Jeremías 8 - DIOSPA QHELQACHISQAN DEUTEROCANONICAL

¹ Tata Dios nillantaj: Chay p'unchaypi Israelpa awqankuna aya p'ampanamanta tullukunata orqhonqanku: Judáj kuraj kamachejkunaj tullunkuta, kurajkunaj tullunkuta, sacerdotekunaj tullunkuta, Diosmanta sut'inchajkunaj tullunkuta, jinallataj Jerusalenpi tiyakojkunaj tullunkutawan.

² Chantá paykuna israelitakunaj tullunkukunata intej, killaj chantá ch'askakunaj ñawpaqenpi wijch'onqanku, imaraykuchus israelitakuna janajpi imakunata munakuspa, munayninkuta ruwarqanku, qhaterqanku, tapukorqanku, yupaycharqankutaj. Chay tullukunata mana pipis p'ampanqachu, manachayqa wanu jina pampapi qhallisqa wijch'urayanqa.

³ Chantá chay millay runakunata wañuchisqaymanta kawsashaj qhepakojkunata ch'eqerachisaj, paykunataj wañuytaraj astawan munanqanku chay cheqakunapi kawsanankumanta nisqaqa. Noqa Tukuy Atiyniyoj Tata Diosmin chayta nini.

Israelqa Diosta wasanchasqanmanta jasut'ichikun

⁴ Tata Dios nillawarqataj: Qan, Jeremías, aylluyman kay parlasqayta sutiypi willay: Pipis urmaytawanqa, sayarikun. Ñanta chinkachejpis ñanman kutirimunpuni.

⁵ Chantá qan Israel, imaraykutaj wasanchawarqankiri? Jerusalén, imaraykutaj noqaman mana kutirimuyta munankichuri? Imaraykutaj kasuyta mana munankichuri?

⁶ Uyarisqayman jina mana pitapis cheqanta parlajta uyarinichu. Mana pipis millayta ruwasqanmanta Diosman kutirikuspa, ninchu: Imatataj ruwakuniri? nispaqa. Sapa ujninku ñanninkuta imata jina t'ijurinku, maqanakuman phawaspa t'ijurej caballokuna jina.

⁷ Patata phawaj pariwanakuna mayk'ajchus kutimpunankuta yachanku. Urpikuna, para p'isqokuna, chakisapa yaku pilikuna ima mayk'ajchus wajnejman rinankuta yachanku. Noqaj aylluyrí, kamachisqayta mana yachankuchu.

⁸ Imaynatataj qankuna niwajchej: Yachayniyoj kayku, imaraykuchus Tata Diospa kamachisqankuna qhelqasqa tiyapuwayku, nispari? Chay kamachisqakunata yachachejkuna yapaykuspa qhelqanku, manataj maychus kajta yachachinkuchu.

⁹ Chay yachayniyojkunaqa k'umuykuchisqa, mancharichisqataj kanqanku, imaynatachus uj animal tojllapi jap'ichikun, jinata. Sichus noqaj nisqaykunata qhesachanku chayqa, ima yachaymantataj parlankuri?

¹⁰ Chayrayku warminkutapis waj qharikunaman jaywaykusaj, jallp'ankutapis wajkunaman qopusaj. Chayta ruwasaj, imaraykuchus tukuyninku, jatunmanta juch'uykama mana allinta ruwaspa qolqe jap'inallamanta wañurinku. Sacerdotekuna, jinataj Diosmanta sut'inchajkuna ima, tukuyninku q'otiyajkuna kanku.

¹¹ Aylluypa k'irisqanta tumpallata jampiykurinku. Paykuna ninku: Tukuy ima allillan kashan, nispa. Jinapis manapuni imapis allinchu.

¹² Paykunaqa millachikunapaj jina ruwasqankumanta p'enqakorqankuchu? Mana, manapuni p'enqakorqankuchu, nitaj p'enqakuy imachus kasqanta yachankuchu. Chayrayku maypachachus noqa paykunata jasut'isaj, chaypacharajmá misk'anqanku, chay ujkuna jinataj urmachisqa kanqanku. Ajinata noqa Tata Dios nini.

¹³ Tata Dios nillantaj: Aylluytaqa trigota jina ruthusaj. Mana uvapis huertapi kanqachu, nitaj higopis sach'api puchonqachu. Manachayqa ch'aki laqhellaña qhepakonqa. Imatachus paykunaman qorqani, chayta qhechukapullasajpuni, nispa.

¹⁴ Chantá aylluy nenqanku: Imapajñataj kaypi qhepakusunchejri? Jaku ripunachej sumaj perqawan jark'achasqa llajtakunaman, ujkama chaypi wañunanchejpaj, imaraykuchus Diosninchej Tata Diosqa churawanchej wañuchisqa kananchejpaj. Payqa venenoyoj yakuta ujyachiwanchej paypa contranpi juchallisqanchejrayku.

¹⁵ Allin rinawanchejta suyarqanchej, manataj ima allinpis chayamuwarqanchejchu. Qhalilla kawsakuyta suyarqanchej, manchariyllatataj rikunchej.

¹⁶ Awqakuna jamushankuña. Caballokunaj samaqesqankupis Danmantapachaña uyarikun. Caballokuna qhaparejtinku, tukuy jallp'a kharkatitin. Kay jallp'api tukuy ima kajta chinkarparichej jamushanku. Tukuy llajtata, chaypi tiyakojkunatawan ima chinkarparichenqanku, nispa.

¹⁷ Tata Dios nillantaj: Qankunaj contraykichejpi venenoyoj katarikunata khaninasuykichejpaj kachaykamusaj, chaykunatarí p'ajpakukunapis mana imanayta atenqankuchu, nispa.

Jeremías Judá ayllurayku waqarikun

¹⁸ Chantá Jeremías nerqa: Jatun llakiy ñit'iykuwan, chaypajtaj mana jampi kanchu. Sonqoypis phatashawanña.

¹⁹ Aylluypa waqasqanqa karu llajtamanta uyarikun: Tata Diosqa manañachu Sionpa kuraj kamachejnin? Manañachu kuraj kamachejnin chaypi kashanri? nispa. Tata Diostajrí kutichin: Imaraykutaj qhasi manakaj lantikunata yupaychaspa phiñachiwarqankichejri? nispa.

²⁰ Q'oñi tiempo pasanña, chajra poqoy oqharina tiempopis, noqanchejtajrí mana qhespichisqachu kanchej.

²¹ Aylluy ñak'arisqanwan noqapis ñak'arini. Llakiywan, manchariywantaj junt'a kani.

²² Manachu ima jampipis Galaad llajtapi kanmanri? Manachu jaqaypi pipis jampiykurej kanmanri? Imaraykutaj kay aylluy mana qhaliyayta atinchuri? nispa.