San Juan 8 - DIOSPA QHELQACHISQAN DEUTEROCANONICAL

Uj warmita khuchichakushajta jap'inku

¹ Jesusqa Olivos sutiyoj orqoman rerqa.

² Q'ayantin sut'iyaytataj Temploj pationman Jesús kutirejtin, may chhika runa chayman tantakorqanku. Jesustaj tiyarikuspa, paykunaman yachacherqa.

³ Jinallapi Diospa kamachisqanmanta yachachejkuna, fariseokuna ima khuchichakushajta taripasqa warmita payman pusamorqanku. Chawpinkupi sayaykuchispataj, Jesusta nerqanku:

⁴ Yachachej Wiraqochi, kay warmita khuchichakushajta jap'iyku.

⁵ Moisespa kamachisqanpi nin kay jina warmita rumiwan ch'anqaykuspa wañuchinaykuta. Qanrí, chaymanta imá ninkitaj? nispa.

⁶ Chayta nerqanku, imatachus Jesús kutichinanta yachayta munaspa, chayman jina payta ch'ataykunankupaj. Jesustajrí k'umuykuspa, ruk'ananwan pampapi qhelqayta qallarerqa.

⁷ Anchatapuni payta tapojtinkutaj, sayarispa, paykunata nerqa: Mayqenchá qankunamanta mana juchayoj kankichej, chay ñawpajta kay warmita rumiwan ch'anqaykuchun, nispa.

⁸ Chayta niytawantaj, watejmanta k'umuykuspa, pampapi qhelqallarqapuni.

⁹ Chay warmita pusamojkunarí chayta uyariytawan, machu runakunamanta qallarispa, ujmanta uj riraporqanku. Jinataj Jesuslla qhepakorqa, warmitaj ñawpaqenpi sayasharqa.

¹⁰ Chantá Jesús sayarispa, warmita nerqa: Maytaj chay ch'ataykusojkunari? Manachu mayqenpis juchachasunku? nispa.

¹¹ Warmitaj nerqa: Mana pipis, wiraqochíy, nispa. Jesustaj payta nerqa: Noqapis manallataj juchachaykichu. Kunanqa ripuy, amañataj ajinata juchallispa puriyñachu, nispa.

Jesusqa runakunapaj k'anchay

¹² Jesús uj kutitawan parlallarqataj: Noqa tukuy runapaj k'anchay jina kani. Pillapis noqawan purejqa mana laqhapichu purenqa, aswanpis wiñay kawsayman pusaj k'anchaypi purenqa, nispa.

¹³ Chantá fariseokuna Jesusta nerqanku: Qanllamanta willakusqaykirayku nisqaykeqa mana jap'ikunapaj jinachu, nispa.

¹⁴ Jesustajrí paykunata kuticherqa: Noqa kikiymanta willasqayqa cheqapuni, imaraykuchus noqaqa maymantachus jamusqayta yachani, maymantajchus rishasqaytapis. Qankunarí mana chayta yachankichejchu.

¹⁵ Qankunaqa runaj yuyasqanman jinalla noqata juzgashawankichej. Noqatajrí mana pitapis juzganichu.

¹⁶ Chaywanpis sichus noqa juzgayman chayqa, maychus kajtapuni juzgayman, imaraykuchus mana sapallaychu juzgani. Aswanpis kachamuwaj Tataywan khuska juzgani.

¹⁷ Kamachisqa qhelqaykichejman jinaqa, iskay runachus kikillantapuni parlanku chayqa, nisqankoqa cheqamin, icharí?

¹⁸ Jina kajtenqa, noqa kikiymin noqamanta willaj kani, kachamuwaj Tataypis noqallamantataj willan, nispa.

¹⁹ Chantá Jesusta taporqanku: Tatayki maypitaj kashanri? nispa. Jesustaj kuticherqa: Qankunaqa mana noqata rejsiwankichejchu, nitaj Tataytapis. Sichus noqata rejsiwankichejman chayqa, Tataytapis rejsillawajchejtaj, nispa.

²⁰ Jesús chayta nerqa Temploj pationpi ofrendata churana cheqanejpi yachachishaspa. Chaywanpis mana pipis payta jap'icherqachu, imaraykuchus pichus pay kasqanta rejsichikunan p'unchay manaraj chayamusqachu.

Jesús paypi mana atinikojkunata k'amin

²¹ Jesús uj kutitawan nillarqataj: Noqa ripusaj, qankunataj mask'awankichej. Chaywanpis juchaykichej patapi wañunkichej. Chayrayku maymanchus rishani, chayman qankuna mana riyta atinkichejchu, nispa.

²² Judiokunaj kurajninkukunataj tapunakorqanku: Pay kikinchu wañuchikonqa? Chayraykuchu nishawanchej: Maymanchus rishani, chayman qankuna mana riyta atiwajchejchu, nispa?

²³ Jesusrí paykunata nerqa: Qankunaqa kaymanta kankichej, noqatajrí patamanta kani. Qankunaqa kay pachamanta kankichej, noqarí mana kay pachamantachu kani.

²⁴ Chayrayku nerqaykichej juchaykichej patapi wañunaykichejta. Noqa pichus kasqayta willarqaykichej. Willasqayta manachus jap'ikunkichej chayrí, juchaykichej patapi wañunkichej, nispa.

²⁵ Chaypacha paykuna taporqanku: Pipunitaj qan kankiri? nispa. Jesustaj kuticherqa: Pichus kasqayta qallariymantapachaña willarqaykichej.

²⁶ Qankunamanta ashkhata parlanay kashan, jinataj juzganay. Chaywanpis noqata Kachamuwajqa cheqanta parlan, noqataj paymanta uyarisqallayta runakunaman willani, nispa.

²⁷ Chayta uyarejkuna mana entiendeyta aterqankuchu Jesusqa Tata Diosmanta parlashasqanta.

²⁸ Chayrayku Jesús paykunata nerqa: Maypachachus Runaj Churinta cruzman chakataspa sayarichinkichej, chaypacha noqa pichus kasqayta yachankichej. Yachallankichejtaj mana imatapis sapallaymanta ruwasqayta. Jinallatataj yachankichej Tata Diospa yachachisqallanta parlasqayta.

²⁹ Kachamuwaj Tatayqa noqawan kashan, paytaj mana sapayta saqerpariwanchu, imaraykuchus paypa munasqanta ruwani, nispa.

³⁰ Jesús chay tukuyta nisqantawan, ashkha runakuna paypi atinikorqanku.

Cheqa kajmanta yachayqa kacharichiwanchej

³¹ Chantá Jesús paypi atinikoj runakunata nerqa: Nisqaytachus kasunkichej chayqa, cheqapuni yachachisqaykuna kankichej.

³² Jinataj Diosmanta cheqa kajta yachasqaykichejqa cheqatapuni kacharichisonqachej, nispa.

³³ Chay runakunataj kuticherqanku: Noqaykoqa Abrahampa mirayninmanta kayku, manataj jayk'ajpis pejpa wata runanchu karqayku. Imaraykutaj nishanki kacharichisqa kanaykutari? nispa.

³⁴ Jesustaj paykunata nerqa: Kayta sut'ita niykichej: Pichus juchallikojqa juchaj wata runanmin.

³⁵ Wata runaqa patronpa wasinpi mana wiñaypajchu qhepakonqa. Wasiyojpa churinrí wiñaypaj chay ayllumanta kanqa.

³⁶ Chayrayku Churichus juchaykichejmanta kacharichisonqachej chayqa, cheqapuni kacharichisqa kankichej.

³⁷ Noqa yachani Abrahampa mirayninmanta kasqaykichejta. Chaywanpis qankuna wañuchiwayta munashankichej, nisqayta mana jap'ikusqaykichejrayku.

³⁸ Noqaqa Tata Diosniywan kashaspa imatachus rikusqayta willaykichej. Qankunatajrí imatachus tataykichej yachachisorqachej, chayta ruwashankichej, nispa.

³⁹ Chantá paykuna kuticherqanku: Noqaykoj tataykoqa Abrahammin, nispa. Jesustajrí paykunata nerqa: Abrahampa wawankunapunichus kawajchej chayqa, paypa ruwasqanta ruwawajchej.

⁴⁰ Chaywanpis noqarí Diosmanta uyarisqay cheqa kajta qankunaman willajtiypis, qankuna chay cheqa kajta nisqayrayku wañuchiyta munawankichej. Abraham mana jayk'ajpis ajinata ruwarqachu.

⁴¹ Qankunarí tataykichej jinallataj ruwashankichej, nispa. Paykunataj nerqanku: Mana noqaykoqa k'ipa wawachu kayku. Uj Tatayojlla kayku, chaytaj Diosmin, nispa.

⁴² Chantá Jesús nerqa: Cheqapunichus Tata Diosniykichej kanman chayqa, noqata munakuwankichejman, imaraykuchus noqaqa Diosmanta jamuni, manataj noqallamantachu, manachayqa Dios kachamuwarqa.

⁴³ Imaraykutaj parlasqayta umaykichejpi mana jap'iyta atinkichejchuri? Imaraykuchus parlasqaytaqa ni uyariyllatapis munankichejchu.

⁴⁴ Qankunaj tataykichejqa Kuraj Supaymin, qankunataj paypa munasqallanta ruwayta munankichej. Payqa qallariymantapacha runa wañuchipuni, cheqa kajtataj mana uyariyta munanchu. Cheqa kajqa manallataj sonqonpi kanchu. Llullakuspaqa, llulla kasqanman jinapuni parlan, imaraykuchus payqa llulla, llullakuyta rikhurichejtaj.

⁴⁵ Chayrayku noqa cheqata parlashajtiypis, mana noqapi atinikuyta munankichejchu.

⁴⁶ Mayqenniykichejtaj juchayoj kasqayta sut'inchawankichejmanri? Ni pi. Jina kajtin, cheqatachus parlani chayqa, imaraykutaj nisqayta mana jap'ikunkichejchuri?

⁴⁷ Diospata kajkunaqa paypa nisqanta tukuy sonqo uyarinku. Qankunatajrí mana uyariyta munankichejchu, imaraykuchus mana Diospa wawanchu kankichej, nispa.

Cristo wiñaymantapacha kasqantapuni nin

⁴⁸ Chaymanta chay judiokuna kuticherqanku: Noqaykoqa cheqanta niyku, qanqa Samariamanta, supayniyojtaj kasqaykita, nispa.

⁴⁹ Jesustajrí kuticherqa: Mana supayniyojchu kani, aswanpis Tatayta jatunchani. Qankunatajrí pisipaj qhawawankichej.

⁵⁰ Mana noqaqa jatunchasqa kaytachu mask'akushani. Wajmari jatunchasqa kanayta mask'ashan, paytaj juzganqa.

⁵¹ Sut'ita niykichej: Pillapis nisqayta kasojqa mana jayk'ajpis wañonqachu, nispa.

⁵² Chantá chay judiokuna Jesusta nerqanku: Kunan sut'ita yachayku supayniyojpuni kasqaykita. Abraham wañorqa, jinallataj Diosmanta ñawpa sut'inchajkunapis, qantaj nishanki: Nisqayta kasojqa mana jayk'ajpis wañonqachu, nispa.

⁵³ Yuyankichu ñawpa tatayku Abrahammanta aswan kuraj kasqaykita? Pay wañorqa, Diosmanta sut'inchajkunapis wañullarqankutaj. Pi kasqaykitataj qan yuyakunkiri? nispa.

⁵⁴ Chantá Jesús nerqa: Noqachus jatunchakuyman chayqa, jatunchakusqay qhasilla kanman. Tatayqa, pitachus ninkichej Diosniykichej kasqanta, paymin noqata jatunchawan.

⁵⁵ Qankuna mana payta rejsinkichejchu, noqatajrí payta rejsini. Noqachus niyman: Mana rejsinichu, nispa chayqa, qankuna jina llulla kayman. Noqarí payta rejsini, nisqantataj junt'ani.

⁵⁶ Ñawpa tataykichej Abrahamtaj noqa jamunaymanta yachaspa, kusikorqa. Ajinata payqa chay p'unchayta ñawinwanpis rikushanman jina manchayta kusikorqa, nispa.

⁵⁷ Judiokunataj Jesusta nerqanku: Manaraj phishqa chunka watayojpischu kashanki, chaychu Abrahamta rejsiwaj karqa? nispa.

⁵⁸ Jesustaj paykunata nerqa: Kayta sut'ita niykichej: Manaraj Abraham kashajtin, NOQA KANI, nispa.

⁵⁹ Chaymanta judiokunaqa Jesusta ch'anqaykunankupaj rumita oqharikorqanku. Paytajrí paykunaj chawpinkuta rispa, Temploj pationmanta llojsiporqa.