Jeremías 48 - DIOSPA QHELQACHISQAN DEUTEROCANONICAL

Jeremías Moabpa contranpi sut'inchan

¹ Israelpa Tukuy Atiyniyoj Tata Diosnenqa Moabpi imachus kananmanta kayta nin: Ay, Nebo llajtamanta, manaraj imapi raqayman tukuchisqa kanqa. Quiriatayin llajtata jap'ispa, k'umuykachachenqanku. Sumaj jark'achasqa llajtakunapis urmachisqa kanqanku.

² Moab suyoj runaykachaynin tukukonqa, imaraykuchus Jesbón llajtapi awqankuna umachakuspa, wakichikunku Moabta imaynamantachus chinkarparichinankupaj. Qan, Madmena, phirisqallataj kanki, maqanakupis qhepallaykitapuni jamonqa.

³ Joronayinmanta runaj qhaparisqan uyarikun: Urmachisqa, phirisqataj kashan, nispa.

⁴ Moab suyu raqayllaña, nanaywan qhaparisqankutaj Sóar llajtakama uyarikun.

⁵ Sonqo nanayta waqarikuspa, Luhit chay wichayta wicharinku, Joronayinman urayk'amuypitaj chay jina ñak'ariyta rikuspa, qhaparinku.

⁶ Ama wañunaykichejpaj ayqeychej. Ch'innejpi retama jina pakakuychej.

⁷ Moab, qanqa kallpallaykipi atinikorqanki, jinataj qhapaj kasqaykipi. Chaywanpis qanta jap'isonqanku. Quemos diosniykeqa waj suyuman apasqa kanqa sacerdotenkunawan, kurajninkunawan ima.

⁸ Thuñejkunaqa tukuy llajtaman chayanqanku, manataj ujllapis chaymanta llusp'enqachu. Chay ura pampapi jinataj pata pampapipis raqayllaña qhepakonqa, imaraykuchus ajinata Tata Dios nin.

⁹ Moabman lijrata jaywaychej, phawaspa ayqeyta atinanpaj, imaraykuchus tukuy llajtankunaqa raqayllaña qhepakonqa, manataj ujpis chaypi tiyakoj kanqañachu, nispa.

¹⁰ Maldicisqa kachun pichus mana tukuy sonqowan Tata Diospa kamachisqanta ruwajqa. Maldicisqallataj kachun pichus maqanakuman mana yaykuyta munajqa.

¹¹ Moabqa ni pejpa ima nisqan unaymantapacha tiyakorqa. Mana jayk'ajpis chay llajtayojkunata suyunkumanta apasqankuchu. Sumaj vinotaqa uj cheqallapi mana wich'imanta waj wich'iman wisispa poqochinchej, ajinamanta misk'i kaynin, q'apaynintaj ama chinkananpaj, icharí? Ajinallataj Moabqa jallp'allanpi qhepakorqa.

¹² Chaywanpis Tata Dios nin: Uj p'unchay chayamonqa, chay p'unchaypitaj runakunata kachamusaj vinota waj wich'iman jich'anankupaj. Chantá chay ch'usaj wich'ikunata phirirparenqanku.

¹³ Chaypacha Moabqa Quemos diosninmanta p'enqakonqa, imaynatachus Israelpis Betelmanta p'enqakorqa, ajinata, mayqenpichus tukuy sonqowan atinikorqa, chaymanta.

¹⁴ Mayta jatunchakuspa, Moabqa nej: May wapu kayku, maqanakupaj sumaj wapu soldadokuna, nispa.

¹⁵ Kunantajrí Moab phirisqa kanqa, llajtankunataj ch'inyachisqa. Sumaj waynakunapis wañurachisqa kanqanku. Ajinata noqa Tukuyta Kamachej, Tukuy Atiyniyoj Tata Dios nini.

¹⁶ Moab chinkachisqa kananqa qayllapiña kashan, ñak'arichisqa kanantaj chayamushanña.

¹⁷ Moabpa muyuyninpi kajkuna, paymanta waqaychej. Manchay uyarisqa kasqanta yachajkunapis niychej: Qhawaychej imaynachus kamachiynin phirisqa kasqanta. Chay kamachiynenqa may k'achitu, sumaj atiyniyojtaj karqa, nispa.

¹⁸ Qan Dibón llajta, chay k'achitu tiyanaykimanta urayk'amuspa, ch'aki pampallapi tiyaykukuy, imaraykuchus Moabta chinkachejqa qanpa contraykipipis jamushallantaj. Awqaykeqa chay jark'achasqa pukaraykikunatapis phirillanqataj.

¹⁹ Aroer llajtapi tiyakojkuna, ñan patapi sayaspa, qhawaychej, chay ayqekamojkunatataj tapuychej: Imataj tiyan? nispa.

²⁰ Moabqa may p'enqaypi rikhurin phirisqa kasqanrayku. Paymanta waqaychej, qhapariychejtaj. Arnón mayupi Moabqa phirisqa kasqanta willamuychej.

²¹ Chay jasut'eqa pata pampapi llajtakunaj contranpi chayamorqa: Holonman, Yahasman, Mefagatman,

²² Dibonman, Neboman, Bet Diblatayinman,

²³ Quiriatayinman, Bet Gamulman, Bet Megonman,

²⁴ Queriotman, Bosraman ima. Jinataj Moabpa qaylla kaj llajtankunaman, chantá karupi kaj llajtankunamanpis chayallarqataj, nispa. Ajinata Tata Dios nin.

²⁵ Tata Dios nillantaj: Moabpa kallpanqa tukuchisqa, atiyninpis chinkachisqa.

²⁶ Moabta machaykuchiychej, imaraykuchus Tata Diospa contranpi oqharikorqa. Chaypacha Moabqa lansasqanpi sunt'enqa, tukuytaj paymanta asikonqanku.

²⁷ Moab, manachu qanqa Israelmanta alqochakorqanki? Payta chejnikuspataj, suwakunawanpis khuskachakunman jina Israelmanta parlaj kanki.

²⁸ Moabpi tukuy tiyakojkuna, llajtaykichejta saqespa, chhanka jusk'uman tiyakoj ayqeychej, imaynatachus chhanka jusk'ukunapi urpikuna thapachakuspa tiyakunku, ajinata.

²⁹ Moabpa manchayta runaykachasqanta rejsiyku, wapuykachaj kasqanta, uma oqharej, mayta yuyakoj kasqantawan ima.

³⁰ Tata Diostajrí nin: Noqaqa Moabpa runaykachasqan qhasi manakajlla kasqanta yachani, jinataj mayta yuyakuspa parlasqanwan ni imata tarisqantapis.

³¹ Chayrayku Moab suyupi tukuy runarayku qhaparispa, paran paranta waqasaj, jinallataj Quir Jerespi runakunaraykupis waqallasajtaj.

³² Sibemapi uva huerta, qanmanta mayta waqasaj, Jazermanta imaynatachus waqarqani, ajinata. Thansaykikunaqa mama qochamanta aswan jaqayman, Jazer llajtakama aysakorqanku. Jinapis kunanqa awqaykeqa uva pallasqaykita, waj poqoykunatapis apakapun.

³³ Moabpa sumachaj jallp'an chawpipi manaña runakunaj kusiywan takisqanku uyarikunñachu. Vino jallch'anapi vinopis tukukapunña. Manaña pipis uvata sarojqa kanchu, nillataj kusiy takiykunapis kanchu.

³⁴ Jesbonmanta runakuna nanaywan qhaparisqankoqa uyarikun Elealekama, Yahaskama. Jinallataj Soarmanta Joronayinkama, Eglat Selisiyakamataj uyarikullantaj, imaraykuchus Nimrín cheqapi yaku juturikunapis ch'akipunku. Noqa Tata Diosmin chayta nini.

³⁵ Tata Dios nillantaj: Noqaqa Moabmanta runakunata chinkachisaj, imaraykuchus paykuna orqo patapi lantinkuman uywa ñak'asqa q'olachinata jaywanku, inciensotapis diosninkukunaman q'oshñichinku.

³⁶ Chayrayku sonqoyqa Moabrayku waqan, Quir Jerespi runakunaraykutaj. Wañuypi jina qenata tocarispa waqallanitaj, imaraykuchus tukuy tantasqa qhapaj kapuynenqa chinkapun.

³⁷ Tukuyninku umankuta ruthukunku, tukuypa sunkhankupis ruthusqallataj. Tukuyninku makinkuta khuchurakunku, qhashqa p'achawantaj p'achallikunku.

³⁸ Moabpi tukuy wasikunapi, tukuynin callekunapipis waqasqanku uyarikun, imaraykuchus noqaqa Moabta phiriykorqani, imaynatachus mana allin ruwasqa yuruta phirinku, ajinata. Noqa Tata Diosmin chayta nini.

³⁹ Moab imayna phirisqachus kasqanmanta waqaychej. Moabqa may mancharisqamin, p'enqaymanta uyantapis pakakun. Tukuy muyuyninpi kajkuna paymanta asikunku, chantá mancharikunku ima.

⁴⁰ Tata Dios nillantaj: Moabpa awqanqa anka jina paypa contranpi phawan.

⁴¹ Llajtankuna, chantá sumaj jark'achasqa llajtankunapis awqankoj makinman urmanqanku. Chay p'unchaypi Moabpa soldadonkunaqa kharkatenqanku, imaynatachus paqarichikoj warmi nanaywan kharkatin, ajinata.

⁴² Moabqa chinkachisqa kanqa manaña suyu kananpaj, imaraykuchus Tata Diospa contranpi oqharikorqa.

⁴³ Chayrayku noqa Tata Dios nini: Moab suyupi tiyakojkunaqa, imaynatachus monte animalta jap'ejkuna qhatiykachanku, ajinata qhatiykachasqa kanqanku. Paykunaqa t'oqoman chayrí tojllaman urmaykonqanku.

⁴⁴ Pichus chay jatun manchariymanta ayqejqa t'oqoman urmaykonqa. Pichus t'oqomanta llojsimojtaj tojllapiñataj jarap'asqa kanqa, imaraykuchus noqaqa Moabpa patanman chay jasut'ina p'unchayta kachaykamusaj. Noqa Tata Diosmin chayta nini.

⁴⁵ Kallpanku llawch'iyasqa ayqekojkunaqa Jesbón llajtapi pakakuyta mask'anqanku. Jinallapi Jesbonmanta kuraj kamachej Sijonpa llajtanmanta nina llojsimonqa. Chayqa Moabmanta ayqejkunata ruphaykonqa, chay ch'ajwa mask'aj runakunata.

⁴⁶ Ay, qanmanta Moab. Quemos diosta yupaychajkunaqa chinkarparichisqa kanku. Churiykikuna, ususiykikunapis waj suyuman preso apasqa kanku.

⁴⁷ Chaywanpis qhepanejman noqaqa Moabta imaynachus ñawpata karqa, ajinaman kutichisaj. Noqa Tata Diosmin chayta nini. Kaykama kashan Moab jasut'isqa kananmanta Jeremiaspa willasqanqa.