San Juan 10 - DIOSPA QHELQACHISQAN DEUTEROCANONICAL

Sumaj michejmanta rijch'anachina

¹ Jesús nillarqataj: Kayta sut'ita niykichej: Pichus oveja kanchaman mana punkunta yaykuspa, perqanta wasaykoj, chay runaqa suwa.

² Pichus oveja kanchaman punkunta yaykojrí, chaymá michejqa.

³ Oveja kanchata qhawajqa chay michej yaykunanpaj punkuta kicharin. Ovejakunataj michejpa kunkanta rejsinku, paytaj sapa ujta sutinkumanta wajyaspa, kanchamanta orqhon.

⁴ Chaymantataj michejqa tukuy ovejankunata orqhospa, paykunaj ñawpaqenta rin, ovejankunataj kunkanta rejsispa, qhepanta rinku.

⁵ Mana rejsisqatarí mana qhatinkuchu, manachayqa paymanta ayqenku, wajpa kunkanta mana rejsisqankurayku, nispa.

⁶ Chay rijch'anachinata willaspa, Jesús paykunaman yachachiyta munarqa. Paykunatajrí imatachus niyta munashasqanta mana entiendeyta aterqankuchu.

Sumaj michejqa Jesusmin

⁷ Chayrayku Jesús uj kutitawan chay runakunata nerqa: Sut'ita niykichej: Noqaqa oveja kanchaman yaykuna punku jina kani.

⁸ Pikunachus noqamanta ñawpajta jamorqanku, chaykunaqa suwa karqanku, ovejakunataj paykunata mana uyarerqankuchu.

⁹ Noqarí punku jina kani. Noqanejta yaykojqa qhespichisqa kanqa, mana pej ima nisqantaj yaykuyta, llojsiyta atenqa, chantá sumaj mikhunata tarenqa.

¹⁰ Suwaqa ovejakunata suwanallanpaj jamun, wañuchinanpaj, tukuchinanpaj ima. Noqarí ovejakuna kawsanankupaj jamuni, chay qosqay kawsaytaj may sumaj kawsay kanqa.

¹¹ Noqa sumaj michej jina kani. Sumaj michejqa ovejankunarayku wañunatapis mana manchachikunchu.

¹² Chaywanpis qolqeraykulla michejqa phiña animal jamushasqanta rikuspa, ovejakunata saqerparispa ayqerikapun, ovejakuna mana paypatachu kasqanrayku. Phiña animaltaj ovejakunata jap'iraspa, ch'eqerachin.

¹³ Chay runa ayqerikapun, imajtinchus paypajqa qolqe aswan, manataj ovejakunachu.

¹⁴ Noqarí sumaj michej jina kani. Ovejaykunata rejsini, paykunataj noqata rejsiwanku.

¹⁵ Imaynatachus Tata Diosniy rejsiwan, ajinallatataj noqapis payta rejsini. Chantá ovejaykunata qhespichinayrayku noqa wañusaj.

¹⁶ Waj ovejaykunapis tiyapullawantaj, mana kay tropamanta kajkuna. Noqataj chay ovejakunatapis pusamunallaytaj tiyan. Paykunata wajyajtiy, uyariwanqanku, chantá tukuy ovejaykuna uj tropalla kanqanku, uj k'ata michejniyojtaj.

¹⁷ Chayraykumin Tata Diosqa munakuwan, imaraykuchus ovejaykunarayku wañunaypaj noqa kikiy munaspa jaywaykukusaj. Chantá wañusqamanta watej kawsarimullasajtaj.

¹⁸ Mana pipis mana munajta wañuchiwanmanchu. Aswanpis noqa munasqayrayku wañusaj. Noqaqa wañuchisqa kanaypaj jaywaykukuyta atini, atillanitaj watejmanta kawsarimuytapis. Ajinata ruwanayta Tatay kamachiwarqa, nispa.

¹⁹ Chantá chay judiokuna Jesuspa nisqanta uyarisqankurayku ujtawan paykunapura churanakuspa t'aqanakorqanku.

²⁰ Paykunamanta wakin nerqanku: Kay runaqa supayniyoj, manataj paypichu kashan. Imapajñataj kasuta ruwankichejri? nispa.

²¹ Wakinkunarí nerqanku: Supayniyoj runaqa mana kay jinata parlanmanchu. Chantá Supayqa ñawsakunaj ñawinta kichariyta atinmanchu? nispa.

Jesús Diospa Churin kasqanta sut'inchan

²² Chaypacha chiri tiempoña karqa. Jerusalenpitaj Templo Diosman jaywasqa kasqanmanta yuyarikuna raymita ruwasharqanku.

²³ Chaypacha Jesús Temploj pationpi Salomonpa corredornin nisqapi purisharqa.

²⁴ Jinapi runakuna payta muyuykuspa, nerqanku: Mayk'ajkamataj iskayrayachiwasqaykuri? Sichus Diospa kachamusqan Cristo kanki chayqa, sut'ita willawayku ari, nispa.

²⁵ Jesustaj kuticherqa: Willarqaykichejña, qankunataj nisqayta llullapaj jap'inkichej. Tataypa sutinpi t'ukuna imakunata ruwasqaypis sut'inta yachayta qosunkichej pichus noqa kasqayta.

²⁶ Qankunatajrí nisqayta mana jap'ikuyta munankichejchu, imaraykuchus mana oveja tropaymantachu kankichej.

²⁷ Noqaqa ovejaykunata rejsini, paykunataj parlasqayta rejsinku, kasuwaspataj, qhepayta jamunku.

²⁸ Noqaqa paykunaman wiñay kawsayta qoni, manataj jayk'ajpis chinkanqankuchu. Makiymantataj paykunata mana pipis qhechuwayta atenqachu.

²⁹ Chay ovejakunata qowaj Tatayqa tukuymanta astawan atiyniyoj. Chayrayku paypa makinmanta mana pipis paykunata qhechuyta atinmanchu.

³⁰ Noqawan, Tata Dioswanqa ujlla kayku, nispa.

³¹ Chantá judiokunaj kurajninkukuna Jesusta ch'anqaykunankupaj ujtawan rumita oqharikorqanku.

³² Chayta rikusparí, Jesús paykunata nerqa: Noqaqa Tataypa qowasqan atiywan sumaj ruwaykunata ruwarqani qankuna rikunaykichejpaj. Chaykunata ruwasqaymanta mayqenmantataj rumiwan ch'anqaykuyta munashawankichejri? nispa.

³³ Judiokunataj kuticherqanku: Mana qan allin kajta ruwasqaykimantachu ch'anqaykusqayku, manachayqa Diospa contranta parlasqaykimanta. Qanqa runalla kashaspa, Dios kasqaykita ninki, nispa.

³⁴ Chantá Jesús kuticherqa: Kamachisqa qhelqaykichejpi nin: Noqa nini dioskuna kasqaykichejta, nispa.

³⁵ Diospa Qhelqachisqanqa cheqanta nin, icharí? Diosqa chay runakunata dioskuna, nispa suticharqa, pikunachus chaypacha Diospa parlasqanta uyarisqanku, chaykunata.

³⁶ Sichus Tata Dios ajllawaspa noqata kay pachaman kachamuwarqa chayqa, imaraykutaj qankuna ninkichej, noqa Diospa Churin kani, nispa, Diospa contranta rimasqaytari?

³⁷ Sichus Tataypa ruwasqanta noqa mana ruwashanichu chayqa, ama noqapi atinikuychejchu.

³⁸ Sichus Tataypa ruwananta ruwani chayrí, amapis noqapi atinikuychejchu. Aswanpis t'ukuna ruwasqallayta cheqapuni kasqanta creeychej. Ajinamanta sut'ita yachankichej Tata Dioswan, chantá noqawan ima ujlla kasqaykuta, nispa.

³⁹ Jesús chayta nisqanrayku, chay runakuna ujtawan Jesusta jap'iytapuni munarqanku. Paytajrí qayllankumanta chinkarerqa.

⁴⁰ Chaymantataj Jesús uj kutitawan Jordán mayu chimpaman rerqa, maypichus ñawpajta Juan bautizasqa, chaynejman. Chaypitaj qhepakorqa.

⁴¹ Chantá ashkha runakuna payman rispa, ujkuna ujkuna ninakorqanku: Cheqapuni Bautizaj Juanqa mana runaj mana jayk'aj rikusqan ima t'ukunatapis ruwarqachu. Chaywanpis Jesusmanta tukuy nisqanqa cheqapuni kasqa, nispa.

⁴² Chaypitaj ashkha runakuna Jesuspi atinikorqanku.