San Juan 19 - DIOSPA QHELQACHISQAN DEUTEROCANONICAL

¹ Chantá Pilatoqa Jesusta jasut'icherqa.

² Soldadokunataj khishkamanta uj pilluta simp'aspa, Jesuspa umanman churaykorqanku, chantá puka patanchanatawan churaykullarqankutaj.

³ Chantá alqochakuspa, qhaparerqanku: Jallalla, judiokunaj kuraj kamachejninku, nispa. Jinallataj Jesusta uyanpi laq'arqanku.

⁴ Chaymanta kamachej Pilato ujtawan llojsimuspa, tantasqa judiokunata nerqa: Kunan kay runata ujtawan jawaman pusamusaj. Chaywanpis sut'ita niykichej: Noqaqa kay runajta mana ima juchantapis tarinichu, nispa.

⁵ Jesustaj llojsimorqa, umanpi khishka pilluyoj, chantá puka patanchanawan qhatasqa. Pilatotaj nerqa: Kaymá chay runaqa, nispa.

⁶ Chaypacha kuraj sacerdotekuna, chantá Templota qhawaj soldadokuna ima Jesusta rikuytawan, kutin kutinta qhaparerqanku: Cruzman chakatasqa kachun, nispa. Jinapi Pilato nerqa: Qankuna apakapuychej, cruzmantaj chakataychej. Noqarí kay runapi mana ima juchantapis tarinichu, nispa.

⁷ Judiokunaj kurajninkukunatajrí kuticherqanku: Diosqa kamachisqankunata qhelqasqata qowarqayku, chayman jinataj kay runa wañuchisqapuni kanan tiyan, Diospa Churin kasqanta nisqanrayku, nispa.

⁸ Chay nisqankuta uyarispa, Pilato astawan mancharikorqa.

⁹ Kamachinan wasiman Jesusta pusaspataj, payta taporqa: Maymantataj qan kankiri? nispa. Jesustajrí mana ni imata kuticherqachu.

¹⁰ Chantá Pilato nerqa: Manachu imatapis niwanki? Manachu yachanki noqa atiyniyoj kasqayta kacharichisunaypaj, chayrí cruzman chakatachisunaypajpis? nispa.

¹¹ Jesustaj kuticherqa: Mana imatapis contraypi ruwayta atiwajchu, manachus Dios atiyta qosunkiman chayqa. Chayrayku pichus noqata qanman jaywaykuwajqa qanmanta aswan juchayoj, nispa.

¹² Chaymantapacha Pilatoqa Jesusta kacharipuyta munasharqa. Judiokunatajrí qhaparerqanku: Chay runatachus kacharinki chayqa, mana Romapi kuraj kamachej Cesarman sayasqachu kanki. Pillapis kuraj kamachej kasqanta nejqa Cesarman contranpi kashan, nispa.

¹³ Chayta uyariytawan, Pilatoqa watej jawaman Jesusta pusarqa. Chantá maypichus justiciata ruwananpaj tiyakoj, chaypi tiyarikorqa, rumiwan losasqa cheqapi. Chaynejta hebreo rimaypi “Gabata”, nispa sutichaj kanku.

¹⁴ Chaypacha Pascua raymita ruwanapaj wakichikuna p'unchay karqa, chawpi p'unchay jina. Pilatotaj judiokunata nerqa: Kayqa kuraj kamachejniykichej, nispa.

¹⁵ Paykunatajrí qhaparerqanku: Llajtamanta jawaman orqhospa, cruzman chakatachimullayña, nispa. Pilatotaj paykunata nerqa: Kuraj kamachejniykichejtachu cruzman chakatachisaj? nispa. Kuraj sacerdotekunataj kuticherqanku: Mana waj kuraj kamachejniyku kanchu Romapi kuraj kamachej Cesarmanta astawanqa, nispa.

¹⁶ Chantá Pilatoqa judiokunaj kurajninkukunaj nisqankuta kasuspa, Jesusta soldadokunaman jaywaykorqa cruzman chakatanankupaj. Paykunataj Jesusta jap'ispa, chakatanankupaj aparqanku.

Jesusta cruzman chakatanku

¹⁷ Chantá Jesús cruznin lijrarisqa llajtamanta llojserqa, T'ojlu Moqo nisqa cheqaman. Chaynejta hebreo rimaypi “Gólgota” nillajtaj kanku.

¹⁸ Chaypitaj Jesusta cruzman chakatarqanku. Jinallataj iskay runakunata chakatallarqankutaj, ujninta pañanman, ujnintataj lloq'enman, Jesustataj chawpiman.

¹⁹ Pilatotaj cruzman uj qhelqasqata churacherqa. Chay qhelqasqa ajinata nisharqa: “Kayqa Nazaretmanta Jesús, judiokunaj kuraj kamachejninku”, nispa.

²⁰ Ashkha runa chay qhelqasqata ñawirerqanku, imaraykuchus llajta qayllapi Jesusta chakatasqanku. Chay qhelqasqataj kinsa rimaypi qhelqasqa karqa: Hebreo rimaypi, latinpi, chantá griego rimaypi ima.

²¹ Judiokunaj kuraj sacerdotenkunarí Pilatota nerqanku: Ama qhelqaychu: Judiokunaj kuraj kamachejninku, nispa. Aswanpis qhelqawaj: Noqaqa judiokunaj kuraj kamachejninku kasqayta nini, nispa nisqanta.

²² Pilatorí paykunaman kuticherqa: Mana. Imatachus qhelqasqayqa qhelqasqaña. Ajinalla kakuchun, nispa.

²³ Jesusta cruzman chakataytawan, soldadokunaqa p'achanta tawaman t'aqaspa, rak'inakorqanku, sapa ujpaj ujkama. Jinapis ukhunchana p'achanqa patamanta urakama uj awasqalla karqa, manataj sirasqachu.

²⁴ Chayrayku soldadokuna ninakorqanku: Kaytaqa ama llik'inachu. Walej kanman suerteta choqananchej, pipajchus kananta yachananchejpaj, nispa. Ajinata junt'akorqa, imachus Diospa Qhelqachisqanpi nin, chay: P'achayta rak'inakorqanku, p'achayraykutaj suerteta choqarqanku, nispa. Soldadokunataj ajinata ruwarqanku.

²⁵ Jesús cruzpi chakatasqa kasharqa, chay qayllapi kasharqanku maman, mamanpa ñañan, Cleofaspa warmin María, chantá María Magdalena ima.

²⁶ Jinapi Jesús mamanta chaypi sayashajta rikorqa, rikullarqataj paypa qayllanpi munasqa yachachisqan kashajta. Chantá mamanta nerqa: Mamáy, kunanmantapacha pay churiyki jina kanqa, nispa.

²⁷ Chantá yachachisqantañataj nerqa: Payqa kunanmantapacha mamayki jina kanqa, nispa. Chaymantapacha Jesuspa yachachisqanqa Mariata wasinman pusakaporqa.

Jesús wañun

²⁸ Chay qhepata Jesús imachus ruwanan tukuychasqaña kasqanta yachaspa, Diospa Qhelqachisqan junt'akunanpaj nerqa: Yakumanta ch'akishawan, nispa.

²⁹ Chaypi k'allku vinoyoj uj yuru kasharqa. Chantá chaypi kajkunamanta ujninkoqa esponjata chay k'allku vinoman chhapuykuytawan, k'aspiman wataykuspa, Jesuspa siminman qayllaykucherqa.

³⁰ Jesustaj chay k'allku vinota llamiytawan, nerqa: Imachus ruwanayta tukuychaniña, nispa. Chantá umanta liwiykuspa, wañuporqa.

Jesusta lanzawan t'ojsinku

³¹ Chaypacha Pascua raymi ruwana ñawpaj p'unchay karqa. Chayrayku judiokuna samarina p'unchaypi ayakuna cruzpi warkhurayananta mana munarqankuchu, paykunapaj ancha jatun p'unchay kasqanrayku. Chayrayku judiokunaj kurajninkukuna Pilatomanta mañakorqanku kamachinanta chakatasqakuna usqhayta wañunankupaj chakinkuta p'akiranankuta, chaymantataj ayakunata cruzmanta urayk'uchinankuta.

³² Soldadokunataj rispa, pikunachus Jesuswan khuska chakatasqa karqanku, chaykunaj chaki senqankuta ujmanta uj p'akirarqanku.

³³ Jesusman qayllaykusparí, payta wañusqataña tariparqanku. Chayrayku chaki senqanta manaña p'akerqankuchu.

³⁴ Chaywanpis ujnin soldado lanzawan Jesuspa wajtannin chaynejta t'ojserqa, chay kikinpachataj yawar, yaku ima surumorqa.

³⁵ Chayta rikojqa testigo jina imatachus rikusqanta willarqa, chay willasqantaj mana llullachu. Payqa maychus kajta parlan, qankuna chayta jap'ikunaykichejpaj.

³⁶ Chay karqa Diospa Qhelqachisqanpi nisqan junt'akunanpaj: Tullunmanta ni ujpis p'akisqachu kanqa, nispa.

³⁷ Diospa Qhelqachisqanpi wajnejpi nillantaj: Pitachus lanzawan t'ojsisqankuta qhawanqanku, nispa.

Jesuspa ayanta p'ampanku

³⁸ Chay tukuy ima qhepata, Arimatea llajtayoj José Jesuspa ayanta apakapunanpaj Pilatomanta mañakorqa. Joseqa judiokunaj kurajninkukunata manchachikusqanrayku pakayllamanta Jesusta qhatisqa. Chantá Pilatoqa Josejpa mañakusqanta uyarerqa, Josetaj Jesuspa ayanta apakaporqa.

³⁹ Nicodemopis jamullarqataj, pichus uj tuta jamuspa Jesusta watukusqa, chay. Payqa kinsa chunka kilo jina mirrata, aloetawan chajrusqata apamorqa.

⁴⁰ Paykunataj Jesuspa ayanta jap'iytawan, chay chajrusqa sumaj q'apashaj jawinawan churaykuspa, sabanawan mayt'uykorqanku, imaynatachus judiokuna ayata p'ampayta yachaj kanku, chay usuman jina.

⁴¹ Chantá, maypichus Jesusta chakatarqanku, chaynejpi uj huerta karqa. Chaypitaj mosoj aya p'ampana karqa, chaymantaj mana pitapis p'ampasqankurajchu.

⁴² Jinapi judiokuna Pascua raymita ruwanapaj wakichikuna p'unchay kasqanrayku, Jesuspa ayanta chay aya p'ampanaman churarqanku, imaraykuchus qayllallapi karqa.