San Juan 2 - DIOSPA QHELQACHISQAN DEUTEROCANONICAL

Caná llajtapi casaraku

¹ Kinsa p'unchayninman Galilea jap'iypi Caná llajtapi casaraku karqa, Jesuspa mamantaj chaypi kasharqa.

² Jesús, chantá yachachisqankuna ima chay casarakuyman rinankupaj wajyarisqa karqanku.

³ Jinallapi vino tukurparikojtin, Jesuspa maman payta nerqa: Vino tukukapun, nispa.

⁴ Jesustajrí kuticherqa: Mamáy, imaraykutaj chayta niwankiri? Pichus noqa kasqayta rejsichikunay p'unchay manaraj chayamunchu, nispa.

⁵ Mamanrí kamachikunata nerqa: Tukuy imatachus nisqanta ruwaychej, nispa.

⁶ Chaypi rumimanta ruwasqa sojta jatuchaj p'uñukuna karqa yakuta churanapaj, judío usuman jina mayllakuspa llimphuchakunankupaj. Sapa p'uñumantaj qanchis chunka litro yaku yaykorqa.

⁷ Jesustaj kamachikunata nerqa: Kay p'uñukunaman yakuta junt'arachiychej, nispa. Paykunataj junt'aracherqanku.

⁸ Chantá Jesús nerqa: Kunanqa uj chhikata wiserqospa, mayordomoman llaminanpaj apaychej, nispa. Paykunataj aparqanku.

⁹ Jinapi mayordomoqa yakumanta ruwasqa vinota llamirerqa, mana yachaspa maymantachus apamusqankuta. Chaytaqa yakuta wisej kamachikunalla yacharqanku. Chantá mayordomoqa casarakojta wajyaspa, nerqa:

¹⁰ Pillapis ñawpajtaqa sumaj vinotaraj jaywan. Casarakuman wajyarisqa macharisqaña kashajtinkutaj, mana walej vinollataña jaywan. Qanrí kunankama aswan sumaj vinota jallch'asqanki, nispa.

¹¹ Jesús Galilea jap'iypi Caná llajtapi yakuta vinoman tukuchisqanqa ñawpaj kaj t'ukuna ruwasqan karqa. Ajinata Jesús may jina atiyniyoj kasqanta rejsicherqa, yachachisqankunataj paypi astawan atinikorqanku.

¹² Chaymantataj Jesús Cafarnaún llajtaman rerqa mamanwan, wawqenkunawan, chantá yachachisqankunawan ima. Chaywanpis mana unaytachu chaypi karqanku.

Jesús qhatojkunata Templomanta qharqon

¹³ Judiokunaj Pascua rayminkuman qayllallaña kashajtin, Jesús Jerusalenman rerqa.

¹⁴ Chantá pikunachus wakakunata, ovejakunata, urpikunata ima Temploj pationpi qhatojkunata rikorqa, jinallataj qolqe chhalajkunata ima.

¹⁵ Jinapi Jesús lazomanta seq'onata ruwaspa, tukuyninkuta Temploj pationmanta wijch'orqa, jinallataj ovejakunata, wakakunatapis. Chhalajkunaj qolqenkutapis pampaman qhallirparispa, mesankuta tijrararqa.

¹⁶ Urpikunata qhatojkunatataj nerqa: Tukuy chaykunata kaymanta orqhoychej. Tataypa wasintaqa ama qhatuna wasiman tukuchiychejchu, nispa.

¹⁷ Chaypacha yachachisqankuna Diospa Qhelqachisqanpi imatachus nisqanmanta yuyarikorqanku: Diosníy, yupaychana wasiykita anchatapuni munakusqayrayku sonqoy lawrarin, nispa.

¹⁸ Chaywanpis judiokunaj kurajninkunaqa Jesusta taporqanku: Kayta ruwanaykita pitaj kamachisorqari? Dioschus kamachisorqa chayqa, runaj mana jayk'aj rikusqan t'ukunata ruway ari, yachanaykupaj, nispa.

¹⁹ Jesustaj paykunata nerqa: Kay templota urmachiychej, noqataj kinsa p'unchayllapi watej sayarichisaj, nispa.

²⁰ Chayta uyarispa, judío kurajkuna kuticherqanku: Kay Temploqa tawa chunka sojtayoj watapi ruwasqa karqa. Qanrí kinsa p'unchayllapichu sayarichiyta atiwaj? nispa.

²¹ Jesusrí: Templo nispaqa, kikin ukhunmanta parlasharqa.

²² Chayrayku yachachisqankuna Jesuspa nisqanta yuyarikorqanku, maypachachus Jesús wañusqamanta kawsarimporqa, chaypacha. Chantá Diospa Qhelqachisqanpi imatachus nisqanta jap'ikorqanku, jinallataj Jesuspa nisqantapis.

Jesús runaj sonqonta rejsin

²³ Pascua raymipi Jesús Jerusalenpi kashajtin, ashkha runakuna paypi atinikorqanku, runaj mana jayk'aj rikusqan t'ukunata ruwasqanta rikuspa.

²⁴ Chaywanpis Jesús paykunapi mana atinikorqachu, imaraykuchus paykuna imaynachus kasqankuta rejserqa.

²⁵ Manataj pay runamanta imatapis pi willanantarajchu suyarqa, imaraykuchus pay runaj sonqonpi imachus kasqanta yacharqaña.