Job 42 - DIOSPA QHELQACHISQAN DEUTEROCANONICAL

Jobqa Dios yachayniyoj kasqanta rimarin

¹ Chantá Job Tata Diosman kuticherqa:

² Noqa yachani qan tukuy imata ruwayta atisqaykita. Qanpajqa mana imapis mana ruwayta atinapaj jina kanchu.

³ Pitaj noqa kasqani atiyniykimanta iskayrayanaypajri? Pitaj noqa kasqani iskayrayaspa mana yachayniyoj kasqayta rejsichikunaypajri? Noqaqa mana yachasqay imakunamanta parlasharqani, mana unanchay atina t'ukuna imakunamanta.

⁴ Qan niwarqanki: Uyariway, qanwan parlayta munani, kayta tapususqayman kutichiwaytaj, nispa.

⁵ Kunankama uyarispallaraj qanta rejserqayki, kunantajrí ñawiywan rikuyki.

⁶ Chayrayku imatachus nisqaymanta p'enqakuni, qanmantaj jallp'a patapi, ushpha patapi ima tiyaspa k'umuykamuyki, nispa.

Diosqa Jobman tukuy kapuyninta kutichipun

⁷ Chantá Tata Dios chaykunata Jobman parlaytawan, Elifazmanñataj nerqa: Noqa qanpaj phiñasqa kashani, jinallataj chay iskay kawsaqeykikunapajpis, imaraykuchus qankunaqa noqamanta mana cheqantachu parlarqankichej, imaynatachus kamachiy Job parlarqa, jinata.

⁸ Kunanqa qanchis torillota, qanchis carnerotawan qhatiriykukuspa, kamachiy Jobman riychej. Chantá chay uywakunata q'olachispa, juchaykichej pampachasqa kananpaj noqaman jaywawaychej. Kamachiy Jobtaj qankunarayku noqamanta mañapusonqachej, noqataj uyarisaj. Jinamanta mana allinta noqamanta parlasqaykichejta pampachasaj. Qankunaqa mana kamachiy Job jinachu noqamanta cheqanta parlarqankichej, nispa.

⁹ Chantá Temán llajtayoj Elifazwan, Suá llajtayoj Bildadwan, Sofarwan ima Tata Diospa nisqanman jina ruwarqanku, Tata Diostaj Jobpa mañakusqanta uyarerqa.

¹⁰ Job kawsaqenkunarayku mañapusqanmanta qhepata, Tata Diosqa ñawpajta kapusqanmanta iskay jinatawan payman kutichiporqa.

¹¹ Chaymantataj tukuy wawqenkuna, panankuna, kawsaqenkuna, jinataj ñawpa rejsisqankunapis Jobta watukoj jamorqanku. Chantá wasinpi jatun mikhuyta mikhuspa, paywan kusikorqanku. Jinallataj paykunaqa Jobta sonqocharqanku tukuy ima ñak'ariyta Tata Dios apachimusqanmanta. Chantataj sapa ujninku qolqeta, chantá qorimanta anillota ima qorqanku.

¹² Chantá Tata Diosqa Jobta ñawpajmanta nisqa astawanraj samincharqa. Qhepanejman Jobpata, 14.000 ovejakuna, 6.000 camellokuna, 1.000 yuntakuna, 1.000 china burrokuna ima tiyaporqa.

¹³ Chaymantaqa qanchis churinkuna, kinsa ususinkuna ima tiyapullarqataj.

¹⁴ Kuraj kaj ususinpa sutin karqa Yemimá, chawpi kajpata Quesiyá, kinsa kajpatataj Queren Hapuc.

¹⁵ Tukuy kay pachapi mana pipis Jobpa ususinkuna jina k'achita karqankuchu. Jobqa ususinkunaman, churinkunaman ima, tukuy kapuyninta chayaqenkupaj qoporqa.

¹⁶ Chaymanta qhepaman Jobqa 140 watatawanraj kawsarqa. Jinamanta payqa wawankunata, allchhinkunata, allchhinkunaj wawankuta, chantá allchhinkunaj allchhintawanpis rejserqaraj.

¹⁷ Chantá Job unayta kawsaspa, allin machuña wañuporqa.