Joel 3 - DIOSPA QHELQACHISQAN DEUTEROCANONICAL

¹ 1 (4.1) Tata Dios nillantaj: Chay p'unchaykuna chayamonqa chaypacha, noqa pikunachus Judamanta, Jerusalenmanta ima waj suyukunaman apasqa karqanku, chaykunata kutichikampusaj.

² 2 (4.2) Chaypachallataj tukuy suyukunamanta kajkunata Josafatpa vallenman tantaykusaj. Chaypitaj paykunamanta cuentata mañasaj Israel aylluywan imatachus ruwasqankumanta, imaraykuchus paykuna israelitakunata tukuynejman ch'eqeracherqanku, jinaspataj, jallp'ayta rak'inakorqanku.

³ 3 (4.3) Suerteta choqaspa, aylluyta rak'inakorqanku wata runanku kanankupaj. Phisu warmiwan puñuykunankupaj qhari wawakunata rukarqanku, vinowan machanankupajtaj warmi wawakunata venderqanku.

Tata Dios suyukunata juchachan

⁴ 4 (4.4) Qankunarí Tiropi, Sidonpi tiyakojkuna, jinataj Filisteapi tiyakojkuna ima, noqamanta imatataj munankichejri? Vengakuytachu munankichej? Chayrí pagachikuwaytachu munashankichej? Tumpamantawan noqaqa aylluyta ruwasqaykichejman jina ñak'arichisqaykichej.

⁵ 5 (4.5) Qankunaqa qolqeyta, qoriytapis suwawarqankichej, temploykichejmantaj tukuy imayta apakaporqankichej.

⁶ 6 (4.6) Judapi tiyakojkunata karuman aparqankichej, jinallataj Jerusalenpi tiyakojkunatapis Grecia suyuman wata runata jina venderqankichej.

⁷ 7 (4.7) Chaywanpis noqaqa paykunata maymanchus venderqankichej, chaymanta pusakampusaj. Chantá qankunatañataj kikillantataj ñak'arichisqaykichej.

⁸ 8 (4.8) Churiykichejkunata, ususiykichejkunata ima Judapi tiyakojkunaman vendesaj, paykuna Sabá llajtayojkunamanñataj vendenankupaj, chay karu llajtayojkunaman. Noqa Tata Diosmin chayta nini.

⁹ 9 (4.9) Kayta suyukunaman willaychej: Maqanakupaj wakichikuychej. Kallpasapakunata wajyaychej. Maqanakoj jamuchunku, tukuy soldadokuna maqanakoj phinkiykuchunku.

¹⁰ 10 (4.10) Rejankumanta espadata ruwakuchunku, trigo ruthuna hozenkumantataj lanzakunata wakichichunku. Pisi kallpayojkunataj nichunku: Kallpasapa kani, nispa.

¹¹ 11 (4.11) Qayllapi kaj suyukuna, kay vallepi usqhayllata tantakuspa, jamuychej. Kunantaj, Tata Diosníy, kallpasapa soldadoykikunata kachamuy.

¹² 12 (4.12) Suyukuna maqanakupaj wakichikuchunku, Josafat nisqa vallemantaj richunku. Chaypimin Tata Diosqa Israelpa qayllanpi kaj suyukunata juchachanqa.

¹³ 13 (4.13) Millayta ruwasqankurayku poqosqa trigota jina paykunata ruthuychej. Chajra oqharina tiempo chayamunña. Uvata jina paykunata saruychej, vinota ruwanapaj wakisqañamin kashan.

¹⁴ 14 (4.14) Justicia Ruwana vallepi manchay ashkha runakuna kashanku. Tata Diospa p'unchaynin chayamushanña.

¹⁵ 15 (4.15) Intipis, killapis laqhayaykonqanku. Ch'askakunaj lliphipiyninpis ayphuyaykonqa.

¹⁶ 16 (4.16) Tata Diosqa Sión orqomanta, Jerusalenmantapacha qhaparispa, parlasqanta uyarichin. Chaypacha janajpis, kay pachapis kharkatitenqanku. Chaywanpis Tata Diosqa israelitakunapaj waqaychajnin, jark'akojnintaj kanqa, paykuna ayllun kasqankurayku.

Qhepanejman Judá suyupaj sumaj kawsay kanqa

¹⁷ 17 (4.17) Chaypacha qankuna yachankichej, noqa Tata Diosniykichej t'aqakusqay Sión orqopi tiyakusqayta. Jerusalenqa noqapaj t'aqakusqay llajta kanqa, manañataj jayk'ajpis waj llajtayojkuna jap'enqankuchu.

¹⁸ 18 (4.18) Chay p'unchayqa orqokunapi, lomakunapi ima vinowan, lechewan yaku jina purenqanku. Judá suyupitaj juch'uy mayukunapis ashkha yakuyoj kanqanku. Noqaj Temploypi yaku juturi rikhurenqa, chaytaj Sitín valleta qarpanqa.

¹⁹ 19 (4.19) Egipto suyurí laqayallaña kanqa, Edom suyutaj ch'inman tukuchisqa kanqa, imaraykuchus paykunaqa Judapi tiyakojkunawan maqanakoj yaykorqanku, jallp'ankupitaj mana juchayojta wañucherqanku.

^20-21 (4.20-21) Jinata aylluymanta kajkunata wañuchisqankurayku, noqa paykunamanta vengakusaj. Juchayojta mana qhespichisajchu. Jinapis Judapi, Jerusalenpipis, wiñaypaj runa tiyakullanqankupuni. Noqa Tata Diosniykichejpis Sión orqopi tiyakusaj.