San Juan 4 - DIOSPA QHELQACHISQAN DEUTEROCANONICAL

Jesús Samaria llajtayoj warmiwan parlan

¹ Fariseokunaqa kayta uyarisqanku: Jesusqa Juanmanta nisqa astawan ashkha yachachisqakunayoj, astawan ashkhatataj bautizan, nispa nejta.

² Manapis Jesuschu bautizasharqa, manachayqa yachachisqankunalla.

³ Jesustaj fariseokuna chayta yachasqankuta yachaspa, Judea jap'iymanta llojsispa, yachachisqankunawan khuska Galilea jap'iyman ujtawan rerqa.

⁴ Galileaman rinankupajqa Samaria jap'iynejtapuni rinanku karqa.

⁵ Chayarqankutaj Samariapi kaj Sicar llajtaman, maypichus Jacobqa churin Joseman chayaqeta qosqa, chay qayllaman.

⁶ Chaypitaj Jacobpa yaku pujyun karqa. Jesustaj sayk'usqa kaspa, chay pujyu qayllapi tiyarikorqa, chawpi p'unchay jinaña kashasqanrayku.

⁷ Jinaqa chayman Samaria jap'iypi Sicar llajtayoj uj warmi jamorqa yakuta orqhoj, Jesustaj chay warmita nerqa: Yakuta qoriway, nispa.

⁸ Jesusrí chaypacha sapallan kasharqa, imajtinchus yachachisqankuna llajtaman mikhunata rantej risqanku.

⁹ Chantá warmeqa Jesusta nerqa: Qanqa judío kanki, noqataj Samaria jap'iymanta warmi kani. Jina chayqa, imaraykutaj yakuta mañakushawankiri? nispa. Chayta nerqa, imaraykuchus judiokunaqa Samaria jap'iymanta kajkunawan mana allintachu kawsaj kanku.

¹⁰ Jinaqa Jesús kutichispa, nerqa: Qanqa Dios imatachus qosuyta munasqanta mana yachankichu, nillataj pichus yakuta mañakusojtapis rejsinkichu. Yachawajchus chayqa, noqamanta yakuta mañakuwankiman, noqataj kawsachej yakuta qoykiman, nispa.

¹¹ Chantá chay warmi nerqa: Wiraqochi, mana imapis yakuta orqhonaykipaj tiyapusunkichu, pujyutaj allin ukhu. Maymantataj chay kawsachej yakuta qowankimanri?

¹² Qanqa ñawpa tatayku Jacobmantapis aswan kuraj kasqaykitachu yuyanki? Paymin kay pujyuta saqewarqayku, mayqenmantachus pay, wawankuna, chantá uywankuna ima ujyarqanku, chayta, nispa.

¹³ Chantá Jesús kuticherqa: Pillapis kay yakumanta ujyajqa watej yaku ch'akiyniyoj kallanqataj.

¹⁴ Noqaj qosqay yakuta ujyajrí manaña jayk'ajpis ujtawan ch'akichikonqachu. Aswanpis noqaj qosqay yakoqa paypi mana ch'akej pujyu jina kanqa, chay yakutaj payman wiñay kawsayta qonqa, nispa.

¹⁵ Warmitaj nerqa: Wiraqochi, chay yakuta qoway ari, amaña yakumanta ch'akichikunaypaj, nitaj ujtawan kay pujyuman yakuta orqhoj jamunaypaj, nispa.

¹⁶ Chantá Jesús nerqa: Rispa, qosaykita wajyamuy, chantá kutimuy, nispa.

¹⁷ Warmitaj kuticherqa: Mana qosay kanchu, nispa. Jesustaj nerqa: Allinta ninki: Mana qosay kanchu, nispa,

¹⁸ imajtinchus phishqa qosayoj karqanki, kunan piwanchus tiyakushanki, chayqa mana qosaykichu. Chaytaqa cheqanta parlanki, nispa.

¹⁹ Warmitaj chayta uyarispa, nerqa: Wiraqochi, qanqa Diosmanta sut'inchajsina kankeqa.

²⁰ Chayrayku noqa tapurikuykiman. Ñawpa tataykukuna kay orqopi Diosta yupaycharqanku. Jina kajtenqa, imaraykutaj qankuna judiokuna ninkichej Jerusalenllapi Diosta yupaychana kasqanta, nispa.

²¹ Chantá Jesús kuticherqa: Warmisita, kayta sut'ita niyki: Qhepanejmanqa mana kay orqopichu, nitaj Jerusalenpichu Tata Diosta yupaychankichej.

²² Samaritanokunaqa pitachus yupaychasqaykichejta mana yachankichejchu. Noqaykurí pitachus yupaychasqaykuta yachayku, imaraykuchus Qhespichejqa judiokuna ukhumanta rikhurimonqa.

²³ Chay p'unchay chayamunan karqa, kunantaj chayamunña: Tata Diosta cheqatapuni yupaychajkunaqa Santo Espíritoj yanapasqan cheqa kajman jina tukuy sonqo yupaychanqanku, imaraykuchus Tata Diosqa ajina yupaychajkunata mask'an.

²⁴ Diosqa mana rikukoj espiritumin, payta yupaychajkunataj Santo Espíritoj yanapasqan cheqa kajman jina tukuy sonqo payta yupaychananku tiyan, nispa.

²⁵ Warmitaj nerqa: Yachani Cristo nisqa Mesías jamunanta, pay jamuspataj, tukuy imata willawasqayku, nispa.

²⁶ Jesustajrí nerqa: Noqa chay Cristo kani, pichus parlashasunki, chay, nispa.

²⁷ Jinallapi yachachisqankuna chayamuspa, Jesusta uj warmiwan parlashajta rikorqanku. Chantá t'ukorqanku. Chaywanpis mana pipis taporqachu: Imaraykutaj paywan parlashankiri? Chayrí: Imamantataj chay warmiwan parlasharqankiri? nispa.

²⁸ Chay warmirí yaku p'uñunta pachanpi saqerparispa, llajtaman kutirerqa. Chaypitaj llajta masinkunata nerqa:

²⁹ Jamuychej, uj runata rejsinaykichejpaj. Payqa tukuy ima ruwasqayta uyaypi nipuwan. Manachu pay Cristo kanman? nispa.

³⁰ Chantá chay llajtapi tukuy tiyakojkuna llojsispa, rerqanku, maypichus Jesús kasharqa, chayman.

³¹ Chaykamarí Jesuspa yachachisqankuna payta nerqanku: Yachachej Wiraqochiyku, imallatapis mikhurikuy ari, nispa.

³² Jesustajrí kuticherqa: Waj mikhuna tiyapuwan, qankunarí mana yachankichejchu chay mikhuna imachus kasqanta, nispa.

³³ Chantá yachachisqankuna paykunapura ninakorqanku: Mana kaypi kananchejkama, pichus mikhunata jaywanman karqa, í? nispa.

³⁴ Jesustaj paykunata nerqa: Mikhunayqa Kachamuwaj Diospa munasqanta ruwanay, imatachus ruwanantataj tukuychanay.

³⁵ Qankuna ninkichej: Tawa killamantaraj chajra oqharina kanqa, nispa. Noqarí niykichej: Qhawariychej, chajraqa oqharinapaj jina poqosqaña.

³⁶ Pichus ruthojmanqa sumaj pagota paganku. Oqharisqanku poqoytaj runakuna kanku, pikunachus wiñay kawsayman yaykonqanku, chaykuna. Ajinaqa pichus tarpojwan, chajrata oqharejwan ima khuska kusikonqanku.

³⁷ Runa kay jinata nisqanqa cheqapuni junt'akun: Uj tarpun, wajtaj tarpusqanta oqharin, nispa.

³⁸ Noqaqa mana tarpusqaykichejta ruthojta kachashaykichej. Wajkuna tarporqanku, qankunataj chay tarpojkunaj poqochisqanta oqharinkichej, nispa.

³⁹ Chantá Samaria jap'iypi chay llajtayojkunamanta ashkhapuni Jesuspi atinikorqanku, chay warmej willasqanta uyarispa, imaraykuchus pay nisqa: Pay tukuy ruwasqayta uyaypi nipuwan, nispa.

⁴⁰ Ajinaqa chay runakuna, Jesús maypichus kasharqa, chayman chayaspa, paykunawan qheparikunanta mañarikorqanku. Jesustaj iskay p'unchayta chaypi qhepakorqa.

⁴¹ Chaypacha Jesuspa parlasqanta uyarispa, astawan ashkha paypi atinikorqanku.

⁴² Warmitataj nerqanku: Kunanqa paypi atinikuyku mana qan willawasqaykuraykullachu. Manachayqa noqayku kikiyku payta uyarispa, yachayku cheqapuni pay tukuy runata qhespichej Cristo kasqanta, nispa.

Jesusqa kamachejpa churinta qhaliyachin

⁴³ Jesús chaypi iskay p'unchayta kaytawan, Samaria jap'iymanta llojsispa, Galilea jap'iyman rerqa.

⁴⁴ Manaraj rishaspa, Jesús nisqa Diosmanta sut'inchajqa llajtanpi pisipaj qhawasqa kasqanta.

⁴⁵ Chaywanpis Galileaman Jesús chayajtin, chay llajtayojkuna jamusqanmanta kusikorqanku. Paykunapis Jerusalenpi Pascua raymiman rillasqankutaj, chaypitaj Jesuspa tukuy ima ruwasqanta rikusqanku.

⁴⁶ Chaymanta Jesús Galileapi Caná llajtaman kutimullarqataj, maypichus yakuta vinoman tukuchisqa, chayman. Chaypachallataj Cafarnaunpi kamachejta yanapaj uj runa kasharqa, paypa wawantaj onqosqa kasharqa.

⁴⁷ Judeamanta Galileaman Jesús jamusqanta yachaspa, payqa Jesuswan tinkukoj jamorqa, mañarikorqataj wasinman rispa wawanta qhaliyachinanta, imaraykuchus wawanqa wañuy patapiña kasharqa.

⁴⁸ Chantá Jesús payta nerqa: Manachus runaj mana jayk'aj rikusqanta, chantá t'ukuna imakunata ima ruwajta rikuwankichej chayqa, qankuna noqapi mana atinikunkichejchu, nispa.

⁴⁹ Jesús chayta nishajtinpis, kamachejta yanapaj runa nillarqapuni: Wiraqochíy, ama jina kaspa, wasiyman rina ari, manaraj waway wañupushajtin, nispa.

⁵⁰ Jesustaj nerqa: Wasiykiman kutipuy. Wawaykeqa mana wañonqachu, kawsanqa, nispa. Chantá chay runaqa Jesuspa nisqanta jap'ikuspa, riporqa.

⁵¹ Wasinman chayashajtintaj, kamachinkuna taripaj llojsimuspa, nerqanku: Wawaykeqa kutiripun, nispa.

⁵² Chantá pay kamachinkunata taporqa mayk'ajchus wawan qhaliyapusqanta. Paykunataj nerqanku: Qayna chawpi p'unchaynejta k'aja onqoynin chinkaporqa, nispa.

⁵³ Wawaj tatantaj repararqa chay phanita jina Jesús payman nisqanta: Wawaykeqa kawsashan, nispa. Chantá chay runa, wasinpi tukuy kajkunapis Jesuspi atinikorqanku.

⁵⁴ Jesús Judeamanta Galileaman kutimuspa, chay iskay kaj t'ukunata ruwarqa, pipunichus pay kasqanta yachayta qonanpaj.