San Juan 11 - DIOSPA QHELQACHISQAN DEUTEROCANONICAL

Lázaro wañupun

¹ Uj runa, Lázaro sutiyoj onqosqa kasharqa. Paywan, panankuna Mariawan, Martawan ima Betaniamanta karqanku.

² Aswan qhepanejman Lázaroj panan Mariaqa Tukuyta Kamachej Jesuspa chakinta sumajta q'apashaj jawinawan jawisqa, chantá chujchanwan ch'akichisqa. Chay Lazaromin onqosqa karqa.

³ Jinapitaj Lázaroj panankunaqa Jesusman willacherqanku: Wiraqochi Jesús, munasqa kawsaqeyki onqosqa kashan, nispa.

⁴ Chantá Jesús chayta uyarispa, yachachisqankunata nerqa: Chay onqoyqa mana wañunanpajchu, manachayqa Dios jatunchasqa kananpaj. Chay onqoynejta noqa Diospa Churinpis jatunchasqallataj kasaj, nispa.

⁵ Jesusqa Martata, ñañanta, chantá Lazarotapis mayta munakorqa.

⁶ Jinapis Lázaro onqosqa kasqanta yachaspa, Jesús maypichus kasharqa, chaypi iskay p'unchaytawanraj qheparikorqa.

⁷ Chaymantataj yachachisqankunata nerqa: Jaku, Judeaman uj kutitawan rinachej, nispa.

⁸ Yachachisqankunarí nerqanku: Yachachej Wiraqochi, qanimpalla chaypi tiyakojkuna rumiwan ch'anqaykusuyta munarqanku. Ujtawanchu jaqayman riyta munashallankitaj? nispa.

⁹ Jesustaj paykunata nerqa: Manachu uj p'unchayqa chunka iskayniyoj phaniyoj? P'unchaypi purejqa mana misk'anchu, imaraykuchus kay pachaj k'anchayninta rikun.

¹⁰ Tutan purejrí misk'an, k'anchay mana kasqanrayku, nispa.

¹¹ Chayta niytawantaj, Jesús yachachisqankunaman nillarqataj: Lázaro kawsaqenchejqa puñushan, noqataj payta rijch'arichimoj risaj, nispa.

¹² Chantá Jesuspa yachachisqankuna nerqanku: Wiraqochi, puñushallanchus chayqa, walejyaponqachá, nispa.

¹³ Jesús chayta nisqa Lázaro wañusqanmanta, yachachisqankunatajrí Lázaro puñushasqanmanta parlashasqanta yuyarqanku.

¹⁴ Chaymanta Jesús sut'incharqa: Lazaroqa wañupun.

¹⁵ Noqarí chaypi mana kasqaymanta kusikuni, imaraykuchus chayqa allinniykichejpaj kanqa, qankuna astawan noqapi atinikunaykichejpaj. Jaku, payta watukamoj rina, nispa.

¹⁶ Jinapi Tomás, pichus Dídimo sutiwan rejsisqallataj karqa chay, yachakoj masinkunata nerqa: Noqanchejpis rinallataj, Jesuswan khuska wañunanchejpaj, nispa.

Jesús wañusqakunaman mosoj kawsayta qon

¹⁷ Jesús Betaniaman chayajtin, Lázaro tawa p'unchaytaña p'ampasqa kasqanta willarqanku.

¹⁸ Betania llajtaqa Jerusalenmanta kinsa kilometropi jinalla karqa.

¹⁹ Chayrayku ashkha runakuna Martata, Mariatawan ima watukoj jamusqanku, turanku wañupusqanmanta paykunata sonqochayta munaspa.

²⁰ Jinapi Martaqa Jesús chayamushasqantaña yachaytawan, payta taripaj llojserqa. Mariatajrí wasillapi qhepakorqa.

²¹ Jesusta taripaspa, Marta nerqa: Tukuyta Kamachej Jesús, kaypichus kawaj karqa chayqa, turay mana wañupunmanchu karqa.

²² Chaywanpis noqa yachani, imatachus Diosmanta mañakunki, chayta pay qosunanta, nispa.

²³ Chantá Jesús payman kuticherqa: Turayki kawsarimonqa, nispa.

²⁴ Martataj nerqa: Arí, kay pachaj tukukunan p'unchaypi kawsarimunanta yachani, mayk'ajchus wañusqakuna watejmanta kawsarimonqanku, chaypacha, nispa.

²⁵ Jesustajrí payta nerqa: Noqamin wañusqakunata kawsarichej kani, kawsayta qojtaj. Pichus noqapi atinikojqa, wañuchunpis kawsanqa.

²⁶ Pillapis kawsashaspa noqapi atinikojtaj mana jayk'aj wañonqachu. Chay nisqayta jap'ikunkichu? nispa.

²⁷ Chantá Marta nerqa: Arí, Tukuyta Kamachej Jesús, noqa tukuy sonqo yachani qanqa Diospa Churin kasqaykita, pitachus Dios kay pachaman kachamunan karqa, chay Cristo, nispa.

Jesús Lázaroj wañusqanmanta waqan

²⁸ Chayta niytawan, Martaqa María ñañanta wajyaj rerqa. Chantá sapallanta Mariata nerqa: Yachachej kaypiña kashan, wajyashasunki, nispa.

²⁹ Mariataj chayta uyariytawankama, usqhayta sayarispa, Jesusta taripaj rerqa.

³⁰ Jesús manaraj llajtaman yaykusqachu, manachayqa maypichus Marta taripasqa, chayllapiraj kasharqa.

³¹ Jinapi pikunachus wasipi Mariata sonqochaspa kasharqanku, chay judiokuna payta usqhayllata llojsishajta rikuspa, nerqanku: Panteonman waqaj rishan, nispa. Qhepantataj rerqanku.

³² Chantá Mariaqa, maypichus Jesús kasharqa, chayman chayarqa. Payta rikuytawantaj, ñawpaqenman qonqoriykukuspa, nerqa: Tukuyta Kamachej Jesús, qanchus kaypi kawaj karqa chayqa, turay mana wañunmanchu karqa, nispa.

³³ Chaypacha Jesús Mariata, jinataj paywan jamoj runakunatapis waqajta rikuspa, sonqon nanarqa, llakikorqataj.

³⁴ Jinaspataj, paykunata taporqa: Maypitaj Lazarota p'amparqankichej? nispa. Paykunataj nerqanku: Wiraqochi, jamuy ari, rikunki, nispa.

³⁵ Jinapi Jesús waqarikorqa.

³⁶ Chayta rikuspataj, chay runakuna nerqanku: Qhawariychej má, Lazarota anchatapuni munakusqa, nispa.

³⁷ Wakinkunatajrí nisharqanku: Kay runaqa ñawsaj ñawinta qhawaricherqa. Chaychu Lázaro ama wañunanpaj mana imatapis ruwayta atinman karqa? nispa.

Jesús Lazarota wañusqamanta kawsarichin

³⁸ Jesús sonqon nanasqallaraj kashaspa, maypichus Lázaro p'ampasqa kasharqa, chayman qayllarqa. Chay aya p'ampanaqa chhankapi ruwasqa karqa, jatun rumiwan wisq'asqataj.

³⁹ Chantá Jesús nerqa: Chay rumita ithirichiychej, nispa. Martataj nerqa: Tukuyta Kamachej Jesús, ayaqa tawa p'unchayña p'ampasqa, asnashanñachá, nispa.

⁴⁰ Jesustajrí payta nerqa: Manachu nerqayki, sichus noqapi atinikunki chayqa, Diospa atiynin imaynapunichus kasqanta rikunaykita? nispa.

⁴¹ Chantá rumita tanqarqanku. Jesustaj patata qhawaspa, nerqa: Tatáy, uyariwasqaykimanta pachis niyki.

⁴² Noqa yachani qanqa uyariwasqaykitapuni. Chaywanpis kaypi kashaj runakunaj allinninkurayku jatunmanta parlaspa kayta nishani, qan kachamuwasqaykita jap'ikunankupaj, nispa.

⁴³ Jinata niytawantaj, Jesús sinch'ita qhaparerqa: Lázaro, chaymanta llojsimuy, nispa.

⁴⁴ Jinallapi Lázaro aya p'ampanamanta llojsimorqa, makin, chakin mayt'usqa, uyantaj qhatasqa. Jesustaj chaypi kajkunata nerqa: Payta phaskaraychej purinanpaj, nispa.

Jesusta wañuchinankupaj fariseokuna yachachinakunku

⁴⁵ Chaypacha Mariata watukoj runakunamanta Jesuspi ashkha atinikorqanku, imaynatachus Lazarota wañusqamanta kawsarichisqanta rikuspa.

⁴⁶ Wakin runakunarí fariseokunaman rispa, Jesuspa ruwasqanmanta willamorqanku.

⁴⁷ Chantá kuraj sacerdotekuna, fariseokuna ima Jatun Juntapi tantakuspa, nerqanku: Imatataj kay runawan ruwasunri? Payqa runaj mana jayk'aj rikusqan ashkha t'ukuna imakunata ruwashan.

⁴⁸ Jinata ruwajtachus saqellasun chayqa, tumpamantawan tukuy runakuna payman kutirikonqanku. Romamanta soldadokunataj jamuspa, kay Templonchejta, chantá suyunchejta ima chinkachenqanku, nispa.

⁴⁹ Jinapi paykunamanta ujnin Caifás sutiyoj, pichus chay watapi kuraj kaj sacerdote karqa, chay nerqa: Qankuna mana imatapis yachankichejchu.

⁵⁰ Manallataj imatapis allinta reparankichejchu. Noqanchejpajqa allin kanman uj runalla tukuyninchejrayku wañunan, tukuy suyunchej chinkachisqa kananmanta nisqaqa, nispa.

⁵¹ Caifás mana payllamantachu chayta nerqa. Manachayqa chay watapi kuraj kaj sacerdote kasqanrayku, Dios paynejta sut'incharqa Jesús tukuy judiokunarayku wañunanta.

⁵² Jesusrí mana judiokunallatachu qhespichinanrayku wañunan karqa, manachayqa Diospa wawankuna tukuynejpi ch'eqerasqa kajkunata tantananpaj.

⁵³ Ajinaqa chay p'unchaymantapacha judiokunaj kurajninkukuna Jesusta wañuchinankupaj parlanakorqanku.

⁵⁴ Chayrayku Jesusqa judiokuna ukhupi manaña sut'itachu purerqa. Aswanpis Judea jap'iymanta llojsispa, ch'innej qayllapi Efraín llajtaman riporqa, chaypitaj yachachisqankunawan qhepakorqa.

⁵⁵ Chaypacha judiokunaj Pascua rayminkuman qayllallaña kasharqa. Chayrayku ashkha runakuna tukuynejmanta Jerusalenman chayamorqanku Diospa ñawpaqenpi llimphuchakunankupaj, manaraj Pascua raymi kashajtin.

⁵⁶ Chantá Jesusta mask'arqanku, Templo chaynejpi kashaspataj, paykunapura ninakorqanku: Ima ninkichejtaj qankuna? Jesús Pascua raymiman jamunmanchu, manachu? nispa.

⁵⁷ Chaywanpis kuraj sacerdotekuna, chantá fariseokuna ima kamacherqanku, pillapis Jesús maypichus kashasqanta yachanman chayqa, paykunaman willanankuta, payta jap'ispa wisq'aykunankupaj.