San Juan 18 - DIOSPA QHELQACHISQAN DEUTEROCANONICAL

Kurajkuna Jesusta jap'ichinku

¹ Tata Dioswan parlarikuyta tukuytawan, Jesusqa yachachisqankunawan ima Cedrón wayq'o chimpaman rerqanku. Chaypi olivo sach'ayoj huerta karqa, chaymantaj Jesús, yachachisqankunawan ima yaykorqanku.

² Jesusta jap'ichej Judaspis chay cheqata rikullasqataj, imaraykuchus Jesús, yachachisqankunawan ima ashkha kutita chaypi tantakoj kanku.

³ Chayrayku Judasqa chaypi kaj Romamanta ashkha soldado pusarisqa chayamorqa, Templota qhawaj soldadokunawan ima. Chaykunata fariseokuna, chantá kuraj sacerdotekuna ima kachamusqanku. Paykuna nina jachonniyoj, lamparakunayoj, chantá armayoj ima jamorqanku.

⁴ Jesusrí chay tukuy ima payta qhatirinanta yacharqaña. Chayrayku ñawpaykuspa, paykunata taporqa: Pitataj mask'ashankichejri? nispa.

⁵ Paykunataj kuticherqanku: Nazaretmanta Jesusta mask'ashayku, nispa. Jesustaj kuticherqa: Noqa kani chay, nispa. Jesusta jap'ichej Judaspis paykunawan kashallarqataj.

⁶ Noqa kani chay, Jesús nejtinkama, tukuyninku ithirispa, pampaman choqakorqanku.

⁷ Chantá Jesús ujtawan tapullarqataj: Pitataj mask'ashankichejri? nispa. Paykunataj kuticherqanku: Nazaretmanta Jesusta mask'ashayku, nispa.

⁸ Jesustaj ujtawan nerqa: Noqa kani, nispa nerqaykichejña. Noqatachus mask'ashawankichej chayqa, kay yachachisqaykuna ripunankuta saqeychej, nispa.

⁹ Ajina karqa Jesuspa kay nisqan junt'akunanpaj: Tatáy, pikunatachus qowarqanki, chaykunamanta mana ujtapis chinkacherqanichu, nispa.

¹⁰ Chaypacha Simón Pedroqa Jesusman kutikuspa, espadanta sik'erqa. Chantá kuraj kaj sacerdotej wata runan Malco sutiyojpa paña ninrinta wajtaspa, qholurparerqa.

¹¹ Jesustajrí Pedrota nerqa: Espadaykita waqaychakapuy. Sichus Tatay ñak'arinayta kamachiwan chayqa, manachu yuyanki ñak'arinaypaj wakichisqa kashasqayta? nispa.

Jesusta kuraj kaj sacerdoteman pusanku

¹² Chaymantataj Romamanta soldadokuna, kamachejninku, jinataj Templota qhawaj soldadokuna ima Jesusta jap'ispa, makinta watarqanku.

¹³ Chantá Jesusta ñawpajta Anaspa wasinman pusarqanku. Anasqa Caifaspa suegron karqa, Caifastaj chay wata kuraj sacerdote jina kasharqa.

¹⁴ Paymin judiokunaj kurajninkukunaman yuyayta qosqa: Walej kanman tukuy runarayku uj runalla wañunan, nispa.

Pedroqa Jesusta mana rejsejman tukun

¹⁵ Jinapi Pedrowan, Jesuspa waj yachachisqanwan ima Jesuspa qhepanta rerqanku. Chay yachachisqataj kuraj kaj sacerdotej rejsisqan kasqanrayku, Anaspa wasinpa pationman Jesuswan yaykorqa.

¹⁶ Pedrotajrí calle punkullapi qhepakorqa. Chantá Jesuspa yachachisqan, pichus kuraj kaj sacerdotej rejsisqan kaj, chay llojsimuspa, punkuta qhawaj warmita parlapayarqa, jinataj Pedrota pusaykorqa.

¹⁷ Chay warmitajrí Pedrota nerqa: Manachu qanpis chay runaj yachachisqankunamanta ujnin kankiri? nispa. Pedrotajrí nerqa: Mana chaychu kani, nispa.

¹⁸ Chaypacha chiri karqa, jinataj, Anaspa kamachinkuna, chantá Templota qhawaj soldadokuna ima ninata jap'ichispa, q'oñikusharqanku. Pedropis paykunawan khuska q'oñikushallarqataj.

Anasqa Jesusta tapun

¹⁹ Chantá kuraj kaj sacerdoteqa Jesusta taporqa pikunachus yachachisqankuna kasqankumanta, chantá imatachus yachachisqanmantawan.

²⁰ Jesustajrí payman kuticherqa: Tukuypa rikunanta runakunaman parlarqani. Yachacherqanitaj tantakuna wasikunapi, Templopi ima, maypichus runakuna tantakunku chaypi, manataj imatapis pakayllapi parlarqanichu.

²¹ Jinaqa imaraykutaj noqata tapuwankiri? Parlasqayta uyariwajkunata tapuy ari, paykuna imatachus parlasqayta yachanku, nispa.

²² Chayta Jesús nisqantawan, Templota qhawaj soldadokunamanta ujnenqa Jesusta uyanpi laq'arqa: Ajinatachu kuraj kaj sacerdoteman kutichina? nispa.

²³ Jesustaj payta nerqa: Sichus mana allinta parlani chayqa, niway ari mayqen parlasqaychus mana allinchu kasqanta. Sichus parlasqay allin chayrí, imaraykutaj laq'awankiri? nispa.

²⁴ Chantá Anasqa kuraj kaj sacerdote Caifasman makin watasqata Jesusta pusacherqa.

Pedro ujtawan Jesusta mana rejsejman tukun

²⁵ Chaykama Pedro ninapi q'oñikushajtin, wakin nerqanku: Manachu qanpis chay runaj yachachisqan kanki? nispa. Pedrotajrí nerqa: Mana chaychu kani, nispa.

²⁶ Chantá kuraj kaj sacerdotej ujnin kamachin, mayqenpatachus ninrinta Pedro qholurparisqa, chay runaj ujnin ayllun Pedrota nerqa: Manachu qanta huertapi Jesustawan khuska rikorqayki? nispa.

²⁷ Jinapi Pedroqa ujtawan kuticherqa: Manapuni payta rejsinichu, nispa. Chayta nisqantawantaj, gallo waqarqa.

Jesusta kamachej Pilatoman pusanku

²⁸ Chantá sut'iyamushajtinña, judiokunaj kurajninkukunaqa Caifaspa wasinmanta Jesusta Pilatoj kamachinan wasiman pusarqanku. Chay pusajkunarí mana Pilatoj kamachinan wasiman yaykorqankuchu, imaraykuchus mana munarqankuchu mana llimphupaj qhawasqa kayta, ajinamanta Pascua mikhuyta mikhunankupaj.

²⁹ Chantá kamachej Pilato llojsimuspa, paykunata taporqa: Kay runa imatataj ruwarqa noqaman apamunaykichejpajri? nispa.

³⁰ Paykunataj kuticherqanku: Manachus millayta ruwaj runa kanman chayqa, mana qanman pusamuykumanchu karqa, nispa.

³¹ Chantá kamachej Pilato paykunata nerqa: Jina kajtenqa, payta pusaspa, kamachisqa qhelqaykichejman jina juzgaychej, nispa. Judiokunaj kurajninkukunatajrí nerqanku: Noqaykoqa mana pitapis wañuchisqa kananpaj juchachayta atiykuchu, nispa.

³² Ajinata Jesuspa nisqan junt'akorqa, imaraykuchus Jesús imaynatachus wañunanta nisqaña.

³³ Chantá kamachej Pilato kamachinan wasiman kutiykorqa, Jesusta wajyaspataj, taporqa: Qanchu judiokunaj kuraj kamachejninku kanki? nispa.

³⁴ Jesustaj payta nerqa: Qanllamantachu chayta ninki, chayrí wajkunachu noqa kuraj kamachej kasqayta nerqasunku? nispa.

³⁵ Chantá kamachej Pilato Jesusman kuticherqa: Noqa judiochu kani, imatajri? Llajta masiykikuna, chantá kuraj sacerdotekuna ima kayman pusamusunku, noqa juzgasunaypaj. Imatataj ruwarqankiri? nispa.

³⁶ Jesustaj kuticherqa: Noqaqa mana kay pachapi kamachejkuna jinachu kani. Kay pachapichus kamachiyta munayman chayqa, noqata qhatiwajkuna maqanakunkuman judiokunaj kurajninkukuna ama jap'inawankupaj. Noqarí mana kay pachapi kamachejkuna jinachu kani, nispa.

³⁷ Chaymanta kamachej Pilato payta taporqa: Chantá qanqa kuraj kamachejchu kanki? nispa. Jesustaj kuticherqa: Qan nishanki noqa kuraj kamachej kasqayta. Noqatajrí kay pachaman jamorqani cheqa kajmanta willanaypaj. Cheqa kajta tukuy kasojkunaqa nisqayta uyarinku, nispa.

³⁸ Chantá kamachej Pilato tapullarqataj: Chay cheqa kaj imatajri? nispa. Chayta niytawan, Pilatoqa jawapi kashaj judiokunaman kutispa, nerqa: Kay runata juchachanapaj jina mana imatapis tarinichu.

Jesusta wañuchisqa kananpaj juchachanku

³⁹ Chaywanpis qankuna usuykichejman jina yachankichej, Pascua raymipi uj presota kacharinapuni kasqanta. Qankuna munawajchejchu kuraj kamachejniykichejta kacharipunayta? nispa.

⁴⁰ Chayta Pilato nejtinrí, tukuy qhaparerqanku: Chay runataqa ama, Barrabasta kachariy, nispa. Barrabasqa runa wañuchi, suwataj karqa.