Jeremías 26 - DIOSPA QHELQACHISQAN DEUTEROCANONICAL

Jeremías wañuchisqa kananmanta llusp'in

¹ Josiaspa churin Joacín Judapi kamachiyta qallarishajtin, Tata Diosqa Jeremiasta nerqa:

² Temploypa pationpi sayaspa, imatachus ninaykita kamacherqayki, chayta niy. Judá suyupi llajtakunamanta pikunachus noqata yupaychawaj Temployman jamushanku, chay tukuy runaman nisqayta willanki, amataj uj simillatapis pakankichu.

³ Ichapis kasususpa, millay ruwasqankuta saqenkuman. Jinata ruwajtinku, noqapis manaña millay ruwasqankumanta paykunata jasut'iymanñachu, imaynatachus yuyashani, jinataqa.

⁴ Noqaj sutiypi kay jinata niy: Tata Dios nin: Qankunaqa kamachisqayta chantá nisqayta kasuspa junt'aychejpuni.

⁵ Sichus kamachiykunaj k'amisqankuta mana kasunkichejchu, pikunatachus qhepan qhepanta kachamorqaykichej, chaykunanejta chayqa,

⁶ Silo llajtapi ruwasqayta jinallatataj kay Templotapis ruwasaj. Kay llajtataj tukuypa asipayanan, alqochakunantaj kanqa, nispa.

⁷ Chantá sacerdotekuna, Diosmanta sut'inchajkuna, tukuy llajtapi kaj runakuna ima Tata Diospa Templonpi Jeremiaspa nisqanta uyarerqanku.

⁸ Tata Diospa nisqanta parlayta tukojtinkamataj, sacerdotekuna, sut'inchajkuna, tukuy llajtapi kaj runakunapis Jeremiasta jap'iytawan, nerqanku: Kunan wañunki.

⁹ Imaraykutaj Tata Diospa sutinpi parlaj churakuspa, nerqanki kay Templo Silopi yupaychana wasi jina thuñisqa kananta, kay llajtapis ch'inyachisqa kananta, mana runayojtaj qhepakunantari? nispa. Chantá tukuy runakuna Diospa Templonpa ñawpaqenpi Jeremiaspa contranta tantaykukorqanku.

¹⁰ Judá ayllumanta kurajkunaqa imachus kasqanta uyarispa, kuraj kamachejpa wasinmanta Diospa Templonman rerqanku. Chaypitaj Mosoj Punku nisqapi tiyaykorqanku.

¹¹ Chantá sacerdotekuna, sut'inchajkunapis kurajkunaman, jinataj tukuy runaman ima nerqanku: Kay runaqa wañuchisqa kanan tiyan, imaraykuchus kay llajtaj contranpi parlan. Chaytaqa qankuna kikiykichej uyarinkichej, nispa.

¹² Chantá Jeremías tukuy runaman, kurajkunaman ima kuticherqa: Tata Diosmin kachamuwan kay Temploj contranpi, kay llajtaj contranpi ima willanaypaj, imatachus uyarinkichej, chayta.

¹³ Chayrayku imaynatachus kawsashasqaykichejta, purishasqaykichejtapis allinchaychej, Diosniykichej Tata Diostapis kasuychej. Ajinatachus ruwankichej chayqa, kachaykamunanta nerqa, chay ñak'ariykunata manaña kachaykamusonqachejchu.

¹⁴ Noqawanrí imatachus munasqaykichejta ruwaychej, imaraykuchus makiykichejpiña kashani.

¹⁵ Jinapis kayta allinta yachaychej: Sichus wañuchiwankichej chayqa, qankuna, chantá kay llajtapi tiyakojkuna ima juchachasqa kankichej mana juchayojta wañuchisqaykichejrayku. Noqata Tata Diospuni kay tukuy imamanta sut'ita willanasuykichejpaj kachamuwarqa, nispa.

¹⁶ Chantá kurajkuna, tukuy runakuna ima sacerdotekunata, jinataj sut'inchajkunata ima nerqanku: Kay runata wañuchinapaj jina mana ima juchanpis kanchu. Payqa Diosninchej Tata Diospa sutinpi parlawarqanchej, nispa.

¹⁷ Chantá wakin kurajkuna sayarikuspa, chaypi tantasqa kashajkunaman nerqanku:

¹⁸ Judá suyuta kuraj kamachej Ezequías kamachishajtin, Moreset llajtayoj Miqueas Tata Diospa sutinpi tukuy Judamanta runakunaman kay jinata parlasqa: Tukuy Atiyniyoj Tata Dios nin: Sionqa llank'ana jallp'aman tukonqa, Jerusalentaj raqayman. Diospa Templon kashan, chay orqopitaj ch'umi wiñaykonqa, nispa.

¹⁹ Miqueas imatachus nisqanmanta kuraj kamachej Ezequías chantá Judamanta runakunapis payta wañuchisqankuchuri? Manachu kuraj kamachejqa Tata Diosta manchachikuspa, mañakusqa paykunamanta khuyarikunanta? Chayrayku Tata Diosqa ñak'arichinan willachisqanta mana junt'asqachu. Sichus noqanchej Jeremiasta wañuchisun chayqa, Tata Dios jasut'iwasun, nispa.

²⁰ Ajinallataj Semaiaspa churin Quiriat Yearín llajtamanta Diosmanta sut'inchaj Uriaspis Jeremías jina Tata Diospa sutinpi sut'inchallasqataj kay llajtaj contranpi chantá kay suyoj contranpi ima.

²¹ Kuraj kamachej Joacintaj, tukuy kamachinkuna, kurajninkunapis Uriaspa nisqanta uyarejtinku, kuraj kamachejqa Uriasta wañuchichiyta munasqa. Uriasrí chayta yachaspa mancharikuytawan, Egiptoman ayqerikapusqa.

²² Chantá kuraj kamachej Joacinqa Acborpa churin Elnatanta, waj runakunatawan ima Egiptoman kachasqa.

²³ Chaykunataj Uriasta Egiptopi jap'ispa, kuraj kamachej Joacinman apamusqanku. Paytaj kamachisqa Uriasta wañuchinankuta, ayantataj, maypichus wajcha runakunata p'ampaj kanku, chayman p'ampanankuta kamachillasqataj, nispa.

²⁴ Safanpa churin Ajicanpis Jeremiasman sayakorqa. Chayrayku mana Jeremiasta runakunaman jaywarqankuchu payta wañuchinankupaj.