Biblia Todo Logo
Bìoball air-loidhne

- Sanasan -

Job 1 - DIOSPA QHELQACHISQAN DEUTEROCANONICAL


Jobta llakiykuna qhatirin

1 Uz sutiyoj suyupi Job tiyakorqa. Payqa cheqanta ruwaspa purej runa karqa. Jinallataj Diosta munakoj karqa, chantá yupaychaj ima. Payqa mana pitapis mana allin kajta ruwaspa waqachejchu karqa.

2 Jobpataqa qanchis churinkuna, kinsa ususinkuna ima tiyaporqa.

3 Chantá 7.000 ovejakuna, 3.000 camellokuna, 500 yuntakuna, 500 china burrokuna tiyaporqa. Jinallataj ashkha wata runan tiyapullarqataj. Inti llojsimuynej cheqapi tiyakojkunamanta nisqaqa, Job aswan qhapaj karqa.

4 Jobpa churinkunaqa sapa uj wasinkupi jatun mikhuyta wayk'uchispa, raymita ruwaj kanku. Chantá kinsantin panankutapis paykunawan khuska mikhunankupaj wajyarikuyta yachallajtaj kanku.

5 Sapa raymi tukukuytataj Jobqa wawankunata wajyaj karqa. Chantá tutamanta jatarispa, sapa uj wawanrayku uywa ñak'asqata q'olachispa Tata Diosman jaywaj karqa. Ajinata Job ruwaj, imaraykuchus sonqonpi nej: Ichapis wawaykuna raymita ruwaspa, sonqonkupi Diospa contranta juchallinkuman karqa, nispa. Job ajinata sapa kuti ruwaj.

6 Ujpacha Diospa munasqanta junt'aj angelkuna Tata Diospa ñawpaqenman jamorqanku, chaypachallataj paykunawan khuska ch'ataykoj angelpis jamullarqataj.

7 Chantá Tata Diosqa ch'ataykoj angelta taporqa: Maymantataj jamushankiri? nispa. Ch'ataykoj angeltaj kuticherqa: Tukuy kay pachata muyumusqaymanta jamushani, nispa.

8 Chantá Tata Dios payta nerqa: Rikorqankichu kamachiy Jobta? Pay jinaqa mana pipis kanchu. Payqa noqaj kamachisqayta tukuy sonqo junt'an, cheqanta purisqanraykutaj mana imamanta k'amina, nitaj pitapis mana allinta ruwanchu, nispa.

9 Ch'ataykoj angeltajrí Tata Diosman kuticherqa: Jobqa mana qhasichu qanta may jatun respetowan qhawasunki.

10 Manachu qan tukuy imamanta payta, ayllunta, jinataj tukuy iman kajtapis waqaychanki? Qan tukuy ima ruwasqanpi yanapanki. Chayrayku paypa uywan manchayta mirasqanrayku, tukuy kay cheqanejman junt'aykushan.

11 Kunanqa tukuy kapusqanta qhechurpariy, rikunkitaj imaynatachus uyarinaykita contraykipi rimasqanta, nispa.

12 Chantá Tata Dios ch'ataykoj angelta nerqa: Jina chayqa, Jobpa tiyapuyninwan munasqaykita ruwayta atinki. Chaywanpis ukhunta ama imanankichu, nispa. Chaymantataj ch'ataykoj angelqa Tata Diospa ñawpaqenmanta llojserqa.

13 Uj kuti Jobpa churinkuna, ususinkuna ima kuraj kaj wawqenkoj wasinpi mikhuspa, ujyaspa ima kasharqanku.

14 Chantá uj chaski Jobman chayamuspa nerqa: Yuntawan llank'asharqayku, china burrokunataj chay qayllapi mikhusharqanku.

15 Jinallaman Sabamanta runakuna chayaykamuspa, uywakunata apakaporqanku, michejkunatataj wañuracherqanku. Noqalla qanman willasunaypaj ayqemuni, nispa.

16 Manaraj chay runa willayta tukushajtin, uj runañataj chayaykamuspa, nillarqataj: Illapa urmamuspa, ovejakunata, michejkunata ima wañurachin, jinataj noqalla chaymanta qanman willasunaypaj ayqemuni, nispa.

17 Chay runa manaraj willayta tukushajtintaj, uj runañataj chayaykamullarqataj. Paypis willallarqataj: Caldea suyumanta kinsa t'aqa runakuna jamuspa maqaykuwarqayku, michejkunata espadawan wañuchispataj, camellokunata tukuyninta qhatikapunku. Noqalla chaymanta ayqemuni qanman willasunaypaj, nispa.

18 Chay runa manaraj willayta tukushajtin, waj runañataj chayamullarqataj. Pay nerqa: Churiykikuna, ususiykikuna ima kurajninkoj wasinpi mikhusharqanku, ujyasharqanku.

19 Chantá kaymanta jinalla ch'innejmanta sinch'i muyoj wayra rikhurimuspa, wasita wawaykikunaj patanman urmaykucherqa, tukuyninkutaj wañorqanku. Chaywanpis noqalla chaymanta ayqemuni qanman willasunaypaj, nispa.

20 Chayta uyariytawan, Jobqa manchay llakisqa sayarispa, p'achanta llik'irakorqa, chujchantapis raphakorqa. Chantá pampakama k'umuykukuspa, Diosta yupaycharqa.

21 Chantá nerqa: Noqaqa mana imayoj q'alalla mamaypa wijsanmanta llojsimorqani, q'alallataj kay pachamanta ripusaj. Tata Dios tukuy imata qowarqa, kunanqa payllataj qhechukapuwan. Tata Diospa sutin yupaychasqa kachun, nispa.

22 Tukuy ima ajina kashajtinpis, Jobqa mana juchallikorqachu, nitaj Tata Diospa contrantapis rimarqachu.

Revisión Biblia Quechua Boliviano © Sociedad Bíblica Boliviana, 2017.

Bolivian Bible Society
Lean sinn:



Sanasan