuna Debir llajtapi tiyakojkunawan maqanakullarqankutaj. Chay llajtaj ñawpa sutin Quiriat Séfer karqa.

¹² Chaypacha Caleb nerqa: Pichus Debir llajtata maqanakuspa atipanqa, chay runataqa ususiy Acsawan casarachisaj, nispa.

¹³ Jinapi Calebpa wawqen Cenazpa churin Otonielqa chay llajtata atiparqa. Chantá Calebqa ususin Acsata chay Otonielwan casaracherqa.

¹⁴ Casarakusqanku p'unchaypi Otonielqa Acsata umacharqa tatanmanta astawan jallp'ata mañakunanpaj. Chayrayku Acsaqa tatan Calebpaman rerqa. Chayamojtin, Calebqa Acsata burromanta urayk'ushajta rikuspa, taporqa: Imatataj munashankiri? nispa.

¹⁵ Acsataj kuticherqa: Jallp'a qowasqaykeqa ch'aki jallp'a mana yakuyoj. Mañarikuyki ari yaku juturikunayoj jallp'akunatawan qonawaykita, nispa. Chantá Calebqa yaku juturiyoj jallp'akunatawan paykunaman qorqa, wichaynejpi, jinataj uranejpipis.

Judá jatun aylluwan Benjamín jatun ayllupiwan jallp'ata jap'inku

¹⁶ Quenita nisqa runakunaqa Moisespa suegronpa mirayninmanta kasqanku. Paykunaqa llojserqanku Judá jatun aylluwan khuska Palmeras llajtamanta, rerqankutaj Judáj ch'innejman, Neguevpi Aradmanta aswan uranejman. Chaypitaj amalecitakunawan tiyakaporqanku.

¹⁷ Chaypacha Judá jatun ayllumanta kajkunaqa rerqanku Simeón jatun ayllumanta kajkunawan khuska maqanakunankupaj, imaynatachus parlanakusqankuman jina. Paykunataj Sefatpi tiyakoj cananeokunata atiparqanku, chay llajtata thuñispataj, chaypi tiyakojkunata chinkacherqanku. Chaytataj Jormá, nispa suticharqanku.

¹⁸ Judá ayllukunaqa Gaza llajtata, Ascalón llajtata, Ecrón llajtatawan jap'ikaporqanku muyuyninpi jallp'akunatawan.

¹⁹ Judá jatun ayllumanta kajkunataj Tata Diospa yanapayninwan wijch'ullarqankutaj orqokunapi tiyakojkunatapis. Chaywanpis manapuni wijch'orqankuchu chay pampakunanejpi kajkunataqa, chaypi tiyakojkuna fierromanta carretayoj kasqankurayku.

²⁰ Moisés nisqanman jina, israelita kurajkunaqa Hebrón llajtata Calebman qorqanku. Calebtaj chaymanta wijch'orqa Anacpa kinsantin churinkunata.

²¹ Jinapis Benjamín jatun ayllumanta kajkunaqa Jerusalén llajtamanta mana wijch'orqankuchu chaypi tiyakoj jebuseokunata. Chayraykumari kunan p'unchaykama Jerusalenpi khuska jebuseokuna Benjamín jatun ayllumanta kajkunawan tiyakushanku.

Joséj mirayninmanta kajkuna Betelta jap'inku

^22-23 Tata Diospa yanapayninwan Joséj mirayninmanta kajkunaqa Betelta jap'ikapoj rerqanku. Chay llajtaj ñawpa sutenqa Luz nisqa karqa. Manaraj chay llajtata atipashaspa, pakayllamanta wateqajkunata chay llajtaman kachasqanku.

²⁴ Chay wateqajkunataj llajtamanta uj runata llojsimushajta rikuspa, payta jap'erqanku, nerqankutaj: Sichus qan rikuchiwasqayku maynintachus llajtaman yaykunata chayqa, qanta khuyasqayku, nispa.

²⁵ Jinapi chay runaqa paykunaman rikuykucherqa maynintachus llajtaman yaykunata, paykunataj chay llajtapi tiyakojkunata tukuyninkuta wañuracherqanku. Jinapis ñanta rikuchej chay runataqa mana wañucherqankuchu, nitaj aylluntapis.

²⁶ Chaymanta qhepamantaj chay runaqa jititakunaj jallp'ankuman ripuspa, chaypi mosoj llajtata jataricherqa, chay llajtataj Luz sutiwan sutichasqa. Chay sutiwantaj kunankama rejsisqa kashan.

Israelitakunaj mana jap'isqanku llajta

²⁷ Manasés jatun ayllumanta kajkunaqa kay llajtakunapi tiyakojkunata mana wijch'uyta aterqankuchu: Bet Seanmanta, Tanacmanta, Dormanta, Ibleammanta, Meguidomanta ima, nillataj chay qayllakunapi juch'uy llajtakunamantapis. Chayrayku cananeokunaqa paykunawan khuska tiyakullarqankupuni.

²⁸ Israelitakuna astawan kallpachakuspa, chay cananeokunataqa sinch'i ruwanaman churarqanku. Chaywanpis manapuni paykunata wijch'uyta aterqankuchu.

²⁹ Efraín jatun ayllumanta kajkunapis manallataj wijch'orqankuchu Guezerpi tiyakoj cananeokunata. Jinamanta cananeokunaqa paykunallawanpuni tiyakorqanku.

Waj jatun ayllukunaj jap'isqanku llajta

³⁰ Zabulón jatun ayllumanta kajkunapis manallataj wijch'orqankuchu Quitronpi, jinataj Nalalpi tiyakoj cananeokunataqa. Jinamanta cananeokunaqa chayllapipuni tiyakorqanku. Chaywanpis Zabulón jatun ayllumanta kajkuna chay cananeokunata sinch'i ruwanaman churarqanku.

³¹ Aser jatun ayllumanta kajkunapis chaypi tiyakoj cananeokunataqa manallataj kay llajtakunamanta wijch'orqankuchu: Acomanta, Sidonmanta, Ajlabmanta, Aczibmanta, Jelbamanta, Afecmanta, Rejob llajtamanta ima.

³² Chay llajtakunapi tiyakojkunata mana wijch'uyta atisqankurayku, Aser jatun ayllumanta kajkunaqa cananeokunawan khuska tiyakaporqanku.

³³ Neftalí jatun ayllumanta kajkunapis manallataj wijch'orqankuchu Bet Semesmanta, Bet Anatmantapis chaypi tiyakoj cananeokunataqa. Chaywanpis sinch'i ruwanaman paykunata churarqanku, chaypitaj paykunawan khuska tiyakorqanku.

³⁴ Amorreokunaqa Dan jatun ayllumanta kajkunata orqonejkama qharqorqanku, manataj pampakunaman urayk'amojta saqerqankuchu.

³⁵ Jinamanta amorreokunaqa Herespi, Ayalonpi, jinataj Sagalbinpi tiyakapoj qhepakaporqanku. Chaywanpis Joséj mirayninmanta kajkuna aswan atiyniyoj kaspa, amorreokunata sinch'i ruwanaman churarqanku.

³⁶ Amorreokunaj jallp'ankoj mojonnenqa Acrabín wichaynejmantapacha Selakama karqa, jinallataj aswan patakamapis rillarqapuni.