San Juan 13 - DIOSPA QHELQACHISQAN DEUTEROCANONICAL

Jesús yachachisqankunaj chakinkuta mayllan

¹ Pascua raymiman qayllallaña karqa. Jesustaj kay pachata saqespa Tatanpaman kutipunanpaj p'unchay chayamushasqanta yacharqa. Jinataj kay pachapi ruwananta junt'ashaspa imaynatachus yachachisqankunata munakorqa, ajinata paykunata tukukuykama munakorqa.

² Jesuswan, yachachisqankunawan ima manaraj Pascua cenata mikhushajtinku, Kuraj Supayqa Simonpa churin Judas Iscarioteta yuyaychasqaña Jesusta jap'ichinanpaj.

³ Jesustaj Tata Diosmanta jamusqanta, chantá Diosmantaj kutipunanta yacharqamin. Jinallataj Diosqa tukuy atiyta payman qosqanta yachallarqataj.

⁴ Jinaqa cenata mikhushajtinku, Jesús sayarikuspa, patanchana p'achanta orqhokorqa, jinaspataj, uj toallata chumpinman churakorqa.

⁵ Chantá uj ch'illamiman yakuta jich'arqospa, yachachisqankunaj chakinta mayllayta qallarerqa. Chumpinpi karqa, chay toallawantaj ch'akicherqa.

⁶ Simón Pedroj chakinta mayllananpaj Jesús qayllaykojtin, Pedro nerqa: Tukuyta Kamachej, imaynatataj qan chakiyta mayllawankimanri? nispa.

⁷ Jesustaj kuticherqa: Kunan imatachus ruwasqayta mana entiendenkichu. Chaywanpis qhepamanraj ima niytachus munasqanta yachanki, nispa.

⁸ Pedrotajrí nerqa: Mana jayk'ajpis chakiyta mayllawankichu, nispa. Jesustaj kuticherqa: Manachus mayllasqayki chayqa, mana noqata qhatiwayta atiwajchu, nispa.

⁹ Jinapi Simón Pedro nerqa: Tukuyta Kamachej, jina kajtenqa, ama chakillaytachu mayllaway, manachayqa chakiyta, makiyta, chantá umaytawan ima, nispa.

¹⁰ Jesustajrí payta nerqa: Pichus tukuy ukhunta mayllakunña, chayqa llimphuña, chakillanta mayllana tiyan. Qankunataj llimphuña kankichej, manapis tukuyniykichejchu, nispa.

¹¹ Jesús yacharqaña pichus payta jap'ichinanta. Chayrayku nerqa: Manapis tukuyniykichejchu llimphu kankichej, nispa.

¹² Chantá yachachisqankunaj chakinkuta mayllayta tukuytawan, Jesusqa patanchana p'achanta churakaporqa. Chaymanta ujtawan tiyarikuspataj, nerqa: Chakiykichejta mayllaspa imatachus ruwasqayta yachankichejchu?

¹³ Qankuna niwankichej: Yachachejniyku, Tukuyta Kamachej, nispa. Chayta niwaspataj, walejta niwankichej, imaraykuchus chaypuni noqa kani.

¹⁴ Noqachus yachachejniykichej, Tukuyta Kamachejtaj kashaspa, chakiykichejta mayllarqaykichej chayqa, ajinallatataj qankunapis chakiykichejta mayllanakunaykichej tiyan.

¹⁵ Chayta noqa ruwarqani, qankunapis noqa jina ruwanaykichejpaj.

¹⁶ Kayta sut'ita niykichej: Wata runaqa patronninmanta mana aswanchu, nitaj kachasqapis kachajninmanta aswan kurajchu.

¹⁷ Sichus chayta entiendespa ruwankichej chayqa, kusisqamin kankichej.

¹⁸ Mana tukuyniykichejmantachu chayta nishani. Noqa yachani pikunatachus ajllakusqayta. Chaywanpis Diospa Qhelqachisqanpi imatachus nisqan junt'akunan tiyan: Pichus noqawan khuska mikhojqa wasanchawan, nispa.

¹⁹ Kunanmantapacha chayta willaykichej, junt'akojtin noqa Cristo kasqayta jap'ikunaykichejpaj.

²⁰ Sut'ita niykichej: Kachasqayta wajyarikojqa noqata wajyarikuwan, noqata wajyarikuwajtaj Kachamuwajniytapis wajyarikullantaj, nispa.

Jesusqa Judas jap'ichinanta nin

²¹ Chayta niytawan, Jesús sonqonpi sinch'ita llakikorqa, sut'inchaspataj, nerqa: Kayta sut'ita niykichej: Qankunamanta ujniykichej jap'ichiwanqa, nispa.

²² Chayta Jesús nejtin, yachachisqankuna paykunapura qhawanakorqanku, mana yachaspa pimantachus parlashasqanta.

²³ Chaypacha Jesuspa yachachisqankunamanta ujnin, pitachus Jesús astawan munakorqa, chay qayllanpi kasharqa.

²⁴ Simón Pedrotaj señawan payta nerqa: Tapuriy pimantachus chayta parlashasqanta, nispa.

²⁵ Paytaj Jesusman astawan qayllaykuspa, taporqa: Tukuyta Kamachej, pitaj chayri? nispa.

²⁶ Jesustaj kuticherqa: Pimanchus t'antata chhapuspa jaywasaj, chay kashan, nispa. Chantá Jesusqa t'antata chhapuspa, Simonpa churin Judas Iscarioteman jaywarqa.

²⁷ Maypachachus Judas t'antata mikhorqa, chaypacha Kuraj Supay paypa sonqonman yaykorqa. Jinapi Jesús Judasta nerqa: Imatachus ruwanayashanki, chaytaqa usqhayta ruwamuy, nispa.

²⁸ Mikhusharqanku, chaykunarí mana entienderqankuchu, imaraykuchus Jesús chay jinata nisqanta.

²⁹ Judas Iscariote jap'erqa Jesuspa yachachisqankunaj qolqe jallch'anan wayaqata. Chayrayku wakin yuyarqanku Jesús payman nisqanta: Rantimuy, raymita ruwanapaj imachus mana kanchu, chayta. Chayrí wajchakunaman imallatapis qorimuy, nispa nisqanta.

³⁰ Chantá Judas t'antata mikhuyta tukuytawan, usqhayllata llojserqa. Chaypacha ña allin tutaña karqa.

Mosoj kamachisqa

³¹ Judas llojsejtin, Jesús nerqa: Kunanmin Runaj Churin jatunchasqa kanqa, jinallataj noqanejta Dios jatunchasqa kasqanta rikullanqankutaj.

³² Sichus Runaj Churin Dios jatunchasqa kasqanta rejsichenqa chayqa, Diospis Churinta jatunchasqa kasqanta rejsichillanqataj. Chaytataj manaraj imapi ruwanqa.

³³ Munasqa wawitaykuna, qankunawan manaña unaytachu kasaj. Imaynatachus judiokunaj kurajninkukunata nerqani, ajinallatataj qankunatapis niykichej: Qankuna mask'awankichej, chaywanpis maymanchus noqa rishani, chayman riyta mana atinkichejchu, nispa.

³⁴ Kunantajrí kay mosoj kamachisqata yachachiykichej: Qankunapura munakuychej. Imaynatachus noqa munakorqaykichej, ajinallatataj qankunapis purajmanta munakuychej.

³⁵ Qankunachus purajmanta munakunkichej chayqa, tukuy runakuna yachanqanku noqaj yachachisqay kasqaykichejta, nispa.

Jesús nin Pedro qhesachananta

³⁶ Chantá Simón Pedro Jesusta taporqa: Tukuyta Kamachej, maymantaj rishankiri? nispa. Jesustaj kuticherqa: Maymanchus rishani, chaymanqa kunan mana noqawan riyta atinkichu. Chaywanpis qhepamanraj qhatiwanki, nispa.

³⁷ Pedrotajrí nerqa: Tukuyta Kamachej, imaraykutaj kunan mana qanwan riyta atiymanchuri? Qanrayku wañunay kajtenqa, wañusaj, nispa.

³⁸ Chantá Jesús payta nerqa: Noqarayku wañuwajchu? Kayta sut'ita niyki: Manaraj gallo waqashajtin, qan kinsa kutikama ninki noqata mana rejsiwasqaykita, nispa.