San Juan 7 - DIOSPA QHELQACHISQAN DEUTEROCANONICAL

Jesús wawqenkunawan

¹ Chay qhepata Jesusqa Galileapi purisharqa, manataj Judeapi puriyta munarqachu, imaraykuchus judiokunaj kurajninkukuna wañuchinankupaj payta mask'asharqanku.

² Chaypacha judiokunaj Ch'ujlla Ruwana rayminkuman qayllaña kasharqa.

³ Jinapi Jesuspa wawqenkuna payta nerqanku: Kaymanta llojsispa, Judeaman riy, jaqaypi kaj yachachisqaykikunapis ruwasqaykita rikunankupaj.

⁴ Pillapis runaman rejsichikuyta munaspaqa, mana imatapis pakayllapi ruwanchu. Chayrayku imatachus ruwashanki, chaytaqa tukuypa rikunanta ruwamuy ari, nispa.

⁵ Wawqenkuna chayta nerqanku, imajtinchus paykunapis Jesuspi mana atinikorqankuchu.

⁶ Jesustajrí paykunata nerqa: Noqa pichus kasqayta rejsichikunaypaj p'unchay manaraj chayamunrajchu. Qankunapajrí ima pachallapis walejlla kashan.

⁷ Runakuna qankunata mana chejnikusunkichejchu. Noqatarí chejnikuwanku, imaraykuchus noqaqa ruwasqanku mana allinchu kasqanta sut'ita nipuni.

⁸ Qankuna raymiman rillaychej. Noqarí manaraj risajchu, imaraykuchus pichus kasqayta rejsichikunay p'unchay manaraj chayamunrajchu, nispa.

⁹ Chayta niytawantaj, Jesús Galileapi qhepakorqa.

Jesús Ch'ujlla Ruwana raymiman rin

¹⁰ Wawqenkuna raymiman risqankumanta qhepata, Jesuspis raymiman rillarqataj pakayllamanta, mana runawan rikuchikuspa.

¹¹ Judiokunaj kurajninkukunatajrí raymipi Jesusta mask'aspa, tapurakorqanku: Maypitaj chay runa kashanri? nispa.

¹² Runakunapis Jesusmanta tukuy imaymanata parlashallarqankutaj. Wakin nerqanku: Chay runaqa manchay k'acha, nispa. Wakintaj nerqanku: Mana, chay runaqa mana allinchu, imaraykuchus ashkha runata q'otiyashan, nispa.

¹³ Chaywanpis mana pipis Jesusmanta sut'ita parlasharqankuchu judiokunaj kurajninkukunata manchachikusqankurayku.

¹⁴ Khuskan raymi kashajtin, Jesús Temploman rerqa. Chantá Temploj pationpi yachachiyta qallarerqa.

¹⁵ Judiokunaj kurajninkukunataj t'ukuspa, nerqanku: Imaynamantataj kay runa Moisespa kamachisqankunamanta kay jinatapuni yachanri, mana noqanchejwan yachashaspallari? nispa.

¹⁶ Jesustaj kuticherqa: Kay yachachisqayqa mana noqajtachu, manachayqa kachamuwaj Diospata.

¹⁷ Pichus Diospa munasqanta ruwayta munajqa, yachachisqay Diosmantachus, chayrí noqallamantachus kasqanta yachanqa.

¹⁸ Pillapis pay kikinmanta parlajqa paylla runakunawan jatunpaj qhawachikuyta mask'an. Pichus kachamojninta jatunchayta munajrí cheqanta parlan, manataj llullakunchu.

¹⁹ Moisés qankunaman kamachisqakunata qosorqachej, icharí? Chaywanpis chay kamachisqakunata ni mayqenniykichej junt'ankichejchu. Chantá imaraykutaj wañuchiwayta munashankichejri? nispa.

²⁰ Runakunatajrí kuticherqanku: Qan supayniyoj kanki. Pitaj wañuchisuyta munashanri? nispa.

²¹ Chantá Jesús paykunata nerqa: Noqaqa samarina p'unchaypi uj t'ukuna imata ruwarqani, qankunataj chayta rikuspa, manchayta t'ukorqankichej.

²² Chaywanpis Moisés circuncidakunaykichejta kamachisusqaykichejrayku samarina p'unchay kashajtinpis, qhari wawata circuncidankichej (Circuncidanaqa ñawpa tataykichejkunawan qallarerqa, manaraj Moisés kamachisqakunata qoshajtin).

²³ Moisespa kamachisqanta mana p'akiyta munaspa, qankuna samarina p'unchay kashajtinpis, qhari wawata circuncidankichej. Jina chayqa, imaraykutaj noqapaj phiñakushankichej suchu runata samarina p'unchaypi puririchisqaymantari?

²⁴ Ama qhawasqaykichejman jinallaqa niychejchu imachus allin, imatajchus mana allinchu kasqantaqa. Manachayqa cheqan kajman jina allinta unanchaychej chayta reparanaykichejpaj, nispa.

Jesús pichus kasqanmanta nin

²⁵ Chaypacha Jerusalenpi wakin tiyakojkuna nerqanku: Manachu kurajninchejkuna kay runata wañuchinankupaj mask'ashanku?

²⁶ Rikuychej á. Tukuypa rikunanta parlashan, nitaj pipis imata nishanchu. Ichapis kurajninchejkuna yachankuña kay runa Diospa kachamusqan Cristo kasqanta.

²⁷ Chaywanpis noqanchej pay maymantachus jamusqanta yachanchej. Diospa kachamusqan Cristo jamojtinrí, ni pi yachanqachu maymantachus jamusqanta, nispa.

²⁸ Chayta Jesús uyarerqa Temploj pationpi yachachishaspa. Chantá jatunmanta parlaspa, nerqa: Qankuna noqata rejsiwasqaykichejta yuyankichejchu, maymantachus kasqaytapis? Jinapis noqaqa mana noqallamantachu jamuni. Pichus noqata kachamuwajqa cheqan kajllatapuni parlan, qankunataj payta mana rejsinkichejchu.

²⁹ Noqarí paymanta jamusqayrayku payta rejsini, paytaj kachamuwarqa, nispa.

³⁰ Chaymanta paykuna Jesusta jap'iyta munarqanku, manataj mayqenpis aterqachu, imaraykuchus manaraj jap'inanku p'unchay chayamusqarajchu.

³¹ Chaywanpis ashkha runakuna Jesuspi atinikorqanku. Paykunataj nerqanku: Dios kachamunan kashan, chay Cristo jamojtin, kay runamanta nisqa astawanrajchu runaj mana jayk'aj rikusqan t'ukunakunata ruwanman? nispa.

Fariseokuna Jesusta jap'ichiyta munanku

³² Fariseokunaqa uyarerqanku runakuna Jesusmanta ajinata chhichinakushasqankuta. Chayrayku paykuna, kuraj kaj sacerdotekuna ima Jesusta jap'inankupaj Templota qhawaj soldadokunata kacharqanku.

³³ Jesustajrí nerqa: Qankunawanqa manaña unaytachu kasaj, manachayqa pichus kachamuwajman kutipusaj.

³⁴ Qankuna mask'awankichej, manataj tariwankichejchu, imaraykuchus maypichus kasaj, chayman qankuna mana jamuyta atinkichejchu, nispa.

³⁵ Chantá judiokunaj kurajninkukuna tapunakorqanku: Maymanpunitaj kay runa renqa, payta mana tarinanchejpajri? Llajta masinchejkuna waj suyupi kashanku, chaykunamanchu renqa? Ichapis mana judío kajkunaman yachachimonqa.

³⁶ Imatataj niyta munan kay jinata nispari: Noqata mask'awankichej, manataj tariwankichejchu. Maypichus kasaj, chayman qankuna jamuyta mana atinkichejchu, nispari?

Kawsashaj yaku juturi

³⁷ Chay raymi tukukuy jatun p'unchaypi Jesús sayariytawan, jatunmanta parlaspa, nerqa: Tukuy pichus yakumanta ch'akichikojqa noqaman jamuchun, noqataj ujyananpaj yakuta qosaj.

³⁸ Pichus noqapi atinikojmantaqa, imaynatachus qhelqasqapi nin jina, paypa sonqonmanta kawsayta qoj yaku mayu jina phullchirenqa.

³⁹ Chayta nispa, Jesús paypi atinikojkunamanta parlasharqa, pikunamanchus Dios Santo Espirituta qonan karqa, chaykunamanta. Chaywanpis Santo Espíritu manaraj jamusqachu, imajtinchus Jesús manaraj janaj pachaman kutipusqachu.

Runakuna Jesusmanta mana ujllatachu parlanku

⁴⁰ Chantá Jesuspa nisqanta uyarispa, wakin nerqanku: Cheqapuni kayqa, noqanchej Diosmanta chay sut'inchaj jamunanta suyasharqanchej, chaymin, nispa.

⁴¹ Wakintaj nerqanku: Kaypuni Diospa kachamusqan Cristo, nispa. Wajkunatajrí nerqanku: Galileamantachu Diospa kachamusqan Cristo jamunman?

⁴² Diospa Qhelqachisqanpi nin Cristoqa Davidpa ayllunpi paqarinanta, Davidpa llajtan Belenpi, nispa.

⁴³ Chayrayku Jesusmanta parlaspa, runakuna t'aqanakorqanku.

⁴⁴ Paykunamanta wakintaj Jesusta jap'iykuyta munarqanku. Chaywanpis mana pipis imanayta aterqachu.

Judiokunaj kurajninkukuna Jesusta qhesachanku

⁴⁵ Templota qhawaj soldadokuna, maypichus kuraj sacerdotekuna, chantá fariseokuna ima kasharqanku, chayman kuterqanku. Kurajkunataj taporqanku: Imaraykutaj chay runata jap'ispa mana apamorqankichejchuri? nispa.

⁴⁶ Chantá Templota qhawaj soldadokuna kuticherqanku: Mana jayk'aj pipis chay runa jina parlarqachu, nispa.

⁴⁷ Fariseokunarí Templota qhawajkunata nerqanku: Qankunapis chay runawan q'otiyachikullankichejtajchu?

⁴⁸ Noqanchejpa kurajninchejkunamanta, chayrí fariseokunamanta kanmanchu pillapis paypi atinikojqa?

⁴⁹ Jesusta qhatej kay runakunaqa Moisespa kamachisqanta mana yachankuchu. Chayrayku Diospa maldicisqan kanku, nispa.

⁵⁰ Chantá fariseokunamanta Nicodemo, pichus Jesusta tuta watukoj risqa, chay nerqa:

⁵¹ Kamachisqaman jina, mana pillatapis juchachayta atisunmanchu manaraj payta uyarispaqa, nispa.

⁵² Chay nisqanmantatajrí fariseo masinkuna kuticherqanku: Qanpis Galileamantachu kanki? Diospa Qhelqachisqanta allinta qhaway ari, chantá qan yachanki: Mana jayk'ajpis Diosmanta sut'inchaj Galileamanta rikhurimunchu, nispa.

⁵³ Chaymantataj sapa uj wasinkuman riraporqanku.