Joel 1 - DIOSPA QHELQACHISQAN DEUTEROCANONICAL

Phinki phinkikuna chajrata tukuykun

¹ Tata Diosqa Petuelpa churin Joelman kayta parlarqa:

² Israelita kurajkuna, jinallataj kay suyupi tukuy tiyakojkuna, kayta allinta uyariychej: Qankuna jayk'ajpis kayman rijch'akojta rikorqankichejchu? Tataykichejkuna tiemponkupi kayman rijch'akojta jayk'ajpis rikorqankuchu?

³ Kayta wawaykichejkunaman willaychej, wawaykichejtaj wawankuman willachunku, wawankukunataj qhepata jamojkunaman willallachunkutaj.

⁴ Phinki phinki khurukunaqa tukuy chajrakunata tukuykorqanku. Puchojtarí, uña phinki phinkikuñataj mikhuykorqanku, chaymanta puchojtataj jatun phinki phinkiñataj mikhukapullarqataj.

⁵ Machasqakuna, rijch'ariychej. Vinota ujyajkuna, waqayta qallariychej, imaraykuchus upi vinoykichejtapis simiykichejmanta qhechusonqachej.

⁶ Ashkha phinki phinkikuna may atiyniyoj soldadokuna jina, suyuyman junt'aykamunku. Paykunaj kirunkoqa leonpa kirun jina, k'amankutaj china leonpata jinallataj.

⁷ Uva sach'aykunata q'araykunku, higo sach'aykunatapis q'ara k'aspillata saqerparinku. Tukuyninta q'araykunku, tukuy yurantataj yurajllata saqerparinku.

⁸ Ayllúy, mayta waqaychej, imaynatachus casarakoj sipas munasqan wañupojtin, lutokuspa sonqo nanayta waqan, ajinata.

⁹ Chay kikinta sacerdotekunapis waqaykunku, imaraykuchus Templopi ch'aki mikhuy jaywana manaña kanchu, nitaj vinopis kanchu Tata Diosman jaywanapaj.

¹⁰ Chajraqa q'arapachalla, jallp'ataj sonqo nanaylla. Trigoqa mana poqonchu, uva sach'apis ch'akirapun, olivo sach'apis qawirapushan.

¹¹ Chajrata poqochejkuna, uvata poqochejkuna ima, llakisqa waqaychej, imaraykuchus chajra mana kanchu. Manataj kanchu trigo ruthuna, nitaj cebada oqharinapis.

¹² Uva sach'akuna qawirasqa kashanku, higo sach'akunataj manaña kanchu. Jinallataj tukuy granada sach'a, palma sach'a, manzana sach'a ima ch'akirapunku. Montepi tukuy sach'akunapis ch'akirapullankutaj. Chayrayku tukuy runaj kusikuyninkupis chinkapullantaj.

¹³ Altarpi ruwanayoj sacerdotekuna, qhashqa p'achata churakuspa, sonqo nanayta waqaychej, imaraykuchus Templopi Tata Diosman jaywanapaj manaña kanchu ch'aki mikhuy, nitaj vinopis.

¹⁴ Tukuy runata tantaspa, ayunanankuta niychej. Tata Diosniykichejpa Templonpi tantaychej kurajkunata, kay suyupi tiyakojkunatawan, chaypitaj Tata Diosmanta mañakuychej.

¹⁵ Ay, Tata Diospa p'unchaynin chayamushanña. Llakiy p'unchayqa qayllapiña. Tukuy Atiyniyoj Diospa thuñinan p'unchay chayamushanña.

¹⁶ Qhawashajtillanchej, mikhunanchejta qhechurawarqanchej. Diosninchejpa Templonpi kusikuy manaña kanchu.

¹⁷ Tarpusqa mujoqa pachanpi ismun, trigopis ch'akirapun, pirwakunapis thuñisqa kashan.

¹⁸ Uywapis khuyayta waqarashan. Wakakunapis qhasillata pastota mask'ashanku, ovejakunataj tropantin yarqhaymanta wañurapushanku.

¹⁹ Tata Dios, qanman qhaparikamuyki, imaraykuchus ninaqa monteta, tukuy qhoratapis ruphaykun.

²⁰ K'ita animalkunapis qanman qhaparikamusunku, imaraykuchus juch'uy mayupi yakupis ch'akipun. Pastotapis nina ruphaykapun.